རྒྱ་ནག་གཞུང་གིས་ལྷོ་རྒྱ་ནག་རྒྱ་མཚོའི་ཁུལ་བདག་བཟུང་བྱེད་ཀྱི་ཡོད་པར་བརྟེན་མཚོ་ཁུལ་འཛུགས་སྐྲུན་ལས་གཞིར་འབྲེལ་བ་ཡོད་པའི་རྒྱ་ནག་གི་བཟོ་གྲྭ་ཁག་དང་འབྲེལ་ཡོད་མི་སྒེར་བཅས་ལ་་ཨ་རིས་ཉེས་ཆད་གཅོད་རྒྱུ་ཡོངས་བསྒྲགས་བྱས་འདུག ནེའུ་ཡོག་དུས་བབ་ཀྱིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༢༦ ཉིན་ཨ་རིའི་གཞུང་གིས། རྩོད་གཞི་ཅན་གྱི་ལྷོ་རྒྱ་ནག་རྒྱ་མཚོའི་ཁུལ་གྱི་རྒྱ་ནག་གི་དམག་དོན་འཛུགས་སྐྲུན་ལས་གཞིའི་ནང་ཆ་ཤས་ལེན་མཁན་གྱི་རྒྱའི་བཟོ་གྲྭ་ ༢༤ ངོས་འཛིན་གྱིས། བཟོ་གྲྭ་དེ་དག་ལ་དམིགས་བསལ་བཀའ་འཁྲོལ་མེད་པར་ཨ་རིའི་ཐོན་དངོས་ཉོ་སྒྲུབ་མི་ཆོག་པའི་དཔལ་འབྱོར་ཉེས་ཆད་བཅད་འདུག་ཅིང་། གནད་དོན་དེ་དང་འབྲེལ་བའི་རྒྱ་ནག་གི་མི་སྒེར་དང་ཁོ་ཚོའི་ནང་མི་སྤུན་མཆེད་རྣམས་ལའང་ཨ་རིར་བསྐྱོད་རྒྱུའི་ཐོངས་མཆན་སྤྲོད་མཚམས་འཇོག་རྒྱུ་ཡིན་འདུག

ཨ་རིའི་རྒྱལ་སྲིད་ལྷན་ཁང་གི་གསལ་བསྒྲགས་སྐབས་རྒྱལ་སྲིད་དྲུང་ཆེ་མེག་པོམ་པེ་མཆོག་གིས། ཐོངས་མཆན་བཀག་སྡོམ་གྱི་བཀའ་རྒྱ་དེ། རྩོད་གཞི་ཅན་གྱི་ལྷོ་རྒྱུད་རྒྱ་ནག་རྒྱ་མཚོའི་ཁུལ་དུ་ས་ཆ་ཕོན་ཆེན་བདག་བཟུང་དང་། འཛུགས་སྐྲུན། དམག་དོན་ལྟེ་གནས་སུ་སྒྱུར་ཐབས་ཀྱི་ལས་གཞིའི་ནང་མཉམ་ཞུགས་དང་། རྒྱ་ནག་གིས་ཁྱིམ་མཚེས་རྒྱལ་ཁབ་དེ་ཚོར་རང་གི་མཚོ་ཁའི་ཐོན་ཁུངས་སྤྱོད་རྒྱུར་འཇིགས་སྐུལ་བཙན་ཤེད་བྱེད་པའི་བྱ་སྤྱོད་ལ་རྒྱབ་སྐྱོར་དང་ཆ་ཤས་ལེན་མཁན་གྱི་མི་སྒེར་དང་བཟོ་ཚོང་ཁང་ལ་ཁྱབ་ཀྱི་ཡོད། ཅེས་དང་། རྒྱ་ནག་གིས་ལྷོ་རྒྱ་ནག་རྒྱ་མཚོ་ཁུལ་དུ་བཙན་ཤེད་མཚམས་འཇོག་མ་བྱས་བར་དུ། ཨ་རིས་དེར་བསྟུན་ཐག་གཅོད་བྱ་རྒྱུ་ཡིན་ཞིང་། ང་ཚོས་མུ་མཐུད་མཐུན་གྲོགས་རྒྱལ་ཁབ་དང་མཉམ་རུབ་ཀྱིས་འདི་ལྟ་བུའི་བྱ་སྤྱོད་ལ་མཐའ་གཅིག་ཏུ་རྒོལ་རྒྱུ་ཡིན། ཞེས་རྒྱ་ནག་ལ་ཉེན་བརྡ་བཏང་ཡོད་འདུག དེ་བཞིན་ཨ་རིའི་ཚོང་དོན་དྲུང་ཆེ་ཝིལ་བྷར་རོ་སི་ (Wilbur Ross) ཡིས། དེ་རིང་བཀག་སྡོམ་གྱི་ཐོ་གཞུང་ནང་ཚུད་པའི་བཟོ་ཚོང་ཁང་དེ་དག་གིས། རྒྱ་ནག་ལ་མིས་བཟོས་གླིང་ཕྲན་འཛུགས་སྐྲུན་གྱིས་མཚོན་པའི་འཁྲུག་སློང་གི་ལས་གཞིའི་ནང་མཉམ་ཞུགས་མི་དམན་པ་བྱས་ཡོད་སྟབས། ཁོ་ཚོར་འགན་འཁུར་དུ་འཇུག་དགོས་པ་ཡིན། ཞེས་བརྗོད་ཡོད་འདུགད་ཐེངས་ཊོམ་ཕུ་སྲིད་གཞུང་གིས་དཔལ་འབྱོར་ཉེས་ཆད་བཅད་པའི་བཟོ་གྲྭའི་ཁྲོད། རྒྱ་ནག་གི་རྒྱུད་གཅིག་ལམ་གཅིག་གི་ལས་གཞིའི་འཛུགས་སྐྲུན་ལས་འཆར་གཙོ་བོ་གཉེར་མཁན་དང་། ལྷོ་རྒྱུད་རྒྱ་ནག་རྒྱ་མཚོའི་ཁུལ་དུ་མིས་བཟོས་གླིང་ཕྲན་འཛུགས་སྐྲུན་གྱི་ལས་འཆར་ནང་ཆ་ཤས་ཆེན་པོ་ལེན་མཁན་གྱི་གཞུང་གཉེར་རྒྱ་ནག་གི་འགྲིམ་འགྲུལ་འཛུགས་སྐྲུན་བཟོ་གྲྭ་ (China Communications Construction Company (CCCC)) ཞེས་པ་དེ་དང་དེའི་ཡན་ལག་བཟོ་གྲྭ་ཁག་ཡོད་ཅིང་། ཁ་སང་གི་ཨ་རིའི་གཞུང་འབྲེལ་གསལ་བསྒྲགས་ནང་། བཟོ་གྲྭ་དེ་དག་གིས་འཛམ་གླིང་ཁྱོན་ཡོངས་ནང་ལྐོག་ཟ་རུལ་སུངས་དང་། ཚོང་དོན་བཤུ་གཞོག ཁོར་ཡུག་གཏོར་བཅོམ་གྱིས་མཚོན་པའི་ལས་ཀ་གཉེར་ཡོད་སྟབས། རྒྱ་ནག་གཞུང་ལ་གཞུང་གཉེར་བཟོ་གྲྭ་དེ་དག་བརྒྱུད་རྒྱ་བསྐྱེད་རིང་ལུགས་ལག་བསྟར་བྱེད་དུ་འཇུག་རྒྱུ་མེད། ཅེས་ཀྱང་བརྗོད་ཡོད་འདུག

ད་ལྟའི་ཆར་རྒྱ་ནག་ཕྱི་སྲིད་ལྷན་ཁང་གིས་ཨ་རིའི་ཐག་གཅོད་དེར་ལན་འདེབས་དམིགས་བསལ་བྱས་མི་འདུག་ཀྱང་། ཨ་རིའི་ནང་ཡོད་པའི་རྒྱ་ནག་གི་གཞུང་ཚབ་ཁང་གི་མགྲིན་ཚབ་པ་ཞིག་གིས། ཨ་རིའི་དཔལ་འབྱོར་ཉེས་ཆད་དེ་ནི་རྒྱུ་མཚན་མེད་པ་ཞིག་དང་། ལྷོ་རྒྱ་ནག་རྒྱ་མཚོ་ནི་རྒྱ་ནག་གི་བྲལ་ཐབས་མེད་པའི་ཆ་ཤས་ཤིག་ཡིན་སྐོར་དང་། ཨ་རིའི་ངོས་ནས་རང་གི་ཐག་གཅོད་ནོར་བ་དེ་ཕྱིར་འཐེན་བྱས་ཏེ། རྒྱ་ནག་གི་ཁེ་དབང་ཨ་རྒྱའི་འབྲེལ་ལམ་ལ་དོ་ཕོག་གཏོང་མཚམས་འཇོག་དགོས་སྐོར་གྱི་རྒོལ་ལན་བསློགས་ཡོད་འདུག

ལྷོ་རྒྱ་ནག་རྒྱ་མཚོའི་རྩོད་གཞི་དེ་ཨ་རྒྱའི་དམག་འཁྲུག་གི་རྐྱེན་གཙོ་བོ་ཞིག་ཏུ་འགྱུར་ཉེན་ཡོད་པའི་ཚོད་དཔག་བྱེད་ཀྱི་ཡོད་ཅིང་། ཉེ་ཆར་ཕྱི་ཚེས་ ༢༥ ཉིན་རྒྱ་ནག་གིས་ཨ་རིའི་ཡུ་ཊུ་གསང་མྱུལ་གནམ་གྲུ་ (U-2 spy plane) ཞིག་ཆོག་མཆན་མེད་པར་རྒྱ་ནག་གི་དམག་མིའི་དམག་སྦྱོང་བྱེད་སའི་མཁའ་དབྱིངས་སུ་འཕུར་ཡོད་པ་དང་། ཨ་རིའི་བྱེད་སྟངས་དེས་རྒྱ་ནག་ལ་ཆེད་དུ་དམག་འཁྲུག་སློང་གི་ཡོད་སྐོར་སྐྱོན་བརྗོད་བྱས་ཡོད་ཅིང་། ཡང་ཁ་སང་རྒྱལ་སྤྱིའི་གསར་ལམ་ཁག་ཏུ། རྒྱ་ནག་གིས་ལྷོ་རྒྱ་ནག་རྒྱ་མཚོའི་ཁུལ་དུ་གནམ་གྲུ་དབོར་འདྲེན་གྲུ་གཟིངས་ (Aircraft Carrier) གཏོར་རྒོལ་བྱ་རྒྱུའི་མེ་མདེལ་གཉིས་འཕངས་ཡོད་སྐོར་གྱི་གནས་ཚུལ་ཐོན་ཡོད་པ་རེད།ནེའུ་ཡོད་དུས་བབ་ཀྱི་གནས་ཚུལ་ལྟར་ན། ཕྱི་ལོ་ ༢༠༡༣ ནས་རྒྱ་ནག་གཞུང་གིས་ཐའེ་ཝན་དང་། ཧྥི་ལི་པིན་ (Philippines)། ཝི་ཐི་ནམ་ (Vietnam)། ཨིན་ཌོ་ནེ་ཤི་ཡ་ (Indonesia)། མ་ལ་ཤི་ཡ་ (Malaysia)། བྷུ་རུ་ནེ་(Brunei) བཅས་བར་ས་ཁོངས་བདག་དབང་ཐད་རྩོད་གཞི་ཡོད་པའི་ལྷོ་རྒྱ་ནག་རྒྱ་མཚོའི་ཁུལ་དུ། རྒྱ་ཁྱོན་ལ་ཨེ་ཁར་ ༣༠༠༠ ལས་མང་བའི་གླིང་ཕྲན་གསར་སྐྲུན་དང་། དེ་བཞིན་དམག་རྫོང་སོགས་འཛུགས་སྐྲུན་བསྟུད་མར་བྱས་ཡོད་པ་མ་ཟད། དམག་སྦྱོང་གིས་མཚོན་པའི་དམག་དོན་བྱ་འགུལ་ཤུགས་ཆེ་རུ་སྤེལ་ཡོད་པ་རེད། སྤྱིར་ལྷོ་རྒྱ་ནག་རྒྱ་མཚོའི་ཁུལ་དུ་ལོ་ལྟར་ཨ་སྒོར་ཐེར་འབུམ་ ༣༣༧༠ ལྷག་གི་ཚོང་ཟོག་དབོར་འདྲེན་བྱེད་ཀྱི་ཡོད་པ་དང་། དེ་ནི་འཛམ་གླིང་ཡོངས་ཀྱི་རྒྱ་མཚོའི་ཚོང་དོན་གྱི་གསུམ་ཆ་གཅིག་ཟིན་གྱི་ཡོད་འདུག ཕྱོགས་གཞན་ནས་ལྷོ་རྒྱ་ནག་རྒྱ་མཚོ་དེ་དམག་དོན་འཐབ་བྱུས་ཀྱི་ས་ཚིགས་གནད་འགག་ཅན་ཞིག་ཆགས་ཡོད་སྟབས། ཨ་རིས་ཀྱང་རྒྱལ་སྤྱིའི་མཚོ་འགྲུལ་རང་དབང་གི་གཞི་རྩའི་འོག་དང་། ཁུལ་དེའི་མཐུན་གྲོགས་རྒྱལ་ཁབ་རྣམས་ཀྱི་ས་ཁོངས་བདག་དབང་སྲུང་སྐྱོབ་ཆེད། ལྷོ་རྒྱ་ནག་རྒྱ་མཚོ་ཁུལ་དུ་དུས་ནས་དུས་སུ་དམག་དོན་སྐོར་སྐྱོད་དང་དམག་སྦྱོང་ལས་གཞི་སྤེལ་མུས་ཡིན་པ་རེད།

ད་ཐེངས་ཀྱི་ཨ་རིའི་ཐག་གཅོད་དེ་ནི་ཉེ་ཆར་ཨ་རིའི་རྒྱལ་སྲིད་ལྷན་ཁང་གིས། རྒྱ་ནག་གིས་ལྷོ་རྒྱ་ནག་རྒྱ་མཚོ་བདག་བཟུང་བྱས་པ་དེ་ཁྲིམས་འགལ་ཞིག་ཡིན་པའི་ངོས་འཛིན་ཐོག་མར་བྱས་པའི་རྗེས་འབྲེལ་གྱི་ཐག་གཅོད་ཅིག་ཡིན་འདུག སྤྱིར་ཕྱི་ལོ་ ༢༠༡༣ ལོར་ཧྥི་ལི་པིན་གྱིས་མཉམ་འབྲེལ་རྒྱལ་ཚོགས་ཀྱི་རྒྱལ་སྤྱིའི་ཁྲིམས་ཁང་ལ་ལྷོ་རྒྱ་ནག་རྒྱ་མཚོའི་བདག་དབང་དང་འབྲེལ་ནས་རྒྱ་ནག་ཁྲིམས་གཏུག་བྱས་པ་ལྟར། ཕྱི་ལོ་ ༢༠༡༦ ལོར་ཁྲིམས་ཁང་དེས་རྒྱ་ནག་ལ་ལོ་རྒྱུས་ཐོག་ནས་ལྷོ་རྒྱ་ནག་རྒྱ་མཚོ་བདག་བཟུང་བྱ་རྒྱུའི་ཐོབ་ཐང་མེད་པའི་བཅད་ཁྲ་བཏང་ཡོད་ཀྱང་། རྒྱ་ནག་གིས་དེར་ངོས་ལེན་བྱས་མེད་པ་རེད།

གསར་འགོད་པ། པ་སངས་ཚེ་རིང་།

The post ཨ་རིས་རྒྱ་ནག་གི་བཟོ་གྲྭ་ ༢༤ ལ་ཉེས་ཆད་བཅད། appeared first on བོད་ཀྱི་དུས་བབ།.

རྒྱ་ནག་གཞུང་གིས་མཚོ་སྔོན་ཞིང་ཆེན་ཁོངས་སུ་ཕྱི་རྒྱལ་ཁག་ན་ཡོད་པའི་བོད་མི་རྣམས་ཀྱི་ཁྱིམ་ཐོ་དང་ས་ཆའི་བདག་དབང་མེད་པར་བཟོ་བཞིན་ཡོད་འདུག འདི་ག་བོད་ཀྱི་དུས་བབ་གསར་ཁང་ལ་བོད་ནས་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་གཞུང་གིས་ཟླ་བ་འདིའི་ཕྱི་ཚེས་༢༤ ཉིན་ནས་འགོ་འཛུགས་ཀྱིས་མཚོ་སྔོན་ཞིང་ཆེན་ཁོངས་ཀྱི་རྫོང་ཁག་ཚང་མའི་ནང་ཁྱིམ་ཐོ་ཞིབ་བཤེར་བྱེད་བཞིན་ཡོད་པ་དང་། བོད་ནང་ཁྱིམ་ཐོ་དང་ས་ཆའི་ཐོབ་ཐང་ནང་ཡོད་ཅིང་། དེང་སྐབས་ཕྱི་རྒྱལ་ཡུལ་གྲུ་ཁག་ལ་གནས་སྡོད་བྱེད་མཁན་བོད་མི་ཡོད་ཚོ་ཁྱིམ་ཐོའི་ཁོངས་ནས་ཕྱིར་འཐེན་དང་ས་ཆའི་བདག་དབང་རྣམས་སྲིད་གཞུང་གིས་ཕྱིར་བསྡུ་བྱེད་ཀྱི་ཡོད་འདུག

 ཁྱིམ་ཐོ་ཞིབ་བཤེར་བྱེད་སྟངས་དེ་ཡང་དབྱེ་བ་གཉིས་སུ་ཕྱེས་ཡོད་འདུག གཅིག་ནི་ཕ་ཡུལ་ལ་ཁྱིམ་ཐོའི་ནང་ཡོད་པ་དང་ས་ཆའི་ཐོབ་ཐང་ནང་ཡོད་ཀྱང་དེང་སྐབས་ཕྱིའི་རྒྱལ་ཁབ་ཁག་ནང་གནས་སྡོད་བྱེད་བཞིན་པ་རྣམས་ཀྱི་ནང་མི་ལ་འབྲེལ་བ་བྱས་ཏེ། ཕྱིའི་རྒྱལ་ཁབ་ལ་ཁྱིམ་ཐོ་ཡོད་མེད་རྩད་ཞིབ་བྱེད་ཀྱི་ཡོད་པ་དང་། གལ་སྲིད་ཕྱིའི་རྒྱལ་ཁབ་ནང་ཁྱིམ་ཐོ་ཡོད་ན། བོད་ནང་གི་ཁྱིམ་ཐོའི་ཁོངས་ནས་ཕྱིར་འཕུད་དང་ས་ཆའི་བདག་དབང་གཞུང་བཞེས་གཏོང་གི་ཡོད་པ་དང་། གལ་སྲིད་ཕྱིའི་རྒྱལ་ཁབ་ལ་ཁྱིམ་ཐོ་མེད་ན་མེད་པའི་དཔང་རྟགས་ཀྱི་ཡིག་ཆ་ངོ་བཤུས་གཏང་དགོས་ཀྱི་ཡོད་འདུག གལ་སྲིད་སྐྱབས་བཅོལ་གྱི་ལག་དེབ་ཐོག་བསྡད་ཡོད་ན་ཡང་ལག་དེབ་ཀྱི་ངོ་བཤུས་གཏང་དགོས་ཀྱི་ཡོད་འདུག

གཉིས་པ་དེ་ནི་བོད་ནང་གནས་སྡོད་བྱེད་མཁན་ཞིག་ཡིན་ཀྱང་ས་གནས་མི་འདྲ་བ་ཁག་གཉིས་ནང་ཁྱིམ་ཐོ་དང་ས་ཆའི་ཐོབ་ཐང་ཡོད་མེད་ཞིབ་བཤེར་བྱེད་ཀྱི་ཡོད་ཅིང་། གལ་སྲིིད་ས་གནས་ཁག་གཉིས་ནང་ཁྱིམ་ཐོ་དང་ས་ཆའི་ཐོབ་ཐང་ལེན་གྱི་ཡོོད་ཚེ་ས་གནས་གཞན་དེའི་ཁྱིམ་ཐོ་མེད་པ་བཟོས་ཏེ་ས་ཆ་གཞུང་བཞེས་གཏོང་གི་ཡོད་པ་རེད་འདུག

 རྒྱ་ནག་གཞུང་གིས་དེང་སྐབས་མཚོ་སྔོན་ཞིང་ཆེན་གྱི་རྫོང་ཁག་སོ་སའི་ས་གནས་སྲིད་གཞུང་གིས་འབྲོག་པ་རྣམས་ལ་རྩྭ་སའི་སྐོར་གྱི་ཚོགས་འདུ་བསྐོང་ཏེ། རྩྭ་སའི་བདག་དབང་སྐོར་གྱི་ལམ་སྟོན་དང་ས་འཛིན་ལག་དེབ་ཟེར་བ་ཤོག་གྲངས་༡༧ ཡོད་པ་ཞིག་བཀྲམས་པ་དང་འབྲེལ། ད་ནས་བཟུང་མང་ཚོགས་ལ་ཡོད་པའི་ས་འཛིན་ལག་དེབ་དང་རྩྭ་ས་རྣམས་གཞུང་གིས་ཕྱིར་བསྡུ་བྱ་རྒྱུ་ཡིན་པའི་ཁྱབ་བསྒྲགས་བྱས་པ་དང་། འདོད་མོས་ཡོད་མེད་ལ་མ་ལྟོས་པར་ཡིག་ཆའི་ཐོག་མོས་མཐུན་ཡོད་པའི་མིང་རྟགས་བརྒྱབ་བཅུག་ཡོད་པ་རེད། 

 ས་གནས་རྒྱ་ནག་གཞུང་གིས་འགྲེལ་བརྗོད་བྱས་པ་ལྟར་ན། འབྲོག་པ་རྣམས་ཀྱི་རྩྭ་ས་གཞུང་བཞེས་བཏང་རྗེས་འབྲོག་ལས་མཉམ་འབྲེལ་གྱི་ལམ་ལུགས་ལ་བསྒྱུར་རྒྱུ་དང་། དེ་ཡང་འབྲོག་ཁྱིམ་སོ་སོའི་ཕྱུགས་ཁ་གྲངས་མང་ཉུང་ལ་ལྟོས་མེད་ཀྱིས་ཚང་མ་འབྲོག་སྡེ་སྤྱིའི་མིང་ཐོག་ནས་གཞུང་གི་རྩྭ་སའི་ཐོག་མཉམ་དུ་འཚོ་སྐྱོང་བྱས་ཏེ། མར་དང་ཕྱུར་བ་སོགས་ཕྱུགས་ཟོག་གི་ཐོན་རྗས་རྣམས་བགོ་འགྲེམས་བྱ་རྒྱུ་ཡིན་ལུགས་བརྗོད་ཡོད་འདུག 

 རྒྱ་གར་ལྷོ་ཕྱོགས་ས་གནས་གསར་འགོད་པ་དོན་གྲུབ་བཀྲིས།

The post ཕྱིའི་བོད་མི་ཚོའི་ཁྱིམ་ཐོ་དང་ས་ཆུའི་བདག་དབང་མེད་པར་བཟོ་ཡི་འདུག appeared first on བོད་ཀྱི་དུས་བབ།.

བདུན་ཕྲག་འདིའི་ནང་རྒྱ་གར་རྒྱལ་ཡོངས་ཀྱི་བོད་མིའི་སྤྱི་ཚོགས་ཁྲོད་ཏོག་དབྱིབས་གཉན་རིམས་ཀྱི་ནད་པ་ ༤༢  བྱུང་སྟེ་ད་བར་གྱི་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་ཏོག་དབྱིབས་ནད་པ་མང་ཤོས་ཀྱི་བདུན་ཕྲག་ཅིག་ཆགས་འདུགའདི་གའི་གསར་འགོད་པས་ཁ་པར་བརྒྱུད་བོད་མིའི་སྒྲིག་འཛུགས་ཀྱི་ཝོ་ཧན་ཏོག་དབྱིབས་གཉན་རིམས་ཛ་དྲག་ལས་དོན་ཚོགས་ཆུང་གི་འབྲེལ་མཐུད་པ་ཚེ་རིང་མཚམས་གཅོད་ལགས་སུ་བདུན་ཕྲག་འདིའི་ནང་གི་ཏོག་དབྱིབས་གཉན་རིམས་ཀྱི་འགོས་ཁྱབ་གནས་སྟངས་སྐོར་དྲིས་པར། བདུན་ཕྲག་འདིའི་ནང་བཙན་བྱོལ་བོད་མིའི་ནང་ཏོག་དབྱིབས་གཉན་རིམས་ཕོག་མཁན་མི་གྲངས་ ༤༡ བྱུང་ཡོད་པ་རེད། དེ་དག་ནི་མོན་གྷོ་ཊི་གཞིས་ཆགས་ནས་ནད་པ་ ༤ བྱུང་བ་དང་། ལྡི་ལི་རུ་ ༣ ། སྦེལ་ཀོབ་ལ་ ༢ དང་ལ་དྭགས་ཁུལ་དུ་ ༣༢ བཅས་ཁྱོན་ ༤༡ བྱུང་ཡོད། ད་ལྟའི་བར་དུ་རྒྱ་གར་ནང་གི་ང་ཚོ་བོད་པའི་སྤྱི་ཚོགས་ཁྲོད་ཏོག་དབྱིབས་གཉན་རིམས་འགོས་ཁྱབ་བྱུང་བ་ཁྱོན་མི་གྲངས་ ༡༣༨ དང་དེའི་ཁྲོད་ཀྱི་མི་གྲངས་ ༨༠ དྲག་སྐྱེད་བྱུང་ཡོད། ད་ལྟ་ན་བཞིན་པ་མི་གྲངས་ ༥༥ དང་རྐྱེན་འདས་སུ་ཕྱིན་པ་མི་ ༣ ཆགས་བསྡད་ཡོད། ཅེས་བརྗོད་བྱུང་བ་དང་། རྐྱེན་འདས་སུ་ཕྱིན་པའི་མི་ ༣ ནི་ལྡི་ལི་ནས་མི་ ༢ དང་མོན་གྷོ་ཊི་ནས་མི་ ༡ ཆགས་ཡོད་འདུག འདི་གའི་གསར་འགོད་པས་རྒྱུན་ལོན་བྱུང་བ་ལྟར་ན། ཟླ་འདིའི་ཕྱི་ཚེས་ ༢༥ དང་ ༢༦ བཅས་བསྟུན་མར་རྒྱལ་ས་ལྡི་ལི་རུ་བོད་མི་གཞན་གཅིག་དང་ཨ་རིའི་གྲོང་ཁྱེར་ནེའུ་ཡོག་ཏུ་བོད་མི་ ༡ བཅས་བོད་མི་གཉིས་ཏོག་ནད་ཀྱིས་འདས་གྲོངས་སུ་ཕྱིན་ཡོད་འདུག

མཇུག་ཏུ་བོད་མིའི་སྤྱི་ཚོགས་ཁྲོད་ནད་པའི་གྲངས་འབོར་ཇེ་མང་དུ་མི་འགྲོ་བ་དང་བོད་མི་རྣམས་ནས་ཡིད་གཟབ་གནང་དགོས་པའི་ཐད་ཚེ་རིང་མཚམས་གཅོད་ལགས་ཀྱིས། སྤྱིར་བཏང་ན་ཚ་འདི་གསར་པ་ཡིན་པ་དང་། བཅོས་ཐབས་ཀྱི་སྨན་མེད་སྟབས་སྔོན་འགོག་རང་ལ་བརྟེན་དགོས་པ་ཞིག་ཆགས་ཡོད། སྔོན་འགོག་གི་ཐབས་ལམ་ནང་རྒྱལ་སྤྱིའི་ནད་ཡམས་སྔོན་འགོག་གི་ལམ་སྟོན་བཞིན་ལག་པ་འཁྲུད་པ་དང་ཁ་རས་གྱོན་པ། བར་རྒྱང་འཇོག་པ་སོགས་གནང་དགོས་ཀྱི་ཡོད། ང་ཚོ་བོད་མིའི་སྤྱི་ཚོགས་ཀྱི་ནད་པའི་རྒྱབ་ལྗོངས་སུ་བལྟས་ཡོང་དུས། ནད་པ་མང་ཆེ་བ་གྲོང་ཁྱེར་ཆེ་ཁག་ལྡི་ལི་དང་བྷང་ལོར་སོགས་ནས་ཡར་མར་འགྲུལ་བཞུད་བྱས་པ་བརྒྱུད་ན་ཚ་ཕོག་ཡོད། དེར་བརྟེན། ན་མནར་གཤག་བཅོས་གནང་དགོས་པའི་རིགས་སོགས་ཛ་དྲག་གི་གནས་སྟངས་མིན་ཚེ། བོད་མི་ཚོ་འགྲུལ་བཞུད་མ་གནང་རོགས་ཞུ་རྒྱུ་ཡིན་ཞེས་འབོད་སྐུལ་ཞུས་གནང་སོང་།ཚེ་རིང་མཚམས་གཅོད་ལགས་ཀྱིས་བརྗོད་པ་ལྟར་ན། བོད་མི་ཁག་ཅིག་སྨན་ཁང་དུ་མིག་གཤག་བཅོས་དང་ཁྲག་ཤེད། གཅིན་སྙི་སོགས་ཀྱི་ཆེད་རྒྱུན་ལྡན་སྨན་ཁང་དུ་བསྟེན་གཏུག་སླད་ཕེབས་ཀྱི་ཡོད་པ་དང་། ཁོ་ཚོ་སྨན་ཁང་དུ་མ་ཕེབས་སྔོན་ཏོག་དབྱིབས་གཉན་རིམས་འགོས་མེད་ནའང་སྨན་ཁང་དང་འགྲུལ་བཞུད་སྐབས་ན་ཚ་ཕོག་གི་ཡོད་སྟབས། ནམ་རྒྱུན་སྨན་ཁང་བསྟེན་གཏུག་གནང་མཁན་ཚོས་ཐུགས་གཟབ་གནང་གལ་ཆེ་བ་དང་། ད་ལྟའི་བོད་མི་མང་པོ་ཞིག་ལ་ནད་གཡོག་དང་སྨན་ཁང་དུ་འཁྲིད་མཁན་སོགས་བརྒྱུད་ནས་ཏོག་དབྱིབས་གཉན་རིམས་འགོས་ཡོད་སྟབས། སྤྱི་ཚོགས་ནང་ནད་པར་ནད་གཡོག་རྒྱུག་མཁན་དང་སྨན་ཁང་དུ་འཁྲིད་མཁན་སོགས་ནས་གཟབ་གཟབ་གནང་རྒྱུ་གལ་ཆེན་པོ་ཆགས་ཡོད་པ་རེད། གཞན་ཡང་ནམ་རྒྱུན་ནས་སོ་སོའི་ལུས་ཟུང་མ་ལག་གཙོས་པའི་ལུས་པོ་དང་སེམས་ཁམས་འཕྲོད་བསྟེན། དེ་བཞིན། ཞལ་ལག་དུས་ཐོག་ཏུ་མཆོད་པ་དང་དུས་ཚོད་ཏག་ཏག་ལ་གཉིད་ཉལ་བ་སོགས་རྒྱུན་ལྡན་ལྟར་གནང་རྒྱུ་གལ་ཆེན་པོ་ཡིན་པའི་ལམ་སྟོན་དང་འབོད་སྐུལ་ཡང་གནང་སོང་།

དེ་རིང་གི་བོད་མིའི་སྒྲིག་འཛུགས་ཀྱི་ཝུ་ཧན་ཏོག་དབྱིབས་གཉན་རིམས་ཛ་དྲག་ངལ་སེལ་ཚོགས་ཆུང་གི་གྲངས་ཐོ་ལྟར་ན། རྒྱ་བལ་འབྲུག་གསུམ་གྱི་བོད་མིའི་ནང་ཁྱོན་ཏོག་དབྱིབས་གཉན་རིམས་ནད་པ་ ༡༣༥ ཡི་ཁྲོད་ནས་དྲག་སྐྱེད་བྱུང་བ་ ༨༠ དང་། ན་བཞིན་པ་ ༥༥། འདས་གྲོངས་སུ་ཕྱིན་པ་ ༣ བྱུང་ཡོད་པ་དང་། དེ་མིན་གྱི་ཕྱི་རྒྱལ་ཁག་ནས་བོད་མི་ཁྱོན་ ༢༡༣ ལ་ནད་རྟགས་ཐོན་པའི་ཁྲོད་ནས་ ༡༦༥ དྲག་སྐྱེད་བྱུང་བ་དང་། མི་ ༣༩ ན་བཞིན་པ་དང་། མི་ ༩ འདས་གྲོངས་སུ་ཕྱིན་ཡོད་འདུག

གསར་འགོད་པ། སྐལ་བཟང་སྦྱིན་པ།

The post བདུན་ཕྲག་འདིའི་ནང་བོད་མིའི་སྤྱི་ཚོཊ་ནང་ཏོག་དབྱིབས་ནད་པ་མང་ཤོས་བྱུང་། appeared first on བོད་ཀྱི་དུས་བབ།.

ཉི་ཧོང་གི་སྲིད་བློན་ཤིན་ཛོ་ཨ་བྷེ་མཆོག་གི་ནད་རྙིང་འཕར་ཏེ་གློ་བུར་དུ་སྲིད་བློན་གྱི་ལས་གནས་ནས་རྩ་དགོངས་ཞུ་རྒྱུ་ཡིན་པ་གསལ་བསྒྲགས་གནང་།དེ་རིང་སྔ་དྲོར་ཉི་ཧོང་གི་སྲིད་བློན་ཤིན་ཛོ་ཨ་བྷེ་(Shinzo Abe)མཆོག་གིས་གསར་འགོད་གསལ་བསྒྲགས་ཤིག་དང་འབྲེལ། སྒེར་གྱི་འཕྲོད་བསྟེན་གནས་སྟངས་རྐྱེན་གྱིས་ཉི་ཧོང་གི་སྲིད་བློན་མཆོག་རྩ་དགོངས་རྒྱུ་ཞུ་ཡིན་པའི་གནས་ཚུལ་བསྒྲགས་སོང་བ་དང་། ད་ལྟའི་ཆར་ཁོང་གི་རྗེས་འཇུག་སྲིད་དབང་འཛིན་མཁན་ཐད་ཐག་གཅོད་བྱུང་མེད་ཀྱང་། ཁོང་གི་སྲིད་དོན་ཚོགས་པ་དང་གྲོས་ཚོགས་འཐུས་མི་ཚོ་མཉམ་དུ་ཛ་དྲག་ངང་ཚོགས་འདུ་འཚོག་བཞིན་ཡོད་འདུག

གསལ་འགོད་གསལ་བསྒྲགས་སྟེང་སྲིད་བློན་ཨ་བྷེ་མཆོག་གིས། ང་རང་ཉི་ཧོང་སྲིད་བློན་གྱི་གོ་གནས་ནས་རྩ་དགོངས་ཞུ་རྒྱུ་ཐག་གཅོད་བྱས་ཟིན་པ་ཡིན་ལ། དེ་སྔ་ནས་ཡོད་པའི་(ulcerative colitis)ན་ཚ་དེ་བསྐྱར་དུ་ལངས་ཏེ། འཕྲོད་བསྟེན་གནས་བབ་དང་གཟུགས་པོའི་ནུས་ཤུགས་ཤོར་ཡོད་པས། འཕྲོད་བསྟེན་གནས་སྟངས་སྐྱོ་བོའི་གནས་བབ་འོག་སྲིད་དབང་གི་སྣེ་ཁྲིད་མི་ཐུབ་སྐོར་དང་། ཁོང་གིས་མ་འོངས་པར་སྲིད་དབང་འཛིན་སྐྱོང་གནང་མཁན་ལ་རྒྱབ་སྐྱོར་གང་ཐུབ་པ་གནང་རྒྱུ་ཡིན་མོད། ཁོང་གི་དམངས་གཙོ་ཚོགས་པས་རྗེས་མའི་སྲིད་དབང་འཛིན་མཁན་དེ་ག་འདྲ་ཞིག་འདེམས་མིན་ཐད་སྐད་ཆ་བཤད་འདོད་མེད་སྐོར་གསུངས་འདུག

ཁོང་གིས་སྲིད་བློན་ལས་གནས་ནས་རྩ་དགོངས་ཞུ་རྒྱུའི་ཐག་གཅོད་དེ་ནི་ཧ་ཅང་གློ་བུར་བ་ཞིག་ཆགས་ཡོད་པ་དང་། དེ་སྔ་ཉི་ཧོང་གི་བདེ་སྲུང་སྲིད་བློན་ཟུར་པ་དང་ད་ལྟའི་ཆར་ཉི་ཧོང་དམངས་གཙོ་ཚོགས་པའི་གྲོས་ཚོགས་འཐུས་མི་རྒན་གྲས་ཊོ་མོ་མེ་(Tomomi Inada)ཡིས། ཨ་བྷེ་ཡིས་དགོངས་ཞུའི་ཐག་གཅོད་དེ་གོ་སོང་ལ། གནས་དོན་དེ་ནི་ཧ་ཅང་གློ་བུར་བ་དང་བློ་ཡིད་ལ་མ་དྲན་པ་ཞིག་ཡིན་པ་དང་། མ་འོངས་པར་སྲིད་དབང་འཛིན་མཁན་ཞིག་བསྐོ་བཞག་མ་བྱུང་བར་དུ་ཨ་བྷེ་མུ་མཐུད་འདུག་རྒྱུ་ཡིན་སྐོར་བརྗོད་འདུག

གནད་དོན་དེའི་ཐད་ཉི་ཧོང་ཊོག་ཡོ་མཱེ་ཇེ་(Meiji University)གཙུག་ལག་སློབ་གཉེར་ཁང་གི་ཆབ་སྲིད་ཚན་རིག་སློབ་དཔོན་ནཱ་ཤི་ཁཱ་ཝ(Nishikawa)ཡིས། སྲིད་བློན་གྱི་ཐག་གཅོད་དེ་ནི་ཉི་ཧོང་རྒྱལ་ཁབ་ནང་ཏོག་དབྱིབས་གཉན་རིམས་དང་། རྒྱ་ནག་དང་འབྲེལ་བའི་ལྷོ་རྒྱ་མཚོའི་མངའ་ཁོངས་རྩོད་རྙོག་སོགས་ཀྱི་དཀའ་ངལ་ཤུགས་ཆེར་འཕྲད་བཞིན་པའི་སྐབས་སུ་བྱུང་བ་ཞིག་ཡིན་པ་དང་། གནད་དོན་དེ་ནི་ཧང་སང་དགོས་པ་ཞིག་དང་མ་འོངས་པར་ཆབ་སྲིད་ཀྱི་དཀའ་རྙོག་ཅིག་ཏུ་ཆགས་མི་སྲིད་པ་མིན་སྐོར་བརྗོད་འདུག

ཨ་བྷེ་མཆོག་སྒེར་གྱི་ན་ཚའི་རྐྱེན་གྱིས་སྲིད་བློན་གྱི་གོ་གནས་ནས་རྩ་དགོངས་ཞུ་རྒྱུ་ཡིན་པའི་གནས་ཚུལ་ཐོན་པ་ཐེངས་དང་པོ་མ་ཡིན་པར། ཕྱི་ལོ་ ༢༠༡༧ ལོར་ན་ཚ་དེ་དང་འབྲེལ་ནས་སྲིད་བློན་གྱི་དུས་ཡུན་མ་རྫོགས་གོང་དགོངས་པ་ཞུ་དགོས་བྱུང་ཡོད་ཀྱང་། རྗེས་སུ་སྨན་བཅོས་སོགས་ཀྱིས་ན་ཚ་དེ་སྟངས་འཛིན་ཐུབ་པ་བྱུང་རྗེས་མུ་མཐུད་སྲིད་བློན་གྱི་ལས་གནས་འཁུར་ཡོད་པ་རེད། ཁོང་གི་(ulcerative colitis)ན་ཚ་དེ་ནི་བྱིས་དུས་ནས་ཡོད་པ་ཞིག་ཡིན་པ་དང་། ལོ་ཤས་སྔོན་སྟངས་འཛིན་ཐུབ་ཡོད་ཀྱང་འདི་ལོའི་ཕྱི་ཟླ་ ༧ ཙམ་ནས་ན་ཚ་བསྐྱར་དུ་ལངས་ཏེ། ཐེངས་ཁ་ཤས་ལ་སྨན་ཁང་དུ་སྨན་བཅོས་བྱས་ཏེ་འདུག་དགོས་བྱུང་ཡོད་འདུག

འདི་ལོར་དགུང་གྲངས་༦༥ ཡིན་པའི་སྲིད་བློན་ཨ་བྷེ་མཆོག་ཕྱི་ལོ་ ༢༠༠༦ ལོར་ཉི་ཧོང་གི་སྲིད་བློན་དུ་བདམས་ཐོན་བྱུང་བ་ནས། འདས་པའི་ལོ་ངོ་ ༡༥ རིང་ཉི་ཧོང་གི་སྲིད་བློན་ལས་ཁུར་ཞུས་ཏེ། ཉི་ཧོང་ལོ་རྒྱུས་ཁྲོད་སྲིད་བློན་གྱི་ཞབས་ཞུའི་དུས་ཡུན་རིང་ཤོས་ཆགས་ཡོད་པ་རེད། ཨ་བྷེ་མཆོག་གི་སྲིད་བློན་དུས་ཡུན་རིང་ཉི་ཧོང་གི་དཔལ་འབྱོར་དང་དམག་དོན་གནས་བབ་ཡར་རྒྱས་ཤུགས་ཆེན་སོང་ཡོད་པ་དང་། ཁོང་ནི་དུས་རྒྱུན་ཉི་ཧོང་རྒྱལ་གཅེས་རིང་ལུགས་པ་གཙོར་འཛིན་དང་། ལྷག་པར་དུ་རྒྱ་ནག་ཐད་ལངས་ཕྱོགས་མཁྲེགས་པོ་འཛིན་མཁན་ཞིག་ཡིན་ལ། ཁོང་གིས་ཉི་ཧོང་འཇིགས་པ་ལས་སྲུང་སྐྱོབ་ཆེད་བདེ་སྲུང་དམག་གི་སྟོབས་ཤུགས་རྒྱ་སྐྱེད་དང་ཉི་ཧོང་གི་དམག་དོན་སྲ་བརྟན་བཟོ་རྒྱུའི་ཐད་ཤུགས་སྣོན་གནང་ཡོད་འདུག

གསར་འགོད་པ། སངས་རྒྱས་དཀོན་མཆོག

The post ཉི་ཧོང་གི་སྲིད་བློན་མཆོག་ནས་རྩ་དགོངས་ཞུ་རྒྱུ་ཡིན་འདུག appeared first on བོད་ཀྱི་དུས་བབ།.

རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཡི་ཧྥ་རན་སིའི་ནང་གི་སྐོར་སྐྱོད་དང་བསྟུན་ས་གནས་བོད་མི་དང་ཡུ་གུར། ཧོང་ཀོང་སོགས་ཀྱི་ལས་འགུལ་བས་ངོ་རྒོལ་སྐད་འབོད་བྱེད་ཀྱི་ཡོད་འདུགརྒྱ་ནག་གི་ཕྱི་སྲིད་བློན་ཆེན་ཝང་ཡེ་ཡིས་ཏོག་དབྱིབས་གཉན་རིམས་འགོས་ཁྱབ་ཕྱིན་རྗེས་ཐེངས་དང་པོ་རྒྱལ་ཁབ་ལྔ་ཡི་ནང་རྒྱལ་དོན་སྐོར་སྐྱོད་བྱེད་ཀྱི་ཡོད་པ་དང་བསྟུན། ས་གནས་སོ་སོ་ན་བོད་མི་དང་ཡུ་གུར། ཧོང་ཀོང་སོགས་ཀྱི་ལས་འགུལ་བ་མང་པོ་ངོ་རྒོལ་ལས་འགུལ་སྤེལ་བཞིན་ཡོད་པ་ལྟར།  དེ་རིང་ཕྱི་ཚེས་ ༢༨ ཉིན། ཧྥ་རན་སིའི་སྲིད་འཛིན་གྱི་བཞུགས་གནས་ (Elysee Palace) སུ། རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཡིས་སྲིད་འཛིན་ཨེ་མེ་ཎུལ་མེ་ཁོ་རོན་ (Emmanuel Macron)མཆོག་དང་མཇལ་འཕྲད་བྱེད་ཀྱི་ཡོད་པར་བརྟེན། ས་གནས་བོད་མི་དང་ཐའེ་ཝན། ཡུ་གུར་དང་ཧོང་ཀོང་བ་སོགས་མི་གྲངས་ ༢༠༠ ལྷག་གིས་རྒྱ་ནག་དམར་ཤོག་གཞུང་ལ་ངོ་རྒོལ་སྐད་འབོད་བྱེད་ཀྱི་ཡོད་འདུག

ལས་འགུལ་སྐབས་ངོ་རྒོལ་བ་ཚོས་ཧྥ་རན་སིའི་སྲིད་འཛིན་མཆོག་གིས་རྒྱ་ནག་གི་ཕྱི་སྲིད་བློན་ཆེན་ཝང་ཡེ་དང་མཉམ་དུ་བོད་དོན་དང་ཡུ་གུར། ཧོང་ཀོང་སོགས་ཀྱི་ནང་གི་འགྲོ་བ་མིའི་ཐོབ་ཐང་ཀྱི་གནད་དོན་སྐོར་ལ་གླེང་སློང་བྱེད་དགོས་པ་དང་། ཡུལ་ལུང་དེ་དག་ནང་རང་དབང་དགོས་པའི་དགོས་འདུན་བཏོན་ཡོད་པ་དང་། དེ་བཞིན་རྒྱ་ནག་ནང་བཟོས་པའི་དངོས་ཟོག་ཉོ་མཚམས་འཇོག་དགོས་པ་དང་། ཏོག་དབྱིབས་ནད་འབུ་རྒྱ་ནག་གཞུང་གིས་བཟོས་ཏེ་འཛམ་གླིང་མི་མང་གནོད་འཚེ་ཚབས་ཆེན་གཏོང་བཞིན་ཡོད་པ་བཅས་ཀྱི་ངོ་རྒོལ་སྐད་འབོད་བྱས་ཡོད་འདུགཧྥ་རན་སིའི་བོད་རིགས་གསར་འགྱུར་ནང་འགྲེལ་བརྗོད་བྱས་པ་ལྟར་ན། ཝང་ཡེ་ཧྥ་རན་སི་ལ་ཡོང་བ་དེ་ཕྱིར་བསྒྲགས་གང་ཡང་མ་བྱས་པར་གསང་བའི་ངང་འབྱོར་ཡོད་པ་དང་། ས་གནས་སུ་སྐུ་སྲུང་མི་སྣ་མང་པོ་ཞིག་བཀྲམས་ཏེ་ཧ་ཅང་དམ་དྲག་བྱེད་ཀྱི་ཡོད་སྐོར་བཀོད་འདུག་ལ།

དེ་རིང་ཕྱི་ཚེས་ ༢༨ ཉིན་རྒྱ་ནག་གི་གཞུང་འབྲེལ་གསར་ཁང་གོ་ལའི་དུས་བབ་སྟེང་བཀོད་པའི་གནས་ཚུལ་ནང་། ཐེངས་འདིའི་རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཧྥ་རན་སི་དང་འཇན་མན་སོགས་རྒྱལ་ཁབ་ལྔའི་ནང་འགྲོ་དགོས་པའི་རྒྱུ་མཚན་ནི། ཡོ་རོབ་མཉམ་འབྲེལ་མཐུན་ཚོགས་དང་རྒྱ་ནག་གཉིས་མཉམ་འབྲེལ་བྱས་ཏེ་ཏོག་ནད་རྐྱེན་གྱིས་ཉམས་རྒུད་དུ་ཕྱིན་པའི་གོ་ལ་ཁྱོན་ཡོངས་ཀྱི་དཔལ་འབྱོར་ཡར་རྒྱས་གཏོང་ཐབས་དང་། གུ་ཡངས་ཀྱི་ཚོང་ལམ་བསྐྲུན་ཐབས། དེ་བཞིན་ཨ་རིས་གང་འདོད་དུ་དཔལ་འབྱོར་གྱི་ཉེས་ཆད་གཅོད་བཞིན་པར་གདོང་ལེན་སོགས་ཀྱི་ཆེད་དུ་ཡིན་སྐོར་བཀོད་འདུག

ཐེངས་འདིའི་ཝང་ཡེ་ཡི་ཡོ་རོབ་ནང་བདུན་གཅིག་ཙམ་གྱི་ཕྱོགས་སྐྱོད་དེ་ནི་ཏོག་དབྱིབས་ནད་ཡམས་རྗེས་ཀྱི་ཁོའི་ཕྱི་རྒྱལ་གྱི་ཕྱོགས་སྐྱོད་ཐེངས་དང་པོ་དེ་ཆགས་ཡོད་པ་དང་། ཨི་ཊ་ལི་དང་ནེའུ་དྷར་ལན་ཌིར་སྐྱོར་སྐྱོད་བྱས་ཡོད་པ་དང་། ནོར་ཝེའི་ནང་ཕྱོགས་སྐྱོད་སྐབས། ཧོང་ཀོང་གི་ངོ་རྒོལ་བར་ནོལ་བྷེལ་གཟེངས་རྟགས་སྤྲད་ཚེ། དེ་ནི་རྒྱ་ནག་གི་ནང་སྲིད་ལ་ཐེ་བྱུས་བྱས་པར་ངོས་འཛིན་བྱ་རྒྱུ་ཡིན་པའི་འཇིགས་སྐུལ་བྱས་ཡོད་འདུག  ཕྱི་ལོ་ ༡༦ ལོར་ནོལ་བྷེལ་ཞིའི་བདེ་གཟེངས་རྟགས་རྒྱ་རིགས་ལུའུ་ཞོ་པའོ་ (Liu Xiaobo) ལ་སྤྲད་པར་བརྟེན། ཕྱོགས་གཉིས་ཀྱི་འབྲེལ་བ་སྡུག་ཏུ་ཕྱིན་ཡོད་པ་དང་། རྒྱ་ནག་གི་ཕྱི་སྲིད་བློན་ཆེན་ཞིག་ལོ་ ༡༥ རྗེས་ཐེངས་དང་པོར་ཡུལ་དེའི་ནང་སྐོར་སྐྱོད་བྱས་ཡོད་འདུག

གསར་འགོད་པ། ཀླུ་མགོན་ཐར།

The post རྒྱ་ནག་གི་ཕྱི་སྲིད་བློན་ཆེན་ལ་ངོ་རྒོལ་བྱས། appeared first on བོད་ཀྱི་དུས་བབ།.

རྒྱ་གར་གྱི་དབུས་གྲོས་ཚོགས་འཐུས་མི་ཟུར་པ་ཁྲིག་སེ་རིན་པོ་ཆེ་མཆོག་ནས་རྒྱ་གར་གྱི་སྲིད་འཛིན་དང་སྲིད་བློན་མཆོག་ལ་ཕྱག་ཡིག་ཕུལ་ཏེ་༧གོང་ས་མཆོག་ལ་རྒྱ་གར་གྱི་ཆེས་མཐོའི་གཟེངས་རྟགས་བྷ་ར་ཏི་རཱ་ཏ་ནཱ་ (Bharat Ratna) འབུལ་ལམ་ཞུ་དགོས་པའི་རེ་སྐུལ་གནང་འདུགཁ་སང་ཕྱི་ཚེས་ ༢༨ ཉིན་རྒྱ་གར་གྱི་དབུས་གྲོས་ཚོགས་གོང་མའི་འཐུས་མི་ཟུར་པ་དང་། ཁྲིག་སེ་རིན་པོ་ཆེ་ངག་དབང་བྱམས་པ་བསྟན་འཛིན་མཆོག་གིས། རྒྱ་གར་གྱི་སྲིད་འཛིན་མཆོག་དང་སྲིད་བློན་མཆོག་རྣམ་གཉིས་ལ་ཕྱག་བྲིས་ཤིག་ཕུལ་ཏེ། དབུས་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་ལ་རྒྱ་གར་གྱི་ཆེས་མཐོའི་གཟེངས་རྟགས་བྷ་ར་ཏི་རཱ་ཏ་ནཱ་ (Bharat Ratna) འབུལ་ལམ་ཞུ་དགོས་པའི་རེ་སྐུལ་གནང་འདུག་ལ། དེ་བཞིན་ཧི་མ་ལ་ཡའི་རི་རྒྱུད་ཀྱི་ཡུལ་མི་ཚོས་ཀྱང་སོ་སོའི་འཐུས་མི་རྣམས་ལ་གཅིག་མཚུངས་ཀྱི་ཞུ་སྐུལ་བྱེད་དགོས་པའི་འབོད་སྐུལ་གནང་འདུག

རིན་པོ་ཆེ་མཆོག་གི་ཕྱག་ཡིག་དེའི་ནང་། ང་ཚོ་ཧི་མ་ལ་ཡའི་རི་རྒྱུད་ཀྱི་མི་རྣམས་ནི་གནའ་བོའི་རྒྱ་གར་གྱི་ན་ལནྜའི་ཆོས་བརྒྱུད་ཡིན་པའི་བོད་བརྒྱུད་ནང་བསྟན་གྱི་ཆོས་དང་རིག་གཞུང་ལ་འབྲེལ་བ་དམ་ཟབ་ཡོད་ལ། ༧གོང་ས་ཏཱ་ལའི་བླ་མ་སྐུ་ཕྲེང་ ༡༤ པ་མཆོག་གི་བཀའ་ཆོས་ཟབ་མོས་ཡང་ཡང་བྱིན་གྱིས་བརླབས་ཡོད་པ་རེད། ༧གོང་ས་མཆོག་ལ་དྭགས་དང་འབྲས་ལྗོངས། ཧི་མ་ཅལ་དང་ཨ་རུ་ན་ཅལ་བཅས་ཀྱི་ནང་ཡང་ཡང་ཕེབས་པ་དང་བཀའ་ཆོས་བསྩལ་བ་ལ་བརྟེན། ང་ཚོའི་རིག་གཞུང་གི་འབྲེལ་ཐག་དམ་དུ་བཏང་བ་དང་། ཆོས་ཀྱི་ཉམས་ལེན་སླར་གསོ་བྱུང་ཡོད་པ་རེད། ཅེས་བཀོད་འདུག

ཡང་ཕྱག་ཡིག་དེའི་ནང་། འཛམ་གླིང་ཁྱོན་ཡོངས་ཀྱིས་༧གོང་ས་རྒྱལ་བ་རིན་པོ་ཆེ་མཆོག་ནི་ཞི་བདེ་དང་ཤེས་རབ། སྙིང་རྗེ་ཡི་མཚོན་དོན་ལ་ངོས་འཛིན་དང་། གཟེངས་རྟགས་བརྒྱ་ཕྲག་ཕུལ་བ་དང་བསྔགས་བརྗོད་བྱེད་བཞིན་པ་ནི་ང་ཚོའི་བླ་མ་དང་ཆོས་ཕྱོགས་ཀྱི་དབུ་འཁྲིད་ཡིན་པའི་ཐོག་ནས་དམིགས་བསལ་གྱི་འབྲེལ་བ་ཡོད་པ་རེད། ཧི་མ་ལ་ཡའི་རི་རྒྱུད་ཀྱི་ཡུལ་མི་རྣམས་ཀྱིས་ཁོང་ནི་རྒྱལ་བ་ཡིད་བཞིན་ནོར་བུ་སྟེ་ཡིད་བཞིན་དུ་འགྲུབ་པའི་ནོར་བུ་དང་། ༧སྤྱན་རས་གཟིགས་སུ་ངོས་འཛིན་བྱེད་ཀྱི་ཡོད་པ་དང་། བཙན་བྱོལ་ནང་ཁོང་གི་གཞན་དོན་གྱི་མཛད་འཕྲིན་ཁག་གིས་ང་ཚོར་ཕན་ཐོགས་ཧ་ཅང་ཆེན་པོ་འབྱུང་གི་ཡོད་པ་རེད། ཁོང་གི་ཐུགས་དགོངས་ལ་བརྟེན་ནས་ང་ཚོའི་སྤྱི་ཚོགས་དང་རིག་གཞུང་དམ་ཟབ་ཏུ་བཏང་ཡོད་ལ། ཆོས་ལུགས་རིས་མེད་དང་བཟོད་སྒོམ་གྱི་བཀའ་སློབ་ཀྱིས་ང་ཚོའི་སྤྱི་ཚོགས་བརྟན་བརླིང་ཆེ་རུ་བཏང་བ། དེ་བཞིན་དུས་རབས་དང་མཐུན་པའི་ཐུགས་དགོངས་དང་གོ་དོན་རྟོགས་སླ་བའི་བཀའ་ཆོས་ཀྱིས་ང་ཚོའི་གཞོན་སྐྱེས་ཚོར་སེམས་སྐུལ་ཐེབས་ཀྱི་ཡོད་པ་རེད། ཁོང་གི་བྱམས་བརྩེའི་བཀའ་དྲིན་ང་ཚོས་གཞལ་ཐབས་མེད་ལ། བཀའ་དྲིན་ཧ་ཅང་དྲན་པའི་སྐབས་འདིར། ང་ཚོ་ཐུན་མོང་གིས་ཁོང་ལ་གཞུང་འབྲེལ་གྱི་ཆེ་བསྟོད་ཅིག་འབུལ་དགོས་ངེས་ཞིག་ཡིན་པ་རེད། ཅེས་བཀོད་འདུག

ཕྱི་ལོ་ ༢༠༡༦ ཟླ་ ༡༢ ནང་ལ་དྭགས་རང་སྐྱོང་རི་ལྗོངས་ཡར་རྒྱས་ལྷན་ཚོགས་ཀྱིས་སྤྱི་མོས་ཐོག་གྲོས་ཆོད་ཐོག་མ་བཞག་སྟེ་དབུས་གཞུང་ལ་སྙན་སེང་ཞུས་ཡོད་པ་དང་། སྐབས་དེའི་གྲོས་ཆོད་ནང་དུ་རྒྱ་གར་གཞུང་ནས་༧གོང་ས་རྒྱལ་བ་རིན་པོ་ཆེ་མཆོག་གིས་སྐུ་ཚེ་ཧྲིལ་བོར་འཛམ་གླིང་ཁྱོན་ཡོངས་སུ་འཚེ་མེད་ཞི་བ་གོང་སྤེལ་གཏོང་གནང་མཛད་པའི་རླབས་ཆེན་གྱི་མཛད་རྗེས་ལ་ངོས་འཛིན་ཞུས་པའི་ཐོག་ནས། ཁོང་ལ་རྒྱ་གར་མི་སེར་གྱི་ཆེས་མཐོའི་གཟེངས་རྟགས་ (Bharat Ratna) ཞེས་པ་དེ་འབུལ་ལམ་ཞུ་དགོས་སྐོར་བཀོད་ཡོད་པ་དང་། དེའི་རྗེས་རྒྱ་གར་གྲོས་ཚོགས་འཐུས་མི་དང་གྲགས་ཅན་མི་སྣ། སྤྱི་ཚོགས་ལས་འགུལ་བ་སོགས་ཀྱིས་ཀྱང་གཟེངས་རྟགས་དེ་༧གོང་ས་རྒྱལ་བ་རིན་པོ་ཆེ་མཆོག་ལ་འབུལ་དགོས་པའི་རེ་སྐུལ་ཞུ་ཡི་ཡོད་པ་རེད།

རྒྱ་གར་གྱི་ཆེས་མཐོའི་གཟེངས་རྟགས་བྷ་ར་ཊི་ར་ཊི་ན་ནི་ནོར་བུ་ཞེས་པའི་དོན་ཡིན་པ་དང་། དེ་ནི་རྒྱ་གར་རྒྱལ་ཡོངས་ཀྱི་གཟེངས་རྟགས་མཐོ་ཤོས་དེ་ཡིན་ལ། མིའི་རིགས་ཀྱི་བདེ་དོན་ཆེད་མཛད་རྗེས་རླབས་ཆེན་འཇོག་གནང་མཁན་དང་། རང་དབང་དང་འགྲོ་བ་མིའི་ཐོབ་ཐང་འཐབ་རྩོད་པ་གནང་མཁན་གྱི་མི་སྣ་གྲགས་ཅན་རྣམས་ལ་འབུལ་སྲོལ་ཡོད་པ་ལྟར། ཕྱི་ལོ་ ༡༩༨༠ ལོར་ཡི་ཤུ་ཨ་མ་ཊི་རེ་སཱ་མཆོག་ལ་ཕུལ་ཡོད་པ་དང་། ཕྱི་ལོ་ ༡༩༩༠ ལོར་ལྷོ་ཨ་ཧྥེ་རི་ཁའི་རང་དབང་འཐབ་རྩོད་པ་དང་སྲིད་འཛིན་ཟུར་པ་ནེལ་སན་མན་ཌ་ལཱ་ (Nelson Mandela) མཆོག་དང་། དེ་བཞིན་རྒྱ་གར་རང་བཙན་འཐབ་རྩོད་པ་ཁཱན་ཨབ་དུལ་གྷ་ཕར་ཁཱན་ (Khan Abdul Ghaffar Khan) ། སྲིད་བློན་དམ་པ་ནེ་རོ་མཆོག་སོགས་མི་སྣ་གྲགས་ཅན་ ༤༨ ཙམ་ལ་ཕུལ་ཡོད་འདུག

གསར་འགོད་པ། ཀླུ་མགོན་ཐར།

The post རྒྱ་གར་གྱི་ཆེས་མཐོའི་གཟེངས་རྟཊ་༧གོང་ས་ལ་འབུལ་དགོས་པའི་ཞུ་སྙན་ཕུལ། appeared first on བོད་ཀྱི་དུས་བབ།.

ཉི་ཧོང་སྲིད་བློན་ཤིན་ཛོ་ཨ་བྷེ་མཆོག་ནས་རྒྱལ་ཁབ་ཀྱི་ཁེ་ཕན་ལ་དགོངས་ཏེ་སྲིད་བློན་ནས་རྩ་དགོངས་ཞུ་བའི་ཐག་གཅོད་གནང་བར་༧གོང་ས་མཆོག་ནས་ཡི་རང་དང་སྦྲགས་ནད་མནར་ལས་མྱུར་ཏུ་གྲོལ་བའི་ཐུགས་སྨོན་མཛད་འདུག དེ་རིང་ཕྱི་ཚེས་ ༢༩ ཉིན།  ༧གོང་ས་རྒྱལ་བ་རིན་པོ་ཆེ་མཆོག་གིས་ཉི་ཧོང་གི་སྲིད་བློན་ཤིན་ཛོ་ཨ་བྷེ་(Shinzo Abe)མཆོག་མྱུར་ཏུ་ནད་མནར་ལས་དྲག་སྐྱེད་ཡོང་བའི་ཐུགས་སྨོན་གསུང་འཕྲིན་ཞིག་བསྩལ་བའི་ནང་། ངོས་ནས་སྐུ་ཉིད་ཀྱི་འཕྲོད་བསྟེན་སྨན་བཅོས་ལེགས་འགྲུབ་ཡོང་བའི་སྨོན་ལམ་འདེབས་བཞིན་ཡོད། སྐུ་ཉིད་ཀྱིས་རྒྱལ་ཁབ་ཀྱི་ཁེ་ཕན་ལ་བསམ་གཞིག་གནང་སྟེ་གོ་གནས་ནས་དགོངས་པ་ཞུས་ཏེ། རང་ཉིད་ཀྱི་འཕྲོད་བསྟེན་སྨན་བཅོས་ཐད་དང་ལེན་གནང་བར་ཡི་རང་ཞུ་བཞིན་ཡོད། ཅེས་གསུངས་འདུག

ཡང་གསུང་འཕྲིན་ནང་། སྐུ་ཉིད་ཀྱིས་དབུ་འཁྲིད་དེ་མི་གཞན་ལ་ཞབས་འདེགས་ཞུས་པར་གུས་བརྩི་ཆེན་པོ་བྱེད་བཞིན་ཡོད་ལ། སྐུ་ཉིད་ནི་ཉི་ཧོང་གི་དུས་ཡུན་ཆེས་རིང་བའི་སྲིད་བློན་དང་། ཉིད་ཀྱིས་རང་གི་རྒྱལ་ཁབ་དེ་འཛམ་གླིང་ཡོངས་ནས་གུས་བརྩི་བྱ་ཡུལ་ཞིག་ཏུ་བསྐྲུན་ཡོད་པ་རེད། ཅེས་གསུངས་འདུག་ལ། ཉི་ཧོང་སྲིད་བློན་ཤིན་ཛོ་ཨ་བྷེ་མཆོག་ནས་ཁོང་གི་ནད་རྙིང་གི་རྐྱེན་གྱིས། མི་མང་གི་བདེ་སྡུག་ཐད་ཐག་གཅོད་ཡག་པོ་མ་ཐུབ་པ་ཡིན་ན། སྲིད་བློན་གྱི་གོ་གནས་ནས་བསྡད་ན་ནོར་འཁྲུལ་ཡིན་སྐོར་གསུངས་ཏེ་རྩ་དགོངས་ཞུས་ཡོད་པ་དང་། སྲིད་བློན་ལས་ཡུན་མ་རྫོགས་གོང་ནས་ཁོང་གིས་དགོངས་པ་ཞུ་དགོས་ཐུག་པར་མི་མང་ལ་དགོངས་སེལ་ཡང་ཞུས་ཡོད་པ་རེད།

ཁོང་གིས་རྩ་དགོངས་ཞུས་པ་དང་འབྲེལ་འཛམ་གླིང་རྒྱལ་ཁབ་ཁག་གི་མཐོ་རིམ་མགོ་འཁྲིད་མང་པོས་ཁོང་གི་འཕྲོད་བསྟེན་གནས་སྟངས་ཇེ་ལེགས་སུ་ཡོང་བའི་ཁམས་འདྲི་གནང་བཞིན་ཡོད་པ་དང་། ཨ་རིའི་སྲིད་འཛིན་ཊོམ་ཕུ་མཆོག་གིས་ཨ་བྷེ་ནི་ངས་ཆེས་གུས་བཀུར་ཞུ་ཡུལ་གྱི་སྲིད་བློན་ཞིག་དང་། ང་རང་སྒེར་གྱི་གྲོགས་པོ་ཡག་ཤོས་ཤིག་ཡིན་པས་ཁོང་སྲིད་བློན་ནས་དགོངས་པ་ཞུ་དགོས་བྱུང་བར་བློ་ཕམ་དང་། ཁོང་གི་ནད་གཞི་མྱུར་ཏུ་དྲག་སྐྱེད་ཡོང་བའི་སྨོན་འདུན་ཞུ་ཡི་ཡོད་ཅེས་གསུངས་ཡོད་པ་དང་། དེ་བཞིན་རྒྱ་གར་སྲིད་བློན་མུ་དྷི་མཆོག་གིས་ཨ་བྷེ་མཆོག་རླབས་ཆེན་གྱི་དབུ་འཁྲིད་དང་ཁོང་རང་སྒེར་གྱི་གྲོགས་པོ་ཞིག་ཡིན་སྐོར་གསུངས་ཡོད་འདུག

ད་ལྟའི་ཆར་སྲིད་བློན་ཨ་བྷེ་མཆོག་གི་རྗེས་འཛིན་མཁན་སུ་ཞིག་ཡོང་མིན་ཐག་གཅོད་བྱུང་མེད་ཀྱང་། ཉི་ཧོང་དམངས་གཙོ་སྲིད་དོན་ཚོགས་པས་བསྒྲགས་པའི་གནས་ཚུལ་ནང་། སྲིད་དབང་འཛིན་མཁན་གསར་པ་དེ་ཕྱི་ཟླ་ ༩་ཚེས་ ༡༥ བར་བདམས་ཐོན་བྱུང་ཚར་བ་གནང་རྒྱུ་ཡིན་སྐོར་བསྒྲགས་ཡོད་པ་དང་། རྒྱལ་སྤྱིའི་སྟེང་ཉི་ཧོང་གི་སྲིད་དབང་འཛིན་མཁན་སུ་ཞིག་ཡོང་མིན་དང་། ཨ་བྷེ་མཆོག་གིས་གློ་བུར་རྩ་དགོངས་ཞུས་པ་དེས་ཉི་ཧོང་ཆབ་སྲིད་ཐད་དཀའ་རྙོག་ཡོང་མིན་གྱི་གླེང་སློང་ཆེན་པོ་བྱེད་བཞིན་ཡོད་པ་རེད།

སྲིད་བློན་ཨ་བྷེ་མཆོག་ཕྱི་ལོ་ ༢༠༠༦ ལོར་ཉི་ཧོང་གི་སྲིད་བློན་དུ་བདམས་ཐོན་བྱུང་བ་ནས། འདས་པའི་ལོ་ངོ་ ༡༥ རིང་ཉི་ཧོང་གི་སྲིད་བློན་ལས་ཁུར་ཞུས་ཏེ། ཉི་ཧོང་ལོ་རྒྱུས་ཁྲོད་སྲིད་བློན་གྱི་ཞབས་ཞུའི་དུས་ཡུན་རིང་ཤོས་ཆགས་ཡོད་པ་རེད། ཨ་བྷེ་མཆོག་གི་སྲིད་བློན་དུས་ཡུན་རིང་ཉི་ཧོང་གི་དཔལ་འབྱོར་དང་དམག་དོན་གནས་བབ་ཡར་རྒྱས་ཤུགས་ཆེན་སོང་ཡོད་པ་རེད།

གསར་འགོད་པ། སངས་རྒྱས་དཀོན་མཆོག

The post ༧གོང་ས་མཆོག་ནས་ཉི་ཧོང་སྲིད་བློན་མཆོག་ལ་ཐུགས་སྨོན་གསུང་འཕྲིན་བསྩལ། appeared first on བོད་ཀྱི་དུས་བབ།.

རྒྱ་ནག་གཞུང་གིས་ཤིན་ཅང་ཡུ་གུར་མི་རིགས་རྩ་མེད་གཏོང་བའི་སྲིད་བྱུས་ལག་བསྟར་བྱེད་ཀྱི་ཡོད་པའི་གནས་ཚུལ་རིམ་པར་ཐོན་ཡོད་པ་ལྟར་ཡུ་གུར་གྱི་བུད་མེད་ཚོར་སྐྱེ་སྒོ་གཏན་འགོག་དང་གསར་དུ་སྐྱེས་པའི་བྱིས་པ་གསོད་པ་སོགས་བྱེད་ཀྱི་ཡོད་པའི་ཞིབ་འཇུག་སྙན་ཐོ་བཏོན།

འཇར་མན་གྱི་མི་རྒྱུད་རིག་པ་བ་དང་ཤིན་ཅང་ཁུལ་གྱི་སློབ་གསོ་བསྒྱུར་བཀོད་ཁང་གི་སྐོར་ལ་ཆེད་མཁས་པ་སྐུ་ཞབས་ཨ་ཌི་རན་རྫན་(Adrian Zenz)ལགས་ཀྱིས། རྒྱ་ནག་གིས་ཤིན་ཅང་ཁུལ་དུ་ལག་བསྟར་བྱེད་བཞིན་པའི་སྲིད་བྱུས་ཐོག་ཉམས་ཞིབ་བྱས་ཏེ་སྙན་ཐོ་ཞིག་བཏོན་པའི་ནང་། ད་ལྟ་རྒྱ་ནག་གཞུང་གིས་ཤིན་ཅང་ཁུལ་གྱི་ཡུ་གུར་བུད་མེད་རྣམས་ཀྱི་སྐྱེ་སྒོ་གཏན་འགོག་བྱས་ཏེ། ཡུ་གུར་མི་རིགས་འཕེལ་རྒྱས་ལ་དྲག་གནོན་དང་། བཙན་དབང་གིས་མངལ་ཆགས་པའི་སྦྲུལ་མ་རྣམས་ཀྱི་བྱིས་པ་མེད་པར་བཟོ་བ་དང་སྐྱེ་སྒོ་ཚོད་འཛིན་གྱི་གཏན་འབེབ་ཁྲིམས་ཟེར་བ་ལས་བརྒལ་ཡོད་ཚེ། གསར་དུ་སྐྱེས་པའི་བྱིས་པའང་གསོད་ཀྱི་ཡོད་པའི་གནས་ཚུལ་སོགས་ཐེར་འདོན་གནང་འདུག

ཡང་སྙན་ཐོ་དེའི་ནང་། ཕྱི་ལོ་ ༢༠༡༥ ནས་ ༢༠༡༩ བར་ཤིན་ཅང་ཁུལ་གྱི་མི་འབོར་འཕེལ་ཚད་བརྒྱ་ཆ་ ༨༤ མར་ཆག་ཡོད་པ་དང་། ཕྱི་ལོ་ ༢༠༢༠ ལོར་མི་འབོར་འཕེལ་ཚད་ཀླད་གོར་དུ་དམིགས་འབེན་འཛིན་བཞིན་ཡོད་སྐོར་དང་། ཕྱི་ལོ་ ༢༠༡༩ ལོར་རྒྱ་ནག་གིས་ཡུ་གུར་གྱི་གྲོང་གསེབ་ཁག་གཉིས་ཀྱི་གཉེན་སྒྲིག་ཟིན་པའི་བུད་མེད་ཀྱི་བརྒྱ་ཆ་ ༣༤ ཡི་སྐྱེ་སྒོ་གཏན་འགོག་ལག་བསྟར་བྱས་ཡོད་པ་དང་། ཕྱི་ལོ་ ༢༠༢༠ ལོར་རྒྱ་ནག་གིས་ལས་གཞི་དེར་རོགས་དངུལ་ཇེ་མང་དུ་བཏང་སྟེ། ཡུ་གུར་གྱི་གྲོང་གསེབ་ཁག་ཡོངས་ཀྱི་གཉེན་སྒྲིག་ཟིན་པའི་བུད་མེད་ཀྱི་བརྒྱ་ཆ་ ༢༠ ཡི་སྐྱེ་སྒོ་གཏན་འགོག་ལག་བསྟར་བྱེད་བཞིན་ཡོད་པ་མ་ཟད། ཤིན་ཅང་གི་ལྷོ་རྒྱུད་ས་ཁུལ་ཡོངས་ལ་ལག་བསྟར་དམིགས་འབེན་བཟུང་ཡོད་སྐོར། དེ་བཞིན།

ཕྱི་ལོ་ ༢༠༡༨ ལོར་རྒྱ་ནག་གིས་ཡུ་གུར་རང་སྐྱོང་ཁུལ་དུ་སྐྱེ་སྒོ་གཏན་འགོག་གི་ལས་གཞི་ཤུགས་ཆེན་སྤེལ་བ་ཡོངས་བསྒྲགས་བྱས་ཡོད་པ་དང་། ཕྱི་ལོ་ ༢༠༡༩ ལོར་ཤིན་ཅང་ས་གནས་སྲིད་གཞུང་གིས་ལྷོ་རྒྱུད་ཀྱི་གྲོང་གསེབ་ཁག་བཞིའི་སྐྱེ་ནུས་ལྡན་པའི་བུད་མེད་བརྒྱ་ཆ་ ༨༠ ཡི་སྐྱེ་སྒོ་གཏན་འགོག་བྱེད་པའམ་མོ་མཚན་ནང་སྐྱེ་འགོག་ཞ་ཉེ་བཞག་ཡོད་སྐོར་སོགས་བརྗོད་ཡོད་འདུག

ཡུ་གུར་རང་སྐྱོང་ཁུལ་དུ་ལོ་ངོ་ ༡༥ རིང་སྦྲུལ་མ་གསོ་བཅོས་ཀྱི་སྨན་པ་བྱེད་མྱོང་མཁན་(Hasiyet Abdulla)ལགས་ཀྱིས། སྨན་ཁང་ཚང་མར་འཆར་ལྡན་བུ་སྐྱེ་ཡི་སྲིད་བྱུས་ལག་བསྟར་ཚན་པ་ཡོད་པ་དང་། ཚན་པ་དེས་བུད་མེད་སུ་ཞིག་ལ་བྱིས་པ་ག་ཚོད་ཡོད་པ་དང་ག་དུས་སྐྱེས་པ་སོགས་ཀྱི་རྒྱབ་ལྗོངས་ཚང་མ་རྒྱུས་ལོན་བྱས་ཏེ་སྐྱེ་འགོག་སྲིད་བྱུས་ལག་བསྟར་བྱེད་དགོས་ཀྱི་ཡོད། ཅེས་དང་། སྒྲིག་ཁྲིམས་ཧ་ཅང་བཙན་པོ་ཡོད། བུད་མེད་ཅིག་གིས་བྱིས་པ་ཞིག་སྐྱེས་རྗེས་བར་ཐག་ལོ་ ༣ ནས་ ༤ བར་ངེས་པར་དུ་འཇོག་དགོས་པ་དང་། གོང་རིམ་གྱི་བཀའ་ལྟར་ང་ཚོས་བྱིས་པ་སྐྱེས་ཚད་མ་ལོན་པ་དང་བྱིས་པ་ཁག་ཅིག་སྐྱེས་པ་དང་གསོད་དགོས་ཀྱི་ཡོད། གལ་སྲིད་བཀའ་དང་ལེན་མ་བྱས་ཚེ་སྨན་ཁང་ལ་ཆད་པ་ཕོག་གི་ཡོད། ཅེས་བརྗོད་ཡོད་འདུག

གཞན་ཡང་ཕྱི་ལོ་ ༢༠༡༨ ལོར་རྒྱ་ནག་གཞུང་གིས་རྒྱལ་ཡོངས་ཀྱི་སྐྱེ་འགོག་ཞ་ཉེ་འཇོག་པའི་ལས་རིགས་བརྒྱ་ཆ་ ༨༠ ཤིན་ཅང་ནས་སྤེལ་ཡོད་སྟབས། ལོ་དེར་ཤིན་ཅང་ཁུལ་དུ་ལོ་ན་ ༡༨ ནས་ ༤༩ བར་གྱི་ཡུག་མོ་དང་ཟླ་མཚན་ཆད་པའི་བུད་མེད་ལྡབ་འགྱུར་གྱིས་ཇེ་མང་དུ་ཕྱིན་ཡོད་པ་དང་། ཉམས་ཞིབ་པས་དེ་ནི་སློབ་གསོ་བསྒྱུར་བཀོད་ཁང་དུ་བུད་མེད་དེ་ཚོའི་ཁྱོ་ག་ཤི་བའམ་ཡང་ན་བུད་མེད་ཀྱི་ཟླ་མཚན་གཏན་གཅོད་དམ་གནས་སྐབས་བཀག་འགོག་བྱེད་པའི་སྨན་ཁབ་བརྒྱབས་ཡོད་པ་བསྟན་ཡོད་པའི་འགྲེལ་བརྗོད་བྱས་འདུགཡང་མི་འབོར་འཕེལ་རྒྱས་ཀྱི་གནད་དོན་དང་འབྲེལ་སྙན་ཐོའི་ནང་། ཕྱི་ལོ་ ༢༠༡༥ ནས་ ༢༠༡༨ བར་ཤིན་ཅང་ཁུལ་དུ་ཡོད་པའི་་རྒྱ་རིགས་གྲངས་འབོར་འབུམ་ ༦ དང་ཕྱེད་ཀ་ལྷག་ཤིན་ཅང་ནས་གནས་སྤོས་བྱས་ཡོད་ཀྱང་། ཁོ་ཚོའི་ཚབ་ཏུ་རྒྱ་ནག་གཞུང་གིས་རྒྱ་རིགས་མི་འབོར་ས་ཡ་ ༢ གནས་སྤོར་བྱེད་དུ་བཅུག་ཡོད་པ་དང་། ཕྱི་ལོ་ ༢༠༡༨ ལོའི་མི་འབོར་འཕེལ་ཚད་ཀྱི་གྲངས་འབོར་ལྟར་ན། ཤིན་ཅང་ཁུལ་གྱི་རྒྱ་མི་རིགས་ཀྱི་གྲངས་འབོར་ནི་ཡུ་གུར་བའི་མི་འབོར་ལས་ལྡབ་ ༨ ཀྱིས་མང་བ་ཆགས་ཡོད་སྟབས། གྲངས་འབོར་དེས་ཤིན་ཅང་ཁུལ་དུ་རྒྱ་ནག་གིས་མི་སེར་སྤེལ་ཡུལ་གྱི་སྲིད་བྱུས་ལག་བསྟར་བྱེད་བཞིན་པ་བསྟན་ཡོད་སྐོར་བརྗོད་འདུག

ཞིབ་འཇུག་སྙན་ཐོ་ལྟར་ན། རྒྱ་ནག་གི་འཆར་ལྡན་བུ་སྐྱེ་ཡི་སྲིད་བྱུས་ཁྲོད། ད་ལྟ་བྱིས་པ་གསུམ་དང་དེའི་ཡན་གྱི་བྱིས་པ་ཡོད་པའི་ཡུ་གུར་བུད་མེད་རྣམས་ཀྱི་སྐྱེ་སྒོ་གཏན་འགོག་བྱེད་ཀྱིན་ཡོད་པ་དང་། བུད་མེད་ཁག་ཅིག་ལ་བྱིས་པ་ ༢ ལས་མེད་ཀྱང་སྐྱེ་སྒོ་འགོག་གི་ཡོད་པ་དང་། གལ་སྲིད་རྒྱ་ནག་གི་གཏན་འབེབ་སྒྲིག་ཁྲིམས་ཟེར་བ་དེ་དང་བརྒལ་བ་ཡིན་ན། གྲངས་ཉུངས་མི་རིགས་ཀྱི་བུད་མེད་ཚོར་ཉེས་ཆད་ནན་མོ་གཏོང་གི་ཡོད་པ་མ་ཟད། བྱིས་པ་སྐྱེས་གྲབས་ཡོད་མེད་ལ་མ་ལྟོས་པར་མངལ་གྱི་བྱིས་པའང་མེད་པར་བཟོ་ཡི་ཡོད་འདུག

འདི་ལོའི་ཕྱི་ཟླ་ ༦ པའི་ནང་། ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་གིས། རྒྱ་ནག་གིས་ཤིན་ཅང་ཁུལ་དུ་བུད་མེད་ཀྱི་སྐྱེ་སྒོ་གཏན་འགོག་བྱེད་བཞིན་པ་ནི་ཡུ་གུར་ཁ་ཆེ་གྲངས་ཉུང་མི་རིགས་ཀྱི་རིགས་རྒྱུད་རྩ་མེད་གཏོང་ཆེད་དུ་ཡིན་པའི་སྐྱོན་བརྗོད་གནང་ཡོད་པ་དང་སྦྲགས། ཨ་རིའི་གཞུང་གིས་གནད་དོན་དེའི་ཐོག་ཞིབ་འཇུག་བྱས་ཏེ། རྒྱལ་ཚོགས་ཀྱི་རིགས་རྒྱུད་རྩ་མེད་ཀྱི་གྲོས་ཡིག་གཞིར་བཟུང་། ཡུ་གུར་ཁ་ཆེ་གྲངས་ཉུང་མི་རིགས་ཀྱི་རིགས་རྒྱུད་རྩ་མེད་གཏོང་བའི་སྲིད་བྱུས་མཚམས་འཇོག་དང་སྲུང་སྐྱོབ་དགོས་པའི་འབོད་སྐུལ་ཞུས་གནང་ཡོད་འདུག

གསར་འགོད་པ། སྐལ་བཟང་སྦྱིན་པ།

The post ཤིན་ཅང་ནང་གསར་དུ་སྐྱེས་པའི་བྱིས་པ་ཚོའང་གསོད་ཀྱི་འདུག་ཟེར། appeared first on བོད་ཀྱི་དུས་བབ།.

རྒྱ་ནག་གཞུང་གིས་པེ་ཅིན་གྲོང་ཁྱེར་དུ་བོད་ཀྱི་ལས་དོན་སྐོར་གྱི་ཚོགས་འདུ་ཐེངས་ ༧ པ་ཟེར་བ་དེ་བསྡུས་ནས་བོད་ནང་གི་ཁ་བྲལ་བར་རྒོལ་རྡུང་དང་བོད་ཀྱི་མཐའ་མཚམས་བརྟན་སྲུང་ལ་ཤུགས་སྣོན་དགོས་སྐོར་བསྒྲགས།རྒྱ་ནག་གི་མགོ་འཁྲིད་ཞི་ཅིན་ཕིན་གྱིས་བོད་སྐོར་གྱི་ལས་དོན་ཚོགས་འདུ་ཟེར་བའི་སྟེང་ཏང་གི་རྩ་འཛུགས་དང་སྲིད་དབང་འཛུགས་སྐྱོང་བྱེད་ཤུགས་ཆེ་རུ་བཏང་ནས་རྒྱལ་ཁབ་བདེ་འཇགས་དང་བོད་ལྗོངས་ཡུན་རིང་བདེ་འགོད་ཡོང་བར་འགན་ལེན་ཧུར་ཐག་དང་། བོད་ནང་གི་ཁ་བྲལ་བར་མཐའ་གཅིག་ཏུ་ངོ་རྒོལ་བྱེད་དགོས་སྐོར་དང་། རྒྱ་ནག་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་ཇེ་བརྟན་དུ་གཏོང་དགོས་པར་བཤད།

ཁ་སང་ཕྱི་ཚེས་ ༢༨ ཉིན་ནས་ཉིན་གྲངས་གཉིས་རིང་། རྒྱ་ནག་དམར་ཤོག་ཚོགས་པའི་བོད་སྐོར་གྱི་ལས་དོན་ཚོགས་འདུ་ཐེངས་བདུན་པ་ཟེར་བ་དེ་རྒྱ་ནག་པེ་ཅིན་གྲོང་ཁྱེར་དུ་འཚོག་བཞིན་ཡོད་པ་དང་། ཚོགས་འདུའི་ཐོག་རྒྱ་ནག་གི་མགོ་འཁྲིད་ཞི་ཅིན་ཕིན་དང་སྲིད་བློན་ལི་ཁེ་ཆྰང་། རྒྱལ་ཡོངས་སྲིད་གྲོས་ཀྱི་ཚོགས་གཙོ་ཝང་དབྱང་གཙོའི་བོད་རང་སྐྱོང་ལྗོངས་ཀྱི་ཏང་སྲིད་འགོ་འཁྲིད་དང་། ད་དུང་མཚོ་སྔོན་དང་ཟི་ཁྲོན་སོགས་རྒྱ་ནག་གི་ཞིང་ཆེན་ཁག་གི་ནང་བཅད་བགོས་བྱས་པའི་བོད་རིགས་རང་སྐྱོང་ས་ཁུལ་གྱི་མགོ་འཁྲིད་སོགས་མཉམ་ཞུགས་བྱས་ཡོད་འདུག

རྒྱ་ནག་གཞུང་འབྲེལ་ཀྲུང་གོའི་བོད་ལྗོངས་ཟེར་བས་ཞི་ཅིན་ཕིན་གྱི་གཏམ་བཤད་སྤེལ་བའི་ནང་།  དུས་རབས་གསར་པ་དང་ལས་འགན་གསར་པའི་མདུན་དུ། ཏང་གི་རྩ་འཛུགས་དང་སྲིད་དབང་འཛུགས་སྐྱོང་བྱེད་ཤུགས་ཆེ་རུ་བཏང་ནས། རྒྱལ་ཁབ་བདེ་འཇགས་དང་བོད་ལྗོངས་ཡུན་རིང་བདེ་འགོད་ཡོང་བར་འགན་ལེན་ཧུར་ཐག་བྱ་དགོས་ཤིང་། མི་དམངས་ཀྱི་འཚོ་བའི་ཆུ་ཚད་རྒྱུན་ཆད་མེད་པར་མཐོ་རུ་གཏོང་བ་དང་། མཐའ་སྲུང་སྲ་བརྟན་དང་མཐའ་མཚམས་བདེ་འཇགས་འགན་ལེན་བཅས་བྱས་ཏེ་མཐུན་སྒྲིལ་འབྱོར་ཕྱུག་དང་། ཤེས་དཔལ། ཞི་མཐུན། མཛེས་སྡུག་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་ཧུར་ཐག་གིས་བསྐྲུན་དགོས་སྐོར་བརྗོད་འདུག

ཡང་ཁོས། ངེས་པར་དུ་དུས་རབས་གསར་པའི་ཏང་གི་བོད་སྐྱོང་ཐབས་ཇུས་ཕྱོགས་ཡོངས་ནས་ལག་བསྟར་བྱས་ཏེ། ཕྱོགས་ཡོངས་བཞིའི་འཐབ་ཇུས་བཀོད་སྒྲིག་ལ་མཐུན་སྦྱོར་སྐུལ་འདེད་གཏོང་རྒྱུ་མཐའ་འཁྱོངས་བྱེད་དགོས་པ་དང་། རྒྱ་ནག་མི་རིགས་ཀྱི་གཅིག་མཐུན་འདུས་གྲུབ་ཀྱི་འདུ་ཤེས་ཇེ་བརྟན་དུ་གཏོང་བ་དང་། འཕེལ་རྒྱས་ཀྱི་སྤུས་ཚད་མཐོ་རུ་གཏོང་བ། དམངས་འཚོ་འགན་སྲུང་དང་ལེགས་བཅོས་བྱེད་པ། སྐྱེ་ཁམས་དཔལ་ཡོན་འཛུགས་སྐྲུན་ལ་སྐུལ་འདེད་གཏོང་བ་བཅས་བྱ་དགོས་སྐོར་བརྗོད་ཡོད་འདུག

ཚོགས་འདུ་དེ་ནི་རྒྱ་ནག་དམར་ཤོག་ཚོགས་པས་ཕྱི་ལོ་ ༢༠༡༧ ལོར་བོད་སྐོར་གྱི་ཚོགས་འདུ་དྲུག་པ་ཟེར་བ་ཚོགས་པ་ནས། རྒྱ་ནག་ནང་ཏོག་དབྱིབས་གཉན་རིམས་བྱུང་བཞིན་པའི་བར་སྐབས་ཤིག་ལ་ཚོགས་ཡོད་པ་དང་། ཚོགས་འདུ་དེ་མ་ཚོགས་སྔོན་ལ་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཝུའི་དབྱང་ཅེ་ཟེར་བས། ཏང་གི་ཆབ་སྲིད་སློབ་ཚན་ཚོགས་འདུ་ཟེར་བ་དང་བསྟུན་ནས། བོད་མི་ཚོས་ཏཱ་ལའི་བླ་མ་དང་ཁ་བྲལ་བའི་སིམ་འཛུལ་ལ་མཐའ་གཅིག་ཏུ་ཕལ་རྒོལ་དང་། བརྟན་ལྷིང་སྲུང་སྐྱོང་། མཐའ་སྲུང་སྲ་བརྟན་སོགས་ཀྱི་ལས་དོན་སྔར་ལས་ཡག་པོ་ཡོང་དགོས་པའི་གཏམ་བཤད་བྱས་ཡོད་པ་རེད།

རྒྱ་ནག་གཞུང་གིས་ད་བར་བོད་ཀྱི་ལས་དོན་བཞུགས་མོལ་ཚོགས་འདུ་ཐེངས་ཁ་ཤས་ལ་ཚོགས་ཡོད་ཀྱང་། ཕྱི་ལོ་ ༢༠༡༥ ལོའི་བོད་ཀྱི་བཞུགས་མོལ་ཚོགས་འདུ་ཟེར་བའི་སྟེང་རྒྱ་ནག་གི་མགོ་འཁྲིད་ཞི་ཅིན་ཕིན་མཉམ་ཞུགས་ཀྱིས་བོད་དོན་སྐོར་ལ་གཏམ་བཤད་བྱེད་སྐབས།  ངེས་པར་དུ་བོད་རང་སྐྱོང་ལྗོངས་སྤྱི་ཚོགས་ཀྱི་འགལ་ཟླ་གཙོ་བོ་དང་དམིགས་བསལ་འགལ་ཟླ་སྟངས་འཛིན་ནན་པོ་ཐུབ་པ་བྱས་ཏེ། ཏཱ་ལའི་རུ་ཚོགས་དང་འཐབ་རྩོད་སྲིད་བྱུས་ལ་གཡོ་འགུལ་མི་གཏོང་རྒྱུ་མཐའ་འཁྱོངས་བྱེད་དགོས་པ་དང་།  ངེས་པར་དུ་རྒྱ་ནག་གི་མི་རིགས་སྲིད་བྱུས་དང་ཆོས་ལུགས་སྲིད་བྱུས་ཕྱོགས་ཡོངས་ནས་ལག་བསྟར་ཡང་དག་བྱེད་པ་དང་། རྒྱལ་ནང་དང་རྒྱལ་སྤྱི་གཉིས་ཀྱི་ཁྲོད་བོད་ཀྱི་ལས་དོན་ཡག་པོ་སྒྲུབ་དགོས་པ། མི་རིགས་ས་ཁོངས་རང་སྐྱོང་ལམ་ལུགས་མཐའ་འཁྱོངས་བཅས་བྱེད་དགོས་ཟེར་བ་དང་། རྒྱལ་ཁབ་སྐྱོང་བར་ངེས་པར་དུ་མཐའ་མཚམས་སྐྱོང་བ་དང་།  མཐའ་མཚམས་སྐྱོང་བར་སྔོན་ལ་བོད་ལ་བརྟན་བརླིང་ཡོང་བ་བྱེད་དགོས་སྐོར་སོགས་བརྗོད་ཡོད་པ་རེད།

འདི་ལོའི་ཕྱི་ཟླ་ ༥ ནང་རྒྱ་ནག་གཞུང་གིས་ཆེད་མངགས་བོད་འབྲེལ་ཕྱི་ཕྱོགས་བརྟག་ཞིབ་ཚོགས་ཆུང་ཟེར་བ་ཞིག་བོད་ཀྱི་རྒྱལ་ས་ལྷ་སར་བཏང་སྟེ། བོད་རང་སྐྱོང་ལྗོངས་ཀྱི་མགོ་ཁྲིད་ཚོ་དང་མཉམ་དུ་ཚོགས་འདུ་ཚོགས་ཏེ། བོད་དང་འབྲེལ་བའི་ཕྱི་ཕྱོགས་ལས་དོན་གྱི་ཇུས་ཆེན་ཟེར་བ་ཞིག་ལ་གྲོས་བསྡུར་བྱས་ཡོད་པ་དང་།  ཚོགས་འདུའི་སྟེང་རྒྱ་ནག་ཕྱི་འབྲེལ་ལས་ཁུངས་ཀྱི་དམར་ཤོག་ཚོགས་པའི་དྲུང་ཆེ་ཆི་ཡུས་ཟེར་བས། བོད་དང་འབྲེལ་བ་ཡོད་པའི་ཕྱི་ཕྱོགས་ལས་དོན་ནི་རྒྱལ་ཁབ་སྤྱི་ཡོངས་ཀྱི་ཕྱི་འབྲེལ་ལྷུ་ཚིགས་གལ་ཆེན་ཞིག་ཆགས་ཡོད་པས། བོད་དང་འབྲེལ་བ་ཡོད་པའི་འཐབ་རྩོད་ཀྱི་རྙོག་འཛིང་དང་ཛ་དྲག་གི་དུས་བབ་ལ་ངོས་འཛིན་གཏིང་ཟབ་བྱས་ཏེ། རྒྱལ་ཁབ་བདེ་འཇགས་ཆེད་འཐབ་རྩོད་དགོས་སྐོར་བརྗོད་འདུག

གསར་འགོད་པ། སངས་རྒྱས་དཀོན་མཆོག

The post རྒྱ་ནག་གིས་བོད་ཀྱི་ལས་དོན་སྐོར་གྱི་ཚོགས་འདུ་ཟེར་བ་ཚོགས། appeared first on བོད་ཀྱི་དུས་བབ།.

ཐའེ་ཝན་དང་ཅེག་སྤྱི་མཐུན་རྒྱལ་ཁབ་གཉིས་ནི་འགྲོ་བ་མིའི་ཐོབ་ཐང་གཙོར་འཛིན་བྱེད་མཁན་དམངས་གཙོའི་རྒྱལ་ཁབ་གཉིས་ཡིན་པས་རྒྱ་ནག་གཞུང་ལ་མགོ་འདོགས་དགོས་དོན་གང་ཡང་མེད་པའི་ལན་འདེབས་གནང་།ཁ་སང་ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་ཀྱི་ཚོགས་གཙོ་མེ་ལོ་སི་(Milos Vystrcil) ལགས་ཐའེ་ཝན་དུ་གཞུང་འབྲེལ་ཕྱོགས་སྐྱོད་དུ་ཕེབས་ཏེ། ཐའེ་ཝན་དང་ཅེག་སྤྱི་མཐུན་རྒྱལ་ཁབ་གཉིས་བར་གྱི་འབྲེལ་ལམ་གོང་འཕེལ་དུ་གཏོང་རྒྱུ་ཡིན་པ་མ་ཟད།  ཅེག་སྤྱི་མཐུན་རྒྱལ་ཁབ་ཀྱིས་རྒྱ་ནག་གཞུང་ལ་མགོ་འདོགས་བྱ་རྒྱུ་མིན་པའི་ཐ་ཚིག་བསྒྲགས་པར་བརྟེན། དེ་རིང་རྒྱ་ནག་གཞུང་གིས། ཅེག་སྤྱི་མཐུན་རྒྱལ་ཁབ་ཀྱིས་རྒྱ་ནག་གཅིག་གི་སྲིད་བྱུས་ལ་རྡོག་རོལ་བཏང་སྟེ། ཐའེ་ཝན་དུ་གཞུང་འབྲེལ་ཕྱོགས་སྐྱོད་བྱས་པར་ཡ་ལན་ངེས་ཅན་སློག་རྒྱུ་ཡིན་པའི་ཉེན་བརྡ་བཏང་འདུག

དེ་ཡང་རྒྱ་ནག་གི་ཕྱི་སྲིད་བློན་ཆེན་ཝང་ཡེ་ཟེར་བས། ཅེག་སྤྱི་མཐུན་རྒྱལ་ཁབ་ཀྱི་གྲོས་ཚོགས་ཚོགས་གཙོ་མེ་ལོ་སི་ཡིས། མཐོང་རྒྱ་ཆུང་བའི་བྱ་སྤྱོད་དང་ཆབ་སྲིད་ཀྱི་གོ་སྐབས་བཟུང་སྟེ་རྒྱ་ནག་ལ་འཛེམ་མེད་ཀྱིས་ཉེན་བརྡ་བཏང་བར། རྒྱ་ནག་གཞུང་དང་རྒྱ་ནག་མི་མང་རང་སོར་འདུག་རྒྱུ་མིན་པ་མ་ཟད། ཐའེ་ཝན་དུ་གཞུང་འབྲེལ་ཕྱོགས་སྐྱོད་བྱས་པར་རྒོལ་ལན་ཉེས་ཆད་གཅོད་རྒྱུ་ཡིན། ཞེས་བརྗོད་ཡོད་པ་དང་། རྒྱ་ནག་གིས་ཅེག་གྲོས་ཚོགས་ཀྱི་ཚོགས་གཙོ་ལགས་སུ་ཉེས་ཆད་ཇི་ལྟར་གཅོད་ཐུབ་ཀྱི་ཡོད་པའི་ཞིབ་ཕྲའི་གནས་ཚུལ་གང་ཡང་འགྲེལ་བརྗོད་བྱས་མེད་པ་རེད།

དེའི་རྗེས་ཅེག་གྲོས་ཚོགས་ཚོགས་གཙོ་ལགས་ཀྱིས་རྒྱ་ནག་ལ་ལན་འདེབས་བྱས་ཏེ། ང་ཚོ་ནི་རང་དབང་ལྡན་པའི་རྒྱལ་ཁབ་ཅིག་ཡིན་པ་དང་འཛམ་གླིང་རྒྱལ་ཁབ་ཚང་མར་བཟང་ཕྱོགས་ཀྱི་འབྲེལ་ལམ་འཛུགས་འདོད་ཡོད་པས། རྒྱ་ནག་ཕྱི་སྲིད་བློན་ཆེན་གྱིས་གཏམ་ག་རེ་བསྒྲགས་ཀྱང་། ང་ཚོས་མུ་མཐུད་འབྲེལ་ལམ་རྒྱུན་སྐྱོང་བྱ་རྒྱུ་ཡིན་ལ། ངས་བསྐྱར་དུ་བཤད་རྒྱུ་ཞིག་ལ་ད་རེས་ཀྱི་སྐོར་སྐྱོད་འདི་བརྒྱུད་མི་སུ་གཅིག་ལའང་ཆབ་སྲིད་ཀྱི་ཁ་གཏད་སློང་གི་མེད། ཅེས་བརྗོད་ཡོད་པ་དང་། ཐའེ་ཝན་དཔལ་འབྱོར་བློན་ཆེན་ཝང་མེ་ཧྥོའོ་ལགས་ཀྱིས། ཐའེ་ཝན་དང་ཅེག་སྤྱི་མཐུན་རྒྱལ་ཁབ་གཉིས་ནི་འགྲོ་བ་མིའི་ཐོབ་ཐང་གཙོར་འཛིན་བྱེད་པའི་དམངས་གཙོའི་རྒྱལ་ཁབ་གཉིས་ཡིན་པ་དང་། ཐའེ་ཝན་ལ་ཅེག་ནང་བཞིན་གྱི་རིན་ཐང་ཡོད། ཅེས་བརྗོད་ཡོད་པ་རེད།

ཅེག་གྲོས་ཚོགས་ཀྱི་ཚོགས་གཙོ་ལགས་ཀྱིས། རྒྱ་ནག་ལ་ཐད་ཀར་ལན་འདེབས་བྱས་མེད་ཀྱང་། ཐའེ་ཝན་དང་ལྷན་དུ་ཚོང་འབྲེལ་གོང་འཕེལ་གཏོང་རྒྱུ་གཙོས་པའི་རང་དབང་དང་དམངས་གཙོ་ནི་འཕེལ་རྒྱས་ཀྱི་རྩ་བ་ཡིན་པ་སོགས་ཀྱི་གཏམ་བཤད་སྤེལ་ཡོད་པ་རེད།

ཅེག་གྲོས་ཚོགས་ཀྱི་ཚོགས་གཙོ་མེ་ལོ་སི་ལགས་ཁ་སང་ཕྱི་ཚེས་ ༣༠ ཉིན་ནས་ཕྱི་ཟླ་ ༩ ཚེས་ ༤ བར་གྱི་ཉིན་གྲངས་ ༦ རིང་ཐའེ་ཝན་དུ་སྐོར་སྐྱོད་གནང་གི་ཡོད་པ་དང་། སྐོར་སྐྱོད་ཁྲོད་ཐའེ་ཝན་དང་ཅེག་གཉིས་ཀྱི་ཚོང་འབྲེལ་གཙོས་པའི་མཉམ་འབྲེལ་དང་རིག་གཞུང་སོགས་ཀྱི་སྐོར་ལ་གྲོས་བསྡུར་དང་། ཐའེ་ཝན་གྱི་སྲིད་འཛིན་ལྕམ་ཚའེ་ཡེན་ཝུན་མཆོག་དང་ཐུག་འཕྲད་དང་ཐའེ་ཝན་གྲོས་ཚོགས་ནང་གཏམ་བཤད་སོགས་གནང་འཆར་ཡོད་འདུག་ལ། རྒྱ་ནག་དང་ཅེག་སྤྱི་མཐུན་རྒྱལ་ཁབ་བར་ཕྱི་ལོ་ ༢༠༡༣ ལོར་ཚོང་འབྲེལ་བཙུགས་ཡོད་ཀྱང་། མ་དངུལ་འཛུགས་མ་ཐུབ་པའི་དཀའ་ངལ་འོག་འབྲེལ་ལམ་ཆད་ཡོད་འདུག

གསར་འགོད་པ། སྐལ་བཟང་སྦྱིན་པ།

The post ཅེག་གཞུང་གིས་ཐའེ་ཝན་ནང་གཟིཊ་སྐོར་གནང་བར་རྒྱ་གཞུང་གིས་རྒོལ་ལན་སློག་ངེས་ཡིན་ཟེར། appeared first on བོད་ཀྱི་དུས་བབ།.

རྒྱ་གར་ནང་མི་གྲངས་ས་ཡ་གསུམ་དང་ཕྱེད་ཀ་ལྷག་ལ་ཏོག་དབྱིབས་གཉན་རིམས་འགོས་པ་དང་མི་གྲངས་ཁྲི་ ༦ ལྷག་འདས་གྲོངས་སུ་ཕྱིན་ཡོད་འདུགརྒྱ་གར་ནང་ཉིན་རེར་ཏོག་དབྱིབས་ནད་པའི་གྲངས་འབོར་ཧ་ཅང་འཕར་བཞིན་ཡོད་ཀྱང་། དཔལ་འབྱོར་བསྐྱར་གསོའི་ཆེད་བཀག་རྒྱ་ཕལ་ཆེ་བ་ལྷོད་ཡངས་སུ་བཏང་ཡོད་སྟབས། ཁ་སང་ཕྱི་ཚེས་ ༣༠ ཉིན་གཅིག་པུར་རྒྱ་གར་རྒྱལ་ཡོངས་ནང་ཏོག་དབྱིབས་ནད་པ་གསར་པ་ ༧༨༧༦༡ ཐོན་པར་བརྟེན། ད་བར་ཉིན་གཅིག་ནང་ཏོག་དབྱིབས་ནད་པ་ཐོན་གྲངས་མང་ཤོས་ཀྱི་རྒྱལ་ཁབ་དེ་ཆགས་ཡོད་འདུག

ཁ་སང་སྲིད་བློན་མུ་དྷི་མཆོག་གིས་རྒྱུན་ལྡན་རླུང་འཕྲིན་ལས་རིམ་ནང་ནད་པའི་ཐོན་གྲངས་སྐོར་གང་ཡང་གསུངས་མེད་ཀྱང་། རྒྱ་གར་གྱི་མི་སེར་ཚང་མའི་འཕྲོད་བསྟེན་བདེ་འཇགས་དང་བདེ་སྐྱིད་ངང་གནས་རྒྱུ་གལ་ཆེན་པོ་ཡིན་ལ། ང་ཚོ་ཚང་མས་མཉམ་རུབ་ཀྱིས་ནད་ཡམས་འདིར་ཁ་གཏད་ཡོངས་སུ་གཅོག་དགོས། ཞེས་དང་།  གལ་ཏེ་ཁྱེད་ཀྱིས་རང་ཉིད་ཀྱི་འཕྲོད་བསྟེན་ལ་བདེ་འཇགས་དང་ཕན་ཚུན་བར་རྒྱང་ཐག་བཀྱེད་ཚེ། ད་གཟོད་ནད་ཡམས་འདིར་ཁ་གཏད་གཅོག་ཐུབ་པ་ཡིན། ཞེས་གསུངས་ཡོད་འདུག

དེ་བཞིན་ཁ་སང་རྒྱ་གར་གྱི་དབུས་འཕྲོད་བསྟེན་བློན་ཆེན་སྨན་པ་ཧར་ཤི་ཝར་དྷན་ (Harsh Vardhan) ལགས་ཀྱིས། རྒྱ་གར་ནང་ཏོག་དབྱིབས་ནད་ཡམས་དེ་འདི་ལོའི་ལོ་མཇུག་བར་སྟངས་འཛིན་བྱ་ཐུབ་རྒྱུའི་གདེང་ཚོད་ཡོད་སྐོར་དང་། ད་ལྟའི་ཆར་རྒྱལ་ཡོངས་ནང་ཉིན་གཅིག་ནང་ནད་ཡམས་བརྟག་དཔྱད་གྲངས་ས་ཡ་ ༡ ལྷག་བྱེད་ཀྱི་ཡོད་པ་དང་། རྒྱལ་ཡོངས་སུ་ནད་ཡམས་བརྟག་དཔྱད་ཁང་ ༡༥༨༣ ལྷག་ཡོད་ཅིང་། རང་སྲུང་གྱོན་ཆས་དང་། དབུགས་སྐྱོར་འཕྲུལ་ཆ་དང་ཁ་རེས་སོགས་འདང་ངེས་ཡོད་པ་མ་ཟད། ད་ལྟའི་ཆར་ཆར་སྔོན་འགོག་སྨན་ཁབ་ཀྱི་ཕན་ནུས་ལ་བརྟག་དཔྱད་བྱེད་མུས་ཡིན་སྐོར་བརྗོད་ཡོད་འདུག སྤྱིར་རྒྱ་གར་གྱི་ Bharat Biotech Vaccine ལྟེ་གནས་ཁང་དང་། རྒྱ་གར་གྱི་དབུས་སྨན་བཅོས་ཞིབ་འཇུག་ཁང་ (ICMR) གཉིས་ཟུང་འབྲེལ་གྱིས་སྒྲུབ་བཞིན་པའི་རྒྱ་གར་རང་གི་སྔོན་ཁབ་ཐོག་མ་ཁོ་ཝ་སིན་ (Covaxin) ཞེས་པ་དེ། མིའི་ལུས་པོར་ཟུར་སྐྱོན་ཕོག་མིན་གྱི་བརྟག་དཔྱད་རིམ་པ་གཉིས་པར་ཐོན་ཡོད་འདུག དེ་བཞིན་རྒྱ་གར་ལ་ཕྱིའི་ལྟེ་གནས་ཁང་དང་མཉམ་འབྲེལ་བརྒྱུད་ཐོབ་ཆ་ཡོད་པའི་ཨོག་སི་ཧྥོ་ཌི་སློབ་ཆེན་ (AZ/Oxford) གྱི་སྔོན་འགོག་སྨན་ཁབ་དང་ཨ་རིའི་ནོ་ཝ་ཝེག་སི་ (Novavax) གཉིས་ཀྱང་བརྟག་དཔྱད་ཀྱི་རིམ་པར་ཞུགས་མུས་ཡིན་འདུག

ཆེད་ལས་འཕྲོད་བསྟེན་མི་སྣས་རྒྱ་གར་ནང་ཏོག་དབྱིབས་ནད་གྲངས་འཕར་བཞིན་པའི་རྒྱུ་མཚན་གཙོ་བོ་ནི། ཏོག་དབྱིབས་ནད་ཡམས་དེ་རྒྱ་གར་གྱི་གྲོང་གསེབ་ཁུལ་དུ་མགྱོགས་པོར་འགོས་ཁྱབ་འགྲོ་བཞིན་པས་ཡིན་སྐོར་བརྗོད་ཡོད་འདུག་ལ། ཡང་ཕྱོགས་གཞན་ནས་རྒྱ་གར་གྱིས་ནད་ཡམས་ཀྱི་ཐོག་མའི་དུས་སྐབས་སུ་རྒྱལ་ཡོངས་ལ་ཁྱིམ་སྡོད་བཀའ་རྒྱ་བསྒྲགས་ཏེ། ཟླ་བ་ ༣ ཙམ་རིང་སྤྱི་དམངས་ཀྱི་འགྲིམ་འགྲུལ་དང་དགོས་ངེས་མ་ཡིན་པའི་ཚོང་དོན་བྱེད་སྒོ་ཕལ་ཆེ་བ་སྒོ་བརྒྱབ་པའི་རྐྱེན་གྱིས། གཞན་དང་བསྡུར་ན་སྟངས་འཛིན་གང་འཚམ་བྱས་ཐུབ་ཡོད་ཀྱང་། དཔལ་འབྱོར་ཉམས་ཉེས་ཀྱི་གཡང་སར་ལྷུང་ཉེན་ལ་འཇིགས་ཏེ། འདི་ལོའི་ཕྱི་ཟླ་ ༦ ཚེས་ ༨ ནས་རྒྱལ་ཡོངས་སྒོ་རྒྱ་འབྱེད་པའི་ (Unlock 1.0) སྲིད་བྱུས་ལག་བསྟར་བྱས་ཡོད་ཅིང་། རིམ་པས་རྒྱལ་ཡོངས་ཀྱི་དཔལ་འབྱོར་འཁོར་རྒྱུག་ལ་གསོན་ཤུགས་རྒྱས་མགོ་བརྩམས་ཡོད་ཀྱང་། ལྡི་ལི་དང་མཱམ་བྷའེ་(Mumbai ) ཡིས་མཚོན་པའི་ཚོང་གི་ལྟེ་བའི་གྲོང་ཁྱེར་ཁག་ཏུ་ནད་ཡམས་ཤུགས་ཆེར་ཁྱབ་ཡོད་ཅིང་། འདས་པའི་བདུན་ཕྲག་འགའ་ཤས་རིང་གྲོང་ཁྱེར་ནས་གྲོང་གསེབ་ཁུལ་དུ་ཁྱབ་མགོ་བཙུགས་ཏེ། ཁ་སང་དྷ་སའི་ཉེ་འཁྲིས་ཀང་ར་རྫོང་གཅིག་པུའི་ནང་ཏོག་དབྱིབས་ནད་པ་གསར་པ་ ༥༡ ཐོན་ཡོད་པ་རེད།རྒྱ་གར་གྱི་སྨན་པ་རཱ་ཇིབ་པཱ་རེག་ (Rajiv Parekh) གྱིས་རུ་ཊར་གསར་ཁང་ལ། མི་རྣམས་ཀྱིས་ནད་པའི་གྲངས་མར་ཆག་མགོ་བཙུགས་པ་དང་། ནད་ཡམས་ཀྱི་དམག་འཐབ་ནང་རྒྱལ་སོང་བསམ་སྟེ། ཚང་མས་ཁ་རེས་མི་གྱོན་པ་དང་། སྤྱི་ཚོགས་རྒྱང་བཀྱེད་མེད་པར་ཕྱིར་ཐོན་ཡོད་པ་རེད། ང་ཚོས་གནས་སྟངས་དེ་ཐོག་མ་ནས་བྱུང་རྒྱུར་བཀག་འགོག་བྱས་དགོས་པ་རེད། ཅེས་མང་ཚོགས་དང་གཞུང་ནས་ལྷོད་གཡེང་བཏང་ཡོད་པའི་བསམ་ཚུལ་བཏོན་ཡོད་ཅིང་། ཡང་སྨན་པ་དང་ཆེད་མཁས་པ་མི་ཉུང་བས་རྒྱ་གར་གྱིས་ད་དུང་ཡང་བརྟག་དཔྱད་ཧ་ཅང་ཉུང་ཉུང་བྱེད་ཀྱི་ཡོད་པ་དང་། འཛམ་གླིང་གི་ནད་ཡམས་མང་ཤོས་ཀྱི་རྒྱལ་ཁབ་བཅུའི་ཁྲོད་ནས། མི་ས་ཡ་རེར་བརྟག་དཔྱད་བྱེད་པའི་གྲངས་འབོར་ལ་ལྟོས་ནས་བཤད་ན། རྒྱ་གར་ད་དུང་ཨང་རིམ་དྲུག་པར་ལུས་ཡོད་སྐོར་བརྗོད་ཀྱིན་འདུག་ལ། གཞན་ཡང་རྒྱ་གར་གྱིས་ཏོག་དབྱིབས་ནད་ཡམས་ཀྱི་ནད་ཐག་ཆོད་པའི་ནད་པ་ཙམ་ལས། དོགས་གཞི་ཅན་གྱི་ནད་པ་རྐྱེན་འདས་སུ་སོང་བ་རྣམས་གཞུང་འབྲེལ་གྲངས་ཐོའི་ནང་འཇུག་གི་མེད་སྟབས། རྒྱ་གར་གཞུང་གིས་གྲངས་ཐོ་དེས་གནས་ཚུལ་དངོས་མཚོན་མིན་ཐད་དོགས་སློང་བྱེད་ཀྱི་ཡོད་འདུག དེ་ཡང་རྒྱ་གར་དང་མེག་སི་ཁོ་ (Mexico) གཉིས་བསྡུར་ཚེ། ད་བར་མེག་སི་ཁོར་ཏོག་དབྱིབས་ནད་པ་ ༥༩༡,༠༠༠ ལས་མེད་པ་དང་། རྒྱ་གར་ལ་མཚོན་ན་དེ་ལས་ལྡབ་འགྱུར་གྱིས་ཁྱོན་ས་ཡ་ ༣ དང་ཕྱེད་ཀ་ལྷག་ཡོད་ཀྱང་། རྐྱེན་འདས་སུ་ཕྱིན་པའི་གྲངས་འབོར་ཐད་ མེག་སི་ཁོར་ ༦༤༤༩༧ དང་རྒྱ་གར་ལ་ ༦༥༤༡༧་བཅས་གཉིས་ཀར་ཁྱད་པར་དེ་ཙམ་མེད་པ་རེད།

རྒྱ་གར་རྒྱལ་ཡོངས་ནང་ཏོག་དབྱིབས་ནད་ཡམས་ཤུགས་ཆེར་འཕར་མིན་ལ་ལྟོས་མེད་ཀྱིས། ཁེ་ཉིན་ཕྱི་ཚེས་ ༢༩ ཉིན་རྒྱ་གར་གཞུང་གིས་སྒོ་རྒྱ་འབྱེད་པའི་རིམ་པ་ ༤ ཟེར་བ་ཞིག་བསྒྲགས་ཏེ། ཕྱི་ཟླ་ ༩ ཚེས་ ༧ ནས་གྲོང་ཁྱེར་ཁག་གི་ས་འོག་མེ་འཁོར་གྱི་ཞབས་ཞུ་མགོ་འཛུགས་རྒྱུ་དང་། དེ་བཞིན་ཕྱི་ཚེས་ ༢༡ ནས་མི་གྲངས་ ༡༠༠ ལས་མི་མང་བའི་སྤྱི་ཚོགས་དང་། ཆབ་སྲིད། ཆོས་ལུགས། རྩེད་རིགས། ཤེས་ཡོན་བཅས་ཀྱི་འདུ་འཛོམས་ཆོག་པ་མ་ཟད། མངའ་སྡེ་དག་གིས་ཛ་དྲག་མིན་པའི་ས་ཁུལ་དག་ལ་ཁྱིམ་སྡོད་བཀའ་རྒྱ་བསྒྲགས་མི་ཆོག་པའི་བཀའ་ཁྱབ་བཏང་ཡོད་འདུག འོན་ཀྱང་སློབ་གྲྭ་དང་། མཐོ་སློབ། ཆུ་བརྐྱལ། གློག་བརྙན་ཁང་སོགས་མུ་མཐུད་སྒོ་བརྒྱབ་དགོས་ཀྱི་ཡོད་འདུག

ད་ལྟའི་ཆར་འཛམ་གླིང་ནང་གི་ཏོག་དབྱིབས་ནད་པ་མང་ཤོས་དེ་ཨ་རིའི་ནང་ཡོད་ཅིང་། ཕྱི་ཟླ་ ༧ ཚེས་ ༡༧ ཉིན་ཨ་རིའི་ནང་ནད་པ་གསར་པ་ ༧༧༢༩༩ ཐོན་ཡོད་པ་དེ། ད་སྔའི་བར་གྱི་ནད་གྲངས་མཐོ་ཤོས་དེ་ཆགས་ཡོད་ཀྱང་། དེའི་རྗེས་བསྟུད་མར་ནད་མནར་ཇེ་ཉུང་དུ་ཕྱིན་ཏེ། རྒྱ་གར་དང་བསྡུར་ན་ཁ་སང་ནད་པ་གསར་པ་ ༤༤༢༦༩ ལས་ཐོན་མེད་པ་རེད། ད་བར་ཨ་རིའི་ནང་ཏོག་དབྱིབས་ནད་པ་ས་ཡ་ ༦ ལས་མང་བ་བྱུང་ཡོད་ཅིང་། དེ་དག་ཁྲོད་ནས་འབུམ་ ༢ མ་ཟིན་ཙམ་རྐྱེན་འདས་སུ་ཕྱིན་ཡོད། ཨ་རིའི་རྗེས་བྷ་ར་ཛིལ་ (Brazil) ནང་ཁྱོན་ནད་པ་ས་ཡ་ ༤ མ་ཟིན་ཙམ་དང་། རྐྱེན་འདས་སུ་སོང་བ་འབུམ་ ༡།༢ བྱུང་ཡོད། རྒྱ་གར་ལ་མཚོན་ན། ད་བར་ནད་མནར་གྱི་གྲངས་ས་ཡ་གསུམ་དང་ཕྱེད་ཀ་ལས་མང་བ་དང་། རྐྱེན་འདས་སུ་ཕྱིན་པའི་མི་གྲངས་ ༦༤༤༦༩ བྱུང་ཡོད་འདུག

གསར་འགོད་པ། པ་སངས་ཚེ་རིང་།

The post ཁ་སང་གཅིག་པུར་རྒྱ་གར་ནང་ཏོག་དབྱིབས་ནད་པ་གསར་པ་ཁྲི་ ༧ ལྷག་བྱུང་། appeared first on བོད་ཀྱི་དུས་བབ།.

The post བལ་ཡུལ་གྱི་བཙུན་དགོན་མཁའ་སྤྱོད་དགའ་འཁྱིལ་གླིང་། appeared first on བོད་ཀྱི་དུས་བབ།.

The post བོད་རིགས་དམག་དཔོན་ཞིག་རྐྱེན་འདས་སུ་ཕྱིན། appeared first on བོད་ཀྱི་དུས་བབ།.

རྒྱ་གར་གྱི་སྲིད་འཛིན་ཟུར་པ་པུར་ནཱབ་མཱོ་ཁར་རྗེ་མཆོག་སྐུ་གྲོངས་བར་༧གོང་ས་མཆོག་གི་དབུས་པའི་སྲིད་སྐྱོང་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་ནས་ཐུགས་གསོ་ཞུས་གནང་འདུགཁ་སང་ཕྱི་ཚེས་ ༡ ཉིན། ༧གོང་ས་རྒྱལ་བ་རིན་པོ་ཆེ་མཆོག་ནས་རྒྱ་གར་གྱི་སྲིད་འཛིན་ཟུར་པ་སྐུ་ཞབས་པུར་ནཱབ་མཱོ་ཁར་རྗེ་(Pranab Mukherjee)ལགས་སྐུ་གྲོངས་བར་ཁོང་གི་བུ་ཨ་བྷེ་ཇི་ཊི་མཱོ་ཁར་རྗེ་(Abhijeet Mukherjee)ལགས་ཀྱི་མཚན་ཐོག་ལ། སྲིད་འཛིན་ཟུར་པ་ཁོང་འདས་གྲོངས་སུ་སོང་བར་བློ་ཕམ་དང་། དམ་པ་ཁོང་ལ་ཐུགས་སྨོན་གནང་བའི་གསུང་འཕྲིན་ཞིག་བསྩལ་གནང་འདུག

གསུང་འཕྲིན་དེའི་ནང་། སྐུ་ཉིད་ཀྱི་ཡབ་སྐུ་གྲོངས་བར་ངོས་རང་བློ་ཕམ་བྱུང་། ངོས་ཀྱིས་དམ་པ་ཁོང་ལ་ཐུགས་སྨོན་དང་སྐུ་ཉིད་ནང་མི་ཡོངས་ལ་ཐུགས་གསོ་ཞུ་རྒྱུ་ཡིན་ལ། སྐུ་ཞབས་པུར་ནཱབ་མཱོ་ཁར་རྗེ་མཆོག་གིས་འདས་པའི་ལོ་མང་རིང་། རྒྱ་གར་མི་མང་ལ་ཞབས་འདེགས་ཞུས་ཏེ། རྗེས་སུ་རླབས་ཆེ་བའི་རྒྱལ་ཁབ་འདིའི་སྲིད་འཛིན་ཀྱི་ཞབས་འདེགས་ཞུ་རྒྱུ་བྱུང་ཡོད་པ་རེད། ཅེས་གསུངས་འདུག

དེ་བཞིན་༧གོང་ས་རྒྱལ་བ་རིན་པོ་ཆེ་མཆོག་ནས་འདས་པའི་དུས་ཚོད་ནང་། དམ་པ་ཁོང་དང་ལྷན་དུ་མཛད་སྒོ་ཁག་འདྲ་མིན་ནང་མཇལ་འཕྲད་གནང་རྒྱུ་བྱུང་བ་ཐུགས་དྲན་གསོས་པ་དང་འབྲེལ། དམ་པ་ཁོང་གིས་སྐུ་ཚེ་ཧྲིལ་པོའི་རིང་གཞན་དོན་སླད་ཕྱག་ལས་གནང་བར་བརྟེན། ཁོང་ཉིད་ཀྱི་མི་ཚེ་དོན་དང་ལྡན་པ་བསྐྱལ་ཡོད་པས་ང་ཚོས་དགའ་བ་སྒོམ་ཆོག་སྐོར་གསུངས་འདུག

ཡང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་བོད་མི་མང་སྤྱི་འཐུས་ཚོགས་གཙོ་མཆོག་རྣམ་གཉིས་ནས་ཐུགས་གསོའི་གསུང་འཕྲིན་བསྩལ་བའི་ནང་། སྲིད་སྐྱོང་མཆོག་གིས་སྲིད་འཛིན་ཟུར་པ་པུར་ནཱབ་མཱོ་ཁར་རྗེ་ཡི་སྐུ་ཚེའི་འཕེན་པ་རྫོགས་པའི་ཡིད་སྐྱོའི་གནས་ཚུལ་གོས་ཐོས་བྱུང་བས་བློ་ཕམ་བྱུང་། ངས་བོད་མི་ཡོངས་དང་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་རྒྱ་གར་གཞུང་དང་། མི་མང་། དེ་བཞིན་སྲིད་འཛིན་ཟུར་པ་མཆོག་གི་ནང་མི་བཅས་ལ་སྙིང་ཐག་པ་ནས་ཐུགས་གསོ་ཞུ་རྒྱུ་ཡིན་ཞེས་དང་། དེ་བཞིན་བོད་མི་མང་སྤྱི་འཐུས་ས་ཚོགས་གཙོ་མཆོག་གི་ཐུགས་གསོའི་གསུང་འཕྲིན་ནང་། དམ་པ་ཁོང་གི་སྐུ་ཚེ་མ་ཟིན་པར་བློ་ཕམ་ཆེན་པོ་བྱུང་། དམ་པ་ཁོང་ནི་དེ་སྔ་ཕྱི་ལོ་ ༢༠༡༦ ལོར་རྒྱ་ནག་གཞུང་གིས་ངོ་རྒོལ་བྱས་མིན་ལ་མ་ལྟོས་པར། འཛམ་གླིང་ཞི་བདེའི་གཟེངས་རྟགས་བཞེས་མྱོང་མཁན་རྣམས་དང་ལྷན་བོད་མིའི་བླ་ན་མེད་པའི་དབུ་འཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྲིད་འཛིན་གྱི་ཕོ་བྲང་དུ་གདན་ཞུས་མཇལ་འཕྲད་གནང་བ་དང་། བོད་དོན་རྒྱབ་སྐྱོར་གནང་རྒྱུའི་ཞལ་བཞེས་གནང་བ་སོགས་བྱུང་ཡོད་སྐོར་གསུངས་འདུག

པུར་ནཱབ་མཱོ་ཁར་རྗེ་ལགས་ནི་རྒྱ་གར་གྱི་སྲིད་འཛིན་སྐབས་ ༡༣ པ་དང་། འདི་ལོ་དགུང་ལོ་ ༨༤ ཡིན་པ་དང་། ཁོང་ལ་ཟླ་གཅིག་ཙམ་གོང་ནས་ཏོག་དབྱིབས་གཉན་རིམས་ཕོག་རྐྱེན། ན་ཚ་གཞན་མང་པོ་ཞིག་ཇེ་སྡུག་ཏུ་ཕྱིན་ཏེ་ཀླད་པ་གཤག་བཅོས་ཀྱིས་ཀླད་ཁྲག་གཙང་སེལ་སོགས་བྱ་དགོས་བྱུང་ཡོད་ཀྱང་། ཕྱི་ཟླ་ ༨ ཚེས་ ༣༡ ཉིན་གྱི་ཕྱི་དྲོར་རྒྱ་གར་རྒྱལ་ས་ལྡི་ལིའི་སྐམ་དམག་སྨན་ཁང་ནང་དུ་སྐུ་གྲོངས་ཡོད་པ་རེད།

ཁོང་འདས་གྲོངས་སུ་སོང་རྗེས་རྒྱལ་སྤྱི་དང་རྒྱལ་གར་གྱི་མཐོ་རིམ་མགོ་འཁྲིད་དང་། སྲིད་དོན་པ་མང་པོས་ཐུགས་གསོ་གནང་ཡོད་པ་དང་། རྒྱ་གར་གྱི་སྲིད་བློན་མུ་དྷི་མཆོག་གིས་སྒེར་གྱི་ཊེ་ཊིར་སྤྱི་ཚོགས་དྲ་ལམ་བརྒྱུད། སྲིད་འཛིན་ཟུར་པ་ཁོང་ནི་རླབས་ཆེ་བའི་སྲིད་དོན་མྱོང་རྒྱུས་ཅན་ཞིག་དང་། ཁོང་གིས་རྒྱལ་ཁབ་འཕེལ་རྒྱས་ཀྱི་ལོ་རྒྱུས་ཁྲོད་གསུབ་ཐབས་བྲལ་བའི་ལེགས་སྐྱེས་ཕུལ་ཡོད་པ་མ་ཟད། ཕུལ་དུ་བྱུང་བའི་མཁས་དབང་ཞིག་དང་རྒྱ་གར་མི་མང་གིས་གུས་བརྩི་བླ་མེད་ཞུ་ཡུལ་ཞིག་ཆགས་ཡོད་སྐོར་གསུངས་འདུག

སྲིད་འཛིན་ཟུར་པ་ཁོང་འདས་གྲོངས་སུ་སོང་བར་དུས་ཡུན་བདུན་ཕྲག་གཅིག་རིང་རྒྱ་གར་རྒྱལ་ཡོངས་གཞུང་འབྲེལ་ངོས་ནས་མྱ་ངན་གུས་འདུད་ཞུ་ཡི་ཡོད་པ་དང་། དུས་ཡུན་དེའི་རིང་གཞུང་འབྲེལ་ལས་ཁུངས་ཁག་གིས་རྒྱལ་དར་ཕྱེད་མར་ཕབ་ནས་གཞུང་འབྲེལ་གྱི་གལ་ཆེའི་བྱེད་སྒོ་ཁག་མི་གཉེར་རྒྱུ་བྱས་ཡོད་འདུག

གསར་འགོད་པ། སངས་རྒྱས་དཀོན་མཆོག

The post རྒྱ་གར་གྱི་སྲིད་འཛིན་ཟུར་པ་མཆོག་སྐུ་གྲོངས་བར་ཐུགས་གསོ་མཛད། appeared first on བོད་ཀྱི་དུས་བབ།.

The post བོད་མིའི་སྒྲིག་འཛུཊ་ཀྱི་དྲུང་ཆེ་གསར་པ་གཉིས་བསྐོ་བཞག་བྱུང་། appeared first on བོད་ཀྱི་དུས་བབ།.

༧གོང་ས་རྒྱལ་བ་རིན་པོ་ཆེ་མཆོག་གི་རླབས་ཆེན་གྱི་དབུ་ཁྲིད་འོག་བོད་མིའི་དམངས་གཙོ་དབུ་བརྙེས་ནས་མི་ལོ་ཧྲིལ་པོ་ ༦༠ འཁོར་བའི་དུས་ཆེན་སྲུང་གཙི་ཞུས།དེ་རིང་སྔ་དྲོའི་ཆུ་ཚོད་ ༡༠ ཐོག་གངས་ཅན་སྐྱིད་གཤོངས་ཀྱི་སྲིད་སྐྱོང་ཚོགས་ཁང་དུ། བོད་མིའི་སྒྲིག་འཛུགས་ཀྱི་གོ་སྒྲིག་འོག་བོད་མིའི་དམངས་གཙོ་དབུ་བརྙེས་པའི་དུས་ཆེན་ཐེངས་ ༦༠ པ་སྲུང་གཙི་གནང་སོང་བ་དང་། མཛད་སྒོའི་ཐོག་ཉེ་སྔོན་རྒྱ་གར་གྱི་སྲིད་འཛིན་ཟུར་པ་སྐུ་ཞབས་པུར་ནཱབ་མཱོ་ཁར་རྗི་ (Pranab Mukherjee) མཆོག་སྐུ་གྲོངས་བར་གདུང་སེམས་མཉམ་སྐྱེད་མཚོན་སླད། དུས་ཆེན་གྱི་འཆར་ཅན་རྐང་བྲོ་གླུ་གཞས་ཀྱི་ལས་རིམ་མེད་པར་བཟོས་ཏེ། དམ་པ་ཁོང་གི་ཆེད་དུ་སྐར་མ་གཅིག་རིང་ངག་བཅད་ཀྱིས་མྱ་ངན་དང་གུས་འདུད་ཞུས་སོང་།

མཛད་སྒོའི་ཐོག་ཕྱི་ལོ་ ༢༠༢༠ ལོའི་སྲིད་སྐྱོང་སློབ་ཡོན་དང་དགའ་ལྡན་ཕོ་བྲང་གི་སློབ་ཡོན་ཐོབ་མཁན་གྱི་སློབ་ཕྲུག་རྣམས་ལ་ཕྱག་འཁྱེར་གནང་བ་དང་། བོད་ཀྱི་ཟློས་གར་ཚོགས་པའི་དབྱར་སྐྱིད་ཕྱི་ལོ་ ༢༠༢༠ ལོའི་བརྙན་སྡེར་དབུ་འབྱེད། འདི་ལོའི་རིགས་གཅིག་རྐང་འཛིན་ཆེད་བསྟོད་བཞེས་མཁན་འབུམ་རམས་པ་སྐལ་བཟང་དབང་འདུས་ལགས་དང་འབུམ་རམས་པ་འཇིགས་མེད་དབང་ཕྱུག་ལགས་གཉིས་གྱི་མཚན་གཞུང་སྙན་སྒྲོན་གནང་སོང་། དེ་བཞིན་བོད་མིའི་སྒྲིག་འཛུགས་ཀྱི་ལས་བྱེད་ཞབས་ལོ་ ༢༥ ཡན་འཁོར་བའི་ཚེ་རིང་དབྱངས་སྐྱིད་ལགས་དང་། ན་གཞོན་ནུས་སྤེལ་ལས་གཞིའི་གཟེངས་བསྟོད་ཐོབ་མཁན་མོན་གྷོ་འདོད་རྒུ་གླིང་དུ་གནས་སྡོད་བོད་མི་བསོད་ནམས་སྟོབས་རྒྱལ་ལགས་དང་། དྷ་སར་གནས་སྡོད་བོད་མི་བསྟན་འཛིན་རབ་རྒྱས་ལགས་གཉིས་ལ་ལེགས་གསོལ་ཕྱག་ཁྱེར་གནང་སོང་བ་དང་། བོད་མིའི་སྒྲིག་འཛུགས་ཕྱི་དྲིལ་དང་སྦེལ་ཇམ་སྐུ་ཚབ་དོན་གཅོད་ལས་ཁུངས་གཉིས་ཟུང་འབྲེལ་ཐོག ༧གོང་ས་མཆོག་ནས་ཡུ་རོབ་མཉམ་འབྲེལ་གྱི་མཉམ་རུབ་ཀྱི་འདུ་ཤེས་ལ་ཡིད་སྨོན་གྱི་བཀའ་སློབ་ཕྱོགས་སྒྲིག་ཞུས་པ་ཞིག་སྒྲིག་སྦྱོར་གནང་བའི་བརྙན་ཐུང་ཞིག་དང་། ཨ་རིའི་སྐུ་ཚབ་དོན་གཅོད་ལས་ཁུངས་ཀྱིས་༧གོང་ས་མཆོག་གི་བཀའ་དྲིན་རྗེས་དྲན་དང་འབྲེལ་ནས་བཟོ་སྐྲུན་ཞུས་པའི་བརྙན་ཐུང་ཞིག་བཅས་གཟིགས་འབུལ་ཞུས་སོང་།མཛད་སྒོའི་སྐབས་ཚོགས་གཙོ་པདྨ་འབྱུང་གནས་མཆོག་གིས་སྒྲོག་སྦྱངས་གནང་བའི་སྤྱི་འཐུས་ལྷན་ཚོགས་ཀྱི་གསུང་བཤད་ནང་། ཉེ་ལམ་ཕྱི་ཟླ་ ༨ ཚེས་ ༢༨ ནས་ ༢༩ བར་པེ་ཅིང་དུ་ཀྲུང་དབྱང་གི་བོད་ལྗོངས་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ ༧ པ་ཟེར་བ་ཚོགས་ཏེ། ཞི་ཅིང་ཕིང་སོགས་རྒྱ་ནག་གི་འགོ་འཁྲིད་མཐོ་གྲས་རྣམས་དང༌། བོད་རང་སྐྱོང་ལྗོངས་ཟེར་བ་སོགས་རྒྱ་ནག་གིས་བོད་ས་དུམ་བུར་བགོས་པའི་བོད་ཁུལ་གྱི་འགོ་འཁྲིད་མཐོ་གྲས་རྣམས་མཉམ་ཞུགས་བྱས་ཏེ། ཚོགས་འདུ་དེ་ལ་བརྟེན་ནས་རྒྱ་གཞུང་གིས་བོད་ཐོག་འཛིན་པའི་དམ་དྲག་དང་གདུག་རྩུབ་ཅན་གྱི་སྲིད་བྱུས་ལ་འགྱུར་བ་གང་ཡང་གཏོང་རྩིས་མེད་པ་མ་ཟད། བོད་ཀྱི་ལོ་རྒྱུས་ལ་འཁྱོག་བཤད་དང༌། རིག་གནས་ལ་བསྒྱུར་བཅོས། ནང་བསྟན་ཆོས་ལུགས་ལ་བསྲེ་ལྷད་བྱ་རྒྱུ་བཅས་ཀྱི་སྐོར་དྲིལ་བསྒྲགས་རྒྱ་ཆེ་རུ་གཏོང་འཆར་གྱི་རྣམ་པ་མངོན་བཞིན་པར་བརྟེན་ཚོགས་འདུ་དེ་རིགས་ནི་རྒྱལ་སྤྱིའི་སྤྱི་ ཚོགས་ཁྲོད་རྣམ་པ་སྟོན་བྱེད་ཙམ་དང་། བོད་ཡུལ་རྒྱ་ཡུལ་དུ་བསྒྱུར་རྒྱུའི་ལག་ཆ་ཞིག་ཏུ་གྱུར་ཡོད་པ་མངོན་གསལ་ཡིན་སྐོར་བཀོད་འདུག

ཡང་མང་གཙོའི་ལམ་ལུགས་ངོམས་སུ་ཆོག་པ་དེ་དངོས་སུ་ལག་ལེན་དུ་བསྟར་སྐབས་རང་རྒྱལ་གཞན་ཕམ་གྱི་བསམ་བློ་དེ་ངེས་པར་དོར་དགོས་པ་ཡིན། ལྷག་པར་དུ་ཕྱི་ལོ་ ༢༠༢༡ ལོའི་ནང་སྲིད་སྤྱི་གཉིས་ཀྱི་འོས་བསྡུའི་སྐབས་བཙན་བྱོལ་བོད་མིའི་བཅའ་ཁྲིམས་ནང་གསལ་བའི་བོད་ཀྱི་ཡུལ་མི་རྣམས་ཀྱིས་མང་གཙོའི་འགན་དབང་ལོངས་སྤྱོད་ཚད་ལྡན་ཡོང་ཐབས་སུ། ཆོལ་ཁ་ཆོས་བརྒྱུད་ནང་ཁུལ་མཐུན་སྒྲིལ་ལ་དོ་ཕོག་འགྲོ་གཞི་དང་། ༧གོང་ས་མཆོག་གི་ཐུགས་དགོངས་འཁྲུག་གཞི། དེ་བཞིན་གཞིས་བཞུགས་བོད་མི་རྣམས་ཀྱི་སྙིང་སྟོབས་ཉམས་དམས་སུ་འགྲོ་གཞི་བཅས་ཀྱི་བྱ་བ་བརྩམ་མི་རུང་བས་ཚང་མས་བླང་དོར་འགལ་འཛོལ་མེད་པ་དགོས་གལ། ལྷག་པར་དུ་༧རྒྱལ་བ་སྐུ་ཕྲེང་བཅུ་བཞི་པ་ཆེན་པོ་མཆོག་གི་དབུ་འཁྲིད་བཟང་པོའི་འོག་བོད་ཀྱི་ཆོས་བརྒྱུད་ཆེན་པོ་བཞི་དང་གཡུང་དྲུང་བོན་དང་། ཆོལ་གསུམ་ཡོངས་རྫོགས་སྐྱིད་ན་སྐྱིད་མཉམ་དང་། སྡུག་ན་སྡུག་མཉམ་གྱི་རྡོག་རྩ་གཅིག་ཏུ་བསྒྲིལ་བའི་གོང་བུའི་ནུས་པ་དེར་གཏོར་བཤིག་གཏོང་རྒྱུར་དམིགས་ཏེ་ཆེད་གཉེར་ལས་འགན་ཡོད་མཁན་ཉུང་ཤས་ཡོད་པ་དེ་དག་ལ་ཁ་གཏད་གཅོག་རྒྱུ་དང་། དེ་རིགས་ཀྱི་ལྷན་དུ་བསམ་མེད་བོད་མི་འགའ་ཤས་མགོ་སྐོར་བསླུ་བྲིད་འོག་སྐབས་རེར་ཚུད་ཉེན་ཆེ་བས་དོགས་ཟོན་ཆེར་བསྐྱེད་ཀྱིས་ཡིད་གཟབ་བྱ་རྒྱུ་ཚང་མར་འོས་འགན་ཡོད་པ་ལྟར་བསམ་ཤེས་ངེས་གནང་ཡོང་བའི་འབོད་སྐུལ་ཞུ་རྒྱུ་ཡིན། ཅེས་བཀོད་འདུག

དེ་བཞིན་བོད་མིའི་སྒྲིག་འཛུགས་བཀའ་ཤག་གི་བསྒྲགས་ཡིག་ནང་། རྒྱ་ནག་གཞུང་གིས་བོད་ལ་ཁ་ཞེ་གཉིས་མེད་ཀྱི་ལས་དོན་ཡག་པོ་སྒྲུབ་འདོད་ཡོད་ན། བོད་མི་རྣམས་ཉིན་མཚན་ལྟོས་མེད་ཞེད་སྣང་ངང་གནས་དགོས་པའི་ཐལ་ཆེ་བའི་གཅིག་སྡུད་རིང་ལུགས་ཀྱི་སྲིད་བྱུས་ལ་འགྱུར་བ་གཏོང་དགོས་པ་མ་ཟད། ཞི་ཅིན་ཕིང་གིས་བོད་མིར་གདུག་རྩུབ་མནར་གཅོད་གཏོང་རྒྱུའི་བསམ་བློ་དོར་དགོས་པ་དང་། གཞིས་བཞུགས་བོད་མི་མང་གི་བསམ་ཚུལ་ལ་ངེས་པར་དུ་དང་ལེན་བྱེད་དགོས་ཅིང་། ༧གོང་ས་མཆོག་གི་སྐུ་ཚབ་བརྒྱུད་རྒྱ་ནག་གཞུང་ལ་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་བསམ་འཆར་ཕུལ་བ་བཞིན་དབུ་མའི་ལམ་བརྒྱུད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་ལྷན་དུ་ཞི་བའི་གྲོས་མོལ་གང་མགྱོགས་འགོ་འཛུགས་གནང་དགོས་པའི་འབོད་སྐུལ་ནན་པོ་ཞུ་རྒྱུ་ཡིན། ཅེས་བཀོད་འདུགཡང་བསྒྲགས་ཡིག་དེའི་ནང་། ཉེ་ལམ་དབུས་འོས་བསྡུ་ལས་ཁང་ནས་སྲིད་སྐྱོང་དང༌། སྐབས་བཅུ་བདུན་པའི་སྤྱི་འཐུས་ཀྱི་འོས་བསྡུ་ཆེན་མོའི་ལས་དོན་འགོ་འཛུགས་གསལ་བསྒྲགས་གནང་ཟིན་པ་ལྟར། འཛམ་གླིང་གང་སར་གནས་པའི་བོད་རིགས་ཡོངས་ཀྱིས་སྔོན་འགྲོ་དང་དངོས་གཞིའི་འོས་བསྡུ་གཉིས་ཀར་ཆ་ཤས་ལེན་རྒྱུ་ཤིན་ཏུ་གལ་ཆེན་པོ་ཡིན་སྟབས། འོས་བསྡུ་དང་འབྲེལ་བའི་ལམ་སྟོན་གནང་བ་ཁག་ལ་ཐུགས་སྣང་དགོས་པ་མ་ཟད། འདས་པའི་ཉམས་མྱོང་གཞི་ལ་བཞག་ནས་སོ་སོའི་འོས་ཤོག་དེ་རྣམ་དཔྱོད་ལྡན་པའི་ངང་ནས་བོད་མིའི་འགོ་འཁྲིད་གནང་ཐུབ་པའི་སྲིད་སྐྱོང་དང་། བོད་མིའི་ངོ་ཚབ་མཚོན་པའི་སྤྱི་འཐུས་རྣམས་འཕྱུགས་པ་མེད་པར་བདམ་དགོས་པའི་འབོད་སྐུལ་ཞུ་ཡི་ཡོད་སྐོར་དང་། སྤྱི་ཚོགས་དྲྭ་ལམ་བེད་སྤྱོད་ལོག་པར་བཏང་ནས་འཆལ་གཏམ་དང་དཀྲུག་ཤིང་སོགས་བོད་མིའི་ཆིག་སྒྲིལ་ལ་གནོད་པའི་བྱེད་བབ་རིགས་ཀྱི་མགོ་སྐོར་འོག་ལ་མ་ཚུད་པར་ཡིད་གཟབ་གནང་རྒྱུ་གལ་ཆེན་པོ་ཡིན་ཡིན་སྐོར་སོགས་བཀོད་འདུག

གསར་འགོད་པ། ཀླུ་མགོན་ཐར།

The post བོད་མིའི་དམངས་གཙོ་དབུ་བརྙེས་ཏེ་མི་ལོ་ ༦༠ འཁོར་བའི་དུས་ཆེན་སྲུང་གཙི་གནང་། appeared first on བོད་ཀྱི་དུས་བབ།.

དོན་ཟུར་དབུ་དཀར་ཚང་སྐལ་བཟང་རྡོ་རྗེ་ལགས་ཀྱིས་ཁོང་ལ་སྲིད་སྐྱོང་གི་འོས་འཐོབ་ཚེ་དབུས་བོད་མིའི་སྒྲིག་འཛུགས་དེང་རབས་ཅན་དུ་བསྒྱུར་རྒྱུ་དང་ཤེས་ཡོན་ལེགས་བཅོས་སོགས་དོན་ཚན་ཆེན་པོ་ལྔ་ཡི་ཐོག་ཤུགས་སྣོན་གནང་རྒྱུ་ཡིན་སྐོར་བསྒྲགས།

དེ་རིང་སྔ་དྲོར་བོད་ཀྱི་དམངས་གཙོའི་དུས་ཆེན་ཐེངས་ ༦༠ པའི་ཉིན་མོ་དང་བསྟུན། བོད་མིའི་སྒྲིག་འཛུགས་ཀྱི་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་ཟུར་པ་དང་། དོན་ཟུར་དབུ་དཀར་ཚང་སྐལ་བཟང་རྡོ་རྗེ་ལགས་ནས་ཁོང་ཕྱི་ལྱོ་ ༢༠༢༡ ལོའི་སྲིད་སྐྱོང་འོས་མིར་ལངས་བའི་གསལ་བསྒྲགས་གནང་སོང་བ་དང་། ཁོང་གི་བསྒྲགས་གཏམ་ནང་། ཧ་ཅང་གལ་གནད་ཆེ་བའི་དུས་སྐབས་འདིར་རང་ཉིད་ལ་དབུས་བོད་མིའི་སྒྲིག་འཛུགས་དང་བོད་མིའི་སྤྱི་ཚོགས་ཧྲིལ་པོའི་སྣེ་འཁྲིད་དེ་མདུན་སྐྱོད་ཐུབ་པའི་དམིགས་ཡུལ་དང་འཆར་གཞི་གསལ་བོ་ཡོད་པས་ཡིན་པ་དང་། ཁོང་གི་འོས་བསྡུའི་ལས་རིམ་འདིའི་ཁྲོད་དུ་བོད་མི་ཡོངས་ནས་རྒྱལ་ཁབ་གཅིག་དང་མི་རིགས་གཅིག འཐབ་རྩོད་གཅིག་གི་ངོ་བོ་བརྟན་པོར་བསྲུང་སྟེ་མཐུན་སྒྲིལ་རྡོག་རྩ་ཆིག་སྒྲིལ་ཡོང་བར་ནུས་ཤུགས་འདོན་ངེས་ཡིན་ལ། སྲིད་སྐྱོང་གི་ལས་ཡུན་རིང་རང་ངོས་ནས་ཆབ་སྲིད་དང་རིག་གཞུང་། དཔལ་འབྱོར་བཅས་རྒྱུན་གནས་གོང་འཕེལ་ཡོང་ཐབས་སུ་ཤུགས་སྣོན་རྒྱག་ངེས་ཡིན་ལ། ད་ལྟའི་བཀའ་ཤག་གི་ལས་དོན་རྣམས་ཚུལ་བཞིན་རྒྱུན་སྐྱོང་དང་ལྔ་དང་ལྔ་བཅུའི་འཆར་སྣང་གལ་གནད་ཆེ་བར་བརྩིས་ནས་གནས་རིམ་གང་ཅིའི་ཐད་ལ་གཞོན་སྐྱེས་ཚོ་མཉམ་ཞུགས་དང་ལས་འགན་ཇེ་ཆེར་གཏོང་རྒྱུ་བཅས་ཡིན་སྐོར་བརྗོད་འདུག

དེ་བཞིན་ཁོང་གི་སྒེར་གྱི་དྲ་རྒྱའི་ནང་སྤེལ་བའི་བསྒྲགས་གཏམ་ནང་། གུས་པས་ལོ་ངོ་ཉེར་གསུམ་ལྷག་གི་རིང་བོད་མིའི་རང་དབང་འཐབ་རྩོད་དང་སྤྱི་ཚོགས་ཡར་རྒྱས་ཆེད་ལས་ཀ་བྱས་པ་ཡིན། ལྷག་པར་དུ་ཕྱི་ལོ་ ༢༠༡༡ ནས་ ༢༠༢༠ བར་དབུས་བོད་མིའི་སྒྲིག་འཛུགས་ནང་དུ་ཞབས་ཞུ་ཞུས་པ་ཡིན། ཐོག་མར་དཔལ་ལྡན་སྲིད་སྐྱོང་མཆོག་གི་དམིགས་བསལ་སློབ་སྟོན་པ་དང། དེ་ནས་བྱང་ཨ་རིའི་༧གོང་ས་མཆོག་གི་སྐུ་ཚབ་དོན་གཅོད། དེའི་རྗེས་སུ་དཔལ་འབྱོར་ལས་ཁུངས་ནང་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་བྱས་པ་བཅས་གལ་གནད་ཆེ་བའི་ལས་གནས་ཁག་གསུམ་གྱི་ནང་དུ་དབུས་བོད་མིའི་སྒྲིག་འཛུགས་ལ་ཞབས་ཞུ་སྒྲུབ་རྒྱུའི་གོ་སྐབས་ཐོབ་བྱུང་། ཞབས་ཞུའི་གོ་སྐབས་དེ་དག་བརྒྱུད་ངས་བོད་ཀྱི་རང་དབང་འཐབ་རྩོད་དང་བོད་མིའི་སྤྱི་ཚོགས་གཉིས་ཀྱིས་གདོང་ལེན་བྱེད་དགོས་པའི་དཀའ་གནད་ཁག་དང་ང་ཚོའི་དགོས་མཁོ་ཅི་ཡིན། ང་ཚོ་ལ་གོ་སྐབས་ཅི་ཡོད། ལྷག་པར་དུ་བོད་མིའི་སྒྲིག་འཛུགས་སྲིད་སྐྱོང་གི་འོས་འགན་སོགས་གསལ་ཞིང་རྒྱས་པ་ཤེས་རྟོགས་བྱུང་ཡོད་པ་དང་། ༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་དགོངས་པ་རྒྱང་གཟིགས་ཀྱིས་ ༢༠༡༡ ལོ་ནས་སྲིད་དབང་ཆ་ཚང་མང་གཙོའི་ལམ་ནས་འདེམས་ཐོན་བྱུང་བའི་དབུ་ཁྲིད་ལ་བསྩལ་བའི་བཀའ་དྲིན་བསྐྱངས་གནང་མཛད་པར་བརྟེན་དབུས་བོད་མིའི་སྒྲིག་འཛུགས་ལ་འོས་འགན་ཤིན་ཏུ་ཆེན་པོ་ཡོད། ཅེས་བཀོད་འདུག

ཡང་གསལ་བསྒྲགས་ནང་། ཁོང་ལ་མ་འོངས་པར་སྲིད་སྐྱོང་གི་འོས་ཐོབ་པ་ཡིན་ན། བོད་དོན་འཐབ་རྩོད་ཀྱི་སྟོབས་ཤུགས་གོང་མཐོར་གཏོང་རྒྱུ་དང་། དབུས་བོད་མིའི་སྒྲིག་འཛུགས་དེང་རབས་ཅན་དུ་བསྒྱུར་རྒྱུ། ཤེས་ཡོན་ལེགས་བཅོས། བོད་ཀྱི་སྐད་ཡིག་དང་རིག་གཞུང་རྒྱུན་འཛིན་དར་སྤེལ། དཔལ་འབྱོར་སྲ་བརྟན་དང་གོང་སྤེལ་བཅས་གནད་དོན་ཆེན་པོ་ལྔ་ཡི་སྒང་ལ་ཤུགས་སྣོན་བྱ་རྒྱུ་ཡིན་པ་དང་། གོང་གསལ་གྱི་ལས་གཞི་ཁག་ནི་གཅིག་ལ་གཅིག་རྟེན་ཡིན་པས། དེ་དག་འགྲུབ་ཐབས་སུ་དབུས་བོད་མིའི་སྒྲིག་འཛུགས་ནང་མི་རབས་གསར་པའི་མཉམ་ཞུགས་གནང་རྒྱུར་འབད་པ་ལྷག་ཏུ་བྱེད་དགོས་པ་མ་ཟད། ལོ་ན་ཆུང་བའི་གཞོན་སྐྱེས་ཤིག་བཀའ་བློན་གང་རུང་ཞིག་ལ་བསྐོ་བཞག་བྱ་རྒྱུ་དང་ནང་སྲིད་ལས་ཁུངས་ཀྱི་ཁྱབ་ཁོངས་འོག་ཏུ་ན་གཞོན་སྡེ་ཚན་ཞིག་གསར་འཛུགས་ཐོག་དེའི་འགན་འཛིན་དུ་དྲུང་ཆེའི་གནས་རིམ་དང་མཉམ་པའི་ན་གཞོན་ཞིག་བདམ་རྒྱུ། ལོ་ལྟར་དབྱར་ཀར་རྒྱལ་སྤྱིའི་ན་གཞོན་འགོ་ཁྲིད་ཀྱི་ལས་གཞི་ཞིག་སྤེལ་བ་བརྒྱུད་མི་རབས་གསར་པའི་འགོ་ཁྲིད་གསོ་སྐྱོང་བྱ་རྒྱུ་དང། དེ་བཞིན་ལྔ་དང་ལྔ་བཅུའི་འཆར་སྣང་འོག་ན་གཞོན་གྱི་སྐུ་ཚབ་ལས་གཞིའི་ (Youth Ambassador Program) ནུས་ཤུགས་ཆེ་རུ་བཏང་ནས་ན་གཞོན་རྣམས་ཀྱིས་བོད་ཀྱི་སྐུ་ཚབ་མཚོན་ཐུབ་པ་མ་ཟད་བོད་ཀྱི་འཐབ་རྩོད་རྒྱལ་སྤྱིའི་སྡིངས་ཆའི་ཐོག་འཁྱེར་ཐུབ་པ་བྱ་རྒྱུར་ཤུགས་སྣོན་རྒྱག་དགོས། ཞེས་བཀོད་འདུག

གསར་འགོད་པ། སངས་རྒྱས་དཀོན་མཆོག

The post དོན་ཟུར་དབུ་དཀར་ཚང་སྐལ་བཟང་རྡོ་རྗེ་སྲིད་སྐྱོང་འོས་མིར་ལངས་བ་ཡོངས་བསྒྲཊ་གནང་། appeared first on བོད་ཀྱི་དུས་བབ།.

རྒྱ་ནག་གི་ཕྱི་སྲིད་བློན་ཆེན་ལ་ཧོང་ཀོང་གི་ཁྲིམས་གསར་ཕྱིར་འཐེན་དང་མཉམ་འབྲེལ་རྒྱལ་ཚོགས་ཀྱི་རྟོག་ཞིབ་ཚོགས་ཆུང་ཞིག་ཤིན་ཅང་ཁུལ་དུ་ལྟ་ཞིབ་ཆེད་གཏོང་དགོས་པའི་དགོས་འདུན་བཏོན། རྒྱལ་སྤྱིའི་གསར་ལམ་ཁག་གིས་གནས་ཚུལ་སྤེལ་བ་ལྟར་ན། ཁ་སང་ཕྱི་ཚེས་ ༡ ཉིན་རྒྱ་ནག་གི་ཕྱི་སྲིད་བློན་ཆེན་ཝང་ཡས་ཀྱི་ཡུ་རོབ་རྒྱལ་ཁབ་ལྔའི་གཞུང་འབྲེལ་སྐོར་བསྐྱོད་དེ་འཇར་མན་ནང་མཇུག་བསྒྲིལ་ཡོད་ཅིང་། མཇུག་བསྡོམས་གསར་འགོད་གསལ་བསྒྲགས་སྟེང་ཡུལ་དེའི་ཕྱི་སྲིད་བློན་ཆེན་ཧེ་ཀོ་མཱ་སི་ (Heiko Maas) ལགས་ཀྱིས།  རྒྱ་ནག་གཞུང་ངོས་ནས་ཧོང་ཀོང་ནང་ལག་བསྟར་བྱེད་བཞིན་པའི་རྒྱལ་ཁབ་བདེ་འཇགས་ཁྲིམས་ཡིག་དེ་ཕྱིར་འཐེན་དང་། མཉམ་འབྲེལ་རྒྱལ་ཚོགས་ཀྱི་རྟོག་ཞིབ་ཚོགས་ཆུང་ཞིག་ལ་ཤིན་ཅང་ཁུལ་དུ་ལྟ་ཞིབ་བྱ་རྒྱུའི་ཆོག་མཆན་སྤྲོད་དགོས་པའི་རེ་འདུན་བཏོན་ཡོད་འདུག

གསར་འགོད་གསལ་བསྒྲགས་སྟེང་ཧེ་ཀོ་མཱ་སི་ལགས་ཀྱིས་ཝང་ཡས་ལ་གདོང་གཏད་དེ། ཁྱེད་ཀྱིས་ཤེས་གསལ་ལྟར། ང་ཚོས་རྒྱལ་ཁབ་བདེ་འཇགས་ཁྲིམས་ཡིག་གི་ཤུགས་རྐྱེན་ལ་བློ་འཚབ་བྱེད་པ་ཡལ་མེད། ང་ཚོས་རྒྱལ་ཁབ་གཅིག་དང་ལམ་ལུགས་གཉིས་ཀྱི་སྲིད་བྱུས་དེ་ཡོངས་སུ་ལག་བསྟར་ཐུབ་རྒྱུའི་འདོད་པ་བྱེད་ཀྱི་ཡོད་སྐོར་དང་། ཧོང་ཀོང་གི་གྲོས་ཚོགས་འཐུས་མིའི་འོས་བསྡུ་དེ་བར་ཆད་མེད་པར་གང་མགྱོགས་བསྡུ་ཐུབ་ན་འདོད་ཀྱི་ཡོད་ཅེས་བརྗོད་འདུག་ལ། དེ་བཞིན་ཁོང་གིས་ཝང་ཡི་དང་གྲོས་མོལ་བྱེད་རིང་རྒྱ་ནག་གཞུང་གིས་ཤིན་ཅང་ཁུལ་དུ་བཙུགས་པའི་སློབ་གསོ་བཅོས་བསྒྱུར་ཁང་གི་སྐོར་ལ་གླེང་མོལ་གནང་ཡོད་པ་དང་། རྒྱ་ནག་ངོས་ནས་འཛམ་གླིང་མཉམ་འབྲེལ་རྒྱལ་ཚོགས་ཀྱི་རྟོག་ཞིབ་པར་ཁུལ་དེར་ལྟ་ཞིབ་བྱ་རྒྱུའི་ཆོག་མཆན་སྤྲད་ཚེ། དེར་དགའ་བསུ་ཞུ་རྒྱུ་ཡིན་སྐོར་ཡང་བརྗོད་ཡོད་འདུག གནད་དོན་དེར་རྒྱ་ནག་གི་ཕྱི་སྲིད་བློན་ཆེན་ཝང་ཡས་ཀྱིས།  ཧོང་ཀོང་ཡིན་ན་འདྲ། ཤིན་ཅང་ཡིན་ནའང་འདྲ། གཉིས་ཀ་རྒྱ་ནག་གི་ནང་སྲིད་ཀྱི་གནད་དོན་ཞིག་ཡིན་པས། ཕྱིའི་རྒྱལ་ཁབ་སུ་འདྲ་ཞིག་གིས་ཀྱང་རྒྱ་ནག་གི་སྤྱི་ཚོགས་ལ་ཐེ་བྱུས་བྱས་ན་འདོད་ཀྱི་མེད། ཅེས་བརྗོད་འདུག

ཁེ་ཉིན་ཕྱི་ཚེས་ ༣༡ ཉིན་རྒྱ་ནག་གི་གནོན་ཤུགས་ལ་འཛེམ་མེད་ཀྱིས། ཡུ་རོབ་མཐུན་ཚོགས་ཀྱི་ཁོངས་གཏོགས་ཅེག་སྤྱི་མཐུན་རྒྱལ་ཁབ་ (Czech Republic) ཀྱི་གྲོས་ཚོགས་གོང་མའི་ཚོགས་གཙོ་མི་ལོ་སི་ཝིས་ཏྲི་ཤིལ་ (Milos Vystrcil) གྱིས་སྣེ་འཁྲིད་པའི་སྐུ་ཚབ་མི་སྣ་ ༩༠ ཐའེ་ཝན་དུ་ཕེབས་འབྱོར་བྱུང་བར་བརྟེན། ཉིན་དེར་ཝང་ཡས་ཀྱིས ཅེག་གི་གྲོས་ཚོགས་གོང་མའི་ཚོགས་གཙོ་མི་ལོ་སི་ཡིས་མིག་རྒྱང་ཐུང་བའི་བྱ་སྤྱོད་སྤེལ་བ་དེར། རང་ཉིད་ནས་འགན་འཁུར་ཆ་ཚང་བླང་དགོས། ཞེས་འཇིགས་སྐུལ་བྱས་ཡོད་ཅིང་། ཁ་སང་བསྐྱར་དུ་མི་ལོ་སིས་རྒྱ་ནག་གཅིག་གི་སྲིད་བྱུས་དང་འགལ་སྟེ། ཐའེ་ཝན་དེ་རྒྱལ་ཁབ་ཅིག་ལ་ངོས་འཛིན་བྱས་ཡོད་པ་དེ་ནི་ཚད་ལས་བརྒལ་བའི་བྱ་སྤྱོད་ཅིག་ཡིན་སྐོར་ནན་བརྗོད་བྱས་ཡོད་འདུགཝང་ཡས་ཀྱི་རྒོལ་གཏམ་དེར་འཇར་མན་གྱི་གནད་ཡོད་མགོ་འཁྲིད་དང་གྲོས་ཚོགས་འཐུས་མི་མི་ཉུང་བས་ཝང་ལ་སྐྱོན་བརྗོད་དྲག་པོ་བྱས་ཡོད་པ་མ་ཟད། ཡུ་རོབ་མཐུན་ཚོགས་ཀྱི་རྒྱལ་ཁབ་གཞན་ཚོས་ཅེག་གི་ཚོགས་གཙོར་རྒྱབ་སྐྱོར་བྱེད་དགོས་པའི་བསམ་ཚུལ་ཤུགས་ཆེར་བཏོན་པ་ལྟར། ཁ་སང་གི་གསར་འགོད་གསལ་བསྒྲགས་སྟེང་འཇར་མན་གྱི་ཕྱི་སྲིད་བློན་ཆེན་ཧེ་ཀོ་མཱ་སི་ལགས་ཀྱིས། ང་ཚོ་ཡུ་རོབ་པ་ཞིག་ཡིན་པའི་ཆ་ནས། ང་ཚོས་རྒྱལ་སྤྱིའི་མཐུན་གྲོགས་རྣམས་ལ་ཕར་བརྩི་བཀུར་ཞུ་བ་བཞིན། ཚུར་ཡང་གཅིག་མཚུངས་ཀྱི་བརྩི་བཀུར་ཞུ་རྒྱུའི་རེ་བ་བྱེད་ཀྱི་ཡོད། འདིར་བརྙས་བཅོས་རིགས་ཁྱོན་ནས་ངོས་ལེན་བྱེད་ཐབས་མེད། ཅེས་ཕར་རྒོལ་བྱས་ཡོད་འདུག

འདས་པའི་བདུན་ཕྲག་གཅིག་ལྷག་རིང་གི་ཡུ་རོབ་སྐོར་སྐྱོད་རིང་། ཡུ་རོབ་རྒྱལ་ཁབ་ཁག་ཏུ་གནས་སྡོད་བོད་མི་དང་། ཧོང་ཀོང་བ། ཡུ་གུར། ཆོས་འཁོར་རྩ་རླུང་སྒོམ་སྒྲུབ་པ། ལྷོ་སོག དེ་བཞིན་ཕྱི་མི་རྒྱབ་སྐྱོར་བ་རྣམས་ཀྱིས། ཕྱི་སྲིད་བློན་ཆེན་གཉིས་ཀྱི་ཐུག་འཕྲད་བྱ་ཡུལ་དང་ཁྲོམ་ལམ་སོགས་སུ་སྐད་འབོད་ལས་འགུལ་སྤེལ་བ་དང་སྦྲགས། འབྲེལ་ཡོད་རྒྱལ་ཁབ་ཀྱི་མགོ་འཁྲིད་ཚོར་ཝང་ཡས་དང་ཐུག་འཕྲད་བྱེད་རིང་། བོད་དང་ཧོང་ཀོང་།  དེ་བཞིན་ཡུ་གུར་བཅས་ཀྱི་གནད་དོན་གླེང་སློང་དགོས་པའི་རེ་སྐུལ་ཞུས་ཡོད་པ་ལྟར། ཁ་སང་འཇར་མན་ཕྱི་སྲིད་ལྷན་ཁང་གི་མདུན་སར། ཉེ་ཆར་ཧོང་ཀོང་ནས་དབྱིན་ཡུལ་དུ་ཉེན་ཡོལ་དུ་ཕྱིན་པའི་ཧོང་ཀོང་གི་གྲོས་ཚོགས་འཐུས་མི་ཟུར་པ་དང་། ཧོང་ཀོང་གི་དམངས་གཙོའི་ལས་འགུལ་གྱི་ན་གཞོན་སྣེ་འཁྲིད་པ་ན་ཐན་ལཱའོ་ (Nathan Law) གཙོས་མི་གྲངས་བརྒྱ་ལྷག་གིས་སྐད་འབོད་ལས་འགུལ་སྤེལ་ཡོད་འདུག

སྤྱིར་རྒྱ་ནག་གི་ཕྱི་སྲིད་བློན་ཆེན་གྱི་ཡུ་རོབ་སྐོར་སྐྱོད་དེ། ཛ་དྲག་ནང་ལྷུང་བའི་ཨ་རྒྱའི་འབྲེལ་ལམ་གྱིས་ཡུ་རོབ་དང་རྒྱ་ནག་གི་འབྲེལ་བར་དོ་ཕོག་མི་འགྲོ་རྒྱུ་དང་། ལྷག་ཏུ་ཨ་རིའི་མཐུན་ཕྱོགས་རྒྱལ་ཁབ་དག་བློ་འགུག་བྱེད་རྒྱུར་དམིགས་ཡོད་ཀྱང་། རྒྱལ་ཁབ་ལྔའི་ཁྲོད་ནས་ཨི་ཊ་ལི་ (Italy) དང་། ནེ་ཐར་ལེན་ཌི་ (Netherlands)། ནོར་ཝེ་། ཧྥ་རན་སི།  འཇར་མན་བཅས་ཀྱིས་ཡོངས་ཁྱབ་ཀྱི་ཐོག་ནས་རྒྱ་ནག་གིས་ཧོང་ཀོང་དང་ཤིན་ཅང་ཁུལ་དུ་སྤེལ་བཞིན་པའི་སྲིད་བྱུས་ལ་སྐྱོན་བརྗོད་དྲག་པོ་བྱས་ཡོད་ཅིང་། དབྱེ་ཞིབ་པས་བརྗོད་ན། ཐེངས་འདིའི་ཝང་ཡས་ཀྱི་སྐོར་སྐྱོད་རིང་ཚོང་འབྲེལ་གྲོས་ཆོད་གཉིས་བཞག་ཐུབ་ཡོད་ཀྱང་། སྤྱི་ཡོངས་ནས་དོན་འབྲས་དེ་ཙམ་སྨིན་མེད་པར་ངོས་འཛིན་བྱེད་ཀྱི་འདུག

ཡང་ལྷོ་རྒྱུད་རྒྱ་ནག་ཞོགས་པའི་ཆ་འཕྲིན་གྱི་གནས་ཚུལ་ལྟར་ན། ཝང་ཡས་ཀྱི་ཡུ་རོབ་སྐྱོར་སྐྱོད་གྲུབ་པ་དང་བསྟུན། ཡོང་རྒྱུའི་བདུན་ཕྲག་འདིའི་ནང་རྒྱ་ནག་གི་ཆེས་མཐོའི་སྐུ་ཚབ་དང་ཕྱི་འབྲེལ་མི་སྣ་ཡང་ཇེ་ཁྲི་ (Yang Jiechi) ཟེར་བ་དེ། ཡུ་རོབ་ཀྱི་རྒྱལ་ཁབ་གྷི་རི་སི་ (Greece) དང་། སི་པན་ (Spain) དུ་ཕྱོགས་སྐྱོད་བྱ་རྒྱུ་ཡིན་འདུག་ལ། དབྱེ་ཞིབ་པས་ད་ལན་རྒྱ་ནག་གིས་གནད་ཡོད་ཕྱི་འབྲེལ་མི་སྣ་གཉིས་བསྟུད་མར་ཡུ་རོབ་ཏུ་གཏོང་ཚུལ་དེ། རྒྱ་ནག་གིས་ཡུ་རོབ་རྒྱལ་ཁབ་རྣམས་ཨ་རིའི་ཕྱོགས་སུ་གཞོལ་རྒྱུར་བཀག་འགོག་བྱེད་པའི་ཐབས་བྱུས་གནད་འགག་ཅན་ཞིག་ཏུ་ངོས་འཛིན་བྱེད་ཀྱི་ཡོད་པ་དང་། སྤྱིར་འདས་པའི་ལོ་ཤས་རིང་ཡུ་རོབ་རྒྱལ་ཁབ་མང་དག་ཅིག་གིས་ཚོང་དོན་ཁེ་ཕན་ལ་གཞིགས་ཏེ་རྒྱ་ནག་ལ་བསྟུན་མཁས་བྱས་ཡོད་ཀྱང་། འདི་ལོའི་ཏོག་དབྱིབས་གཉན་རིམས་ཀྱིས་ཡུ་རོབ་ཙམ་དུ་མ་ཟད། འཛམ་གླིང་གི་རྒྱལ་ཁབ་མང་པོའི་ནང་རྒྱ་ནག་ལ་ལྡོག་ཕྱོགས་ཀྱི་རྣམ་པ་གསལ་པོ་སྟོན་པའི་མགོ་བཙུགས་ཡོད་པ་རེད། དེ་བཞིན་ཨ་རིའི་ཕྱོགས་ནས་ཀྱང་ཡུ་རོབ་རྒྱལ་ཁབ་དང་མཉམ་འབྲེལ་གྱིས་རྒྱ་ནག་ལ་ཁ་གཏད་ཀྱི་མཐུན་ཚོགས་ཤིག་སྐྲུན་བཞིན་ཡོད་པ་དེས་ཀྱང་། གྷི་རི་སི་ལྟ་བུའི་ཡུ་རོབ་རྒྱལ་ཁབ་དག་ལ་རྒྱ་ནག་དང་ཨ་རིའི་བར་གྱི་གདམ་ཀ་དེ་རང་བཞིན་གྱིས་སླེབས་བཞིན་ཡོད།

གསར་འགོད་པ། པ་སངས་ཚེ་རིང་།

The post རྒྱ་ནག་གི་ཕྱི་སྲིད་བློན་ཆེན་གྱི་ཡུ་རོབ་སྐོར་སྐྱོད་ལ་གྲུབ་འབྲས་དེ་ཙམ་ཐོན་མི་འདུག appeared first on བོད་ཀྱི་དུས་བབ།.

ཚོགས་ཟུར་སྤེན་པ་ཚེ་རིང་ལགས་ཀྱིས་སྤྱི་སྙོམས་དྲང་བདེན་དང་། ནུས་པ་མཉམ་སྤུངས། གོམ་པ་མདུན་སྤོས་བཅས་དམ་བཅའ་གསུམ་གྱི་ཐོག་ནས་སྲིད་སྐྱོང་འོས་མིར་ལངས་པ་གསལ་བསྒྲགས་གནང་སོང་།དེ་རིང་རྒྱ་གར་གྱི་དགོང་མོའི་ཆུ་ཚོད་ ༧།༣༠ ཐོག་ཚོགས་ཟུར་སྤེན་པ་ཚེ་རིང་ལགས་ཀྱིས་དྲ་ལམ་ཐད་གཏོང་བརྒྱུད་ཁོང་ཕྱི་ལོ་ ༢༠༢༡ ལོའི་སྲིད་སྐྱོང་གི་འོས་གཞིར་ལངས་པ་གསལ་བསྒྲགས་གནང་སོང་བ་དང་། སྐབས་དེར་ཁོང་གིས་མི་མང་ནས་ཁོང་སྲིད་སྐྱོང་དུ་བསྐོས་ཚེ། སྤྱི་སྙོམས་དྲང་བདེན་དང་། ནུས་པ་མཉམ་སྤུངས། གོམ་པ་མདུན་སྤོས་བཅས་ཀྱི་དམ་བཅའ་གསུམ་གྱི་ཐོག་ནས་སྲིད་སྐྱོང་གི་ལས་འཁུར་ཞུ་རྒྱུ་ཡིན་ལ། ཁོང་གི་མི་ཚེ་འདིའི་ནང་བོད་སྤྱི་པའི་དོན་རང་ལ་ཞབས་ཕྱི་ཞུ་རྒྱུའི་ཆོད་སེམས་བརྟན་པོ་ཡོད་ཅེས་བརྗོད་སོང་།

གསལ་བསྒྲགས་ཀྱི་ཐོག་མར་ཁོང་སྲིད་སྐྱོང་གི་འོས་གཞིར་ལངས་དགོས་པའི་རྒྱུ་མཚན་དྲུག་གི་སྐོར་ལ་ཁོང་གིས། དང་པོ་དེར་སྤྱིར་བཏང་སྤྱི་པའི་ལས་དོན་བྱེད་པའི་སྐབས་ལ་ཕྱི་ནང་གི་རྐྱེན་སྣ་ཚོགས་ཤིག་འཕྲད་ཡོང་གི་རེད། ཡིན་ན་ཡང་དེ་སྔ་ངས་མང་ཚོགས་ལ་ཞུས་པ་བཞིན། ངའི་མི་ཚེ་འདིའི་རིང་བོད་སྤྱི་པའི་དོན་རང་ལ་ཞབས་ཕྱི་ཞུ་རྒྱུ་ཡིན། ཆོད་སེམས་འདི་བརྟན་པོ་ཡིན། རྐྱེན་སྣ་ཚོགས་ལ་བརྟེན་ནས་བློ་ཕམ་དང་སེམས་ཕམ་བྱས་ནས་སྤྱི་ཚོགས་ཀྱི་འགན་མ་འཁུར་བའི་གནས་སྟངས་རྩ་བ་ནས་ཆགས་ཀྱི་མེད་པ་རེད། མུ་མཐུད་ནས་བོད་པའི་སྤྱི་པའི་ལས་དོན་བྱ་རྒྱུའི་ཆོད་སེམས་བརྟན་པོ་ཡོད། དེར་བརྟེན་དེ་རིང་སྲིད་སྐྱོང་གི་འོས་མིར་ལངས་ཀྱི་ཡོད། གཉིས་པ་དེར་སྤྱིར་བཏང་སྤྱི་ཚོགས་ལ་ཞབས་ཕྱི་ཞུ་བར་ལས་གནས་དང་གོ་གནས་ཡོད་མེད་ཀྱི་ཁྱད་པར་ཡོད་པ་མ་རེད། འོན་ཀྱང་ལས་གནས་མཐོ་བ་དང་ལྷག་པར་དུ་སྲིད་སྐྱོང་གི་འགན་འཁྱེར་པ་ཡིན་ན། དེའི་ཁྱད་ནུས་འདོན་སྟངས་ལ་ཁྱད་པར་ཏན་ཏན་ཡོང་གི་ཡོད་པ་རེད། མི་སྒེར་གཅིག་གི་ལས་དོན་བྱེད་ཕྱོགས་དང་སྤྱི་པའི་གོ་གནས་གཅིག་གི་ཐོག་ནས་ལས་འགན་བྱེད་རྒྱུའི་ཁྱད་ནུས་དེ་འདྲ་ཡི་མེད་སྟབས། ད་ལན་སྲིད་སྐྱོང་གི་འོས་མིར་ལངས་ནས། རྣམ་པ་ཚོས་འགན་བསྐུར་ན་སོ་སོའི་བསམ་བློའི་ནང་བང་སྒྲིག་བཞག་པ་དག་ལག་བསྟར་བྱ་རྒྱུའི་གོ་སྐབས་ཡོད་པ་རེད། གསུམ་པ་དེར་༸སྤྱི་ནོར་གོང་ས་སྐྱབས་མགོན་རིན་པོ་ཆེ་མཆོག་གི་དགུང་ལོ་བགྲེས་འགྲོ་བཞིན་ཡོད་པར་བརྟེན། འདས་པའི་ལོ་ ༦༥ ལྷག་གི་རིང་༸གོང་ས་མཆོག་གིས་འགན་གཙོ་བོ་བཞེས་པའི་ཐོག་ནས་བོད་དོན་བདེན་མཐའ་གསལ་རྒྱུ་དང་། བོད་མི་རིགས་ཀྱི་ཕན་བདེ་སྒྲུབ་རྒྱུ་སོགས་གནང་བ་རེད། ཕྱི་ལོ་ ༢༠༠༡ ནས་ཕྱེད་བགྲེས་ཡོལ་ཡིན་ཞེས་བཀའ་གནང་བ་དང་། ༢༠༡༡ ནས་ཆབ་སྲིད་ཀྱི་སྐུ་དབང་ཡོངས་རྫོགས་མི་མང་གིས་བདམས་པའི་མགོ་འཁྲིད་ལ་གནང་བ་རེད། རྩ་བའི་ཆ་ནས་༸གོང་ས་མཆོག་ནས་ཆབ་སྲིད་དང་འཛིན་སྐྱོང་གི་འགན་བཞེས་གནང་གི་མེད་ཀྱང་། ད་བར་༸གོང་ས་མཆོག་ནས་བཀའ་སློབ་ལམ་སྟོན་མང་པོ་ཕེབས་ཡོད་པ་རེད། ༸རྒྱལ་བ་རིན་པོ་ཆེ་མཆོག་གི་དགོངས་པ་དེ་དག་གཞི་གཙོ་བོར་བཞག་ནས་ལས་དོན་སྒྲུབ་རྒྱུ་གལ་ཆེན་པོ་ཡིན་པ་རེད། ༸གོང་ས་མཆོག་གི་དགོངས་པ་དེ་དག་ཀྱང་དངོས་ཡོད་གནས་སྟངས་དང་རྒྱུ་མཚན་དང་ལྡན་པ། འཕྲལ་ཕུགས་རྒྱང་གསུམ་ལ་གཟིགས་ཏེ་གཏན་ལ་ཕབ་པ་ཞིག་ཡིན་སྟབས། དེ་དག་ལག་བསྟར་བྱ་རྒྱུའི་འགན་དེ་ང་ཚོའི་མི་རབས་ལ་བབས་ཡོད་པ་རེད། ང་རང་ལྟ་བུར་མཚོན་ནའང་དུས་རྒྱུན་དུ་སྤྱི་ཚོགས་ནང་ལ་འགན་ཞིག་མ་འཁྱེར་ན་རྩ་བ་ནས་འགྲིག་ཐབས་མི་འདུག་ཅེས་པའི་བསམ་བློ་འཁྱེར་གྱི་ཡོད་པ་རེད། དེར་བརྟེན་ད་ཐེངས་སྲིད་སྐྱོང་ལ་ལངས་པ་ཡིན། ཅེས་དང་། རྒྱུ་མཚན་བཞི་པ་དེ་རང་ཉིད་ལ་ཉམས་མྱོང་དང་སློབ་སྦྱོང་སོགས་ཀྱི་ཐད་ནས་གང་འཚམ་ཤེས་རྟོགས་ཡོད་པ་དང་། ལུས་པོའི་འཕྲོད་བསྟེན་ཆ་ནས་ཀྱང་བདེ་ཐང་ཡིན་པ། འདས་པའི་ལོ་མང་རིང་ལས་འགན་མང་པོ་ཞིག་འཁུར་བར་བརྟེན། སྲིད་སྐྱོང་གི་འགན་སྒྲུབ་ཐུབ་པ་དང་། བྱེད་ཐུབ་པ། འཇོན་ཐུབ་པའི་བསམ་བློ་ཡོད་པ་དང་། ད་ལྟ་སྲིད་སྐྱོང་གི་འགན་འཁྱེར་ན་ནུས་པ་འདོན་རྒྱུའི་དུས་ལ་བབས་ཡོད་སྐོར་དང་། རྒྱུ་མཚན་ལྔ་པ་དེ་མང་ཚོགས་ཁྲོད་རང་ཉིད་ཀྱི་ཉམས་མྱོང་དང་། འཇོན་ཐང་། གཤིས་ཀ་བཅས་ལ་རྒྱུས་མངའ་ཡོད་པའི་མི་མང་པོས་སྲིད་སྐྱོང་ལ་ལངས་རྒྱུའི་རེ་བ་འཆང་གི་ཡོད་པ་དང་། ཁོ་ཚོའི་རེ་བ་དེ་བསྐང་ཐུབ་རྒྱུའི་རེ་བ་བྱེད་ཀྱི་ཡོད་སྐོར་དང་། སྲིད་སྐྱོང་ལ་ལངས་དགོས་པའི་རྒྱུ་མཚན་དྲུག་པ་དེ། རང་ཉིད་ཀྱི་ཆབ་སྲིད་དང་། འཛིན་སྐྱོང་། དཔལ་འབྱོར། སྤྱི་ཚོགས་བཅས་ཀྱི་རིགས་ལམ་དང་འཆར་སྣང་གིས་བོད་མིའི་རྩ་དོན་དང་སྤྱི་ཚོགས་ཀྱི་བདེ་དོན་ལ་ཕན་རྒྱུའི་གདེང་ཚོད་དང་ཆོད་སེམས་བརྟན་པོ་ཡོད་སྐོར་སོགས་བརྗོད་སོང་།

ཡང་ཁོང་གི་ཡིག་ཐོག་བསྒྲགས་གཏམ་ནང་དུ། སྤྱི་སྙོམས་དྲང་བདེན་ནི་ཆབ་སྲིད་དང་འཛིན་སྐྱོང་གི་བྱེད་སྒོ་ཡོངས་སུ་རྫོགས་པའི་དམ་བཅའ་གཙོ་བོ་དེ་ཡིན་པ་དང་། སྲིད་ཇུས་དང་ལས་འཆར་ཚང་མ་དམ་བཅའ་འདི་ལས་མ་བརྒལ་བར་འཆར་སྒྲིག་ལག་བསྟར་ཞུ་རྒྱུ་དང་། བཅའ་ཁྲིམས་དང་སྒྲིག་གཞི་ཁག་བརྩི་བཀུར་ཉམས་ལེན་བརྒྱུད། འཛིན་སྐྱོང་གི་བྱེད་སྒོ་རྣམས་ས་ཕྱོགས་ལྷུང་ཕྱོགས་འཐེན་འཁྱེར་མེད་པ་དང་། ཕྱི་གསལ་ནང་གསལ། གྲུབ་འབྲས་གཙིགས་འཛིན། དྲང་པོ་དྲང་བཞག་ཡོང་བ་ཞུ་རྒྱུ་དེ་ཡིན། ཞེས་དང་། ནུས་པ་མཉམ་སྤུངས་ནི་དམིགས་ཡུལ་མངོན་འགྱུར་ཡོང་བའི་ཐབས་ལམ་གཙོ་བོ་དེ་ཡིན་པ་དང༌། ང་ཚོ་གནད་དོན་ཆུང་ཙག་ལ་ནང་ཁུལ་རྩོད་རེས་བྱས་ཏེ་གོང་བུའི་ནུས་པ་ཉམས་ཆག་ཕྱིན་ན། དེའི་གྱོང་གུན་ཕོག་མཁན་ང་ཚོ་རང་ཉིད་ཡིན་པ་མཁྱེན་དགོས་པ་དང་། མི་རེ་རེར་ལངས་ཕྱོགས་དང་བསམ་ཚུལ་མི་མཐུན་པ་ཡོང་ངེས་ཡིན་པ་དང་། དེ་ལྟར་ཡོང་ཆོག་གི་ཡོད་ནའང་། ང་ཚོར་མི་རིགས་ངོས་འཛིན་གྱི་ཐུན་མོང་གི་ལྟ་བ་ཞིག་ཡོད་པ་དེ་རྨང་གཞིར་བཟུང་སྟེ། བོད་ཀྱི་རྩ་དོན་ཐོག་མི་རེ་ངོ་རེའི་ནུས་པ་སྤུངས་ཐུབ་པ་ཡིན་ན། ཆུ་ཐིགས་ བསགས་པའི་རྒྱ་མཚོའི་དཔེ་བཞིན་འབྲས་བུ་འཐོན་རྒྱུ་ཡིན་པས། ཆབ་སྲིད་དང་། འཛིན་སྐྱོང་། དཔལ་འབྱོར། སྤྱི་ཚོགས་བཅས་ཀྱི་ལས་གཞི་ཡོད་དོ་ཅོག་ལ་བོད་ཀྱི་ཡུལ་མི་ཚང་མའི་ནུས་པ་མཉམ་སྤུངས་ཀྱི་སྒོ་ནས་ནས་གྲུབ་འབྲས་ཐོན་པའི་འབད་བརྩོན་གང་ཡོང་ཞུ་རྒྱུ། ཞེས་དང་། གོམ་པ་མདུན་སྤོས་ནི་དམིགས་ཡུལ་ལྟེ་བ་དེ་ཡིན། ང་ཚོས་འདས་ཟིན་པའི་ཉམས་མྱོང་ལས་བསླབ་བྱ་ལེན་དགོས་པ་དང་། ང་ཚོས་འཐུས་ཤོར་དང་ནོར་འཁྲུལ་བྱུང་བ་རྣམས་ཡར་རྒྱས་འགྲོ་བའི་མཐུན་རྐྱེན་དུ་བསྒྱུར་རྒྱུའི་ཐབས་ཤེས་བསྟེན་དགོས་པ་ལས། གོམ་པ་ཕྱིར་བཤིག་བྱེད་ཐབས་མེད། ང་ཚོས་རྒྱལ་སྤྱི་དང་རྒྱ་ནག་ གི་འཕེལ་འགྱུར་དང་བསྟུན་པའི་བོད་དོན་བདེན་མཐའ་གསལ་བའི་ཐབས་ཇུས་འཆར་སྒྲིག་བྱེད་དགོས་དང་། བོད་ཁྱོན་ཡོངས་ཀྱི་གནས་སྟངས་དང་། དེ་བཞིན་དུ་བཙན་བྱོལ་བོད་མིའི་སྤྱི་ཚོགས་ཀྱི་འགྱུར་འགྲོས་དང་། ྋགོང་ས་མཆོག་དང་བོད་མིའི་སྒྲིག་འཛུགས་གནས་ཡུལ་རྒྱ་གར་གྱིས་གཙོས་པའི་བོད་མི་གནས་ སྡོད་བྱ་ཡུལ་རྒྱལ་ཁབ་ཁག་གི་འགྱུར་འགྲོས་དང་བསྟུན་པའི་གོམ་པ་མདུན་སྤོ་བྱེད་ཐུབ་པ་ཡིན་ན། བོད་མི་རྣམས་དུས་རབས་ ༢༡ པ་འདིའི་ནང་མི་རིགས་གཞན་དང་མཉམ་དུ་དཔུང་པ་མཉམ་གཤིབ་ཐུབ་པའི་ཐོག བོད་ཀྱི་ཆོས་དང་རིག་གཞུང་གི་ལེགས་ཆ་རྣམས་ཀྱིས་འགྲོ་བ་མི་སྤྱི་ཡོངས་ལ་ཕན་ཐོགས་བསྐྲུན་རྒྱུའི་དམིགས་ཡུལ་སྒྲུབ་པ་ལའང་མཐུན་འགྱུར་བྱེད་ཐུབ། ཅེས་བརྗོད་སོང་།

གཞན་ཡང་གསལ་བསྒྲགས་སྐབས་ཚོགས་ཟུར་སྤེན་པ་ཚེ་རིང་ལགས་ཀྱིས། ངའི་བསམ་བློའི་འཁྱེར་སོ་དེ། ང་ལ་མི་མང་གིས་འགན་བསྐུར་དང་མ་བསྐུར་དེ་གལ་ཆེན་པོ་རྩི་ཡི་མེད། མི་མང་གིས་འགན་བསྐུར་མ་བསྐུར་དེ་མི་མང་གི་ལག་ལ་ཡོད་པ་རེད། སོ་སོ་ལའང་ལས་དབང་ཞིག་དགོས་ཀྱི་ཡོད་པ་རེད། ང་བྱེད་ཀྱི་ཡིན་ཟེར་མཁན་ཚང་མར་གོ་སྐབས་དེ་ཡོད་པ་མ་རེད། ད་ཐེངས་མི་མང་གིས་འགན་མ་བསྐུར་བ་ཡིན་ན་བློ་ཕམ་དང་འགྱོད་པ་གང་ཡང་མེད། སོ་སོས་ཐབས་ཤེས་གང་ཡོད་བྱས་པ་རེད། ལས་དབང་མི་འདུག་བསམ་ནས་ངོས་ལེན་བྱ་རྒྱུ་རེད། གལ་ཏེ་འགན་བསྐུར་ན་༸གོང་ས་སྐྱབས་མགོན་རིན་པོ་ཆེ་མཆོག་གིས་ནམ་རྒྱུན་དུ་བཀའ་སློབ་གནང་གི་ཡོད་པ་ལྟར། འགན་ཁྱེར་མཁན་དེ་ཚོས་ལས་ཀ་ག་རེ་བྱས་པ་ཡིན་ན་ཡང་། ལྷག་བསམ་རྣམ་དག ཕྱི་གནས་ནང་གསལ། མངོན་ལྐོག་རྒྱབ་མདུན་མེད་པ་བྱེད་དགོས་གསུངས་པ་དེ་མཐའ་གཅིག་ཏུ་བྱ་རྒྱུ་ཡིན་ཞེས་དམ་བཅའ་བརྟན་པོ་ཡིན། ཞེས་བརྗོས་སོང་།

མཇུག་ཏུ་ཚོགས་ཟུར་ལགས་ཀྱིས་མང་ཚོགས་ལ་འབོད་སྐུལ་ཞུས་དོན། ཕྱི་ལོ་ ༢༠༡༦ ལོའི་འོས་བསྡུ་ཆེན་མོའི་སྐབས་སུ་བགྲོ་གླེང་ལྷུག་པོ་དང་། འོས་འཕེན་པ་མཉམ་ཞུགས་ཀྱི་ གྲངས་ཚད་མཐོ་པོ་བྱུང་བ་རྣམས་མང་གཙོའི་ལམ་སྲོལ་ཡར་རྒྱས་འཐུས་ཚང་འབྱུང་བའི་མཐུན་རྐྱེན་ཡིན་ནའང་། དགོས་མེད་ཀྱི་འཐེན་རྩོད་མང་པོ་ཞིག་བྱུང་བའི་གནོད་སྐྱོན་ལས་བསླབ་བྱ་བླངས་ཏེ། ང་ཚོ་གོམ་པ་མདུན་སྤོས་བྱེད་དགོས་པ་དང་། ཐེངས་འདིའི་འོས་བསྡུ་ཆེན་མོའི་ནང་སྲིད་སྐྱོང་དང་སྤྱི་འཐུས་ཀྱི་འོས་གཞིར་འཛུལ་ཞུགས་བྱེད་མཁན་ཚང་མ་སྤྱི་པའི་ལས་དོན་ལ་འགན་ཁུར་ལེན་ཆེད་དུ་འོས་བསྡུའི་ལས་རིམ་ནང་མཉམ་ཞུགས་གནང་བ་ཞིག་ཡིན་སྟབས། ཚང་མས་རང་རང་གི་རྣམ་དཔྱོད་རྩལ་དུ་སྤྲུགས་ཏེ་སྤྱི་དོན་སྒྲུབ་ཐབས་ཀྱི་འཆར་སྒོ་རྣམས་མང་ཚོགས་ཀྱི་མདུན་དུ་སྤུངས་གནང་ཡོང་བ་དང་། དཀྲོག་གཏམ་དང་དཀྲུག་ཤིང་ཆེད་སྒྲོགས་བྱེད་མཁན་རེ་ཟུང་ཡོང་སྲིད་པ་དེ་དག་ལ་དོགས་ཟོན་གནང་སྟེ། དགོས་མེད་སྒེར་རྩོད་དང་ཕྱོགས་འཐེན་འགྲོ་གཞིའི་རྩོད་གླེང་རིགས་མི་གནང་བའི་འབོད་སྐུལ་ཞུ་རྒྱུ་དང་། འོས་གཞི་སོ་སོར་རྒྱབ་སྐྱོར་བྱེད་མཁན་ཚོས་ཀྱང་མང་གཙོའི་དོན་སྙིང་དང་བོད་སྤྱི་པའི་རྩ་དོན་སེམས་ལ་བཅངས་ཏེ་འོས་བསྡུའི་ལས་རིམ་ནང་མཉམ་ཞུགས་ཡོང་བའི་འབོད་སྐུལ་དང་རེ་སྨོན་ཆབས་ཅིག་ཏུ་ཞུ་རྒྱུ། ཞེས་བཀོད་འདུག

གསར་འགོད་པ། པ་སངས་ཚེ་རིང་།

The post ཚོགས་ཟུར་སྤེན་པ་ཚེ་རིང་ལགས་ཕྱི་ལོ་ ༢༠༢༡ ལོའི་སྲིད་སྐྱོང་འོས་མིར་ལངས་པ་གསལ་བསྒྲགས་གནང་། appeared first on བོད་ཀྱི་དུས་བབ།.

དམངས་གཙོའི་དུས་དྲན་དང་བསྟུན་སློབ་ཕྲུག་ཚོས་བོད་ཀྱི་མང་གཙོའི་འཕེལ་རིམ་དང་༸རྒྱལ་བ་ཐམས་ཅད་མཁྱེན་པའི་བླ་ན་མེད་པའི་ལེགས་སྐྱེས་ཞེས་པའི་བརྗོད་གཞིའི་སྟེང་རྩོམ་ཡིག་འགྲན་བསྡུར་བྱས་ཡོད་འདུག

ཁ་སང་ཕྱི་ཚེས་ ༢ ཉིན། བོད་ཀྱི་དམངས་གཙོའི་དུས་དྲན་ཐེངས་ ༦༠ པ་དང་བསྟུན། བོད་མི་འདུས་སྡོད་ཀྱི་ས་ཁུལ་ཁག་ཏུ་དམངས་གཙོའི་དུས་དྲན་རྣམ་པ་འདྲ་མིན་ཐོག་སྲུང་བརྩི་བྱས་ཡོད་པ་ལྟར། སྒང་ཏོག་བོད་ཀྱི་གསོལ་མགྲོན་ཚོགས་ཁང་དུ་ས་གནས་མགོ་འཛིན་གཙོའི་སྒང་ཏོག་བོད་ཀྱི་སྐད་ཡིག་གཅེས་འཛིན་ཚོགས་པ། རིས་མེད་དགོན་སྡེ་ཁག་གི་སྐུ་ཚབ་རྣམ་པ། ས་གནས་གཞུང་འབྲེལ་མིན་པའི་ཚོགས་པ་དྲུག་གི་ཚོགས་གཙོ་དང་རྒྱུན་ལས་རྣམ་པ། སྐྱིད་སྡུག་དང་སྡེ་ཚན་ཁག་གི་སྐུ་ཚབ་བཅས་མི་གྲངས་ ༣༠ ཙམ་ལྷན་འཛོམས་ཐོག་དམངས་གཙོའི་དུས་དྲན་སྲུང་བརྩི་ཞུས་ཡོད་འདུག

མཛད་སྒོའི་སྟེང་དམིགས་བསལ་འདི་ལོར་བོད་མིའི་སྒྲིག་འཛུགས་ནས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུའི་ཡོངས་ཁྱབ་གསལ་བསྒྲགས་གནང་དོན་བཞིན། སྒང་ཏོག་བོད་ཀྱི་སྐད་ཡིག་གཅེས་འཛིན་ཚོགས་ཆུང་གི་ངོས་ནས་རྒྱལ་བའི་བཀའ་དྲིན་རྗེས་དྲན་སྲུང་བརྩི་ཞུ་ཆེད། བོད་ཀྱི་མང་གཙོའི་དུས་དྲན་དང་བསྟུན། ཀ་རྡོར་འབྲས་གསུམ་ཁྱབ་ཁོངས་སློབ་གྲྭ་འགྲིམ་བཞིན་པའི་འཛིན་གྲྭ་ ༩ ནས་ ༡༢ བར་འབྲིང་རིམ་དང་མཐོ་རིམ་སློབ་མ་རྣམས་རང་རེའི་སྐད་ཡིག་བཀོལ་སྤྱོད་དང་ཡར་རྒྱས་ལ་སྨན་པའི་སླད། བོད་ཀྱི་མང་གཙོའི་འཕེལ་རིམ་དང་༸རྒྱལ་བ་ཐམས་ཅད་མཁྱེན་པའི་བླ་ན་མེད་པའི་ལེགས་སྐྱེས་ཞེས་པའི་བརྗོད་གཞི་ཐོག  བོད་ཡིག་འབྲི་རྩོམ་འགྲན་བསྡུར་ཞིག་གོ་སྒྲིག་ཞུས་པ་བཞིན། གོང་གསལ་ས་གནས་ཁྱབ་ཁོངས་ནས་སློབ་མ་ ༡༠ གྲངས་ཞིག་མཉམ་ཞུགས་བྱུང་བ་ལས། མཉམ་ཞུགས་གནང་བའི་གྲུབ་འབྲས་ཀྱི་ཨང་རིམ་སོན་པ་དག་ལ་གཟེངས་བསྟོད་བྱ་དགའ་སྤྲད་ཡོད་འདུག

དེ་བཞིན་སྒང་ཏོག་ས་གནས་འགོ་འཛིན་ལས་ཁུངས་ཀྱི་རོགས་དྲུང་དང་། དངུལ་གཉེར་གཅིག་ལྕོགས་ལས་བྱེད་ཉི་མ་དོན་གྲུབ་ལགས་ཞབས་ལོ་ ༢༥ འཁོར་བའི་བསྔགས་བརྗོད་ཕྱག་འཁྱེར་དང་ཕྱག་རྟགས་སྤྲད་ཡོད་པ་དང་། འཕྲོད་བསྟེན་ལས་ཁུངས་ནས་དམིགས་བསལ་དགོས་མཁོ་ཅན་གྱི་མི་གྲངས་ ༦ ལ་ངལ་སེལ་རོགས་དངུལ་དང་། ཏོག་དབྱིབས་སྔོན་འགོག་གི་ཅ་དངོས་བཅས་སྤྲད་ཡོད་པ།  གཞན་ཡང་སྒང་ཏོག་ས་འཐུས་ཚེ་རིང་སྟོབས་རྒྱལ་ལགས་ནས་མང་ཚོགས་དང་ལྷག་པར་གཞོན་སྐྱེས་ཚོར་གོ་རྟོགས་ཡོང་སླད་མང་གཙོའི་འཕེལ་རིམ་སྐོར་འབྲི་རྩོམ་སྒྲོག་སྦྱང་གསལ་བཤད་གནང་བ་དང་། མཐར་ས་གནས་རང་བདེན་ཚོགས་ཆུང་གི་ཚོགས་གཙོ་ལས་ཚབ་ནས་ཐུགས་རྗེ་ཆེའི་གསུང་བཤད་ཀྱི་སྒོ་ནས་བོད་ཀྱི་མང་གཙོའི་དུས་དྲན་སྲུང་བརྩིའི་མཛད་སྒོ་གྲོལ་ཡོད་འདུག

བོད་ཡིག་འབྲི་རྩོམ་འགྲན་བསྡུར་གྱི་གྲུབ་འབྲས་ནང་འབྲིང་རིམ་སློབ་མ་འཛིན་གྲྭ་ ༩ ནས་ ༡༢ བར་ཨང་དང་པོ་ཀ་སྦུག་གཏན་སློབ་ནས་ཡིན་པའི་པདྨ་དབང་མོ།  ཨང་གཉིས་པ་ཀུན་བཟང་བདེ་ཆེན། ཨང་གསུམ་པ་བསྟན་འཛིན་དབྱངས་འཛོམས། ཨང་བཞི་པ་སྒང་ཏོག་སྐྱིད་བདེ་ཁང་སློབ་མ་བསྟན་འཛིན་མཁའ་འགྲོ་བཅས་ཡིན་པ་དང་། གཞན་ཡང་མཐོ་རིམ་སློབ་མ་རྣམས་ནས་རྣམ་རྒྱལ་གསོ་རིག་མཐོ་སློབ་ཁོངས་ནས་ཨང་དང་པོ་ཕུར་བུ་ཆོག་པ། ཨང་གཉིས་པ་ནོར་བུ་བསམ་འཕེལ། ཨང་གསུམ་པ་བཀྲ་ཤིས་རྣམ་རྒྱལ།  ཨང་བཞི་པ་བསྟན་འཛིན་ལྷ་སྒྲོན། ཨང་ལྔ་པ་བྱམས་པ་ཆོས་འབྱོར། ཨང་དྲུག་པ་པདྨ་སྐྱིད་སྒྲོན་བཅས་ཡིན་འདུག

གནས་ཚུལ་མཁོ་སྤྲོད་པ་ཨཱཅརྱ་ཚུལ་ཁྲིམས་རྒྱ་མཚོ།

The post འབྲས་ལྗོངས་སྒང་ཏོག་ཁུལ་དུ་བོད་ཀྱི་མང་གཙོའི་དུས་དྲན་སྲུང་བརྩི་ཞུས། appeared first on བོད་ཀྱི་དུས་བབ།.