ཉེ་ལམ་ཁེ་ན་ཌའི་ནང་གནས་སྡོད་བོད་རིགས་བུ་མོ་ཀུན་བཟང་སྐྱིད་རོང་ལགས་ཀྱི་འགུལ་བརྙན་ཡར་ཀླུང་ངམ་ཡར་ཀླུང་གཙང་པོ་ཞེས་པ་དེ་ཡུལ་དེའི་ཨོ་ཊ་ཝ་རྒྱལ་སྤྱིའི་འགུལ་རིས་གློག་བརྙན་དུས་སྟོན་ (Ottawa International Animation Festival)ནང་ཚུད་ཡོད་འདུག

ཡར་ཀླུང་ངམ་ཡར་ཀླུང་གཙང་པོ་ཞེས་པའི་འགུལ་རིས་གློག་བརྙན་དེའི་རིང་ཚད་ལ་སྐར་མ་ ༥ དང་སྐར་ཆ་ ༢༤ ཡོད་འདུག་ལ། དེ་ནི་བོད་རིགས་བུ་མོ་ཀུན་བཟང་སྐྱིད་རོང་ལགས་ཀྱིས་འཁྲིད་སྟོན་བྱས་ཤིང་། ཨི་མེལ་ལེ་ཁར་གཙུག་ལག་སློབ་གྲྭའི་ (Emily Carr University) སྒྱུ་རྩལ་དང་ཇུས་འགོད་ཚན་པས་བཟོས་ཡོད་འདུག ཐེངས་འདིའི་རྒྱལ་སྤྱིའི་འགུལ་བརྙན་དུས་སྟོན་སྟེང་འཛམ་གླིང་རྒྱལ་ཁབ་ ༨༤ ནས་ཁྱོན་གློག་བརྙན་གྲངས་ ༡༩༥༠ འཛུལ་ཞུགས་བྱས་ཡོད་པའི་ཁྲོད། འགུལ་བརྙན་ཐུང་གྲས་ ༩༢ ཙམ་ཞིག་འགྲན་བསྡུར་ནང་འདེམས་ཐོན་བྱུང་ཡོད་འདུག་ལ། དེའི་ཐོག་གློག་བརྙན་ ༡༦ ཙམ་ཞིག་ཁེ་ན་ཌའི་སློབ་མའི་གློག་བརྙན་འགྲན་བསྡུར་ནང་འདེམས་ཡོད་འདུག དེ་བཞིན་གློག་བརྙན་ ༤༡ ཙམ་ཁེ་ན་ཌ་དང་རྒྱལ་སྤྱིའི་སློབ་མའི་ནུས་པ་མཚོན་ཆེད་འདེམས་ཡོད་པ་བཅས་ཁྱོན་གློག་བརྙན་ ༡༤༩ འདེམས་སྒྲུག་བྱས་ཡོད་པའི་ཁྲོད། ཀུན་བཟང་སྐྱིད་རོང་ལགས་ཀྱི་འགུལ་བརྙན་ཡར་ཀླུང་ནི་ཁེ་ན་ཌའི་སློབ་མའི་གློག་བརྙན་འགྲན་བསྡུར་ནང་ཚུད་པ་ཞིག་ཡིན་འདུག

ཁོར་ཡུག་སྲུང་སྐྱོབ་ཀྱི་དྲ་ཚིགས་ (State of The Planet) ཞེས་པའི་ཐོག་བརྙན་དེ་དང་འབྲེལ་ནས་བཅར་འདྲི་བྱས་པ་ཞིག་གི་ནང་། འགུལ་བརྙན་དེའི་བརྗོད་བྱ་གཙོ་བོ་བོད་ཡར་ཀླུང་འདེམས་དགོས་པའི་རྒྱུ་མཚན་གྱི་སྐོར་ལ་ཀུན་བཟང་སྐྱིད་རོང་ལགས་ཀྱིས། ཡར་ཀླུང་གཙང་པོ་ནི་བོད་ཀྱི་ནུབ་རྒྱུད་ནས་རྒྱ་གར་གྱི་ཨ་རུ་ན་ཅལ་སྡེའི་ནང་བཞུར་གྱི་ཡོད་པ་རེད། ངའི་ཨ་མ་ནི་མངའ་སྡེ་དེའི་ནང་གི་ཏི་ཛུ་ (Tezu) བོད་མིའི་གཞིས་གྲོང་དུ་སྐྱེས་པ་དང་། གཞིས་གྲོང་དེ་ནི་ཡར་ཀླུང་གཙང་པོའི་རྒྱུད་དུ་ཆགས་ཡོད་པ་རེད། ང་ཚོའི་ཉིན་རེའི་འཚོ་བ་གཙང་བོར་ཤུགས་ཆེན་བརྟེན་ཡོད་པ་མ་ཟད། ངའི་བྱིས་དུས་ཀྱི་དབྱར་ཁ་ཆ་ཚང་དེར་བསྐྱལ་ཡོད་པ་རེད། ཉིན་རེར་ཐེངས་གསུམ་བཞི་ཙམ་ལ་འཁྲུས་རྒྱག་པ་དང་ཟས་སྣོད་འཁྲུད་པ། འཐུང་ཆུ་ལེན་དུ་འགྲོ་བ་སོགས་ཀྱི་ཆེད་ཆུ་ཁར་འགྲོ་དགོས་པ་རེད། དེ་བཞིན་གཙང་བོ་ནི་བྱིས་པ་ཚོ་རྩེད་མོར་རོལ་ས་གཙོ་བོ་ཞིག་ཡིན་པ་རེད། ཅེས་ཆུང་དུས་ནས་ཡར་ཀླུང་གཙང་བོར་འབྲེལ་འདྲིས་དམ་ཟབ་ཡོད་སྐོར་འགྲེལ་བརྗོད་བྱས་འདུག

ཡང་འགུལ་བརྙན་དེ་བཟོས་པའི་དམིགས་ཡུལ་གྱི་སྐོར་ལ་ཁོང་མོས། རྒྱ་ནག་གཞུང་གིས་གང་བྱུང་ཆུ་མཛོད་གསར་རྒྱག་བྱས་ཏེ་བོད་ནས་འབབ་པའི་གཙང་པོ་དེ་དག་གི་རྒྱུད་དུ་གཞིས་རྟེན་ཆགས་པའི་ཨེ་ཤ་ཡའི་རྒྱལ་ཁབ་མང་པོ་ཞིག་གི་ཡུལ་མིའི་འཚོ་རྟེན་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་སྟབས། དེའི་ཐད་དངོས་བྱུང་གློག་བརྙན་ཞིག་བཟོ་རྒྱུར་བསམ་བློ་ཡང་ཡང་འཁོར་ཡོད་པ་མ་ཟད། ཆུང་དུས་ནས་རང་ཉིད་སྒྲུང་ལ་ཉན་རྒྱུ་དང་བཤད་རྒྱུ་ལ་དགའ་པོ་ཡོད་རྐྱེན། ཐེངས་འདིའི་གློག་བརྙན་དེ་བརྒྱུད་ཡར་ཀླུང་གཙང་པོ་དང་མིའི་འཚོ་བའི་བར་རིན་ཐང་ཇི་ཙམ་ཆགས་ཡོད་པ་ཤེས་རྟོགས་སླད་དུ་ཕབ་བསྐྲུན་བྱས་པ་ཡིན་སྐོར་བརྗོད་འདུག

ཨོ་ཊ་ཝ་རྒྱལ་སྤྱིའི་འགུལ་རིས་གློག་བརྙན་དུས་སྟོན་ (Ottawa International Animation Festival)དེ་འདི་ལོའི་ཕྱི་ཟླ་ ༩ ཚེས་ ༢༣ ཉིན་ནས་ཕྱི་ཟླ་ ༡༠ ཚེས་ ༤ ཉིན་བར་དུ་འཚོག་རྒྱུ་ཡིན་འདུག

གསར་འགོད་པ། ཀླུ་མགོན་ཐར།

The post བོད་རིགས་བུ་མོ་ཞིག་གི་འགུལ་བརྙན་རྒྱལ་སྤྱིའི་གློག་བརྙན་དུས་སྟོན་ནང་ཚུད། appeared first on བོད་ཀྱི་དུས་བབ།.

རྒྱ་ནག་གིས་ཧོང་ཀོང་ནང་རྒྱལ་ཁབ་བདེ་འཇགས་ཀྱི་ཁྲིམས་ཟེར་བ་ལག་བསྟར་དང་འབྲེལ་ཨ་རིས་ཧོང་ཀོང་དང་ཉེས་ཅན་རྩིས་སྤྲོད་ཀྱི་གྲོས་ཆོད་གཙོའི་གྲོས་ཆོད་གསུམ་ཙམ་མཚམས་འཇོག་བྱས་ཡོད་འདུག

ཁ་སང་ཕྱི་ཚེས་ ༡༩ ཉིན།  ཨ་རིའི་སྲིད་གཞུང་གིས་རྒྱ་ནག་དམར་ཤོག་ཚོགས་པས་རྒྱལ་ཁབ་བདེ་འཇགས་ཀྱི་ཁྲིམས་ཟེར་བ་ལག་བསྟར་བྱས་ཏེ། ཧོང་ཀོང་མི་མང་གི་རང་དབང་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་གཏོང་གི་ཡོད་པའི་ངོས་འཛིན་འོག  ཨ་རིས་ཧོང་ཀོང་ལ་ཉེས་ཅན་རྩིས་སྤྲོད་ཀྱི་གྲོས་ཆོད་གཙོའི་གྲོས་ཆོད་གསུམ་ཙམ་མཚམས་འཇོག་ཡོངས་བསྒྲགས་གནང་འདུག

གནད་དོན་དེའི་ཐད་ཨ་རིའི་རྒྱལ་སྲིད་དྲུང་ཆེ་མེག་ཕོམ་པེ་ལགས་ཀྱིས། རྒྱ་ནག་དམར་ཤོག་ཚོགས་པས་ཧོང་ཀོང་མི་མང་གི་རང་སྐྱོང་དང་རང་དབང་རྡོག་རོལ་གཏོང་གི་ཡོད་སྟབས། ཨ་རིའི་ངོས་ནས་ཧོང་ཀོང་དང་འབྲེལ་བའི་གྲོས་ཆོད་ཁག་གསུམ་རྩིས་མེད་དུ་གཏོང་རྒྱུ་ཡིན་པ་དང་། གྲོས་ཆོད་དེ་དག་ནི་ཉེས་ཅན་རྩིས་སྤྲོད་དང་། ཁྲིམས་ཆད་ཕོག་པའི་བཙོན་པ་རྩིས་སྤྲོད། དེ་བཞིན། རྒྱལ་སྤྱིའི་ཚོང་འབྲེལ་ཁྲོད་ཀྱི་ཡོང་འབབ་ལ་འདྲ་མཉམ་གྱི་དཔྱ་ཁྲལ་བཅས་མཚམས་འཇོག་རྒྱུ་ཡིན་སྐོར་བརྗོད་འདུག

ཐེངས་འདིར་ཨ་རིས་ཧོང་ཀོང་ལ་ཉེས་ཅན་རྩིས་སྤྲོད་མཚམས་འཇོག་དང་འབྲེལ། ཨ་རིའི་སྲིད་འཛིན་ཊོམ་ཕུ་མཆོག་གིས། ཉེ་སྔོན་ཕྱི་ཚེས་ ༩ ཉིན་འཛིན་བཟུང་བྱས་པའི་ཧོང་ཀོང་གི་དམངས་གཙོའི་ལས་འགུལ་བ་དང་། ཀུ་ཤུ་གསར་ཁང་ཆེད་གཉེར་་ཁང་གི་འགན་འཛིན་ཕྱུག་བདག་ཇི་མེ་ལཱེ་(Jimmy Lai)ལགས་ནི་སྙིང་སྟོབས་ལྡན་པའི་མི་ཞིག་པའི་བསྔགས་བརྗོད་བྱས་ཡོད་འདུག ཨ་རི་ནི་ཧོང་ཀོང་ལ་ཉེས་ཅན་རྩིས་སྤྲོད་ཀྱི་གྲོས་ཆོད་མཚམས་འཇོག་བྱེད་མཁན་ཐོག་མ་མིན་པར། ད་སྔ་བར་དབྱིན་ཡུལ་དང་འཇར་མན། ཨོ་གླིང་སོགས་ནུབ་ཕྱོགས་སྟོབས་ཆེན་རྒྱལ་ཁབ་ཁག་ཅིག་གིས་ཧོང་ཀོང་དང་ཉེས་ཅན་རྩིས་སྤྲོད་ཀྱི་གྲོས་ཆོད་རྩིས་མེད་བཏང་ཡོད་པ་རེད།

ཧོང་ཀོང་ནང་བདེ་འཇགས་ཁྲིམས་གསར་ལག་བསྟར་དང་འབྲེལ། ཟླ་འདིའི་ཕྱི་ཚེས་ ༧ ཉིན་ཨ་རིའི་སྲིད་འཛིན་ཊོམ་ཕུ་གཞུང་གིས། ཧོང་ཀོང་སྤྱི་ཁྱབ་ཀེ་རེ་ལམ་གཙོས་པའི་གནད་ཡོད་མི་སྣ་ཁག་ཅིག་དང་དེ་བཞིན། ཧོང་ཀོང་དང་འབྲེལ་བའི་རྒྱ་ནག་གི་དཔོན་རིགས་བཅས་ཁྱོན་མི་གྲངས་ ༡༡ ལ་ཉེས་ཆད་བཏང་སྟེ། ཨ་རིའི་ནང་ཡོད་པའི་རྒྱའི་དཔོན་རིགས་དེ་དག་གི་རྒྱུ་དངོས་གཉིས་གཞུང་བཞེས་གཏོང་རྒྱུ་ཡིན་པ་ཡོངས་བསྒྲགས་བྱས་ཡོད་པ་དང་། ཁྲིམས་ཆད་དེའི་ཁྲོད་ཧོང་ཀོང་སྤྱི་ཁྱབ་ཀེ་རེ་ལམ་དང་ཧོང་ཀོང་ཉེན་རྟོན་ལས་ཁུངས་ཀྱི་མགོ་གཙོ་ཟུར་བ་སི་ཝི་ཧྥན་ལོ་(Stephen Lo)དང་ད་ལྟ་ལས་ཐོག་མགོ་གཙོ་ཁེར་སི་ཝ་ཊང་(Chris Tang)། ཧོང་ཀོང་གི་བདེ་སྲུང་དྲུང་ཆེ་ཇོ་ཧན་ཀཱ་ཆའི་(John Ka-chiu)དང་ཁྲིམས་དྲུང་ཊི་རེ་སཱ་(Teresa Cheng)། གཞན་ཡང་ཧོང་ཀོང་ནང་ཡོད་པའི་རྒྱ་ནག་གི་ལས་བྱེད་མཐོ་ཤོས་ལཱོ་ཧོ་ཡེན་(Luo Huining)དང་ཨོ་མན་དང་ཧོང་ཀོང་གི་གནས་བབ་ལྟ་ཞིབ་ལས་ཁུངས་ཀྱི་འགན་འཛིན་ཤཱ་བྷོ་ལོང་(Xia Baolong)བཅས་ཡོད་འདུག

ད་ལྟའི་ཆར་ཧོང་ཀོང་ནང་བདེ་འཇགས་ཁྲིམས་ཟེར་བ་ལག་བསྟར་གྱིས། རྒྱ་ནག་གཞུང་གིས་ཧོང་ཀོང་མི་མང་གི་སྨྲ་བརྗོད་རང་དབང་དང་གསར་འགོད་རང་དབང་སོགས་ལ་བཀག་སྡོམ་ཤུགས་ཆེར་བྱེད་བཞིན་ཡོད་པ་མ་ཟད། ཁྲིམས་དེའི་འོག་ཧོང་ཀོང་གི་སློབ་གསོའི་ཁ་ཕྱོགས་བསྒྱུར་གྱི་ཡོད་སྟབས། ད་ལྟ་ཧོང་ཀོང་གི་དགེ་རྒན་མཐུན་ཚོགས་གཙོས་པའི་མི་མང་པོ་ཞིག་གིས་སློབ་གྲྭ་ཁག་གི་སློབ་དེབ་ལ་ཆབ་སྲིད་ཀྱི་དབང་སྒྱུར་བྱེད་བཞིན་ཡོད་པའི་སེམས་འཚབ་བྱེད་བཞིན་ཡོད་པ་རེད།

གསར་འགོད་པ། སྐལ་བཟང་སྦྱིན་པ།

The post ཨ་རིས་ཧོང་ཀོང་ལ་ཉེས་ཅན་རྩིས་སྤྲོད་ཀྱི་གྲོས་ཆོད་མཚམས་འཇོག་བྱས། appeared first on བོད་ཀྱི་དུས་བབ།.

ཉི་མ་དབང་མོ། ལྡི་ལི་མཐོ་སློབ།

རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་ཀྱིས་འཛམ་གླིང་འདིའི་སྒང་གི་མི་ཡོད་ཚད་ལ་ཕལ་ཆེར་དངོས་ཤུགས་བརྒྱུད་གསུམ་ནས་ལུས་སེམས་གཉིས་ལ་སྔར་མེད་པའི་གནོད་སྐྱོན་འཚབ་ཆེན་ཞིག་བཏང་ཡོད་ལ། བོད་མི་དང་བོད་མིའི་ལས་དབང་ལ་ཁ་ཞེ་གཉིས་མེད་ཀྱིས་ཤ་ཚ་ལྡན་པ་རྣམས་ལ་དེའི་སྟེང་དུ་ད་དུང་སེམས་ཁྲལ་འཕར་མ་ཞིག་བྱུང་དང་འབྱུང་བཞིན་ཡོད། ཕྱི་ལོ་ ༢༠༢༠ ལོ་ནི་བོད་མིའི་སྒྲིག་འཛུགས་ངོས་ནས་༸གོང་ས་མཆོག་གི་བཀའ་དྲིན་མཚོན་ཕྱིར། བཀའ་དྲིན་རྗེས་དྲན་གྱི་ལོ་ཞིག་ཏུ་སྲུང་བརྩི་ཞུ་རྒྱུ་གཏན་འཁེལ་གནང་བ་བཞིན་སྲུང་བརྩི་ཞུ་ཐུབ་ཀྱི་མེད་པ་དང་། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་ཀྱི་འོས་འདེམས་བྱ་བའི་ཉིན་མོར་ཉིན་རེ་ནས་ཉེ་བར་སླེབ་བཞིན་པ་དེ་ཡིན།

བོད་གཞུང་མང་གཉིས་ཀྱི་སེམས་ནང་བོད་མིའི་སྒྲིག་འཛུགས་ཀྱིས་འཆར་གཞི་གནང་བ་ལྟར་བཀའ་དྲིན་རྗེས་དྲན་སྲུང་བརྩི་ཞུ་ཐུབ་ཀྱི་མེད་པ་ནི་འདོད་བློ་མ་ཁེངས་པའི་གནས་ཤིག་ཡིན་པ་སྨྲ་མ་དགོས་ཀྱང་། དེ་བས་བློ་འཚབ་ཆེ་བ་ནི། གལ་ཏེ་གཉན་རིམས་དེའི་ཛ་དྲག་ད་དུང་དེ་བཞིན་མུ་མཐུད་ནས་གནས་ན། ང་ཚོ་ནི་ཡུལ་གྱར་བ་ཞིག་ཡིན་སྟབས། ཡུལ་ཆུ་འཐུང་ན་ཡུལ་ཁྲིམས་འཁྱེར་འགྲོ་དགོས་ཞེས་གཏམ་དཔེ་ཡོད་པ་བཞིན། བོད་མི་བཙན་བྱོལ་བ་རྒྱ་གར་ཕྱི་ནང་ཡུལ་གྲུ་གང་དུ་ཡོད་ཀྱང་། གནས་སྐབས་རིང་ཡུལ་དེའི་ཁྱིམ་སྡོད་དང་སྤྱི་ཚོགས་རྒྱང་བཀྱེད་ཀྱི་བཀའ་རྒྱ་སོགས་ལ་ངེས་པར་བརྩི་སྲུང་བྱེད་དགོས་པ་ལས་རང་སྣང་གང་ཤར་བྱེད་མ་ཆོག་པས། སྲིད་སྐྱོང་དང་སྤྱི་འཐུས་གཉིས་ཀྱི་འོས་བསྡུའི་ལས་རིམ་དེ་དག་ཇི་འདྲ་ཞིག་ཡོང་བསམ་པ་དེ་ཡིན།

རང་ཡུལ་རྒྱ་དམར་གྱིས་བཙན་འཕྲོག་བྱས་རྗེས་བོད་མི་གཞིས་བྱེས་གཉིས་སུ་གྱེས་པའི་བརྒྱུད་རིམ་ཁྲོད་ནས་གཞིས་བཞུགས་སྤུན་ཟླ་རྣམ་པ་རྒྱ་དམར་གྱི་སྲིད་ཇུས་གདུག་རྩུབ་འོག་ད་དུང་ཡང་ལུས་སེམས་གཉིས་ཀྱི་ཐོག་དཀའ་ངལ་མྱངས་དང་མྱོང་བཞིན་ཡོད་པ་དང་། བྱེས་ལ་འབྱོར་བའི་སྤུན་ཟླ་རྣམ་པ་ཆེས་ཐོག་མར་གཞན་ཡུལ་གྱི་སྐད་ཡིག་མ་ཤེས་པའི་སྟེང་གནམ་གཤིས་དང་ཡུལ་སྲོལ་གོམས་གཤིས་མ་འདྲ་བས་དཀའ་སྡུག་སྣ་ཚོགས་མྱངས་ཡོད་ཀྱང་། གཙོ་བོ་༸གོང་ས་མཆོག་གི་བཀའ་དྲིན་དང་མི་སྒེར་སོ་སོའི་ཞུམ་པ་མེད་པའི་སྙིང་སྟོབས་སོགས་ལ་བརྟེན་ནས་རིམ་གྱིས་འཚོ་བའི་གནས་སྟངས་ཇེ་ཡག་ཏུ་སོང་སྟེ། ཟུར་དུ་གཞིས་ཆགས་དང་བོད་མིའི་སྒྲིག་འཛུགས། དེ་བཞིན་མ་འོངས་སོན་རྩའི་ཆེད་སློབ་གྲྭ་སོགས་བཙུགས་ཐུབ་པ་རེད། ད་ཆ་བྱེས་ཀྱི་བོད་མི་རྣམས་ནི་བཙན་བྱོལ་བ་འདྲ་འདྲའི་ནང་ནས་མ་འདྲ་བ་ཞིག་གྱུར་ཡོད་པ་མ་ཟད། བཙན་བྱོལ་དུ་འཚར་ལོངས་བྱུང་བའི་གཞོན་སྐྱེས་ཤིག་ཡིན་ན་ཡི་གེ་འབྲི་ཀློག་གི་ཆུ་ཚད་གཏིང་ཟབ་ལོས་ཇི་ལྟར་ཡང་། གང་ལྟར་ཕལ་ཆེར་གྱིས་ལག་ཐོགས་ཁ་པར་དང་དྲ་རྒྱ་ཁ་སྔོག་མ་ཤེས་པ་ཞིག་མེད་སྟབས། དྲ་ཐོག་ནས་འོས་ཤོག་དང་འབྲེལ་བའི་ལས་འགུལ་ལ་ལྟ་ཉན་ཐུབ་པ་ནི། ད་ལྟ་ནད་ཡམས་ཀྱིས་རྐྱེན་བྱས་ཏེ་གནས་སྟངས་སྐྱོ་བོ་ཡིན་སྐབས་ཀྱི་སེམས་ཁྲལ་དང་རྐྱེན་ངན་བར་ནས་ད་དུང་རེ་བ་བཟང་པོ་བརྒྱབ་ཆོག་པ་ཞིག་ཡིན་པ་རེད།

༸གོང་ས་མཆོག་གིས་ཐུགས་ཞིབ་ཟབ་མོ་གནང་སྟེ་ང་ཚོར་དགའ་བཞིན་སྤྲོ་བའི་ངང་དམངས་གཙོའི་གཞུང་ཞིག་གསོལ་རས་གནང་བ་དེ། ང་ཚོས་ཆུད་ཟོས་སུ་མ་གཏང་བར་གོ་སྐབས་དམ་འཛིན་གྱིས་བེད་སྤྱོད་ལེགས་པར་བཏང་ན། གཅིག་ནས་༸གོང་ས་མཆོག་བཞེད་དགོངས་འགྲུབ་ཅིང་། གཉིས་ནས་མ་མཐར་ང་ཚོ་གོ་ཆོད་པ་ལྟ་བུ་ཞིག་ཏུ་གནས་སྐབས་བརྩི་ཆོག་པ་ཞིག་ཡིན། དེ་མིན་ང་ཚོས་གལ་ཆེན་ལ་དོན་ཆེན་མ་བརྩི་བར་རང་སྣང་གང་ཤར་བྱེད་པ་དང་། མནོ་བསམ་ཡག་པོ་མ་གཏང་བར་གོ་ལོ་ཐོས་ལོ་བཞིན་འོས་ཤོག་འཕངས་ནས་རྩེད་མོའི་སྣང་བ་ཙམ་བྱེད་པ། དེ་བཞིན་ཉག་ཕྲ་བའི་བོད་ཀྱི་བསྟན་སྲིད་གཉིས་རྒྱ་ཡན་དུ་བཏང་ནས་ཉེ་དགའ་ཕྱོགས་ཞེན་སོགས་ཀྱི་དབང་དུ་སོང་ན། སྦར་མཐིལ་གང་ལས་མེད་པའི་བཙན་བྱོལ་གྱི་བོད་མིའི་ཆིག་སྒྲིལ་ལ་རང་བཞིན་གྱིས་དོ་ཕོག་འབྱུང་རྒྱུ་མ་ཟད། དེ་ལ་བརྟེན་ནས་བོད་བསྟན་པ་ཆབ་སྲིད་ལ་གྱོང་གུད་ཆེན་པོ་ཞིག་འབྱུང་རྒྱུ་ངེས་དགོས་ལ། འདས་པའི་ལོ་ཟླའི་ནང་བྱུང་བའི་འཁྲུག་ཆ་ལ་བརྟེན་ནས་ང་ཚོའི་སྤྱི་ཚོགས་ནང་རྡབ་གསིག་ཇི་ཙམ་བྱུང་བ་སེམས་ལ་བཞག་ཏེ་མ་འོངས་པར་དེ་འདྲ་ཞིག་སླར་ཡང་མ་ཡོང་ཆེད་འབད་བརྩོན་བྱེད་དགོས་རྒྱུ་ནི། འོས་འཕེན་མཁན་ཙམ་མིན་པར་འོས་མིར་ལང་མཁན་ཚོས་ཀྱང་དེའི་ཐོག་འགན་འཁུར་གནང་དགོས་རྒྱུ་གལ་ཆེན་ཞིག་ཏུ་མཐོང་ལ། སྔ་མ་སྔ་མ་ལས་ཕྱི་མ་ཕྱི་མར་ལེགས་ཆ་བླང་པ་དེ་མཁས་པ་དང་ཡ་རབས་ཀྱི་ཀུན་སྤྱོད་ཅིག་ཀྱང་ཡིན་ལགས།

བར་སྐབས་སྤྱི་ཚོགས་དྲ་ལམ་ཞིག་གི་ཚོགས་པ་ག་གེ་མོའི་ནང་ཆོལ་ཞེན་གྱིས་ཀུན་ནས་བླངས་ཏེ། སྲིད་སྐྱོང་འོས་མིར་བཞེང་འདོད་ཡོད་པའི་བུད་མེད་ཅིག་གི་མཚན་ནས་སྨྲས་ཤིང་། དེའི་ཆོལ་ཁ་དེ་རེད། དེ་སླེབས་ན་ཡག་པོ་མིན་ཚུལ། དེའི་འོས་གྲངས་ཉུང་དུ་གཏོང་ཕྱིར་འོས་མི་དེ་འདྲ་ཞིག་བསླང་དགོས་ཚུལ་སོགས་རྙོག་གཏམ་དང་དཀྲོག་གཏམ་ལུང་པ་གང་བཤད་བསྡད་པ་ལས། དོན་དམ་པར་སེམས་བརྣལ་དུ་བཞག་ཏེ་བོད་བསྟན་པ་ཆབ་སྲིད་ལ་ཕན་གནོད་ཇི་ལྟར་ཡོང་མི་ཡོང་སྐོར་སྐད་ཆ་སྣ་གཅིག་ཀྱང་བཤད་མིན་འདུག སྐད་ཆ་དེ་ཐོས་རྗེས་འདས་པའི་ལོ་ཟླའི་ནང་གི་འཁྲུག་ཆ་དེ་དྲན་ཞིང་སླར་ཡང་དེ་འདྲ་ཞིག་འབྱུང་རྒྱུའི་སྔ་ལྟས་མིན་ནམ་དྲན་ཏེ་སེམས་ལ་མ་བདེ་བ་དང་སེམས་ཁྲལ་ཆེན་པོ་ཞིག་བྱུང་།

སྤྱིར་ཡོང་འགྱུར་གྱི་འོས་བསྡུའི་རྒྱུད་རིམ་ཁྲོད་དངོས་གནས་འོས་མི་འོས་ཤིང་འཚམས་པའི་སྐྱེས་པ་ཕོ་མོ་སུ་ཞིག་སླེབས་ཀྱང་ང་ལ་མཚོན་ན་བརྩི་བཀུར་དང་དང་ལེན་ཞུ་རྒྱུ་ལས་མ་དགའ་བའི་རྣམ་འགྱུར་བསྟན་དགོས་དོན་ཅི་ཡང་མེད། ལྷག་པར་དུ་བོད་ཀྱི་སྲིད་སྐྱོང་ལ་བུད་མེད་ཅིག་སླེབས་ན་ད་དུང་དགའ་བསུ་དང་སྤོབས་པ་བྱེད་རྒྱུ་ལས་སྐྱོ་སྣང་དང་སེམས་ཁྲལ་ཞིག་ཡོང་དོན་མིན་འདུག་སྙམ། ༸གོང་ས་མཆོག་གིས་ལོ་ཤས་གོང་ནས་ཡང་ནས་ཡང་དུ་བུད་མེད་ལ་ཁྱད་ཆོས་ཤིག་ཡོད་པ་ནི་རང་བཞིན་གྱིས་བྱམས་བརྩེའི་ནུས་སྟོབས་ཆེ་བ་དང་། རྒྱལ་ཁབ་ཀྱི་འགོ་ཁྲིད་བྱས་ན་ཕོ་ལས་མོས་ཡག་པ་བྱེད་ཐུབ་པའི་དགོངས་ཚུལ་གསུངས་བ་མཇལ་མྱོང་ལ། ད་ལོ་ཏོག་དབྱིབས་གཉན་རིམས་ལ་བརྟེན་ནས་འཛམ་གླིང་གི་རྒྱལ་ཁབ་ཡོད་ཚད་སེམས་ཁྲལ་དང་དཀའ་ངལ་ནང་ལྷུང་སྐབས། གདོང་ལེན་ཡག་ཤོས་དང་མྱུར་ཤོས་བྱེད་མཁན་རྒྱལ་ཁབ་ནི། ནེའུ་ཛི་ལེན། ཨོ་སི་ཏི་ལི་ཡ། ཇར་མ་ནི། དེ་བཞིན་ཐའེ་ཝན་བཅས་ཡིན་པ་དང་། རྒྱལ་ཁབ་དེ་ཚོའི་འགོ་ཁྲིད་ནི་བུད་མེད་ཡིན་འདུག་པ་དེས་༸གོང་ས་མཆོག་གི་གསུང་ལ་བདེན་དཔང་བྱས་ཡོད།

ང་ལ་མཚོན་ན། གལ་སྲིད་ད་རེས་བོད་ཀྱི་སྲིད་སྐྱོང་ལ་བུད་མེད་ཅིག་སླེབས་ན་དེ་བས་བོད་ཀྱི་གཟི་བརྗིད་ཅིག་ཆགས་འགྲོ་གི་རེད་སྙམ། དེ་ཡང་ཁོང་ནི་བོད་ཀྱི་ལོ་རྒྱུས་ཁྲོད་བུད་མེད་ཀྱི་སྲིད་སྐྱོང་དང་པོ་ཆགས་རྒྱུ་མ་ཟད། ཡང་སྒོས་དེས་རྒྱལ་སྤྱིའི་སྟེང་བོད་ཀྱི་སྤྱི་ཚོགས་ནང་ཕོ་མོ་འདྲ་མཉམ་ཡོད་པ་མཚོན་ཐུབ་ཀྱི་རེད། འཛམ་གླིང་འདིའི་སྒང་རང་དབང་རང་བཙན་གཙང་མ་ཡིན་པའི་རྒྱལ་ཁབ་མང་པོའི་ནང་བུད་མེད་རྣམས་ལ་ད་དུང་རྒྱལ་ཁབ་ཀྱི་འགོ་ཁྲིད་བྱ་རྒྱུ་ཕར་ཞོག་གཞི་རྩའི་ཤེས་ཡོན་སྦྱོང་བའི་ཐོབ་ཐང་ཡང་སྤྲོད་ཀྱི་མེད་སྟབས། རང་དབང་རང་བཙན་མེད་པའི་རྒྱལ་ཁབ་ཅིག་ལ་བུད་མེད་འགོ་ཁྲིད་ཅིག་སླེབ་པར་སྤོབས་པ་བྱེད་འོས་པ་ལས་སྐྱོ་སྣང་དང་གཉའ་ཞུམ་དགོས་པ་ཞིག་གང་ཡང་མིན་འདུག་སྙམ།

གང་ལྟར་མདོར་བསྡུས་ཏེ་བཤད་ན། དེང་སང་འཛམ་གླིང་གི་ཆབ་སྲིད་ལ་འགྱུར་བ་ཆེན་པོ་ཞིག་འགྲོ་བཞིན་པ་དང་། རྒྱ་ནག་གིས་ནད་ཡམས་དེ་དུས་ཐོག་གསལ་བསྒྲགས་མ་བྱས་པར་སྦས་གསང་བྱས་སྟབས། རྒྱལ་ཁབ་མང་པོ་ཞིག་གིས་མ་དགའ་བའི་རྣམ་འགྱུར་སྔར་ལས་ཇེ་ཆེར་འགྲོ་བཞིན་པའི་སྐབས་དེར། གོ་སྐབས་དེ་བཟུང་ནས་བོད་ཀྱི་གནད་དོན་འཛམ་གླིང་གི་སྡིངས་ཆའི་སྟེང་གླེང་ཐུབ་མཁན་གྱི་འགོ་ཁྲིད་ཅིག་དགོས་ཀྱི་འདུག་ན། བོད་མིའི་སྒྲིག་འཛུགས་ངོས་ནས་རེ་འདུན་གནང་བ་ལྟར། ད་རེས་ང་ཚོས་ངེས་པར་དུ་འོས་བསྡུ་ལ་མཉམ་ཞུགས་གནང་དགོས་ལ། སོ་སོའི་ཕྱོགས་ཞེན་གྱི་ཀུན་སློང་ཕར་བཞག་ནས་བོད་ཀྱི་བསྟན་པ་ཆབ་སྲིད་སྙིང་ལ་བཅངས་ཏེ། སྤྱིར་བོད་མིའི་སྒྲིག་འཛུགས་ཀྱི་འཛིན་སྐྱོང་ལ་རྒྱུས་མངའ་ལྡན་ཞིང་། ཡང་སྒོས་བོད་ཀྱི་ཆབ་སྲིད་ཀྱི་གནས་སྟངས་ལ་མཁྱེན་རྒྱ་ཡངས་པ་མ་ཟད། བོད་ཀྱི་གནད་དོན་དེ་འཛམ་གླིང་སྡིངས་ཆའི་སྟེང་གསལ་པོར་བྱེད་ནུས་པའི་མི་ཞིག་སྲིད་སྐྱོང་ལ་སླེབ་ཐབས་འབད་བརྩོན་བྱ་དགོས་རྒྱུ་དེ་གལ་ཆེན་ནང་ནས་དོན་ཆེན་ཞིག་ཏུ་མཐོང་གི་འདུག

The post ཕྱི་ལོ་ ༢༠༢༡ གི་སྲིད་སྐྱོང་འོས་ཤིང་འཚམ་པ་ཞིག་དགོས་འདུག appeared first on བོད་ཀྱི་དུས་བབ།.

ཡུ་རོབ་མཐུན་ཚོགས་ཀྱིས་བྷེ་ལ་རུ་གཞུང་གིས་བསྒྲགས་པའི་ཡུལ་དེའི་སྲིད་འཛིན་འོས་བསྡུའི་གྲུབ་འབྲས་ལ་ངོས་ལེན་མེད་པའི་བསྒྲགས་གཏམ་སྤེལ་འདུག

ཁ་སང་ཕྱི་ཚེས་ ༡༩ ཉིན། ཡོ་རོབ་མཉམ་འབྲེལ་མཐུན་ཚོགས་ཀྱིས་ཉེ་སྔོན་ཕྱི་ཟླ་ ༨ ཚེས་ ༩ ཉིན་ཤར་ཡོ་རོབ་ཀྱི་བྷེ་ལ་རུ་སིའི་(Belarus)རྒྱལ་ཁབ་ཀྱིས་ཡུལ་དེའི་སྲིད་འཛིན་འོས་བསྡུ་བྱས་ཏེ། འོས་བསྡུའི་གྲུབ་འབྲས་ཁྲོད་གཞུང་འཛིན་སྲིད་འཛིན་ཁྰ་ཤིན་ཁོ་(Lukashenko)ལ་འོས་གྲངས་བརྒྱ་ཆའི་ ༨༠ ཐོབ་ནས་བསྐྱར་དུ་རྒྱལ་ཁ་ཐོབ་ཡོད་སྐོར་བསྒྲགས་པ་དེར་ངོས་ལེན་མེད་པ་མ་ཟད། ཡུལ་དེའི་མི་མང་གིས་འོས་བསྡུ་དྲང་བོ་བྱུང་མེད་སྐོར་བརྗོད་ནས་སྲིད་གཞུང་ལ་ངོ་རྒོལ་དང་རྩོད་རྙོག་ཆེན་པོ་བྱུང་བཞིན་པར། ཡུ་རོབ་མཐུན་ཚོགས་ནས་བྷེ་ལ་རུ་སི་མི་མང་ལ་རྒྱབ་སྐྱོར་ཡོད་སྐོར་བསྒྲགས་འདུག

དེ་འབྲེལ་གནད་དོན་ཐད། ཡུ་རོབ་མཐུན་ཚོགས་ཀྱི་ཚོགས་གཙོ་དང་། ཡུ་རོབ་རྒྱལ་ཁབ་ཁག་གི་འགོ་ཁྲིད་བཅས་ཀྱིས་དྲ་ཐོག་བརྒྱུད་བྷེ་ལ་རུ་སིའི་ (Belarus) འོས་བསྡུ་དང་འབྲེལ་ནས་ཚོགས་འདུ་ཞིག་འཚོགས་ཡོད་པ་དང་། སྐབས་དེར་ཡུ་རོབ་ལྷན་ཚོགས་ཀྱི་ཡོ་རོབ་མཐུན་ཚོགས་ཀྱི་ཚོགས་གཙོ་མཱི་ཆེལ་གྱིས། ཡོ་རོབ་མཐུན་ཚོགས་ཀྱི་རྒྱལ་ཁབ་ཚོས་བྷེ་ལ་རུ་མི་མང་ལ་རྒྱབ་སྐྱོར་བྱེད་ཀྱི་ཡོད་པ་དང་། སྲིད་འཛིན་གྱི་འོས་བསྡུ་དེ་ནི་རང་དབང་དང་དྲང་བདེན་གང་ཡང་བྱུང་མེད་ཁར། རྒྱལ་སྤྱིའི་ཚད་གཞི་དང་མཐུན་མེད་པས། བྷེ་ལ་རུ་གཞུང་གིས་གསལ་བསྒྲགས་བྱས་པའི་འོས་བསྡུའི་གྲུབ་འབྲས་དེར་ངོས་ལེན་མེད་པ་མ་ཟད། སྲིད་འཛིན་ཁྰ་ཤིན་ཁོ་ཡིས་མི་མང་གི་ངོ་རྒོལ་སྐབས་འཛིན་བཟུང་བཙོན་མཇུག་བྱས་པའི་ལས་འགུལ་བ་རྣམས་ཀློད་གྲོལ་གཏོང་དགོས་སྐོར་སོགས་བརྗོད་འདུག

ཟླ་འདིའི་ཕྱི་ཚེས་ ༡༦ ཉིན་བྷེ་ལ་རུ་སིའི་རྒྱལ་སའི་ནང་མི་གྲངས་འབུམ་གཅིག་ལྷག་ཁྲོམ་གཞུང་དུ་ཐོན་ཏེ། སྲིད་འཛིན་གྱི་འོས་བསྡུའི་གྲུབ་འབྲས་ནི་རྫུན་བཟོ་བྱས་པ་ཞིག་ཡིན་པ་དང་། སྲིད་འཛིན་ལའོ་ཁྰ་ཤིན་ཁོ་ཡིས་སྲིད་འཛིན་གྱི་ལས་གནས་ནས་དགོངས་པ་ཞུ་དགོས་པའི་དགོས་འདུན་བཏོན་པ་མ་ཟད། ཕྱི་ལོ་ ༡༩༩༦ ལོར་རང་བཙན་ཐོབ་རྗེས་ཀྱི་སྲིད་གཞུང་ལ་ངོ་རྒོལ་ཁྲོམ་སྐོར་ཆེ་ཤོས་དེ་བྱས་ཡོད་པ་དང་། སྐབས་དེར་སྲིད་འཛིན་ལའོ་ཁྰ་ཤིན་ཁོ་ཡིས་ཐེངས་འདིའི་སྲིད་འཛིན་གྱི་འོས་བསྡུ་ནི་ཁྲིམས་མཐུན་ཡིན་པ་དང་། འོས་གྲངས་བརྒྱ་ཆའི་ ༨༠ ལྷག་བྱུང་ཡོད་པ་དེ་ཚོ་རྫུན་བཟོ་ཡིན་མི་སྲིད་པ། དེ་བཞིན་སྲིད་འཛིན་གྱི་ལས་གནས་ནས་དགོངས་ཞུ་བྱ་རྒྱུ་མིན་སྐོར་བསྒྲགས་ཡོད་པ་རེད།

ཐེངས་འདིའི་འོས་བསྡུའི་ཁྲོད་སྲིད་འཛིན་ལའོ་ཁྰ་ཤིན་ཁོ་ཡི་ཁ་གཏད་ཆེ་ཤོས་འགྲོ་བ་མིའི་ཐོབ་ཐང་འཐབ་རྩོད་པ་དང་ཆབ་སྲིད་པ་(Tikhanovskaya)ལགས་འོས་བསྡུའི་སྐབས་འཛིན་བཟུང་བྱས་ཏེ་ཆུ་ཚོད་འགའི་རིང་བཀག་ཉར་བྱས་པ་སོགས་ལ་བརྟེན། ཟླ་འདིའི་ཕྱི་ཚེས་ ༡༨ ཉིན་ཁོ་མོ་ལའེ་ཐོ་ནེ་ཡ(Lithuania)ནང་སྐྱབས་བཅོལ་པའི་ཚུལ་དུ་གནས་ཡོད་པ་དང་། ཁོང་མོས་བརྙན་ཐུང་ཞིག་བརྒྱུད་བྷེ་ལ་རུ་སིའི་བདེ་སྲུང་དང་ཁྲིམས་དོན་ལས་མི་རྣམས་ཀྱིས་སྲིད་འཛིན་ལའོ་ཁྰ་ཤིན་ཁོ་ཡི་འཛིན་སྐྱོང་ལ་ལག་འབྲེལ་བྱ་རྒྱུ་མཚམས་འཇོག་བྱ་དགོས་པའི་འབོད་སྐུལ་དང་། ད་ལྟའི་འཛིན་སྐྱོང་ལས་ལོགས་སུ་ཕྱིན་ཚེ་འདས་པའི་བྱས་ཉེས་ལ་མི་མང་གིས་ཁེངས་ར་བྱེད་མི་སྲིད་སྐོར་བརྗོད་ཡོད་པ་མ་ཟད། ད་ལྟའི་དུས་སུ་ཁོང་མོ་རྒྱལ་ཡོངས་ཀྱི་མགོ་ཁྲིད་བྱེད་པར་གྲ་སྒྲིག་ཡོད་སྐོར་སོགས་བརྗོད་འདུག

གསར་འགོད་པ། ཀླུ་མགོན་ཐར།

The post ཡུ་རོབ་མཐུན་ཚོགས་བྷེ་ལ་རུ་སི་མི་མང་རྒྱབ་ཏུ་ཡོད། appeared first on བོད་ཀྱི་དུས་བབ།.

ཨ་རིའི་ཕོ་བྲང་དཀར་པོའི་སློབ་སྟོན་པ་ཟུར་པ་བྷན་ནོན་སོགས་ཀྱིས་མེག་སི་ཀོ་མཐའ་མཚམས་ལྕགས་རིས་བསྐོར་བའི་ལས་གཞི་ཡི་རོགས་དངུལ་མང་པོ་སྒེར་སྤྱོད་བྱས་པའི་དོགས་གཞིའི་འོག་འཛིན་བཟུང་བྱས་འདུག ཟླ་འདིའི་ཕྱི་ཚེས་ ༢༠ ཉིན་ཨ་རིའི་ཕོ་བྲང་དཀར་པོའི་སློབ་སྟོན་པ་ཟུར་པ་སི་ཊི་ཝི་བྷན་ནོན（Steve Bannon）སོགས་མི་བཞི་ཡིས། “ང་ཚོས་ལྕགས་རི་འཛུགས(We Build the Wall)”ཞེས་པའི་ལས་གཞིའི་ཆེད་རོགས་དངུལ་ཞལ་འདེབས་འབོར་ཆེན་བསྡུ་རུབ་བྱས་ཏེ། ཞལ་འདེབས་གནང་མཁན་ལ་མགོ་སྐོར་བཏང་བ་དང་། སྤྱི་དངུལ་སྒེར་སྤྱོད་བྱས་པའི་དོགས་གཞིའི་འོག་འཛིན་བཟུང་བྱས་ཡོད་འདུག

ཞུ་སྦྱོར་བས་ཨ་རིའི་ནེའུ་ཡོག་ཁྲིམས་ཁང་ལ་ཕུལ་བའི་གཏུག་ཡིག་ནང་དུ། ད་ལྟའི་ཆར་ང་ཚོས་ལྕགས་རི་འཛུགས་ཞེས་པའི་ལས་གཞི་དེའི་ཆེད་ཨ་སྒོར་ས་ཡ་ ༢༥ ཙམ་བསྡུས་ཡོད་པའི་ནང་ནས་ས་ཡ་ ༡ ལྷག་བྷན་ནོན་དང་ཁོའི་རོགས་པ་ཚོས་ཡུལ་སྐོར་སྤྲོ་འཆམ་དང་ཆང་ཁང་སོགས་སུ་སྒེར་སྤྱོད་བྱས་ཡོད་སྐོར་དང་། དང་ཐོག་བྷན་ནོན་གྱིས་སྒེར་དོན་དུ་སྒོར་རྡོག་གཅིག་ཀྱང་མི་གཏོང་བར་ཞལ་འདེབས་ཆ་ཚང་ལས་གཞིའི་ཆེད་དུ་གཏང་རྒྱུ་ཡིན་པའི་ཁས་ལེན་བྱས་ཡོད་ཀྱང་། དོན་དངོས་ཐོག་བྱུང་འཛིན་རྫུན་བཟོ་བྱས་པ་སོགས་ཀྱི་བྱེད་ཐབས་སྤྱད་དེ་སྤྱི་དངུལ་སྒེར་སྤྱོད་བྱས་ཡོད་སྐོར་བརྗོད་ཡོད་འདུགགནད་དོན་དེའི་ཐད་ཨ་རིའི་སྲིད་འཛིན་ཊོམ་ཕུ་མཆོག་གིས། བྷན་ནོན་གྱི་ཞལ་འདེབས་བསྡུ་ལེན་གྱི་བྱ་འགུལ་དེའི་སྐོར་ཤེས་རྟོགས་གང་ཡང་མེད་ལ། དུས་ཡུན་རིང་པོར་བྷོན་ནོན་ལ་འབྲེལ་འདྲིས་བྱུང་མེད་ལུགས་དང་། མི་སྒེར་གྱི་ཚོགས་པ་ཞིག་གིས་དྲིལ་བསྒྲགས་ཀྱི་ལམ་ནས་དངུལ་བསྡུ་རུབ་བྱས་ཏེ། གནད་འགག་གི་ས་ཆ་ཞིག་ལ་ལྕགས་རི་ཆུང་ཆུང་དེ་འདྲ་ཞིག་རྒྱག་པར་ཁོང་མོས་མཐུན་མེད་ལ། ཁོ་ཚོས་དེ་ལྟར་བྱས་ནས་ཁོང་ལ་ཁ་སྐྱེངས་པོ་བཟོ་ཡི་ཡོད་པ་ཙམ་ཡིན་སྐོར་གསུངས་ཡོད་པ་རེད།

ཨ་རིའི་ལྷོ་རྒྱུད་མེག་སི་ཀོ་མཐའ་མཚམས་སུ་ལྕགས་རིས་བསྐོར་བའི་ལས་གཞི་དེ་ནི་ཊོམ་ཕུ་གཞུང་གི་གླེང་གཞི་ཆེ་ཤོས་ཤིག་ཡིན་ཡང་། ང་ཚོས་ལྕགས་རི་འཛུགས་ཞེས་པའི་ལས་གཞི་དེ་ནི་བྷ་རིན་ཁོལ་ཧྥག་(Brian Kolfage)ཅེས་པའི་དབང་པོ་སྐྱོན་ཅན་ཞིག་གིས་བཙུགས་ཏེ། ཕྱིས་སུ་ཨེན་ཌེའུ་བྷ་ཌོ་ལཱ་ཊོ་(Andrew Badolato)དང་ཊི་མོ་ཐི་ཤིའ་(Timothy Shea)ཞེས་པའང་མཉམ་ཞུགས་བྱས་ཡོད་པས་ཁོ་ཚོ་གསུམ་ཡང་འཛིན་བཟུང་བྱས་ཡོད་འདུགགཞན་ཡང་། བྷན་ནོན་དང་རྒྱ་རིགས་ཚོང་པ་གོ་ཝིན་ཀེ་གཉིས་མཉམ་འབྲེལ་གྱིས་བཙུགས་པའི་(GTV Media Group)ཞེས་པའི་གསར་ལས་ཁང་དེས་ཁྲིམས་ལྟར་དངུལ་འབབ་དཔྱ་ཁྲལ་སྤྲད་མེད་པ་སོགས་ཀྱི་དོགས་གཞིའི་འོག ཨ་རིའི་མཉམ་འབྲེལ་ཞིབ་དཔྱོད་ཁང་དང་དཔྱ་ཁྲལ་ལས་ཁུངས་གཉིས་ནས་ཞིབ་འཇུག་བྱེད་བཞིན་པའི་སྒང་ཡིན་འདུག་ལ། ཨ་རིའི་(JPMorgan Chase)དང་ (Wells Fargo)དངུལ་ཁང་དུ་ཡོད་པའི་གསར་ལས་ཁང་དེའི་དངུལ་རྣམས་བཀག་སྡོམ་བྱས་ཟིན་པ་དང་། ཨ་རིའི་དངུལ་ཁང་(Bank of America)གིས་ཀྱང་ཉེ་ཆར་སྒོ་འབྱེད་བྱས་པའི་གསར་ལས་ཁང་དེའི་དངུལ་བྱང་ཡང་སྒོ་བརྒྱབ་ཡོད་འདུག

ཆབ་སྲིད་པ་བྷན་ནོན་གྱིས་ཕྱི་ལོ་ ༢༠༡༦ ལོའི་སྲིད་འཛིན་ཊོམ་ཕུ་མཆོག་གི་འོས་བསྡུའི་གཙོ་འགན་འཁུར་ཏེ་རྒྱལ་ཁ་ཆེན་པོ་བླངས་ཡོད་པ་དང་། ཊོམ་ཕུ་མཆོག་ལ་རྒྱལ་ཁ་ཐོབ་རྗེས་བྷན་ནོན་ཕོ་བྲང་དཀར་པོའི་སློབ་སྟོན་པར་བསྐོ་བཞག་བྱས་ཡོད་ཀྱང་། སྲིད་འཛིན་མཆོག་དང་ལྟ་བ་ལངས་ཕྱོགས་མ་མཐུན་པར་བརྟེན། ཕྱི་ལོ་ ༢༠༡༧ ཟླ་ ༨ པའི་ནང་བྷན་ནོན་གནས་དབྱུང་བཏང་ཡོད་པ་རེད།

བསྟན་འཛིན་རབ་བརྟན་གྱིས་སྒྱུར་སྒྲིག་བྱས།

The post ཨ་རིའི་ཕོ་བྲང་དཀར་པོའི་སློབ་སྟོན་པ་ཟུར་པ་འཛིན་བཟུང་བྱས། appeared first on བོད་ཀྱི་དུས་བབ།.

སྐྱེ་རྒུ་མདོ་འཁྲི་འདུ་རྫོང་ནས་བོད་མི་གཉིས་གློ་བུར་དུ་འཛིན་བཟུང་བྱས་ཏེ་ད་ལྟའི་ཆར་གནས་སྟངས་གང་འདྲ་ཡོད་སོགས་གོ་ཐོས་མེད་པར་གྱུར་ཡོད་འདུགཁ་སང་བོད་ནང་གི་སྔ་དྲོའི་ཆུ་ཚོད་༩ ཡས་མས་སུ། བོད་མི་རྡོ་སྐྱབས་དང་ཁོང་གི་སྤུན་མཆེད་རྒྱལ་མཚན་གཉིས་ཀྱིས། སྐྱེ་རྒུ་མདོ་འཁྲི་འདུ་རྫོང་ཐོག་གི་ཟ་ཁང་ཞིག་ཏུ་ཟ་མ་ཟ་བཞིན་པའི་སྐབས་སུ། གློ་བུར་དུ་ཉེན་རྟོག་པ་གསུམ་ཡོང་ནས་ཁོང་གཉིས་འཛིན་བཟུང་བྱས་ཏེ་འཁྲི་འདུ་རྗོང་ ༦༨༣་བཀག་ཉར་ཁང་ཏུ་བཅུག་ཡོད་པ་དང་། ད་ལྟ་ཆར་ཁོང་གཉིས་ཀྱི་གནས་སྟངས་ག་འདྲ་ཡོད་སོགས་གང་ཡང་ཤེས་རྟོགས་ཐུབ་ཀྱི་མེད་འདུག

འབྲེལ་ཡོད་ནས་བརྗོད་པ་ལྟར་ན། རྒྱ་ནག་གཞུང་གིས་མང་ཚོགས་ཀྱི་རྩྭ་སའི་བདག་དབང་གི་ས་འཛིན་ལག་དེབ་དེ་གཞུང་ལ་རྩིས་སྤྲོད་དགོས་སྐོར་བཀའ་རྒྱ་བཏང་ཡོད་ཀྱང་། བོད་མི་དེ་གཉིས་ཀྱིས་ས་ཐོ་ལག་འཛིན་གཞུང་ལ་རྩིས་སྤྲོད་བྱས་པ་ཡིན་ན། ཕ་ཤུལ་བུ་ཡིས་འཛིན་མ་ཐུབ་པ་དང་། བུ་རབས་ཚ་བརྒྱུད་ནས་བཟུང་ཚར་བ་རེད། ང་ཚོས་དུས་ནམ་ཡང་རྩིས་སྤྲོད་བྱ་རྒྱུ་མིན་ཞེས་བཤད་པར་བརྟེན། སྲིད་གཞུང་གི་བཀའ་བཀོད་ལ་མ་ཉན་པར་རྙོག་ཟིང་བཟོས་པའི་ཉེས་མིང་འོག་འཛིན་བཟུང་བྱས་ཡོད་འདུག

ས་གནས་ཀྱི་འབྲེལ་ཡོད་ཅིག་གིས་འགྲེལ་བརྗོད་གནང་བ་ལྟར་ན། རྡོ་སྐྱབས་ནི་མི་ཡག་པོ་ཞིག་དང་ཁོང་ནི་ལོ་མང་རིང་ཆུ་དམར་ལེབ་རྫོང་འབྲོག་ལས་གཉིས་པའི་མགོ་འཁྲིད་ཡིན་པ་དང་། ནམ་རྒྱུན་ས་གནས་སུ་ཡོད་པའི་འབྲོག་ཁྱིམ་ཉམ་ཐག་ཚོ་ལ་ཧ་ཅང་གིས་རོགས་པ་བྱེད་ཀྱི་ཡོད་པ་མ་ཟད། ས་གནས་གཞུང་གི་རོགས་དངུལ་རྣམས་འབྲོག་པ་ཚོའི་ལག་ཏུ་དུས་ཐོག་འབྱོར་ཐུབ་མེད་པའི་སྐོར་གཞུང་ལ་སྙན་ཞུ་ཐེངས་མང་ཕུལ་མྱོང་ཡོད་འདུག

ཁོང་གཉིས་ནི་ཆུ་དམར་རྗོང་ཆིག་སྒྲིལ་གྲོང་རྡལ་སྐྱ་འཁྱོག་ཡུལ་ཚོའི་འབྲོག་ལས་གཉིས་པ་ནས་ཡིན་ཞིང་། རང་ལོ་ ༦༣ ཡིན་པའི་རྡོ་སྐྱབས་ལགས་ཀྱི་ཕ་མིང་ལ་ཚེ་ནོར་དང་། རང་ལོ་ ༤༣ ཡིན་པའི་རྒྱལ་མཚན་ལགས་ནི་ཚེ་ནོར་ལགས་ཀྱི་སྤུན་ཆུང་བའི་བུ་ཡིན་འདུག

འབྲེལ་ཡོད་གནས་ཚུལ། རྒྱ་གཞུང་གིས་བོད་མིའི་ས་ཐོ་ལག་འཛིན་ཕྱིར་བསྡུ་ཡི་འདུག

རྒྱ་གར་ལྷོ་ཕྱོགས་ས་གནས་གསར་འགོད་པ་དོན་འགྲུབ་བཀྲ་ཤིས།

The post སྐྱེ་རྒུ་མདོ་འཁྲི་འདུ་རྫོང་ནས་བོད་མི་གཉིས་འཛིན་བཟུང་བྱས། appeared first on བོད་ཀྱི་དུས་བབ།.

ཨ་རིའི་གྲོས་ཚོགས་འོག་མའི་འཐུས་མི་ཞིག་གིས་དགྲ་བོའི་མིང་འདོན་གྲོས་འཆར་འོག་ཞི་ཅིན་ཕིན་ལ་སྲིད་འཛིན་ཞེས་འབོད་མི་རུང་པའི་གྲོས་འཆར་ཞིག་བཏོན་འདུག

དེ་འབྲེལ་གནས་ཚུལ་ནང་། སི་ཁོ་ཊི་པེ་རི་ལགས་ཀྱི་གྲོས་འཆར་ནང་སྲིད་འཛིན་ཞེས་པའི་མིང་དེ་མི་མང་གིས་དམངས་གཙོའི་ལམ་ནས་བདམས་ཐོན་བྱུང་བའི་མགོ་འཁྲིད་ལ་ཐོབ་པ་ལས། མི་གཅིག་སྲིད་དབང་སྒེར་འཛིན་གྱི་མགོ་འཁྲིད་ལ་ཐོབ་ཀྱི་མེད་པས། ཞི་ཅིན་ཕིན་དམར་ཤོག་ཚོགས་པའི་དྲུང་ཆེ་ཙམ་ལས་མིན་པ་དང་།  རྗེས་ཕྱོགས་ཨ་རིའི་གཞུང་ནས་ཞི་ཅིན་ཕིན་ལ་སྲིད་འཛིན་ཞེས་ཨ་རིའི་གཞུང་གི་མ་དངུལ་འགྲོ་སོང་གཏོང་མི་ཆོག་རྒྱུ་སོགས་བཀོད་ཡོད་སྐོར་བརྗོད་འདུག

The post ཞི་ཅིན་ཕིན་ལ་སྲིད་འཛིན་ཞེས་འབོད་མི་རུང་བའི་གྲོས་འཆར་བཏོན།   appeared first on བོད་ཀྱི་དུས་བབ།.

ཇོ་རུ། ཨོ་གླིང་།

དགུ་དང་པོ། བར་དོའི་ཁྱི་སྐད་འཛེར་འཛེར།

ཉེ་སྔོན་འོས་བསྡུ་འགན་འཛིན་གསུམ་ལྷན་བཞུགས་ཐོག་རྩ་འཛིན་ལམ་སྟོན་དོན་ཚན་ ༡༢ ཅན་ཞིག་སྒྲོག་སྦྱངས་དང་འབྲེལ་འོས་བསྡུའི་ལས་མགོ་བཙུགས་ཟིན་པའི་གསར་འགོད་གསལ་བསྒྲགས་གནང་རྗེས། བོད་པའི་གསར་འགྱུར་བརྒྱུད་ལམ་ཁག་དང་། ཡུ་ཀྲོབ་(youtube)དང་ངོ་དེབ་སོགས་མི་ཚང་མའི་མཐོང་ལམ་དུ་ཡོད་པའི་སྤྱི་ཚོགས་དྲ་རྒྱ་ཁག་དང་། དེ་བཞིན། ཋིལ་རྒི་རམ་(Telegram)དང་ཝ་ཙབ(WhatsApp)། སྐད་འཕྲིན་སོགས། དཔུང་དང་ཤོག་སྒྲིག་ནས་ལྐོག་ལྐོག་སུད་སུད་བཤད་སའི་དྲ་ཚོམས་དག་བཅས་སྤྱི་ཚོགས་དྲ་རྒྱའི་བརྒྱུད་ལམ་འདྲ་མིན་ཁག་ཏུ། དྲ་འབུར་གྱུར་བའི་བཙན་བྱོལ་བ་ཚོ་བསྐྱར་དུ་འུར་ཆིལ་ལེར་འགྲོ་མགོ་རྩོམ་བཞིན་འདུག

ཉེ་བའི་ཉིན་འགའི་རིང་སྒེར་ངོས་ནས་མདུན་མཆོངས་རྒྱག་མཁན་དང་རྒྱབ་ལོག་ནས་ཕུད་རྒྱག་གཏོང་མཁན་བཅས་ཁྱོན་སྲིད་སྐྱོང་འོས་མི་བརྒྱད་དགུ་ཞིག་དྲ་ཐོག་ལ་བཏོན་འདུག ད་ལོའི་སྲིད་སྤྱིའི་འོས་བསྡུ་འདི་ནི་དྲ་ཐོག་གི་ཟློས་གར་འཁྲབ་གཞུང་ཞིག་འཆག་སྲིད། འཁྲབ་གཞུང་ནང་གི་དྲ་དཔོན་གདུག་རྭ་ཅན་དག་གི་ལས་གཞི་ནི་སྲིད་སྐྱོང་འོས་མི་ཚོར་ཚོན་རྩི་སྣ་ཚོགས་བྱུགས་ཏེ་གཏོར་མ་དང་གླུད་འགོང་བཟོ་རྒྱུ་དང་། དྲ་འབངས་རིག་འཚོ་མ་ཟིན་པ་དག་གི་ལས་ཀ་ནི་ཕན་ཚུན་དཔུང་ཤོག་སྒྲིག་ཏེ་གཏོར་རྒྱག་དང་གླུད་གཏོང་བྱ་རྒྱུ་ཙམ་རེད། ད་དུང་དྲ་འདྲེ་རྒྱ་ཤིག་དག་གི་ལས་འགན་ནི་རིག་འཚོ་མ་ཟིན་པའི་དྲ་འབངས་ཚོའི་དབང་ལྔའི་རྩ་གནད་དག་ལ་སོ་བརྒྱབ་སྟེ་ས་ལྡིང་གནམ་ལྡིང་གིས་གླུ་ལེན་གར་འཁྲབ་བྱེད་འཇུག་རྒྱུ་བཅས་ཡིན་ངེས་རེད། ཟློས་གར་སྟེགས་བུའི་སྟེང་གི་འཁྲབ་སྟོན་གཙོ་སྐུ་སྲིད་སྐྱོང་འོས་མི་རྣམ་པས་ཀྱང་བར་དོའི་ལམ་ཡིག་ལྟ་བུའི་འོས་ཤོག་གྲངས་ཚད་རྨི་ལམ་ཏུ་སྒོམ་ཏེ་གཉིད་ཆག་ཟས་བརྗེད་ཀྱི་ངལ་བ་དང་དུ་ལེན་བཞིན་ཡོད་ངེས།

མ་གཞི་ང་རང་ཟློས་གར་འཁྲབ་གཞུང་འདིའི་ཟུར་ངོས་གང་ཞིག་ན་ཡོད་དམ། ངས་འདི་ལྟར་རྣོ་བསམ་བཏང་སྟེ་རང་ཉིད་འཚོལ་གྱིན་ཡོད། ང་རང་བཙན་བྱོལ་དུ་འབྱོར་དུས་ནི་འཆི་གསོན་བརྩིས་མེད་རྒྱབ་གཡུག་བྱེད་པའི་རང་ལོ་ཉི་ཤུའི་གསར་བུ་སྣང་མཐོ་ཞིག་ཡིན། ལར་རྒྱའི་དོན་དུ་ཁུ་ཚུར་འཕྱར་ཤག་ཤག་ཅིག་ཡིན། དུང་ཞེན་གྱི་ཆེད་དུ་མིག་ཆུ་གཏོང་ཆོག་ཆོག་ཅིག་ཡིན། དེ་ལྟར་ད་ལྟའི་བར་བཀའ་ཁྲི་དང་སྲིད་སྐྱོང་གི་འོས་ཤོག་ཀྱང་ཐེངས་གསུམ་ལ་བླུགས་ཟིན། དད་མོས་ཀྱིས་འོས་ཤོག་ཕུལ་ཡོད་སྲིད་ལ། ཨ་གསར་གྱིས་འོས་ཤོག་སྤུར་ཡོད་ངེས། སྦྲིད་འཐོམ་གྱིས་འོས་ཤོག་བོར་ཡང་ཡོད་པ་འདྲ། དེ་ལྟར་མི་ཚེ་ཕྱེད་ཙམ་རྡ་སའི་རི་ངོགས་དེར་གཏིམ་ཟིན་མཐར། ད་ནི་གཞོན་ནུའི་ཚོར་བའི་རླབས་རྩེ་འཇགས་ཟིན་པ་འདྲ། ལོ་ཡི་རྒས་གཉེར་རི་མོ་ཡང་བབ་ཡོད་པར་ངེས།

སྲིད་སྐྱོང་འོས་མི་དེ་དག་དྲ་ལམ་བརྒྱུད་མིག་ལ་མངོན་ཡོང་དུས། སོ་སོའི་ཨམ་ཕྲག་ནང་གི་སྒོར་རྡོག་ཚོའི་གྲངས་ཀ་དང་འདྲ་བར། བརྒྱ་ཤོག བཅུ་ཤོག ཁེར་ཤོག ཞོ་ཤོག་དང་སྐར་མ་སོགས་གང་ཡིན་མིག་བཤེར་ཙམ་གྱིས་ངོས་ཟིན་ཚོད་རེད། རིག་འཚོ་མ་ཟིན་པའི་དྲ་འབངས་ཚོ་དང་འདྲ་བར་སྲིད་སྐྱོང་འོས་མི་དེ་དག་གིས་སྐད་གསེང་མཐོན་པོས་གཞས་ག་རེ་ལེན་མིན་དང་། ལྡེམ་འཕྲུལ་དོད་པའི་གར་ཅི་ཞིག་འཁྲབ་མིན་ལ་གཅེར་ཏེ་གཞི་ནས་རིན་གོང་བརྒྱག་དགོས་པའི་ཚད་ལ་ཡེ་ནས་ལྷུང་མི་འདུག ང་ལ་མཚོན་ན་སོ་སོའི་འོས་ཤོག་གཅིག་པུ་གང་ལ་འཕེན་མིན་ནི་ཟློས་གར་འཁྲབ་གཞུང་འདིའི་སྔོན་འགྲོ་དང་དངོས་གཞིའི་གར་སྟེགས་འཁྲབ་སྟོན་གྱི་ཤུགས་རྐྱེན་ལ་འབྲེལ་བ་ཅི་གང་མི་འདུག དེ་བས། ངས་རྒྱང་ལྟ་བྱེད་ས་ནི་ཆབ་སྲིད་གར་མཁན་སྲིད་སྐྱོང་འོས་མི་དག་དང་། གློག་འོད་དང་སྒྲ་དབྱངས། རླངས་སྤྲིན་གྱི་རམ་འདེགས་བྱེད་མཁན་གར་གྲོགས་དྲ་དཔོན་རྣམས། ད་དུང་ཟ་ཟུར་ནས་འཁྲབ་གཞུང་ཧྲིལ་པོར་གཅོད་འབྲེག་གཏུམ་གསུམ་བྱ་ཨེ་ཐུབ་བལྟ་མཁན་དྲ་འབུ་རྒྱ་ཤིག་དག་བཅས་ནས། རིག་འཚོ་མ་ཟིན་པའི་དྲ་འབངས་དག་ལ་བྲན་བསྒྱུར་དང་། མཐོང་ཆུང་། བརྙས་བཅོས། རྩེད་ཆས་ཅི་ལྟར་བཟོ་མིན་གྱི་ལྟད་མོར་རོལ་མྱོང་བྱ་རྒྱུ་ཙམ་དང་། གར་སྟེགས་ཡོལ་བའི་རྒྱབ་ཏུ་ཡུབ་སྟེ་ཟློས་གར་ཧྲིལ་པོར་ཇུས་འགོད་སྒྲིག་སྦྱོར་བྱེད་མཁན་གྱི་ངོ་གདོང་མེད་པའི་འཁྲབ་འཁྲིད་པ་ཚོའི་རྨི་ལམ་ནང་གི་སྒྱུ་འཕྲུལ་ལྷ་མོ་དེའི་སྒྲེན་གཟུགས་འཚོལ་རྒྱུ་བཅས་ཡིན།

རིག་འཚོ་མ་ཟིན་པའི་དྲ་འབངས་ཚོ་ནི་དངོས་གནས་སྙིང་རྗེ་སྐྱེས་ཡུལ་ཞིག་རེད། ཁོ་ཚོས་རང་ཉིད་ཀྱི་ཐོབ་ཐང་དུ་རློམ་ཏེ་ང་རྒྱལ་གྱིས་སྤུར་གྱིན་པའི་འོས་ཤོག་རྐང་གཅིག་པུ་དེ་ནི། དོན་ལ་སོ་སོའི་ལུས་སེམས་ལ་མནར་གཅོད་གཏོང་བྱེད་ཀྱི་ཉལ་ཐ་ཙམ་ལས་ཅི་གང་མ་རེད། ཁོ་ཚོ་སྦྲིད་འཐོམ་དུ་གྱུར་ཏེ་སོ་སོའི་ལུས་སྟེང་གི་ལྭ་བའི་ཁ་དོག་དང་བཟོ་ལྟ། རྐང་ལྷམ་གྱི་ཆེ་ཆུང་དང་ལྕི་ཡང་སོགས་ཀྱང་རྟོགས་ཀྱིན་མེད་པར། ཆབ་སྲིད་གར་པ་ཚོའི་མདུན་ནས་ <<རྭ་ལོ>> བཞིན་སྣབས་འདོམ་པ་གང་དྲུད་དེ་སོ་སོ་ཡར་གཡུག་མར་འགྲིལ་གྱིས་ལུས་ཀྱི་ལྭ་ཐེད། ཡར་མཆོངས་མར་ལྡིང་གིས་རྐང་མགོའི་ལྷམ་རལ། ཐ་ན་ཁྱིམ་གྱི་ཆུང་མའང་གཞན་གྱིས་སྤྱད་ཟིན་ནའང་། ད་དུང་ཉི་འོད་ཀྱི་དྲོད་ཁོལ་འོག་ཏུ་འོས་ཤོག་གཅིག་པུས་གསང་དོར་བཟོས་ཏེ་སྒྲེན་པོར་གར་སྟེགས་སྟེང་ཚོར་བས་མཆོངས་རྩིས་བྱེད་ཀྱིན་ཡོད། ཐ་ན། སང་ལོ་དགུན་གཞུང་སླེབས་དུས་རང་ཉིད་མགོ་ཐང་ཡིན་པའང་ཚོར་གྱིན་མེད།

མ་གཞི་འཛམ་གླིང་ལོ་རྒྱུས་སྟེང་སྐྱོ་གར་མང་པོ་ཞིག་ཡང་དང་བསྐྱར་དུ་འཁྲབ་དགོས་དོན་གྱི་གཞི་རྩ་ཡང་། འདི་ལྟའི་རིག་འཚོ་མ་ཟིན་པའི་བྲན་འབངས་ཕོན་ཆེན་པོ་ཞིག་ཡོད་པས་རེད། ཁོ་ཚོར་སྨྱུག་མ་རྩེ་མདུང་ཞིག་ལག་ལ་གཏད་དེ་ཁྱོད་ནི་གེ་སེར་རྒྱལ་པོའོ་ཞེས་འབོད་ཚེ། མགོ་ཐུར་ལ་འཁོར་ནས་གཡེང་ལ་མཆོངས་འགྲོ་གི་རེད་ལ། ལུས་ལ་གཤིན་གོས་རལ་པོ་ཞིག་སྐོན་ཏེ་ཁྱོད་ནི་བྱང་ཆུབ་སེམས་དཔའ་འོ་ཞེས་བསྔགས་ཚེ། སྒྲེན་པོར་མི་ཚོགས་འཕྲེད་ཀྱིས་བཅད་དེ་རི་ཁྲོད་ལ་རྒྱུག་འགྲོ་གི་རེད། མདོར་ན་ཁོ་ཚོས་རང་ཉིད་ཅི་ལྟར་འཚོ་བཞིན་པའང་ཚོར་གྱིན་མེད་ལ། རང་ཉིད་སུ་ཞིག་ཡིན་པའང་གཏན་ནས་ཤེས་ཀྱིན་མེད། ཁོ་ཚོ་ནི་ཆབ་སྲིད་གར་པ་དག་གིས་སྒེར་ལ་སྤྲོ་བ་འཕེལ་ཆེད་ཁྱམས་རའི་ནང་གསོས་པའི་ཁྱི་ཨབ་སོག་དང་མཚུངས་པར་འགྲོ་འཆག་ཉལ་འདུག་ཙམ་ཞིག་དང་། ཆབ་སྲིད་གར་པ་དག་མཐོང་དུས་གདོང་པ་གཉེར་ཏེ་འཛུམ་ཆུང་རེ་དང་རྔ་གཡུག་རེ་བྱེད་ཤེས་པ་ཙམ་རེད། ཡིན་ནའང་། ཁོ་ཚོ་ཨབ་སོག་ལ་མི་དོ་བའི་ཆ་ནི་ཨབ་སོག་ལ་བདག་པོའི་སར་ནས་ལྟོ་འགྲང་ཚད་རག་གི་ཡོད་ལ། རིག་འཚོ་མ་ཟིན་པའི་བྲན་འབངས་སམ་དྲ་འབངས་དག་ལ་ཆབ་སྲིད་གར་པ་ཚོའི་ལག་ནས་ལྟོ་ཡང་རག་གི་མེད་པ་དེ་རེད། དོན་ལ་ཁོ་ཚོ་ནི་བར་དོའི་ཁམས་ནས་འཛེར་སྐད་རྒྱག་པའི་ཁྱི་ཚོགས་ཤིག་ལས་ཅི་གང་མ་རེད།

གནའ་མྱི་བོད་ཀྱི་གཏམ་ལ་ “སྐུད་པ་རིང་ན་ཆད་འགྲོ། སྐད་ཆ་རིང་ལ་འཁྱོལ་འགྲོ།” ཟེར་པ་ལྟར། ད་ནི་ཆབ་སྲིད་བར་དོ་ཐོས་གྲོལ་མ་འདི་ཙམ་གྱིས་ཆོག་པར་ཞུ། མཐའ་དོན། མཁས་དབང་དགེ་འདུན་ཆོས་འཕེལ་མཆོག་གིས་ “གྲོག་མ་མིག་མེད་བདེ་བའི་ཆེད་དུ་རྒྱུག། ས་འབུ་རྐང་མེད་བདེ་བའི་ཆེད་དུ་རྒྱུག། མདོར་ན་འཇིག་རྟེན་ཐམས་ཅད་བང་འགྲན་ནས།། གཅིག་ལས་གཅིག་མགྱོགས་བདེ་བའི་ཕྱོགས་སུ་རྒྱུག།” ཅེས་གསུངས་པ་ལྟར། སྤྱིར་སྐྱེ་འགྲོ་ཐམས་ཅད་ཀྱིས་རང་གཞན་བདེ་ཐབས་སུ་ཐོས་བསམ་བསྐྱེད། དཀལ་ལས་བརྒྱབ། འཚོ་བ་རོལ་གྱིན་པ་ཡིན་མོད། བཙན་བྱོལ་དྲ་འབངས་སམ་བྲན་འབངས་ཚོ་ནི་དེ་ལས་ལྡོག་སྟེ་རང་གཞན་སྡུག་ཐབས་སུ་ཨམ་གཙིགས་བསྡམས་ཏེ་ཤུགས་ཀྱིས་རྒྱུག་གིན་ཡོད་དེ། ཆབ་སྲིད་གར་པ་ཚོས་ལག་ཆར་སྤྱོད་ཀྱིན་པའི་ཆོལ་ཁ་དང་ཆོས་བརྒྱུད། ལུང་ཚན། གཞིས་ཆགས། གསར་འབྱོར། ཕོ་མོ། རྒན་གཞོན་སོགས་སྦྲིད་སྨན་ལྟ་བུའི་ཚིག་རིས་དག་ལ་ཤི་འཐམ་རོ་འཐམ་བྱས་ཏེ། བོད་སྤྱི་པའི་ཕུགས་ཀྱི་འཐབ་རྩོད་གཡུགས། གཞིས་བཞུགས་བོད་མིའི་རེ་བཞག་བོར། བཙན་བྱོལ་བོད་མིའི་ཆིག་སྒྲིལ་གཏོར། གྲོགས་པོའི་དབར་གྱི་མཛའ་བརྩེ་བརླགས། བཟའ་ཚང་བར་གྱི་འཆམ་མཐུན་ཉམས། མི་སྒེར་རང་གི་སེམས་ཁམས་དཀྲུགས། ད་དུང་རྒྱུ་དང་འབྱོར་བའི་གྱོང་གུད་འཁུར། ཀྱེ་མ་ཀྱི་ཧུད། རིགས་ཁྱུ་འདི་འདྲ་བར་སྨྲ་ཤེས་ཤིང་དོན་གོ་བ་མིའི་མཚན་ཉིད་ཅི་ལྟར་འཇོག་ཨང་། དེ་བས། འཛེར་སྐད་དིར་དིར་གྱི་བཙན་བྱོལ་དྲ་འབངས་དེ་ཚོ་ལ་ “རིག་འཚོ་མ་ཟིན་པའི་བྲན་འབངས” ཞེས་པའི་ཆོ་ལོ་འདི་འོས་ཤིང་འཚམས་པར་མཐོང་ངོ་། དོན་ལ་གནས་པར་སེམས་སོ། དེ་ལྟར་བཏགས་ཀྱང་འབོད་པར་བགྱིད་དོ། །

དགུ་གཉིས་པ། བར་དོའི་མང་གཙོ་འཁྱར་འཁྱོར། (མུ་འགོད།)

The post འོས་བསྡུ་དང་འབྲེལ་བའི་གཏམ་ནག་པོ་དགུ་སྦྱོར། appeared first on བོད་ཀྱི་དུས་བབ།.

རྒྱ་གར་གྱི་རྒྱལ་ས་ལྡི་ལི་ནས་སྐྱེས་པ་ཞིག་འཛིན་བཟུང་བྱས་ཏེ་སྔོན་བཤེར་བྱས་སྐབས་མཚོན་ཆ་ཁ་ཤས་དང་འབར་རྫས་ཤིག་ལག་སོན་བྱུང་ཡོད་འདུགདེ་རིང་རྒྱ་གར་གྱི་གསར་ལམ་ཁག་ཏུ་གནས་ཚུལ་སྤེལ་བ་ལྟར་ན། མདང་དགོང་མཚན་གུང་ཆུ་ཚོད་ ༡༡།༣༠ ཐོག རྒྱ་གར་གྱི་རྒྱལ་ས་ལྡི་ལིའི་ས་གནས་ཀཱ་རོལ་བག་(Karol Bagh)དང་དྷོ་ལ་ཀུ་བཱ་(Dhaula Kuan)གཉིས་ཀྱི་ལམ་བར་ཞིག་ནས། ཁ་ཆེ་འཇིགས་སྐུལ་དྲག་ཚོགས་ཨ་ཨེ་སི་ཨ་ཨེ་སི་ (ISIS)དང་འབྲེལ་བ་ཡོད་པའི་དོགས་གཞིའི་འོག་སྐྱེས་པ་མི་ཞིག་འཛིན་བཟུང་བྱས་ཡོད་པ་མ་ཟད། སྔོག་བཤེར་བྱེད་སྐབས་མཚོན་ཆ་ཁ་ཤས་དང་འབར་རྫས་ཤིག་ལག་སོན་བྱུང་ཡོད་འདུག

དེ་རིང་ཞོགས་པར་ལྡི་ལིའི་ཉེན་རྟོག་པས་བརྗོད་པ་ལྟར་ན། མི་དེའི་མིང་ལ་ཨབ་དུལ་ཡུ་ས་ཕ་ཁཱན་(Abdul Yusuf Khan)ཞུ་བ་དང་། ལྡི་ལིའི་ས་འབྲེལ་མངའ་སྡེ་ཨུ་ཏར་པ་ཪ་དེཤ་(Uttar Pradesh)ཡིན་འདུག ཁ་སང་མཚན་གུང་ཁོས་སྦག་སྦག་ཞིག་བཏང་སྟེ་འགྲོ་བཞིན་པའི་སྐབས་སུ་འཛིན་བཟུང་བྱས་ཏེ། ད་ལྟ་འཇིགས་སྐུལ་རིང་ལུགས་པར་དམིགས་བསལ་རྟོག་ཞིབ་སྡེ་ཚན་དུ་བསྐྱལ་ཟིན་པ་མ་ཟད། ལྡི་ལིའི་ས་གནས་ཁ་ཤས་ལ་གནས་སྐབས་རིང་དོགས་ཟོན་བྱེད་དགོས་པའི་ཉེན་བརྡ་ཡང་བཏང་འདུག

ཉེན་རྟོག་པས་མི་དེར་ལྡི་ལིའི་མི་ཁ་ཤས་དང་འབྲེལ་བ་ཡོད་པར་དོགས་པ་ཡོད་སྟབས་ད་དུང་འདྲི་རྩད་བྱེད་བཞིན་ཡོད་འདུག་ལ། ཉེན་རྟོག་པས་མི་དེ་འཛིན་བཟུང་བྱས་པའི་ཉེ་འགྲམ་གྱི་ས་གནས་སུ་ཞིབ་འཇུག་བྱས་སྐབས། སངས་རྒྱས་འཁྲུངས་པའི་སྐྱེད་ཚལ་ཞེས་པ་དེའི་ནང་ནས་འབར་རྫས་ཤིག་རྙེད་འདུག

རྒྱ་གར་ནང་འཇིགས་སྐུལ་དྲག་སྤྱོད་པའི་དོགས་གཞིའི་འོག་བསྟུད་མར་མི་ཁག་ཅིག་འཛིན་བཟུང་བྱས་ཡོད་པ་རེད། འདི་ལོའི་ཕྱི་ཟླ་ ༣ པར་རྒྱ་གར་ལྷོ་ཕྱོགས་བྷང་ལོར་ནས་སྨན་པ་ཁྱོ་ཤུག་གཉིས་འཛིན་བཟུང་གིས་འདྲི་རྩོད་བྱས་པ་བརྒྱུད། ཁ་ཆེའི་འཇིགས་སྐུལ་རིང་ལུགས་པ་དང་འབྲེལ་བ་ཡོད་པ་ཤེས་རྟོགས་བྱུང་ཡོད་པ་མ་ཟད། ཁྱོ་ཤུག་གཉིས་ཀྱིས་རྒྱ་གར་ནང་ཁ་ཆེ་འཇིགས་སྐུལ་རིང་ལུགས་པའི་ལས་དོན་མང་པོ་ཞིག་གི་སྐོར་ཉེན་རྟོག་པར་བརྗོད་ཡོད་འདུག

ལྡི་ལིའི་གསར་འགོད་པ་ཉི་མ་ཚེ་རིང་།

The post ལྡི་ལི་ནས་འཇིགས་སྐུལ་བའི་དོཊ་གཞི་ཅན་ཞིག་འཛིན་བཟུང་བྱས། appeared first on བོད་ཀྱི་དུས་བབ།.

བྱང་ཀོ་རི་ཡའི་མགོ་འཁྲིད་ཀེམ་ཇོང་ཨུན་གྱི་འཕྲོད་བསྟེན་གནས་སྟངས་ཛ་དྲག་ཡིན་ལ་འདས་པའི་ཟླ་ཤས་ནང་ཀེམ་སྐོར་གྱི་པར་རིས་ཕྱིར་བསྒྲགས་བྱས་པ་ཚང་མ་རྫུན་མ་ཡིན་སྐོར་བརྗོད་འདུགདེ་རིང་སྔ་དྲོ་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་སྤེལ་བཞིན་པའི་ནང་། ལྷོ་ཀོ་རི་ཡའི་ཕྱོགས་ནས་ཤེས་རྟོགས་བྱུང་བ་ལྟར་ན། བྱང་ཀོ་རི་ཡའི་མགོ་འཁྲིད་ཀེམ་ཇོང་ཨུན་གྱི་འཕྲོད་བསྟེན་གནས་སྟངས་ཛ་དྲག་ཆགས་ཡོད་པ་དང་། ཁོ་ད་ལྟའི་ཆར་སྨན་ཁང་དུ་དྲན་པ་ཡལ་ཞིང་དབུགས་སྐྱོར་བརྒྱབ་ནས་བཞག་ཡོད་པ་མ་ཟད། ཀེམ་གྱི་སྲིང་མོ་ཀེམ་ཡོ་ཇོན(Kim Yo-jon)གྱིས་བྱང་ཀོ་རི་ཡའི་སྲིད་དབང་དང་རྒྱལ་སྤྱིའི་གནད་དོན་ཁག་གི་འགན་འཁུར་ལེན་རྒྱུའི་འཆར་གཞི་ཡོད་སྐོར་བརྗོད་འདུག

དེ་འབྲེལ་གནས་ཚུལ་ནང་། ལྷོ་ཀོ་རི་ཡའི་དེ་སྔའི་སྲིད་འཛིན་འདས་པོ་(Kim Dae-jung)ཀེམ་དྷེ་རྗོང་གི་ཆབ་སྲིད་དྲུང་ཆེ་དང་། སྐབས་དེའི་གཞུང་གི་ལས་ཁུངས་སྟངས་འཛིན་འགན་འཁུར་བ་ཁྲིན་སོང་མཱན་ (Chang Song-min)གྱིས་ལྷོ་ཀོ་རི་ཡའི་(The Korea Herald)གསར་ཁང་ལ་གནས་ཚུལ་མཁོ་སྤྲོད་བྱས་པའི་ནང་། རྒྱ་ནག་གི་འབྲེལ་ཡོད་བརྒྱུད་ཤེས་རྟོགས་བྱུང་བ་ལྟར་ན། ཀེམ་གྱི་འཕྲོད་བསྟེན་གནས་སྟངས་ཛ་དྲག་ནང་ཡོད་པ་དང་། ད་དུང་ཤི་མེད་ན་ཡང་། འདས་པའི་ཟླ་ཤས་ནས་བཟུང་བྱང་ཀོ་རི་ཡའི་ཀེམ་སྐོར་གྱི་པར་རིས་དང་བརྙན་ཕྱི་ཕྱོགས་སུ་བཏང་བ་ཚང་མ་རྫུན་མ་ཡིན་སྐོར་བརྗོད་འདུག

ཡང་ཁོས། ད་ལྟའི་ཆར་བྱང་ཀོ་རི་ཡའི་ཀེམ་གྱི་སྲིད་དབང་རྒྱུན་འཛིན་པ་དངོས་སུ་བསྐོ་བཞག་བྱས་མེད་ཀྱང་། ན་ཚའི་དབང་གིས་ཀེམ་གྱིས་གནས་བབ་གང་ལ་ཡང་སྟངས་འཛིན་མི་ཐུབ་པ་མ་ཆགས་བར་དུ། ཁོ་རང་གི་ཉེ་འཁོར་མཐོ་རིམ་མགོ་འཁྲིད་དག་ལས་སུ་ལ་ཡང་ཡིད་ཆེས་མེད་པས་སྲིད་དབང་བློས་གཏོང་བྱ་རྒྱུ་མིན་ན་ཡང་། གནས་སྟངས་ཛ་དྲག་ཆགས་པ་ཡིན་ན་ཀེམ་གྱི་སྲིང་མོ་ཀེམ་ཡོ་ཇོན་ནས་བྱང་ཀོ་རི་ཡའི་སྲིད་དབང་འཛིན་རྒྱུའི་འཆར་གཞི་ཡོད་སྐོར་བརྗོད་འདུག

དེ་བཞིན་ལྷོ་ཀོ་རི་ཡའི་ཉིན་རེའི་གསར་ཁང་(The Korea Herald )གི་གནས་ཚུལ་ནང་། ལྷོ་ཀོ་རི་ཡའི་རྒྱལ་ས་སོལ་གྱི་གསང་བའི་ལས་ཁུངས་ནས་ཡུལ་དེའི་གྲོས་ཚོགས་འཐུས་མི་ཚོར། བྱང་ཀོ་རི་ཡའི་ཀེམ་གྱི་འཕྲོད་བསྟེན་གནས་སྟངས་དང་ཁོས་བྱང་ཀོ་རི་ཡའི་སྲིད་དབང་སུ་ལ་སྤྲོད་མིན་དང་། སུ་ཞིག་གིས་བྱང་ཀོ་རི་ཡའི་སྲིད་དབང་ལ་འགན་འཁུར་མིན་ཐད་དོ་སྣང་དགོས་པའི་བཀོད་ཁྱབ་བཏང་ཡོད་སྐོར་བརྗོད་འདུག

བྱང་ཀོ་རི་ཡའི་མགོ་འཁྲིད་ཀེམ་གྱི་འཕྲོད་བསྟེན་གནས་སྟངས་ཐད་འདི་ལོའི་ཕྱི་ཟླ་ ༤ པ་ནས་རྒྱལ་སྤྱིའི་སྟེང་གླེང་སློང་མང་པོ་བྱུང་ཡོད་པ་དང་། སྐབས་དེར་ཡང་ལྷོ་ཀོ་རི་ཡའི་ནང་རྟེན་གཞི་བྱས་ཡོད་པའི་བྱང་ཀོ་རི་ཡའི་ཉིན་རེའི་གསར་འགྱུར་ (Daily NK) གྱི་ནང་། ཀེམ་གྱིས་ཐ་མག་རྒྱུན་འཐེན་བྱེད་པ་དང་ཤ་རྒྱགས་དྲགས་པ། དེ་བཞིན་ལས་ཀ་བྱེད་ཡུན་རིང་དྲགས་པ་ལ་བརྟེན་སྙིང་ཁམས་དང་འབྲེལ་བའི་སྨན་བཅོས་བྱས་ཡོད་སྐོར་དང་། ཡང་གནས་ཚུལ་ཡོངས་ཁུངས་ཁ་ཤས་ནང་ཀེམ་གྱིས་ཡུལ་དེའི་སྤྲོད་སྐྱིད་ཁང་ཞིག་ཏུ་དབྱར་ཁའི་གུང་གསེང་བཏང་སྟེ་སྤྲོ་སྐྱིད་བཏང་ནས་ཡོད་པ་སོགས་བཤད་ཚུལ་མི་འདྲ་བ་མང་པོ་བྱུང་ཡོད་པ་རེད།

རྒྱལ་སྤྱིའི་སྟེང་ཀེམ་གྱི་འཕྲོད་བསྟེན་གནས་སྟངས་གླེང་སློང་ཆེན་པོ་བྱེད་དོན་ནི། ཀེམ་འདས་གྲོངས་སུ་སོང་བ་ཡིན་ན་ཡུན་རིང་སྒེར་གཅོད་བྱས་པའི་བྱང་ཀོ་རི་ཡའི་སྲིད་དབང་སུ་ལ་དབང་མིན་དང་། བྱང་ཀོ་རི་ཡའི་མ་འོངས་གནས་སྟངས་ག་འདྲ་ཆགས་མིན་གྱི་རྩོད་གཞི་ཆེན་མོ་ཞིག་ཆགས་ཡོད་པས་ཡིན་པ་དང་། རྒྱལ་སྤྱིའི་སྲིད་དོན་དབྱེ་ཞིབ་པ་ཚོས་ཀེམ་འདས་གྲོངས་སུ་སོང་བ་ཡིན་ན། བྱང་ཀོ་རི་ཡའི་སྲིད་དབང་དེ་ཀེམ་གྱི་སྲིང་མོ་ཀེམ་ཡོ་ཇོན (Kim Yo-jon)གྱིས་འཛིན་རྒྱུ་ཡིན་པའི་ཚོད་དཔག་དང་། ཁོང་མོར་ཀེམ་ཁྱིམ་ཚང་གི་ཁྲག་རྒྱུན་ཡོད་པ་ཙམ་མིན་པར། འདས་ལོ་ནས་བཟུང་ཁོང་མོ་གཞུང་འབྲེལ་གསར་ཁང་ནང་ཡང་ཡང་ཐོན་གྱི་ཡོད་པ་མ་ཟད། རྒྱལ་ཡོངས་ཀྱི་ཚོགས་འདུ་གཙོ་ཁག་གི་ནང་ཀེམ་དང་ལྷན་དུ་མཉམ་ཞུགས་བྱེད་ཡོད་སྐོར་བརྗོད་བཞིན་ཡོད་པ་རེད།

འབྲེལ་ཡོད་གསར་འགྱུར། 

ཀེམ་ཇོང་ཨུན་ཛ་དྲག་ནང་ལྷུང་ཡོད་པར་བཤད།

བྱང་ཀོ་རི་ཡ་གཞུང་གིས་ཀེམ་ཇོང་ཨན་གྱི་གནས་ཚུལ་སྤེལ།

གསར་འགོད་པ། སངས་རྒྱས་དཀོན་མཆོག

The post ཡང་ཀེམ་གྱི་འཕྲོད་བསྟེན་གནས་སྟངས་ཛ་དྲག་རེད་ཟེར། appeared first on བོད་ཀྱི་དུས་བབ།.

ཕུན་ཚོགས་སྟོབས་ལྡན་གྱིས་བརྩམས།
ཞི་བདེའི་ས་བོན་གྱིས་བསྒྱུར།

ད་རེས་དབྱར་ཁའི་འགོ་སྟོད་དུ་རྒྱ་དཀར་ནག་གཉིས་ཀྱི་མཐའ་མཚམས་དམག་མིའི་བར་གདོང་ཐུག་དྲག་པོ་བྱུང་སྟེ་རྒྱ་གར་སྤྱི་དམངས་ཁྲོད་དུ་བོད་ཀྱི་ཁྲིམས་མཐུན་གྱི་གནས་བབ་ཐད་གླེང་སློང་རིམ་པར་བྱུང་ཞིང་། མི་མང་པོ་ཞིག་གིས་འཕགས་བོད་གཉིས་ཀྱི་ས་མཚམས་ཡིན་པ་ལས་རྒྱ་དཀར་ནག་གཉིས་ཀྱི་དབར་ཐུན་མོང་གི་ས་མཚམས་ཤིག་མེད་པ་ཐེར་འདོན་བྱས་ཡོད་པ་མ་ཟད། དེ་སྔ་དབྱིན་ཇིའི་རྒྱ་གར་(British India)གྱིས་རྒྱ་གར་བྱང་ཕྱོགས་ཀྱི་ས་མཚམས་དང་འབྲེལ་བའི་ཁྲིམས་མཐུན་གྱི་ཆིངས་ཡིག་དེ་བོད་དང་ལྷན་དུ་བཞག་ཡོད་པ་ལས་རྒྱ་ནག་དང་འབྲེལ་བ་མེད་ཅིང་། བོད་ཕྱོགས་ནས་དབྱིན་ཇིའི་རྒྱ་གར་དང་ལྷན་དུ་ཆིངས་ཡིག་མང་པོ་ཞིག་བཞག་ཡོད་པ་དང་། ལྷག་པར་དུ་༡༩༡༤ལོའི་སིམ་ལའི་ཆིངས་ཡིག་བཞག་པ་དེས་འཕགས་བོད་གཉིས་ཀྱི་ས་མཚམས་སུ་མེག་མཱ་ཧོན་ས་ཐིག་(McMahon Line) ཅེས་པ་དེ་གསར་འཛུགས་བྱས། རྒྱ་གར་གྱི་རྒྱལ་ས་ལྡི་ལིར་ཡོད་པའི་རྒྱ་ནག་གི་གཞུང་ཚབ་ཁང་གི་གཞུང་ལམ་ལ་མཐུད་ཡོད་པའི་གྲོས་མཐུན་དོན་ཚན་ལྔ་(Panchsheel)གཞུང་ལམ་ཞེས་པ་དེར་ཏཱ་ལའི་བླ་མའི་གཞུང་ལམ་ཞེས་མིང་འདོགས་དགོས་པ་རྒྱ་གར་གྱི་སྲིད་བློན་མོ་དྷི་ཡི་མཚན་ཐོག་ལ་མང་ཚོགས་ཀྱིས་ཞུ་སྙན་ཕུལ་ཡོད་ཅིང་། རྒྱུ་མཚན་ནི། སྤྱི་ལོ་༡༩༥༤ལོར་རྒྱ་དཀར་ནག་གཉིས་བར་བཞག་པའི་གྲོས་མཐུན་དོན་ཚན་ལྔ་འམ་(Panchsheel)ཟེར་བ་དེ་རྒྱ་ནག་གཞུང་གིས་བརྩི་མེད་བཏང་ཡོད་པ་རེད། དེར་བརྟེན། ཉེ་ལམ་རྒྱ་གར་གྱི་རྒྱལ་སྲུང་ལ་གནོད་སྐྱོན་ཚབས་ཆེན་ཕོག་སྟེ་གླེང་སློང་དུ་མ་ཞིག་བྱུང་ཡོད་པ་དེ་ནི། དེ་སྔ་ནེཧེ་རུ་གཞུང་གིས་བོད་དེ་རྒྱ་ནག་གི་ཆ་ཤས་ཤིག་ཡིན་པ་གོང་ཞུས་གྲོས་མཐུན་དོན་ཚན་ལྔའི་ནང་ངོས་འཛིན་བྱས་པའི་རྐྱེན་གྱིས་བྱུང་བ་ཞིག་ཡིན་པ་གསལ་སྟོན་བྱས་ཡོད་ལ། རྒྱ་གར་ངོས་ནས་ད་ལྟའི་བོད་མིའི་སྒྲིག་འཛུགས་སམ་(བཙན་བྱོལ་བོད་གཞུང་)དེ་དམིགས་བསལ་ཁྲིམས་མཐུན་གྱི་ངོས་འཛིན་བྱེད་པའི་གོ་སྐབས་ཤིག་ཀྱང་བསྐྲུན་ཡོད།

 རྒྱ་གར་གྱིས་བོད་ཀྱི་གནས་བབས་ངོས་འཛིན་བྱེད་ཕྱོགས་ཀྱི་གནད་དོན།

སྤྱི་ལོ་༡༩༥༩ལོར་༸གོང་ས་༸ཏཱ་ལའི་བླ་མ་མཆོག་རྒྱ་གར་ལ་བྲོས་བྱོལ་དུ་ཕེབས་པའི་སྐབས། ཁོང་གི་ཐུགས་དགོངས་ལ་བོད་རང་བཙན་སླར་གསོ་བྱ་རྒྱུ་ནི་གཙོ་བོ་ཡིན། ཡིན་ནའང་། སྐབས་དེའི་རྒྱ་གར་གྱི་སྲིད་བློན་ནེཧེ་རུའི་གཞུང་གིས་འོག་ལ་བོད་དེ་ཁྲིམས་མཐུན་གྱི་ངོས་འཛིན་བྱ་རྒྱུ་ཧ་ལམ་ཡོང་མི་སྲིད་པ་ལྟ་བུ་ཞིག་ཡིན་པའི་ཁར། ཁོང་གིས་བོད་ཀྱི་གནད་དོན་ནི་རང་ཉིད་ཀྱི་མངོན་འདོད་སྒྲུབ་པར་འགོག་རྐྱེན་བཟོ་མཁན་ཞིག་ལ་སྣང་ཡོད། དེ་ནས་ནེཧེ་རུ་འདས་གྲོངས་སུ་ཕྱིན་པའི་རྗེས། སྐུ་ཞབས་ལཱལ་བྷ་དུར་ཤ་སི་ཏི་རི་(Lal Bahadur Shastri)མཆོག་རྒྱ་གར་གྱི་སྲིད་བློན་ལ་བདམས་ཐོན་བྱུང་ཞིང། སྤྱི་ལོ་༡༩༦༥ལོར་རྒྱ་གར་རྒྱལ་ས་ལྡི་ལིར་རྟེན་གཞི་བྱས་པའི་ལྡི་ལི་སྐུ་ཚབ་དོན་གཅོད་སྐུ་ཞབས་ཞཱ་སྒབ་པ་དབང་ཕྱུག་བདེ་ལྡན་ལགས་ཀྱིས་སྲིད་བློན་ལཱལ་བྷ་དུར་ལྷན་དུ་ཐུག་འཕྲད་བྱ་རྒྱུའི་དུས་ཚོད་བཟོས་ཡོད་པར་བརྟེན། སྐབས་དེར་ངོས་བཙན་བྱོལ་བོད་གཞུང་ཕྱི་དྲིལ་ལས་ཁུངས་ཀྱི་ངོ་ཚབ་པ་ཡིན་པས་ཁོང་གི་སྐད་སྒྱུར་ཆེད་མཉམ་དུ་ཕྱིན་པ་ཡིན། སྐབས་དེར་སྐུ་ཞབས་ཞཱ་སྒབ་པས་སྲིད་བློན་མཆོག་ནས་བཙན་བྱོལ་བོད་གཞུང་ངོས་འཛིན་དགོས་པའི་འབོད་སྐུལ་ཞུས་སོང་།  འོན་ཀྱང་ང་ཚོར་ཁ་ཡོད་ལག་ཡོད་ཀྱི་ལན་འདེབས་ཤིག་རག་པའི་རེ་བ་དེ་ཙམ་མེད་ཀྱང་། ཞཱ་སྒབ་པས་དེ་ནི་གཞུང་འབྲེལ་གྱི་གནད་དོན་ཞིག་ལ་ངོས་འཛིན་གྱིས་སྲིད་བློན་མཆོག་ལ་ཡང་ནས་ཡང་དུ་འབོད་སྐུལ་ཞུས་པའི་རྗེས། སྲིད་བློན་མཆོག་གིས་དེ་འབྲེལ་ལན་འདེབས་ཤིག་གནང་བྱུང་བས། ང་གཉིས་ཧང་སངས་དགོས་བྱུང་། ཁོང་གིས། “ང་ཚོའི་གནད་དོན་དེར་བསམ་ཞིབ་བྱེད་མུས་ཡིན་པ་དང་། ཁྱེད་ཉིད་ཀྱི་འབོད་སྐུལ་བཞིན་ཟླ་བ་བཞི་ལྔ་ནང་ཚུད་ལ་ལན་ཕུལ་ཐུབ་པའི་ང་ཚོར་གནས་བབ་ཅིག་ཡོད་ལ། ནམ་ཞིག་དུས་ཚོད་ངེས་ཅན་ཞིག་ལ་གནས་སྟངས་ཇེ་ལེགས་སུ་འགྲོ་བའི་རེ་སྒུག་བྱེད་བཞིན་ཡོད་ཅིང་། གལ་ཏེ་དེ་ལྟར་བྱུང་བ་ཡིན་ཚེ། དེ་ནས་ང་ཚོས་བཙན་བྱོལ་བོད་གཞུང་དེ་ངོས་འཛིན་བྱ་རྒྱུ་ཡིན།” ཅེས་གསུངས་སོང་། སྐབས་དེར་ཁོང་གི་སྐད་ཆ་དེ་ཐོས་མ་ཐག་ཏུ་ང་རང་ཡིད་ཆེས་དཀའ་བའི་གནས་སུ་གྱུར་ཏེ། ཞཱ་སྒབ་པར་ཁོང་གིས་གསུངས་པའི་སྐད་ཆ་དེ་ཚོ་བསྒྱུར་ཐབས་བྱས། ང་གཉིས་སྤྲོ་སེམས་འཁོལ་བའི་ངང་གཞུང་ལམ་༡༥པར་ཡོད་པའི་དོན་གཅོད་ཁང་དུ་ཕྱིར་ལོག་བྱས་པ་དང་། སྐུ་ཞབས་ཞཱ་སྒབ་པས། “ངེད་གཉིས་ཁང་པའི་ཐོག་ཁར་བོད་ཀྱི་རྒྱལ་དར་སྒྲེང་འཛུགས་བྱེད་སའི་ས་ཆ་རན་པོ་ཞིག་འཚོལ་དུ་འགྲོ་” ཞེས་བརྗོད་བྱུང་།

སྤྱི་ལོ་༡༩༦༥ལོའི་སྤྱི་ཟླ་༡༠པའི་ནང་། བཙན་བྱོལ་བོད་གཞུང་གི་ཕྱི་སྲིད་བློན་ཆེན་༧སྐུའི་གཅེན་པོ་རྒྱ་ལོ་དོན་གྲུབ་ཀྱིས་ང་ཨ་རིར་ཡོད་པའི་བོད་ཀྱི་སྐུ་ཚབ་དོན་གཅོད་སྣེའུ་ཤར་ཐུབ་བསྟན་ཐར་པ་ལགས་ཀྱི་ཕྱག་རོགས་ཆེད་ནེའུ་ཡོག་བོད་ཀྱི་སྐུ་ཚབ་དོན་གཅོད་ཁང་དུ་བཏང་གནང་སོང་། སྐབས་དེའི་དོན་གཅོད་ཀྱི་འོས་འགན་གཙོ་བོ་ཞིག་ནི་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྟེང་བོད་འབྲེལ་གནད་དོན་ལ་བསམ་གཞིག་དང་གྲོས་བསྡུར་ཞིབ་ཚགས་ཡོང་ཆེད་གྲ་སྒྲིག་བྱ་རྒྱུ་དེ་ཡིན་ཞིང་། མཉམ་འབྲེལ་རྒྱ་ཚོགས་ཀྱི་ཚོགས་ཆེན་ཐོག་གྲོས་ཆོད་༡༧༢༣ ཞེས་པ་ཞིག་བཞག་ཐུབ་པ་དེ་ནི་དེའི་གྲུབ་འབྲས་ཡིན་ལ། རྒྱ་ནག་གཞུང་གིས་བོད་ནང་ལག་བསྟར་བྱེད་བཞིན་པའི་བྱ་སྤྱོད་དེ་ནི་བོད་མི་ཚོའི་རང་ཐག་རང་གཅོད་ཀྱི་ཐོབ་ཐང་རྣམས་རྡོག་རོལ་གཏོང་བཞིན་ཡོད་པ་གྲོས་ཆོད་དེའི་ནང་ངོས་འཛིན་བྱས་ཡོད། དེ་ནས་ཟླ་བ་འགའ་ཤས་ཀྱི་རྗེས། སྤྱི་ལོ་༡༩༦༦ལོའི་སྤྱི་ཟླ་༡ཚེས་༡༡ཉིན་ཨུ་ཟ་བྷེ་ཁི་སི་ཐན (Uzbekistan)གྱི་རྒྱལ་ས་ཐ་ཧྲི་ཀན་(Tashkent)དུ་རྒྱ་གར་གྱི་སྲིད་བློན་ཤ་སི་ཏི་རི་མཆོག་འདས་གྲོངས་སུ་ཕྱིན་པའི་གནས་ཚུལ་གོ་ཐོས་བྱུང་། མི་ཚོས་ཚོད་དཔག་འདྲ་མིན་བྱས་ཏེ་སྲིད་བློན་ཁོང་ཨུ་རུ་སུ་Sovietཡི་གསང་མྱུལ་གྱིས་བསད་ཡོད་ལུགས་དང་། ཡང་ན་ཁོང་གི་མ་བྱན་གྱིས་བསད་ཡོད་ཚུལ་སོགས་བསམ་ཚུལ་འདྲ་མིན་བརྗོད་མཁན་བྱུང་ཡོད། འོན་ཀྱང་། རྒྱ་གར་གཞུང་ཕྱོགས་ནས་གནས་ཚུལ་དེར་ནམ་ཡང་ཞིབ་འཇུག་གནང་མེད་པ་མ་ཟད། ཁོང་ཇི་ལྟར་གྲོངས་ཡོད་མེད་དེ་ད་ལྟ་བར་དུ་གསང་བའི་ངང་ལྷག་ཡོད། མདོར་ན། སྤྱི་ལོ་༡༩༦༥ལོའི་སྤྱི་ཟླ་༨པའི་ནང་ལྡི་ལི་རུ་སྲིད་བློན་སྐུ་ཞབས་ཤ་སི་ཏི་རི་མཆོག་དང་ང་ཚོ་བར་མཇལ་འཕྲད་བྱུང་བ་དེ་ནི་རྒྱ་གར་གཞུང་གིས་བཙན་བྱོལ་བོད་གཞུང་ངོས་འཛིན་བྱེད་རྒྱུའི་ཉེ་འགྲམ་དུ་སླེབས་པ་ཐེངས་དང་པོ་དེ་རེད།

འཕགས་བོད་གཉིས་ནི་ས་ཁམས་ཀྱི་ཐོག་ནས་མཉམ་དུ་བཅིངས་ཡོད་ལ། བོད་རང་བཙན་ནི་ཕྱོགས་གཉིས་ཀའི་ཁེ་ཕན་ཡིན་ཞིང་། བོད་ཀྱི་བདེ་དོན་ཆེད་དུ་རྒྱ་གར་བྱང་ཕྱོགས་ཀྱི་མཐའ་མཚམས་སུ་ས་ཁུལ་ཀི་ལོ་མི་ཏྲིར་༤༠༠༠སྲུང་སྐྱོབ་བྱེད་ཐུབ། སྐབས་དེ་དུས་སྐུ་ཞབས་ནེཧེ་རུ་ནི་ཁོང་སྒེར་གྱི་མངོན་འདོད་ཆེ་དྲགས་པའི་དབང་གིས་ལོང་བ་ལྟ་བུ་ཆགས་ཡོད། འོན་ཀྱང་། རྒྱ་གར་གྱི་འགོ་ཁྲིད་སྐུ་ཞབས་ཤ་སི་ཏི་རི་ནི་འདི་ལྟར་མིན། སྤྱི་ལོ་༡༩༦༢ལོའི་རྒྱ་དཀར་ནག་གཉིས་ཀྱི་དམག་འཁྲུག་གི་ཉམས་མྱོང་གཞིར་བཞག་གིས། རྒྱ་གར་གིས་རྒྱ་ནག་ལ་མུ་མཐུད་འབྲེལ་བ་བྱེད་པའི་བརྒྱུད་རིམ་ཁྲོད་རྒྱ་གར་གྱི་བྱང་ཕྱོགས་ས་ཁུལ་ལ་དྭགས་ནས་ཤར་ཕྱོགས་ས་ཁུལ་ཨ་སམ་བར་དུ་ཁྱོན་ཀེ་ལོ་མི་ཏྲར་༤༠༠༠ལྡན་པའི་མཐའ་མཚམས་ཐོག་རྒྱ་གར་གྱིས་སྟངས་འཛིན་བྱེད་པ་ནི་ཡོང་མི་སྲིད་པ་ཞིག་ཡིན་པ་རྒྱ་ནག་གིས་རྒྱ་གར་ལ་ར་སྤྲོད་བྱས་ཡོད་ལ། རྒྱ་གར་གྱིས་རྒྱ་ནག་ལ་ཆ་ཚང་གསལ་སྟོན་བྱས་ཡོད། སྐུ་ཞབས་ནེཧེ་རུ་ཡིས་བོད་རྒྱ་ནག་གི་ཆ་ཤས་སུ་ངོས་ལེན་བྱས་པ་དེ་ནི་བསམ་བློ་ཆུང་ཐག་ཆོད་པ་ཞིག་རེད། དེའི་རྐྱེན་གྱིས། ཕྱོགས་གཅིག་ནས་ད་སྐབས་བོད་རྒྱ་ནག་གི་ཆ་ཤས་རེད་ཟེར་བ་དེར་རྒྱ་གར་ངོས་ནས་བྱ་ཐབས་མེད་པ་ལྟ་བུ་གྱུར་ཡོད་ལ། ཕྱོགས་གཞན་ཞིག་ནི། འཕགས་བོད་གཉིས་བར་བཞག་པའི་མེག་མོ་ཧན་ས་ཐིག་གི་གྲོས་མཐུན་དེ་ཡང་ཁྲིམས་མཐུན་རང་བཞིན་ཐོག་ནས་སྲུང་སྐྱོབ་བྱ་རྒྱུ་ཁག་པོ་ཆགས་ཡོད། བོད་དེ་རྒྱ་ནག་གིས་དབང་བསྒྱུར་འོག་ཇི་ཙམ་ལྷག་པ་ཡིན་ན། དེ་ཙམ་གྱིས་རྒྱ་གར་ལ་ཉེན་ཚབས་ཡོད་པ་མ་ཟད། དེ་སྔའི་ལམ་སྲོལ་ནང་བཞིན་བོད་དེ་ཨེ་ཤ་ཡའི་སྟོབས་ཆེན་རྒྱལ་ཁབ་གཉིས་ཀྱི་བར་གནས་རྒྱལ་ཁབ་ཅིག་ཏུ་མ་ཆགས་པ་ཡིན་ན། རྒྱ་གར་ངོས་ནས་རང་ཉིད་ཀྱི་དཔལ་འབྱོར་ཡར་རྒྱས་དང་འབྲེལ་བའི་དགོས་མཁོ་རྣམས་སྐོང་མི་ཐུབ་ལ། གནད་དོན་གཞན་ཁག་ཀྱང་སྒྲུབ་པར་འགོག་རྐྱེན་འཕྲད་ངེས་ཡིན།

སྤྱི་ལོ་༡༩༨༠ཙམ་ནས་བཟུང་། དབུས་བོད་མིའི་སྒྲིག་འཛུགས་ཀྱི་རྩ་དོན་དེ་ཡང་རང་བཙན་ནས་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་གནས་བབ་ཏུ་གྱུར་ཞིང་། བོད་མིའི་སྒྲིག་འཛུགས་ཀྱི་ངོས་ནས་ཞི་མཐུན་རང་བཞིན་གྱི་གནས་བབ་དེས་བོད་ནང་རྒྱ་མི་གནས་སྤོ་བྱེད་རྒྱུ་མཚམས་འཇོག་ཡོང་བའི་རེ་བ་དང་། བོད་མི་ཚོས་རང་ཉིད་ཀྱི་མཐུན་མོང་མ་ཡིན་པའི་རིག་གཞུང་སྲུང་སྐྱོབ་དང་ཆབས་ཅིག ནང་ལོགས་ཀྱི་ནད་དོན་ཁག་བོད་མི་རང་ཉིད་ནས་ཚད་མཐོ་པོའི་སྒོ་ནས་སྟངས་འཛིན་བྱེད་རྒྱུའི་རེ་བ་བརྒྱབ་ཡོད། འོན་ཀྱང་། རྒྱ་ནག་གཞུང་གིས་ཧོང་ཀོང་ནང་ལག་བསྟར་བྱས་པའི་རྒྱལ་ཁབ་གཅིག་ལ་ལམ་ལུགས་གཉིས་ཟེར་བ་དེ་ཉེ་ལམ་ནག་གསུབ་བཏང་བ་དེ་ཡིས་རྒྱ་ནག་འོག་ལ་མིང་དོན་མཚུངས་པའི་རང་སྐྱོང་ཟེར་བར་རེ་བ་བཅོལ་བ་དེ་ནི་ཕན་མེད་ལྟ་བུ་གྱུར་ཡོད་པ་གསལ་སྟོན་བྱས་ཡོད།

 རྒྱལ་སྤྱིའི་ཁྲིམས་ལུགས་འོག་རང་བཙན་དང་རང་སྐྱོང་བར་ཁྱད་པར།

ད་ལྟའི་ཆར་བོད་མིའི་ཁྲོད་དུ་རང་བཙན་དང་དབུ་མའི་ལམ་ཞེས་ལྟ་བ་ལངས་ཕྱོགས་དེ་གཉིས་ཀྱི་རྗེས་འབྲས་ཐད་གོ་རྟོགས་གསལ་པོ་མེད་པར་འཐབ་རྩོད་བྱེད་མུས་ཡིན་ཞིང་། རང་བཙན་རྒྱལ་ཁབ་ཟེར་བ་དེ་ནི་རྒྱལ་ཁབ་གཞན་གྱི་ངོས་འཛིན་བྱས་པའི་ཐོག་རང་དབང་ཆ་ཚང་ཡོད་པའི་རྒྱལ་ཁབ་ཤིག་ལ་གོ་དགོས་ལ། རྒྱལ་ཁབ་དེར་རང་དབང་གི་སྲིད་གཞུང་དང་། མི་འབོར། ཁྲིམས་སྒྲིག ཕྱི་སྲིད་འབྲེལ་ལམ། དམག་དཔུང་། རྒྱལ་དར། ངོས་འཛིན་ཡོད་པའི་མཐའ་མཚམས་ས་ཁུལ། དེ་བཞིན་རང་ཉིད་ལ་དབང་བའི་ཕྱི་སྐྱོད་ལག་ཁྱེར་བཅས་ཡོད། རང་སྐྱོང་ས་ཁུལ་ཟེར་བ་དེ་ནི་རྒྱལ་ཁབ་ཅིག་གི་མངའ་ཁུངས་སུ་ཡོད་པའི་ས་ཁུལ་ཞིག་གིས་རང་ཉིད་ཀྱི་ནང་སྲིད་དང་ནང་ལོགས་ཀྱི་ལས་དོན་ཁག་ལ་སྟངས་འཛིན་བྱེད་པ་ལས་ཕྱི་སྲིད་ཀྱི་གནད་དོན་ཐད་ཐེ་བྱུས་བྱེད་དབང་མེད་ལ། རང་ཉིད་ལ་དབང་བའི་རྒྱལ་དར་དང་། ཕྱི་སྐྱོད་ལག་ཁྱེར་ཞུ་ཆོག་པའི་ཐོབ་ཐང་། དེ་བཞིན་མཐའ་མཚམས་སྲུང་སྐྱོབ་ཀྱི་དབང་ཚད་སོགས་དེ་བས་ཀྱང་མེད། དེ་ལས་ལྷག་པའི་གོང་ཞུས་གནད་དོན་གཉིས་ལ་གལ་གནད་ཆེ་བའི་ཁྱད་པར་ཞིག་ནི། རང་བཙན་རྒྱལ་ཁབ་ཤིག་ལ་རྒྱལ་ཁབ་གཞན་ཞིག་གིས་བཙན་འཛུལ་བྱེད་པའི་སྐབས། མཉམ་འབྲེལ་རྒྱལ་ཚོགས་ཀྱི་སྲུང་སྐྱོབ་ལྷན་ཁང་ལ་ཞུ་འབོད་གནང་ཆོག འོན་ཀྱང་། རང་སྐྱོང་ས་ཁུལ་ལ་གོང་ཞུས་རང་དབང་དེ་ཚོ་མེད། དེར་བརྟེན། མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ནང་བོད་ཀྱི་གནད་དོན་ཐེངས་དང་པོ་གླེང་སློང་བྱུང་ཡོད་ཀྱང་། རྒྱལ་ཚོགས་ཀྱི་སྲུང་སྐྱོབ་ལྷན་ཁང་ནང་དེ་ལྟར་བྱུང་མེད་པ་རེད། ཡང་རྒྱལ་སྤྱིའི་ཁྲིམས་ལུགས་འོག་རང་བཙན་རྒྱལ་ཁབ་ཚོར་ཆ་རྐྱེན་གཞན་ཞིག་ཡོད་པ་དེ་ནི། སྤྱི་ལོ་༡༩༥༡ལོར་༸གོང་ས་༸ཏཱ་ལའི་བླ་མ་མཆོག་གིས་ཆིངས་ཡིག་དོན་ཚན་༡༧ཕྱིར་འཐེན་གནང་ཡོད་པ་ལྟར། གལ་ཏེ་རང་བཙན་རྒྱལ་ཁབ་ཀྱི་སྐུ་ཚབ་ཅིག་ལ་འཇིགས་སྐུལ་འོག་མཚན་རྟགས་བཀོད་བཅུག་པ་ཡིན་ཚེ། རྒྱལ་ཁབ་དེ་ཉིད་ཀྱི་ངོས་ནས་གོང་ཞུས་མཚན་རྟགས་དེ་བཙན་ཤེད་ཀྱི་གནས་སྟངས་འོག་བཀོད་བཅུག་པ་ཞིག་ཡིན་པ་ཐེར་འདོན་གྱིས་ཕྱིར་འཐེན་བྱེད་ཆོག་པའི་ཐོབ་ཐང་ཡོད། ངོས་ཀྱིས་གནད་དོན་དེ་དག་སྐོར་ཤེས་རྟོགས་བྱུང་བ་ནི། ངོས་རང་ཁྲིམས་རྩོད་པ་ཞིག་མིན་ལ། ཁྲིམས་ལུགས་ཀྱི་མཁས་དབང་ཞིག་དེ་བས་ཀྱང་མིན། འོན་ཀྱང་། ངོས་དེ་སྔ་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྟེང་བོད་ཀྱི་གནད་དོན་ཐད་རྒྱབ་སྐྱོར་བྱེད་མཁན་ཚོ་དང་ལྷན་དུ་འབྲེལ་བ་བྱེད་སྐབས་ཀྱི་སྦྱང་འབྲས་ཡིན།

གོ་སྐབས་དམ་འཛིན།

སྤྱི་ལོ་༡༩༤༧ལོར་རྒྱ་གར་དབྱིན་ཇིའི་མངའ་འོག་ནས་རང་བཙན་ཐོབ་པའི་རྗེས། རྒྱ་གར་གསར་པས་བོད་གཞུང་ལ་འབྲེལ་ལམ་གསར་པ་ཞིག་འགོ་འཛུགས་གནང་འཆར་ཡོད་མིན་སྐོར་ཡིག་འབྲེལ་བྱས་ཡོད་པ་དེ་ནི་རྒྱ་གར་གཞུང་གིས་བོད་རང་བཙན་རྒྱལ་ཁབ་ཅིག་ཡིན་པ་ངོས་འཛིན་བྱེད་རྒྱུའི་གསེར་ལྟར་དཀོན་པའི་གོ་སྐབས་ཤིག་ཀྱང་ཡིན། འོན་ཀྱང་། ཡིད་ཆེས་བྱ་དཀའ་བ་ཞིག་ལ། བོད་གཞུང་གིས་གོ་སྐབས་དེ་དམ་འཛིན་མ་ཐུབ་པ་རེད། ཡིན་ནའང་། ད་སྐབས་ང་ཚོས་གཤམ་གསལ་ལྟར་དེ་འབྲེལ་གནས་ཚུལ་ལ་འགྲེལ་བརྗོད་འདི་ལྟར་གནང་གི་ཡོད།༡༽ སྐབས་དེར་༸གོང་ས་༸ཏཱ་ལའི་བླ་མ་སྐུ་ཕྲེང་༡༤ པ་མཆོག་དགུང་གྲངས་༡༢ལས་སོན་མེད་པ་མ་ཟད། སྤྱི་ལོ་༡༩༤༧ལོར་བོད་ཀྱི་རྒྱལ་ཚབ་བམ་སྲིད་སྐྱོང་གིས་རྒྱལ་ཁབ་ཀྱི་ཐུགས་འགན་བཞེས་མུས་ཡིན་པ་དང་། ༢༽ རྒྱ་གར་རང་བཙན་ཐོབ་ནས་བཟུང་།  སྤྱི་ལོ་༡༩༥༠ལོར་རྒྱ་ནག་གིས་བོད་ལ་བཙན་འཛུལ་བྱས་པའི་དུས་སྐབས་བར། གཉན་འཕྲང་ཆེ་བའི་ལོ་ངོ་༣ རིང་དེར་ང་ཚོ་བོད་པ་ཚོ་བྲེལ་འཚུབ་ངང་ནང་ཁུལ་ལ་འཁྲུག་རྩོད་བརྒྱབ་སྟེ་གནས་ཤིང་། ལྷག་པར་དུ་བོད་གཞུང་དང་སེར་ར་དགོན་པ་གཉིས་ནང་འཁྲུག་རྒྱག་མ་ཚར་པ་བསྡད་ཡོད། མདོར་ན། སྐབས་དེར་བོད་པ་ཚང་གིས་རྒྱ་གར་གསར་པའི་ལྷན་དུ་ཕྱི་སྲིད་ཀྱི་འབྲེལ་ལམ་འཛུགས་རྒྱུའི་གོ་སྐབས་དེ་ཡང་ཤོར་བ་རེད།

ཡང་འདས་པའི་ནོར་འཁྲུལ་ཅན་གྱི་གོམ་འགྲོས་ཇི་ལྟར་བྱུང་མིན་ལ་མ་ལྟོས་པར། གོ་སྐབས་གསར་པའི་རིགས་འབྱུང་འགྱུར་ཡོང་སྲིད་པ་ཞིག་རེད། མི་ལོ་༢༡༤༧ གྱི་ལོ་རྒྱུས་ལྡན་པའི་རྒྱལ་ཁབ་ཅིག་རྒྱ་ནག་གཞུང་གིས་མི་ལོ་༧༠རིང་ལས་སླ་པོའི་ངང་རྩ་མེད་བཟོས་ཐུབ་མེད། མི་ལོ་༢༠༠རྗེས་རྒྱ་གར་དབྱིན་ཇིའི་འོག་རང་བཙན་ཐོབ་ཅིང་། རྒྱ་གར་རང་ཉིད་ཀྱི་དབྱིན་ཇིའི་མི་སེར་སྤེལ་ཡུལ་གྱི་དབང་བསྒྱུར་འོག་གི་མཉམ་མྱོང་ལ་གཞིགས་ན། རྒྱ་གར་ནི་བོད་རང་བཙན་རྒྱལ་ཁབ་ཡིན་པ་ངོས་འཛིན་བྱེད་མཁན་ཐོག་མ་དེ་ངེས་པར་དུ་ཆགས་དགོས་པ་ཞིག་ཡིན་ལ། ཕྱོགས་གཞན་ཞིག་ནས་བཤད་ན། འཕགས་བོད་གཉིས་བར་རིག་གཞུང་གི་ཆ་ནས་འབྲེལ་བ་ཆེན་པོ་ཡོད་པ་མ་ཟད། ༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་གཙོས་པའི་བཙན་བྱོལ་བོད་མི་མང་པོ་ཞིག་རྒྱ་གར་ནང་གནས་ཡོད། འོན་ཀྱང་། དེ་ལས་གལ་ཆེ་བ་ཞིག་ནི། རྒྱ་གར་བྱང་ཕྱོགས་ཀྱི་མཐའ་མཚམས་སྲུང་སྐྱོབ་དེ་བོད་ཀྱི་ཁྲིམས་མཐུན་གནས་བབ་དང་འབྲེལ་བ་ཡོད། བོད་ལ་རང་དབང་ཡོད་པའི་སྐབས་དེར་རྒྱ་གར་ངོས་ནས་རང་ཉིད་ཀྱི་བྱང་ཕྱོགས་ཀྱི་མཐའ་མཚམས་ཐད་སེམས་ཁྲལ་བྱེད་དགོས་དོན་གང་ཡང་མེད།

ཕྱི་མིག་ཅིག་བལྟས་པའི་ཚེ། ནེཧེ་རུ་སོ་སོས་བོད་ཐོག་འཛིན་པའི་སྲིད་བྱུས་ལ་བློ་འགྱོད་སྐྱེས་ཡོད། ཁོང་གིས་རྒྱ་ནག་ལ་ཡིད་ཆེས་ཆ་ཚང་བྱས་ཏེ་རྒྱ་ནག་གི་སྲིད་བློན་ཀྲོའུ་ཨེན་ལའེ་(Zhou Enlai) ཡི་མཐུན་གྲོགས་སུ་གྱུར་ཡོད་པ་དང་། མཉམ་འབྲེལ་རྒྱལ་ཚོགས་ནང་རྒྱ་ནག་འཛུལ་ཞུགས་ཆེད་རྒྱབ་སྐྱོར་ཡང་བྱས་ཡོད། ནེཧེ་རུ་ཡིས་བསམ་པར་རང་ཉིད་སྒེར་གྱི་མངོན་འདོད་རྣམས་སྒྲུབ་པར་རྒྱ་ནག་གི་ཕན་ཐོགས་བྱེད་སྲིད་པའི་རེ་བ་བཅངས་ཡོད་ཀྱང་། དེ་ལས་ལྡོག་སྟེ། རྒྱ་ནག་སྲིད་བློན་གྱིས་ནེཧེ་རུ་རྨོངས་སུ་བཅུག་པའམ་མགོ་སྐོར་བཏང་རྐྱེན། སྤྱི་ལོ་༡༩༦༢ལོའི་རྒྱ་དཀར་ནག་གཉིས་ཀྱི་དམག་འཁྲུག་བྱུང་ཞིང་། དེ་ནས་ནེཧེ་རུ་རང་ཉིད་ཀྱིས་འགན་གཙོ་བོ་བཞེས་ཏེ་གསར་འཛུགས་གནང་བའི་སྲིད་བྱུས་ཏེ། ཕྱོགས་སྒྲིལ་སྤངས་པའི་ཕྱི་འབྲེལ་སྲིད་བྱུས་(Nonalignment Foreign Policy)དོར་ཏེ། ཨ་རིའི་སྲིད་འཛིན་ཀེ་ནེ་སྒྲི(Kennedy)ལ་རོགས་རམ་སྲུང་སྐྱོབ་ཀྱི་ཞུ་འབོད་བྱས་ནས་ཨ་མ་རི་ཀའི་མཚོ་དམག་ཨང་བདུན་པའམ་7th Fleed རྒྱ་གར་རྒྱ་མཚོའི་བྱང་ཤར་གྱི་ཆ་ཤས་ཏེ་བྷེ་ཨོ་ཕྷོ། བྷེན་གྷལ་(Bay of Bengal)དུ་འབྱོར་ཏེ། རྒྱ་ནག་གི་དམག་དཔུང་རྣམས་རྒྱ་གར་ས་ཁུལ་ནས་བོད་ཀྱི་མཐའ་མཚམས་བར་ཕྱིར་འཐེན་བྱས་དགོས་བྱུང་། དེའི་རྗེས་འབྲས་སུ། སྐུ་ཞབས་ནེཧེ་རུ་གཞི་ནས་རྨོངས་གཉིད་ལས་སད་དེ་རྒྱ་ནག་གིས་རྒྱ་གར་གྱི་རྒྱབ་ནས་གྲི་བསྣུན་པ་ཤེས་རྟོགས་བྱུང་བར་བརྟེན། སྐབས་དེའི་རྒྱ་གར་གྱི་གྲོས་ཚོགས་ནང་ཁོང་གིས་ངུ་སྐད་དབང་མེད་དུ་ཤོར་ཡོད་པ་རེད།

སྤྱིར་གལ་གནད་ཆེ་བའི་འཕགས་བོད་གཉིས་ཀྱི་འབྲེལ་ལམ་དང་ཐུན་མོང་གི་དམིགས་ཡུལ་ཐད་རྒྱལ་ཁབ་དེ་ཉིད་ཕན་ཚུན་འུད་སྒྲོབ་ཤོད་རེས་བྱས་པའི་གནས་ཚུལ་ལྷགས་པ་ནི་ཧ་ཅང་གིས་ཁག་པོ་ཡིན།  རྒྱ་གར་ངོས་ནས་གྲོས་མཐུན་དོན་ཚན་ལྔ་(Panchsheel Agreement)་ཕྱིར་འཐེན་དགོས་པ་དང་། བོད་མིའི་སྒྲིག་འཛུགས་ཀྱིས་སླར་ཡང་རང་བཙན་གྱི་བདེན་མཐའ་རྩོད་དགོས། འགའ་ཤས་ཀྱིས་གནད་དོན་དེ་ཧ་ཅང་གི་རྒྱང་མཐའ་རིང་པོ་ཞིག་མཐོང་སྲིད་ཀྱང་། དེ་ཚོ་ནི་བོད་པ་ཚང་མུ་མཐུད་ཤར་སྐྱོད་བྱ་དགོས་པའི་གནད་དོན་གཙོ་གྲས་ཤིག་ཡིན། གལ་ཏེ་བོད་མིའི་སྒྲིག་འཛུགས་ཀྱི་ངོས་ནས་བོད་མིའི་ཆོས་དང་རིག་གཞུང་སྲུང་སྐྱོབ་བྱེད་རྒྱུའི་ཐད་ལ་བསམ་ཞིབ་ནན་པོ་བྱེད་ཀྱི་ཡོད་ན། བོད་རང་བཙན་རྩོད་ལེན་བྱ་རྒྱུ་ནི་ཐབས་ལམ་འབའ་ཞིག་དེ་ཡིན།

འདས་པའི་མི་ལོ་ ༢༡༤༧ཙམ་གྱི་ལོ་རྒྱུས་ནང་བོད་རང་བཙན་རྒྱལ་ཁབ་ཅིག་ཡིན་པ་གསལ་སྟོན་བྱས་ཡོད་པ་མ་ཟད། འདས་པའི་ལོ་རྒྱུས་ནང་རྡོ་རིང་དང་ཆིངས་ཡིག་དུ་མ་ཞིག་བཞག་ཡོད་པ་དེ་དག་གིས་རྒྱ་བོད་གཉིས་ཀྱི་ས་མཚམས་མཚོན་ཀྱི་ཡོད་ལ། དུས་རབས་བདུན་པའི་ནང་གསར་དུ་བསྐྲུན་པའི་ལྷ་སའི་གཙུག་ལག་ཁང་གི་མདུན་དུ་ཡོད་པའི་རྡོ་རིང་ད་དུང་མཐོང་རྒྱུ་ཡོད་པ་དང་།  ལྷག་པར་དུ་དུས་རབས་༦པ་དང་༧པའི་ནང་བཞེངས་པའི་ལྷ་སའི་པོ་ཏ་ལའི་མདུན་དུ་དེ་འབྲེལ་རྡོ་རིང་ཞིག་ཀྱང་ཡོད། དོན་དངོས་ཐོག མཉམ་འབྲེལ་རྒྱལ་ཚོགས་ནང་རྒྱལ་ཁབ་༢༠༠སྐོར་ཞིག་ཡོད་པ་ནང་ནས་རྒྱལ་ཁབ་ཕྱེད་ཀ་ལྷག་གིས་བོད་ནང་བཞིན་གྱི་ལོ་རྒྱུས་ཐོག་ནས་སོ་སོའི་རྒྱལ་ཁབ་རང་བཙན་ཡིན་པ་ཁུངས་སྐྱེལ་བྱེད་རྒྱུ་ཧ་ཅང་གི་ཁག་པོ་ཆགས་ཡོད། དེ་དང་ཕྱོགས་མཚུངས། སྤྱི་ལོ་༡༩༦༤ལོར་སྐུ་ཞབས་ནེཧེ་རུ་མ་གྲོངས་གོང་དུ། གལ་ཏེ་བོད་མི་ཚོར་ཐོབ་ཐང་རྩོད་ལེན་བྱེད་རྒྱུའི་ནུས་པ་ཡོད་ན། བོད་རང་བཙན་བྱེད་རྒྱུའི་ཐོབ་ཐང་ཆ་ཚང་ཡོད་པ་ཁོང་གིས་རྒྱལ་ཡོངས་ཆིག་སྒྲིལ་(National Integration)ཚོགས་པས་བཅར་འདྲི་སྐབས་འགྲེལ་བརྗོད་བྱས་ཡོད་པ་རེད།

སྤྱི་ལོ་༡༩༥༠ལོར་རྒྱ་ནག་གིས་བོད་ལ་བཙན་འཛུལ་བྱེད་སྐབས། དམག་སྦྱོང་དང་མཚོན་ཆ་བཅས་ཀྱི་མཐུན་རྐྱེན་ཞན་པའི་བོད་དམག་གིས་རྒྱ་དམག་ལ་ཕར་འཛིང་བྱས་ཡོད་ཀྱང་གྲངས་ཀའི་ཆ་ནས་བོད་དམག་ལས་རྒྱ་ནག་གི་དམག་མི་རྦད་དེ་མང་བ་ཡོད། བལ་ཡུལ་དུ་རྟེན་གཞི་བྱས་པའི་གློ་སྨན་ཐང་ངམ་(Mustang)དུ་བོད་མིའི་རང་དབང་འཐབ་རྩོད་པ་ཚོས་ཉར་ཚགས་བྱས་པའི་རྒྱ་ནག་གི་ཡིག་ཆའི་ནང་གསལ་བ་བཞིན། སྤྱི་ལོ་༡༩༥༩ལོའི་རང་དབང་སྒེར་ལངས་སྐབས་བོད་མི་༨༧༠༠༠ཙམ་རྒྱ་ནག་གིས་དྲག་གནོན་འོག་འདས་གྲོངས་སུ་ཕྱིན་ཡོད་པ་བཀོད་ཡོད། སྤྱི་ལོ་༡༩༨༠ལོའི་ལོ་མཇུག་ནས་བཟུང་ལྷ་སར་བོད་མི་ཚོས་རྒྱ་ནག་གི་དབང་བསྒྱུར་ལ་ངོ་རྒོལ་རིམ་པ་མང་པོ་བྱས་ཏེ་མཐར་རྒྱ་ནག་གཞུང་གིས་དྲག་པོའི་ཁྲིམས་གཞི་བསྡམས་ཏེ་བོད་མི་ཚོར་དམ་དྲག་བྱས། དེ་ནས་སྤྱི་ལོ་༡༩༨༩ལོའི་པེ་ཅིན་གནམ་སྡེ་སྒོ་མོ་ཆེའི་ཐང་ཆེན་དུ་སྡེབ་གསོད་ཀྱི་དོན་རྐྱེན་བྱུང་བའི་ཟླ་བ་དྲུག་གི་སྔོན་ལ། སླར་ཡང་ལྷ་སར་བོད་མི་ཚོས་རྒྱ་ནག་གཞུང་གིས་མུ་མཐུད་བོད་ས་དབང་བསྒྱུར་བྱེད་པར་ངོ་རྒོལ་གྱི་ལས་འགུལ་སྤེལ་ཡོད། རྒྱ་ནག་གཞུང་གིས་དྲག་པོ་ཇི་ཙམ་བྱས་མིན་ལ་མ་ལྟོས་པར། ༢༠༠༩ ལོ་ནས་བཟུང་བོད་ས་ཁྱོན་ཡོངས་ནང་བོད་མི་༡༥༦གིས་རང་ལུས་མེར་སྲེག་བཏང་ཡོད་པ་དང་། ལྷག་དོན་དུ་སྤྱི་ལོ་༢༠༠༨ལོའི་པེ་ཅིན་ཨའོ་ལིན་ཕིག་ལུས་རྩལ་འགྲན་བསྡུར་སྐབས་བོད་མཐོ་སྒང་ཁྱོན་ཡོངས་སུ་བོད་མི་ཚོས་རྒྱ་ནག་གཞུང་ལ་མི་དགའ་བའི་རྣམ་འགྱུར་ཤུགས་ཆེན་བསྟན་ཏེ་རྒྱ་མིས་དབང་བསྒྱུར་ལ་ངོ་རྒོལ་བྱས་ཡོད་པ་དེ་དག་ད་ལྟའི་མི་རབས་གསར་པ་ཚོས་མུ་མཐུད་རྒྱུན་འཁྱོངས་བྱེད་མུས་ཡིན་པ་རེད།

འཛམ་གླིང་ནང་འགྱུར་ལྡོག་ཧ་ཅང་ཆེན་པོ་འགྲོ་བཞིན་ཡོད་པ་དེ་ང་ཚོས་ཚོད་འཛིན་བྱེད་དཀའ་བ་ཞིག་ཡིན། འོན་ཀྱང་། བོད་མི་ཚོས་འབྱུང་འགྱུར་འཛམ་གླིང་འཕོ་འགྱུར་འགྲོ་བཞིན་པའི་གོ་སྐབས་དམ་འཛིན་གྱིས་བོད་རང་བཙན་རྩོད་ལེན་གནང་སྟེ། རྒྱ་ནག་ལྷན་དུ་ཆ་རྐྱེན་གཞིར་བཞག་གིས་གྲོས་མོལ་གྱི་ལམ་ནས་ས་ཁུལ་ཐག་གཅོད་བྱ་དགོས། བོད་མིའི་ཕྱོགས་ནས་ངེས་པར་དུ་ས་ཐིག་ངེས་ཅན་ཞིག་གི་ཐོག་ལ་རྒྱ་ནག་ལྷན་དུ་གྲོས་མོལ་བྱེད་རྒྱུའི་གྲ་སྒྲིག་དགོས་པ་དང་། བོད་ཆེན་པོ་ཟེར་བའི་བསམ་ཚུལ་དེ་བློས་གཏོང་གནང་སྟེ་མཐའ་མའི་ས་མཚམས་གང་དུ་ཡང་ཐག་གཅོད་བྱས་པ་དེ་ཁས་ལེན་བྱ་དགོས། འོན་ཀྱང་ཐག་གཅོད་དེས་བོད་མི་དང་མཐའ་མཚམས་སུ་གནས་སྡོད་རྒྱ་མི་གཉིས་ཀར་འདོད་བློ་ཁེངས་ཐུབ་ཀྱི་ཡོད་པ་ཕལ་ཆེར་ངེས་པ་མེད། བོད་ནི་མི་འབོར་ས་ཡ་དྲུག་ཡོད་པའི་ས་གཞི་ཆེ་བའི་རྒྱལ་ཁབ་ཅིག་ཡིན་པར་བརྟེན། རང་བཙན་གཙང་མའི་ཆེད་དུ་ས་ཁུལ་ཁག་ཅིག་ཕན་ཚུན་བརྗེ་ལེན་བྱེད་ཐུབ་པའི་ནུས་པ་ཡང་ཡོད་ལ། རྒྱ་ནག་ཕྱོགས་ནས་ཀྱང་དེ་དེ་བཞིན་གྱི་གདམ་ཀར་ངོས་ལེན་བྱེད་སྲིད། རྒྱུ་མཚན་ནི། དེས་བོད་ཀྱི་ཤར་ཕྱོགས་སུ་ཡོད་པའི་ས་མཚམས་རྣམས་རྒྱ་མིར་ཁྲིམས་མཐུན་གྱི་བདག་དབང་ཡོད་པ་ར་སྤྲོད་བྱེད་ཐུབ། དེ་མིན་དེ་ཚོ་དྲི་བ་རང་བཞིན་ཅན་དུ་ལྷག་སྲིད།

སྤྱི་ལོ་༡༩༩༡ལོར་ཨུ་རུ་སུ་མནའ་འབྲེལ་སྤྱི་མཐུན་རྒྱལ་ཁབ་(Soviet Union)དེ་བཞིན་བརྡིབས་ཏེ་རྒྱལ་ཁབ་དུམ་བུ་༡༥ ལ་འཐོར་ཞིང་། ཁ་འཐོར་རྒྱལ་ཁབ་དེ་དག་གིས་རང་ཉིད་ཀྱི་ཐོབ་ཐང་རྩོད་ལེན་བྱས་པ་བཞིན་སླར་ཡང་རང་བཙན་རྒྱལ་ཁབ་ཅིག་ཏུ་གྱུར་ཡོད། དེང་སྐབས་རྒྱལ་སྤྱིའི་སྟེང་རྒྱ་ནག་གིས་རྒྱ་གར་ལ་བཙན་རྒོལ་བྱས་པའི་གནས་ཚུལ་ཇེ་མང་དུ་ཐོན་བཞིན་ཡོད་པའི་ཁར། ཕྷི་ལི་པེན་སིའི(Philippines)་ནང་དུ་མིས་བཟོས་པའི་གླིང་ཕྲན་དང་། ལྷོ་ཤར་ཨེ་ཤ་ཡའི་གླིང་ཕྲན་ཁག་ནང་དམག་དཔུང་སྣེ་ཁྲིད་ཀྱིས་ཧམ་འཛུལ་བྱས་ཏེ་རྒྱལ་སྤྱིའི་མཚོ་ཐོག་སྐྱེལ་འདྲེན་ཁག་ལ་རྒྱ་ནག་གིས་ཉེན་ཚབས་བཟོས་ཤིང་། དེ་དང་མཉམ་དུ། ཧོང་ཀོང་རང་སྐྱོང་གི་གནས་བབ་ནག་གསུབ་བཏང་བ་སོགས་དེ་དག་གིས་རྒྱ་ནག་གིས་བོད་བཙན་བཟུང་བྱས་ཏེ་དུས་ཡུན་རིང་པོ་ཞིག་གི་རྗེས་སླར་ཡང་རྒྱ་ནག་གི་བཙན་ཤུགས་ཇེ་ཆེར་འགྲོ་བཞིན་ཡོད་པ་མངོན་བཞིན་ཡོད་ལ། གོང་ཞུས་ཉེན་ཚབས་ཅན་གྱི་རྒྱ་ནག་གི་བྱ་སྤྱོད་དེ་ཚོ་ཡིས་རྒྱ་ནག་རྒྱལ་ནང་དུ་ཡང་བརྟན་ལྷིང་མེད་པའི་གནས་ཚུལ་རིགས་ཇེ་མང་དུ་འགྲོ་བཞིན་ཡོད་པ་གསལ་པོ་མཚོན་ཐུབ་པ་མ་ཟད། ལྐོག་ཟ་རུལ་སུངས་དང་བུ་ལོན། དེ་བཞིན་ལས་མེད་སོགས་ཇེ་མང་དུ་འགྲོ་བཞིན་ཡོད་པ་ཡང་གསལ་སྟོན་བྱེད་བཞིན་ཡོད། དེར་བརྟེན། རྒྱ་ནག་བཙན་རྒྱལ་མགྱོགས་མྱུར་བརྡིབ་རྒྱུའི་ཆེད་ང་ཚོ་བོད་པ་ཚང་གིས་ངེས་པར་དུ་གྲ་སྒྲིག་བྱ་དགོས། དེའི་ཆེད་དུ་ང་ཚོ་གྲ་སྒྲིག་ཡིན་ནམ།

མཆན། ཕུན་ཚོགས་སྟོབས་ལྡན་(Phundhon)ལགས་ནི་ད་ལྟའི་ཆར་ཨ་རིའི་ནེའུ་ཡོག་ཏུ་གནས་སྡོད་བྱེད་མུས་ཡིན་ཞིང་། སྤྱི་ལོ་༡༩༦༥་ནས་༡༩༧༣ བར་ཨ་རི་བོད་ཀྱི་སྐུ་ཚབ་དོན་གཅོད་གནང་ཡོད་པ་དང་། སྤྱི་ལོ་༡༩༧༣ ནས་༡༩༧༦ བར་ལྡི་ལི་སྐུ་ཚབ་དོན་གཅོད་གནང་ཡོད།

The post འབྱུང་འགྱུར་བོད་ཀྱི་མདུན་ལམ། appeared first on བོད་ཀྱི་དུས་བབ།.

རྒྱ་མི་ལའོ་སང་ཟེར་བ་དེས་༧གོང་ས་མཆོག་དང་འབྲེལ་བའི་གནས་ཚུལ་བསྡུ་ལེན་ཆེད་བོད་པའི་གྲྭ་པ་མང་པོར་ལྐོག་དངུལ་སྤྲད་པའི་གནད་དོན་ཐད་རྒྱ་གར་གཞུང་གིས་ཞིབ་བཤེར་བྱེད་ཀྱི་ཡོད་འདུགཁ་སང་ཕྱི་ཚེས་ ༢༣ ཉིན། རྒྱ་གར་གྱི་སི་ཨན་ཨན་བརྙན་འཕྲིན་ཁང་(CNN TV 18)ཁང་གིས། ཉེ་སྔོན་རྒྱ་གར་གཞུང་གིས་འཛིན་བཟུང་བྱས་པའི་རྒྱ་མི་ལའོ་སང་ཟེར་བ་དེས་འདས་པའི་ལོ་ངོ་གཉིས་རིང་བོད་ཀྱི་གྲྭ་པ་ ༡༠༠ མ་ཟིན་ཙམ་ཞིག་ལ་ཧིན་སྒོར་འབུམ་མང་པོ་སྤྲད་ཡོད་སྟབས།  ད་ལྟའི་ཆར་རྒྱ་གར་ལྷོ་ཕྱོགས་སེ་ར་དགོན་དང་འབྲས་སྤུངས་བློ་གསལ་གླིང་།  ལྡི་ལི་བསམ་ཡས་གླིང་གི་དགོན་པ་གཅིག་བཅས་ལ་རྒྱ་གར་གཞུང་གིས་ཞིབ་བཤེར་བྱེད་བཞིན་ཡོད་སྐོར་བརྗོད་འདུག

རྒྱ་གར་གྱི་ཧིན་རྡུ་གསར་ཁང་(The Hindu)གིས་རྒྱ་མི་དེའི་སྐོར་ལ་དགའ་ལྡན་ཕོ་བྲང་ནས་གསལ་བསྒྲགས་ཤིག་གནང་ཡོད་སྐོར་དང་། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་དེའི་སྐོར་ལ་དགོངས་ཚུལ་གསུངས་ཡོད་སྐོར་བཀོད་འདུག་པས། འདི་གའི་གསར་འགོད་པས་དགའ་ལྡན་ཕོ་བྲང་ལ་འབྲེལ་བ་ཞུས་ཏེ་བཀའ་འདྲི་ཞུས་སྐབས། ཕོ་བྲང་ནས་དེའི་སྐོར་ལ་གསལ་བསྒྲགས་སོགས་ཀྱི་སྐད་ཆ་གང་ཡང་བཤད་མེད་ཅེས་གསུངས་བྱུང་།

རྒྱ་གར་གྱི་སི་ཨན་ཨན་བརྙན་འཕྲིན་ཁང་གི་གནས་ཚུལ་དེའི་ནང་ལའོ་སང་གིས་གྲྭ་པ་ཚོར་དངུལ་ཁང་བརྒྱུད་དངུལ་བཏང་བའི་དཔང་རྟགས་རྙེད་སོན་བྱུང་ཡོད་སྟབས།  རྒྱ་གར་གཞུང་གིས་འབྲེལ་ཡོད་གྲྭ་པ་དེ་ཚོར་དངུལ་དེ་ག་རེ་བྱས་ནས་ཁོ་ཚོའི་དངུལ་བྱང་སྟེང་བཏང་བ་ཡིན་སྐད་ཆ་འདྲི་སྐབས། གྲྭ་པ་ཚོས་དངུལ་དེ་ལེན་དགོས་པའི་ཐད་ལན་འདོད་པ་ཁེངས་པ་དང་འགྲེལ་བཤད་གསལ་བོ་ཞིང་བྱུང་མེད་སྟབས། རྒྱ་གར་དབུས་གཞུང་གིས་ས་གནས་ཉེན་རྟོག་པར་བཀོད་ཁྱབ་བཏང་སྟེ། གནད་དོན་དེ་དག་ལ་ཞིབ་འཇུག་མཐར་ཕྱིན་པ་བྱེད་བཞིན་ཡོད་སྐོར་བརྗོད་འདུག

གནས་ཚུལ་དེ་དང་འབྲེལ་ནས་ཕྱི་ཚེས་ ༢༣ ཉིན། སེར་སྨད་ཐོས་བསམ་ནོར་གླིང་གྲྭ་ཚང་གིས་ཡོོངས་ཁྱབ་བསྒྲགས་གཏམ་ཞིག་སྤེལ་བའི་ནང་། སེར་སྨད་ཐོས་བསམ་ནོར་གླིང་གྲྭ་ཚང་གི་དགེ་འདུན་བགྲེས་གཞོན་སུས་ཀྱང་གཞིས་བྱེས་བོད་མིའི་བདེ་དོན་དང་། བཙན་བྱོལ་བོད་མིའི་སྒྲིག་འཛུགས། ལྷག་དོན་རང་ཅག་བོད་འབངས་ཡོངས་ཀྱི་ཁོག་པའི་སྙིང་དང་དཔྲལ་བའི་མིག འདི་ཕྱི་གཏན་གྱི་སྐྱབས་གནས་སྤྱི་ནོར་ྋགོང་ས་ྋསྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་སྐུ་ཕྱྭ་དང་། གསང་གསུམ་མཛད་འཕྲིན་ལ་དོ་ཕོག་འགྲོ་རྒྱུའི་ལས་གཞི་དངོས་ཤུགས་བརྒྱུད་གསུམ་ནས་དུས་ནམ་ཡང་སྤེལ་མེད་པ་དང་། དེ་འདྲའི་ལས་གཞི་རྩོམ་མཁན་སུ་ ལའང་འབྲེལ་བ་མེད། མ་ཟད་ལས་གཞི་དེ་འདྲ་སྤེལ་མཁན་གྱི་སྒེར་དང་ཚོགས་པ་སུ་ཡིན་རུང་མཐའ་གཅིག་ཏུ་ངོ་རྒོལ་བྱ་རྒྱུ་ཡིན། ཞེས་གསུངས་འདུག

ཡང་བསྒྲགས་གཏམ་ནང་། སེར་སྨན་གྲྭ་ཚང་གི་ལས་ཁུངས་དབུས་མ་ཕྱག་མཛོད་ཁང་དང་དེའི་སྡེ་ཚན་ཁག་བཅས་ནས་ཉེ་ཆར་གསར་འགྱུར་ཁག་ནས་འདྲ་པར་དང་མིང་འདོན་བྱས་པའི་ལོ་བཟང་ཞེས་པ་དེ་དང་། དེ་འདྲའི་རིགས་ཀྱི་མི་སྒེར་དང་ཚོགས་པ་གང་ནས་ཀྱང་ད་བར་དངུལ་སྤྲོད་ལེན་གྱི་འབྲེལ་བ་མེད་པ་དང་། དེ་དག་དང་འབྲེལ་བའི་ལས་གཞིའི་རིགས་གང་ཡང་བརྩམས་མེད་ལ་མ་འོངས་པ་ལའང་བརྩམ་རྒྱུ་མིན་པའི་དམ་བཅའ་བརྟན་པོ་ཡོད། གྲྭ་ཚང་གི་སྒྲིག་ཁོངས་སུ་ཡོད་པའི་དགེ་འདུན་པ་སུ་འདྲ་ཞིག་ཡིན་རུང་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་ཕྱྭ་དང་བོད་མིའི་རྩ་དོན་ལ་གནོད་པའི་ལས་དོན་དངོས་སུ་སྤེལ་བ་དང་། སྤེལ་མཁན་གྱི་མི་སྒེར་དང་ཚོགས་པ་སོགས་ལ་མཉམ་ཞུགས་བྱས་ཡོད་པའི་ར་འཕྲོད་བྱུང་ཚེ། གང་ཟག་དེ་ཡུལ་ཁྲིམས་དང་མཐུན་པར་ས་གནས་རྒྱ་གར་གྱི་འབྲེལ་ཡོད་ལས་ཁུངས་ལ་རྩིས་སྤྲོད་བྱ་རྒྱུ་མ་ཟད་གྲྭ་ཁོངས་ནས་ཀྱང་གནས་དབྱུང་གཏང་རྒྱུ་ཡིན། ཞེས་བཀོད་འདུག

ལའོ་སང་དང་མིང་གཞན་ལ་ཆྰར་ལེ་ཕེན་(Charlie Peng)ཞེས་པ་དེ་འདི་ལོའི་ཕྱི་ཟླ་ ༨ ནང་། རྒྱ་གར་དབུས་དཔྱ་ཁྲལ་དོ་དམ་ཁང་(Central Board of Direct Taxes)རྒྱ་གར་རྒྱལ་ས་ལྡི་ལིའི་ཉེ་ཁུལ་གྱི་ས་གནས་ཁག་ ༢༡ ནང་དངུལ་དངོས་གཏོང་ལེན་དང་འབྲེལ་བའི་ཞིབ་བཤེར་ཞིག་བྱས་པ་བརྒྱུད། རྒྱ་གར་མི་སེར་གྱི་ལག་འཁྱེར་རྫུན་བཟོ་བྱས་པའི་རྒྱ་མི་ལའོ་སང་(Lou sang)ཞེས་པ་ཞིག་གིས། རྒྱ་ནག་གི་མིང་ཐོག་ནས་དྲ་ལམ་ཚོང་ལས་ཁང་ཧཱ་ཝ་ལ(hawala network)ཞེས་པ་ཆེད་འཛུགས་ཀྱིས། ཧིན་སྒོར་བྱེ་བ་ ༣༠༠ ལྷག་ཁྲིམས་འགལ་ངང་གཏོང་ལེན་བྱས་པ་ཤེས་རྟོགས་བྱུང་སྟེ་བསྐྱར་དུ་འཛིན་བཟུང་བྱས་ཡོད་པ་རེད།

རྒྱ་མི་དེས་༧གོང་ས་མཆོག་དང་བཙན་བྱོལ་བོད་མི་ཚོར་གསང་བའི་མྱུར་ཞིབ་བྱས་ཡོད་པའི་གནས་ཚུལ་ཐོན་རྗེས། རྒྱ་གར་ཧི་མ་ཅཱལ་མངལ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་ཤན་ཏ་ཀུ་མར་ (Shanta Kumar) མཆོག་གིས།  སྤྱི་ཁྱབ་བློན་ཆེན་ལས་ཐོག་རྗེ་རམ་ཐཱ་ཀོར་ (Jai Ram Thakur) མཆོག་ལ་སྙན་ཞུ་ཞིག་ཕུལ་ཏེ། གནད་དོན་དེར་ཞིབ་འཇུག་མཐར་ཕྱིན་པ་དགོས་པའི་འབོད་སྐུལ་ཞུ་ཡིག་ཕུལ་ཡོད་པ་ལྟར། ཕྱི་ཚེས་ ༡༧ ཉིན་མངའ་སྡེའི་སྤྱི་ཁྱབ་བློན་ཆེན་རྗེ་རམ་ཐཱ་ཀོར་ (Jai Ram Thakur) མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭ་ནི་མངའ་སྡེའི་གཞུང་གི་ལས་དོན་གལ་ཆེན་ཞིག་ཡིན་པ་དང་། ད་ལྟ་དགོས་ངེས་ཀྱི་ལས་ཀ་མང་པོ་ཞིག་བསྒྲུབ་བཞིན་ཡོད་ནའང་། དབུས་གཞུང་ནས་ལམ་སྟོན་ཅི་གནང་ལ་ལག་བསྟར་དོ་ནན་བྱ་རྒྱུ་ཡིན། ཞེས་གསུངས་ཡོད་པ་རེད།

གསར་འགོད་པ། སངས་རྒྱས་དཀོན་མཆོག

The post རྒྱ་གར་གཞུང་གིས་བོད་པའི་དགེ་འདུན་པ་ཁག་ཅིག་ལ་འདྲི་ཞིབ་བྱེད་ཀྱི་ཡོད་འདུག appeared first on བོད་ཀྱི་དུས་བབ།.

ཁ་སང་ཕྱི་ཚེས་ ༢༤ ཉིན་ཧི་མ་ཅཱལ་མངའ་སྡེ་གཞུང་གིས་རྒྱ་མི་གསང་ཉུལ་བ་ལའོ་སང་ཟེར་བ་དེ་དང་དངུལ་གཏོང་ལེན་གྱི་འབྲེལ་བ་ཡོད་པའི་དོགས་གཞི་ཅན་གྱི་མི་གཉིས་འཛིན་བཟུང་བྱས་ཡོད་པ་མ་ཟད་དེའི་ནང་གི་གཅིག་བོད་རིགས་ཤིག་ཡིན་པའི་དོགས་པ་བྱེད་ཀྱི་འདུགདེ་འབྲེལ་གྱི་གནས་ཚུལ་ནང་། ཧི་མ་ཅཱལ་མངའ་སྡེའི་སྤྱི་ཁྱབ་བློན་ཆེན་རྗེ་རམ་ཐཱ་ཀོར་ (Jai Ram Thakur) མཆོག་གིས། རྒྱ་མི་གསང་ཉུལ་བ་ལའོ་སང་ཟེར་བ་དེ་དང་དངུལ་གཏོང་ལེན་གྱི་འབྲེལ་བ་ཡོད་པའི་དོགས་གཞི་ཅན་ལན་ཧོ་(Lan Hoo)ཟེར་བ་ཞིག་དང་། སོ་ནོ་བྷང་ཊོ(Sonu Bangtoo) ཟེར་བ་ཞིག་འཛིན་བཟུང་བྱས་ཏེ། གསང་བའི་ལས་ཁུངས་ནས་ཞིབ་བཤེར་འདྲི་རྩད་བྱེད་བཞིན་ཡོད་ལ། ལན་ཧོ་ཞེས་པའི་བུད་མེད་དེ་རྒྱ་མི་ཞིག་ཡིན་པ་ངོས་འཛིན་ཐུབ་ཡོད་ཀྱང་། སོ་ནོ་བྷང་ཊོ་ཞེས་པ་དེ་རྒྱ་མི་ཞིག་ཡིན་དང་། ཡང་ན་བོད་མི་སྐྱབས་བཅོལ་བ་ཞིག་ད་དུང་ངོས་འཛིན་ཐག་གཅོད་ཐུབ་མེད་ན་ཡང་། ལའོ་སང་ཟེར་བ་དེས་མི་དེ་གཉིས་ཀྱི་དངུལ་བྱང་སྟེང་དངུལ་བཏང་ཡོད་པ་ར་འཕྲོད་བྱུང་ཡོད་པ་དང་། ད་ལྟའི་ཆར་ཧི་མ་ཅྰལ་གཞུང་གིས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭའི་སྲུང་སྐྱོབ་དམ་དུ་བཏང་ཡོད་པ་མ་ཟད། ཉེན་རྟོག་པ་རྣམས་ལ་སྐུ་ཕྱྭའི་བདེ་སྲུང་སྔར་ལས་ཚགས་ཚུད་དང་དོ་ནན་བྱ་དགོས་པའི་བཀོད་མངགས་གནང་ཡོད་སྐོར་གསུངས་འདུག

འདི་གའི་གསར་འགོད་པས་བོད་མིའི་སྒྲིག་འཛུགས་བདེ་སྲུང་དྲུང་ཆེ་ཀརྨ་རིན་ཆེན་ལགས་སུ་གནས་ཚུལ་དེའི་སྐོར་ལ་དེ་སྔོན་ནས་བདེ་སྲུང་ལས་ཁུངས་ལ་མཁྱེན་རྟོགས་ཡོད་མེད་དང་། ད་ལྟའི་ཆར་ གནད་དོན་དེར་རྒྱ་གར་གཞུང་དང་བདེ་སྲུང་ལས་ཁུངས་ནས་རྩད་གཅོད་ཞིབ་འཇུག་ག་འདྲ་གནང་གི་ཡོད་མེད་དྲིས་པར་ཁོང་གིས། ད་ལྟའི་ཆར་རྒྱ་གར་གཞུང་གིས་ཞིབ་འཇུག་བྱེད་བཞིན་ཡོད་སྟབས་ང་ཚོར་དེའི་སྐོར་ནས་ཞུ་རྒྱུ་གང་ཡང་མེད་མོད། བདེ་སྲུང་ལས་ཁུངས་ནས་ལའོ་སང་གི་སྐོར་ལ་དེ་སྔ་ནས་ཤེས་རྟོགས་བྱུང་ཡོད་པ་དང་། ༧སྐྱབས་མགོན་རིན་པོ་ཆེ་མཆོག་གི་༧སྐུ་ཕྱྭའི་ཐད་རྒྱ་གར་གཞུང་ནས་ཐུགས་གནང་ཤུགས་ཆེར་གནང་སྟེ་ལས་དོན་ཁག་ཇི་བཞིན་གནང་གི་ཡོད་པས། མི་མང་ནས་བློ་འཚབ་སོགས་གནང་དགོས་པ་གང་ཡང་ཡོད་པ་མ་རེད། ཅེས་བརྗོད་བྱུང་།

རྒྱ་གར་ཧིན་རྡུ་སི་ཐན་དུས་བབ་གསར་ཁང་གི་གནས་ཚུལ་ནང་། མི་དེ་གཉིས་ལས་ལན་ཧོ་ཟེར་བ་དེ་སྦིར་ནས་ཡིན་པ་དང་དྷ་རམ་ས་ལའི་ཉེ་འཁོར་ཞིག་ནས་འཛིན་བཟུང་བྱས་ཡོད་པ་དང་། བུད་མེད་དེ་ཡུན་རིང་སྦིར་དུ་མོ་རང་གི་བྱིས་པ་བུ་མོ་གཉིས་དང་ལྷན་དུ་བསྡད་ཡོད་ལུགས་དང་། སོ་ནོ་བྷང་ཊོ་ཟེར་བ་དེ་ཅོན་ཏ་ར་ཡི་བོད་པའི་སློབ་གྲྭ་ཞིག་གི་ནང་དགེ་རྒན་བྱེད་བཞིན་ཡོད་སྐོར་བརྗོད་འདུག་པ་མ་ཟད།  ཧིན་རྡུ་དུས་བབ་དང་ཧིན་རྡུ་སི་ཐན་དུས་བབ་ཀྱི་གནས་ཚུལ་ནང་དུ། སོ་ནོ་བྷང་ཊོ་ཟེར་བ་དེ་བོད་མིང་ལྟར་བྱས་ན་བསོད་ནམས་དབང་འདུས་སམ་ཡང་ན་བསོད་ནམས་དབང་ཕྱུག་ཡིན་ལུགས་བྲིས་འདུག་པ་མ་ཟད། ཁོ་ཕྱི་ལོ་ ༢༠༠༦ ལོར་སློབ་ཕྲུག་གི་ངོ་བོའི་ཐོག་བོད་ནས་རྒྱ་གར་དུ་བསླེབས་ཡོད་འདུག

ད་ལྟའི་ཆར་ལའོ་སང་དང་འབྲེལ་རྒྱ་གར་གཞུང་གིས་བོད་པའི་དགེ་འདུན་པ་ཁག་ཅིག་ལ་འདྲི་ཞིབ་བྱེད་བཞིན་ཡོད་པ་དང་། རྒྱ་གར་གཞུང་དང་ལྷག་པར་ཧི་མ་ཅྰལ་མངའ་སྡེའི་ངོས་ནས་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་ཕྱྭའི་བདེ་འཇགས་དང་འབྲེལ། རྒྱ་མི་ལའོ་སང་ཟེར་བ་དེ་དང་འབྲེལ་ཡོད་དོགས་གཞི་ཅན་ཚོར་ཞིབ་འཇུག་མཐར་ཕྱིན་པ་གནང་རྒྱུ་ཡིན་སྐོར་གསུངས་ཡོད་པ་རེད།

གསར་འགོད་པ། སངས་རྒྱས་དཀོན་མཆོག

The post ཧི་མ་ཅཱལ་ནས་གསང་ཉུལ་གྱི་དོཊ་གཞིའི་འོག་མི་གཉིས་འཛིན་བཟུང་བྱས། appeared first on བོད་ཀྱི་དུས་བབ།.

རྒྱ་ནག་གཞུང་གི་དྲ་བའི་སྒྲིག་ཁྲིམས་ཟེར་བར་གཏོར་བརླག་བཏང་ཡོད་པའི་ཉེས་མིང་གཡོགས་ཏེ་བོད་མཚོ་ལྷོ་ཁུལ་ནས་ཡིན་པའི་བོད་རིགས་བུད་མེད་ཅིག་དང་སྐྱེས་པ་ཞིག་འཛིན་བཟུང་བྱས་ཏེ་བཀག་ཉར་འོག་བཞག་ཡོད་འདུག སྤྱི་ཚོགས་དྲ་ལམ་ནས་ཐད་གཏོང་བརྒྱུད་བོད་རིགས་བུད་མེད་ཅིག་དང་སྐྱེས་པ་ཞིག་གིས་ཆགས་གཏམ་སྤེལ་བའི་ཉེས་མིང་འོག ཟླ་འདིའི་ཕྱི་ཚེས་ ༡༧ ཉིན་གསེར་ཆེན་རྫོང་ཉེན་རྟོག་ཁང་གིས་བུད་མེད་དེ་འཛིན་བཟུང་བྱས་པ་དང་། ཕྱི་ཚེས་ ༡༡ ཉིན་སྐྱེས་པ་དེ་ཡང་འཛིན་བཟུང་བྱས་ཡོད་འདུག་ལ། རྒྱལ་ཁབ་ཀྱི་བདེ་འཇགས་དོ་དམ་སྐོར་གྱི་ཆད་གཅོད་བཅའ་ཁྲིམས་ཀྱི་དོན་ཚན་རེ་བརྒྱད་པ་ཟེར་བའི་གཏན་འབེབས་ལྟར། བོད་མི་དེ་གཉིས་ཉིན་གྲངས་ ༡༣ རིང་བཀག་སྐྱིལ་བྱ་རྒྱུ་ཡིན་ལུགས་བརྗོད་འདུག

དྲ་འཕྲིན་གཞུང་དོན་ཁང་ཟེར་བས་དྲ་རྒྱའི་ཐད་གཏོང་ལས་རིགས་ཀྱི་ཆེད་དོན་བཅོས་སྒྲིག་དང་། ཚད་ལྡན་དོ་དམ་ལས་དོན་དང་ཕྱི་ལོ་ ༢༠༢༠ ལོའི་དྲ་བ་གཙང་སེལ་གྱི་ཆེད་དོན་ལས་འགུལ་ཞེས་པ་སྤེལ་སྐབས། འཛིན་བཟུང་བྱས་པའི་བུད་མེད་མཚོ་ལྷོའི་ལྷ་མོ་ཞེས་པ་དེས་གཞན་གྱི་དོ་ཁུར་ཡོང་ཆེད། ཐེངས་མང་པོར་བོད་རིགས་སྐྱེས་པ་མཚོ་ལྷོའི་ཨ་ཁོ་ཞེས་པ་ཞིག་ལ་བརྙན་འབྲེལ་བྱས་ཏེ། ཐད་གཏོང་གི་ལམ་ནས་ཁོ་གཉིས་ཀྱིས་ཆགས་གཏམ་དང་མདོ་མེད་ཉོག་གཏམ་མང་པོ་བཤད་པར་བརྟེན། ཐད་གཏོང་ལ་ལྟ་མཁན་མི་གྲངས་ཁྲི ༣ བརྒལ་ནས་རྒྱུན་ལྡན་གྱི་དྲ་རྒྱའི་སྒྲིག་ལམ་ལ་གཏོར་བརླག་ཚབས་ཆེན་བཟོས་ཡོད་སྐོར་བསྒྲགས་འདུག

འདས་ལོར་མཚོ་ལྷོ་ཁུལ་གསེར་ཆེན་རྫོང་ཉེན་རྟོག་ཁང་གིས། དྲ་རྒྱའི་ཁོར་ཡུག་གཙང་སེལ་དང་བདེ་འཇགས་ཟེར་བའི་འོག བོད་མི་རྟ་མགྲིན་དང་ཧུའུ་ཙི་ཀི། མཚོ་སྔོན་བསྟན་མཚོ་ཞེས་པ་འགར་སྒྲིག་འགལ་ངང་མ་རབས་ཐ་ཤལ་གྱི་བརྙན་ཐུང་དང་ནོར་འཁྲུལ་གྱི་རིན་ཐང་ལྟ་ཕྱོགས་བསྒྱུར་སྒྲིག་དང་ཁྱབ་བསྒྲགས། དེ་བཞིན་བརྒྱུད་སྤེལ་བྱས་པའི་ཉེས་མིང་གཡོགས་ཏེ། གསེར་ཆེན་རྫོང་ཉེན་རྟོག་ཁང་གིས་ཆབ་སྲིད་སློབ་གསོ་སྤྲད་ཡོད་འདུགརྒྱ་ནག་གཞུང་གིས་གཏན་འབེབ་བྱས་པའི་དྲ་རྒྱའི་སྒྲིག་ཁྲིམས་ཟེར་བ་དེའི་ནང་། ཆབ་སྲིད་ཀྱི་གནད་དོན་ཡོད་པའི་ནང་དོན་དང་འཆལ་གཏམ་མི་བཤད་པ་དང་།  གསང་བ་དང་འབྲེལ་བའི་ནང་ཁུལ་གྱི་དཔྱད་ཡིག་དང་ཆགས་སྲེད། དུག་རྫས། དྲག་སྤྱོད་དང་འབྲེལ་བའི་བརྙན་སོགས་མི་སྐུར་བ། དམག་དོན་གྱི་དཔྱད་ཡིག་དང་རྒྱལ་ཁབ་ཀྱི་གསང་བ་དང་འབྲེལ་བའི་ཡིག་ཆ་མི་སྐུར་བ་སོགས་བཀོད་ཡོད་པ་རེད།

གསར་འགོད་པ། སྐལ་བཟང་སྦྱིན་པ།

The post བོད་རིགས་ཕོ་མོ་གཉིས་འཛིན་བཟུང་བྱས། appeared first on བོད་ཀྱི་དུས་བབ།.

༧གོང་ས་རྒྱལ་བ་རིན་པོ་ཆེ་མཆོག་ནས་ཟླ་འགའི་རྗེས་ནད་ཡམས་ཀྱི་གནས་སྟངས་རྒྱུན་ལྡན་དུ་གྱུར་བའི་རྗེས་རྒྱ་གར་མཐོ་སློབ་ཁག་གི་ཉེ་བའི་རིགས་བདག་དང་དགེ་རྒན་ཚོ་མཉམ་དུ་དམིགས་བསལ་གྱི་བཀའ་བསྡུར་གནང་རྒྱུར་ཐུགས་འདུན་ཆེན་པོ་ཡོད་སྐོར་གསུངས་སོང་།

དེ་རིང་སྔ་དྲོའི་ཆུ་ཚོད་ ༩ ཙམ་སྟེང་བཞུགས་སྒར་རྒྱལ་བའི་ཕོ་བྲང་དུ། སེམས་བསྲེ་བ་(Mind Mingle)ཞེས་པའི་ལས་འཆར་ཚོགས་པས་གོ་སྒྲིག་ཞུས་པ་བཞིན། ༧གོང་ས་རྒྱལ་བ་རིན་པོ་ཆེ་མཆོག་ནས་ཨ་རི་དང་ཝེ་ཐི་ནམ། སིང་གྷ་ལ་སོགས་ནས་ཡིན་པའི་སློབ་གསོ་སྤྲོད་མཁན་ཁག་ཅིག་ལ། དེང་རབས་ཀྱི་ཤེས་ཡོན་ལམ་ལུགས་ནང་ཆོས་ལུགས་དང་མ་འབྲེལ་བའི་སྤྱོད་བཟང་མཁོ་ཚུལ་(The Need for Secular Ethics in the Modern Education System)ཞེས་པའི་བརྗོད་གཞིའི་སྟེང་། བཀའ་སློབ་དང་དེ་འབྲེལ་གྱི་དྲི་བར་བཀའ་ལན་བསྩལ་ཡོད་པ་དང་། སྐབས་དེར་༧གོང་ས་རྒྱལ་བ་རིན་པོ་ཆེ་མཆོག་ནས་དེང་རབས་ཤེས་ཡོན་ལམ་ལུགས་ནང་ངེས་པར་དུ་ང་ཚོ་མི་གྲངས་དུང་ཕྱུར་བདུན་ཅུ་ཚང་མ་གཅིག་གྱུར་ཡིན་པ་དང་། ཚང་མ་མཉམ་དུ་འཚོ་དགོས་པའི་འདུ་ཤེས་སྐྲུན་ཐུབ་དགོས་སྐོར་གསུངས་སོང་།

༧གོང་ས་རྒྱལ་བ་རིན་པོ་ཆེ་མཆོག་ནས། ངོས་ཀྱི་དམིགས་ཡུལ་གཙོ་བོ་དེ་བདེ་སྐྱིད་ལྡན་པའི་འཛམ་གླིང་ཞིག་ཡོང་བ་དང་། མི་སྒེར་རེ་རེ་བདེ་སྐྱིད་ལྡན་པ་ཞིག་ཡོང་བར་ཤེས་བྱ་ཁོ་ནས་བདེ་སྐྱིད་བསྐྲུན་ཐུབ་པའི་ཁེག་ཐག་བྱེད་ཐུབ་ཀྱི་མེད་པ་རེད། ང་ཚོས་མི་རིག་པ་ཅན་དང་ཤེས་ཡོན་ཚད་མཐོན་པོ་ཡོད་ནའང་། ཁོང་ཚོར་བདེ་སྐྱིད་མེད་པའི་མི་དེ་འདྲ་མཐོང་གི་ཡོད་པ་རེད། དེ་བས་ངོས་ཀྱི་རྟག་ཏུ་དེང་རབས་ཀྱི་ཤེས་ཡོན་ནི་ཕྱི་དངོས་པོར་གཙོ་འཛིན་བྱེད་པའི་ཕྱོགས་སུ་ལྷུང་ཡོད་པ་དང་། མི་ལ་བདེ་སྐྱིད་བསྐྲུན་ཐབས་སུ་ལོ་ངོ་སྟོང་ཕྲག་འགོར་བའི་རྒྱ་གར་གྱི་གནའ་བོའི་བྱམས་སྙིང་རྗེ་དང་འཚེ་བ་མེད་པ་གཉིས་མཁོ་ཡི་ཡོད་པ་བཤད་ཀྱི་ཡོད། བྱམས་སྙིང་རྗེ་ཡིས་ནང་སེམས་ལ་ཞི་བདེ་དང་སྙིང་སྟོབས་སྦྱིན་གྱི་ཡོད་པ་དང་། དེའི་འབྲས་བུར་སེམས་ཁྲལ་དང་ཞེད་སྣང་ཉུང་བ་ཡོད་སྐོར་གསུངས་སོང་།

ཡང་ཁོང་ཉིད་ཀྱིས་མུ་མཐུད། འཚེ་བ་མེད་པ་ཡིས་རྟག་ཏུ་ལུས་ངག་གཉིས་ཀྱི་ཐོག་ནས་གཞན་ལ་འཚེ་བ་བྱས་ཏེ་མི་སྐྱིད་པ་བཟོ་པ་དེ་འགོག་གི་ཡོད་པ་རེད། འཚེ་བ་མེད་པ་ཡང་དག་ཞིག་ཡོང་ཐབས་ཀྱི་རྩ་བ་ནི་བྱམས་སྙིང་རྗེ་ཆགས་ཡོད་པ་རེད། རྒྱ་གར་ནང་ལོ་ངོ་སྟོང་ཕྲག་འགའི་རིང་ནས་ནང་སེམས་ལ་སྦྱོང་བརྡར་ཇི་ལྟར་སྤྲོད་ཐབས་ཀྱི་བསམ་བློ་དེ་ཡོད་པ་རེད། དུས་རབས་ཉེར་གཅིག་འདིའི་ནང་གནའ་བོའི་རིག་གཞུང་བྱམས་སྙིང་དང་འཚེ་བ་མེད་པ། དེང་རབས་ཀྱི་ཤེས་ཡོན་བཅས་སྦྲེལ་ཐུབ་མཁན་ནི་རྒྱ་གར་ཁོ་ན་ཡིན་པ་དང་། འཛམ་གླིང་འདི་བདེ་སྐྱིད་དང་ལྡན་པ་ཞིག་བསྐྲུན་ཐབས་སུ་རྒྱ་གར་གྱིས་འགན་འཁུར་ཆེ་ཤོས་ལེན་དགོས་སྐོར་གསུངས་སོང་།

དེང་རབས་ཤེས་ཡོན་སློབ་གསོའི་ཁྲོད་བྱིས་པའི་ཤེས་ཡོན་གྱི་སྐོར་ལ་ཁོང་ཉིད་ཀྱིས། བྱིས་པ་ཚོ་ཤེས་ཡོན་གྱི་སྡེ་ལ་མ་ཞུགས་གོང་དུ་ཁོང་ཚོ་མཉམ་དུ་རྩེད་མོ་རྩེད་པ་ལས་གཞན། ཕན་ཚུན་གྱི་མི་འདྲ་བའི་ཕྱོགས་ལ་བསམ་བློ་གཏོང་གི་མེད་པ་རེད། ཤེས་ཡོན་གྱི་སྡེའི་ནང་ཞུགས་རྗེས་ཕན་ཚུན་ལ་དབྱེ་བ་བགར་ཏེ་ང་ཚོ་དང་ཁོང་ཚོ་ཟེར་བའི་དབྱེ་བ་ཤུགས་ཆེར་འབྱེད་ཀྱི་ཡོད་པ་རེད། དེ་བས་ཤེས་ཡོན་ལམ་ལུགས་ནང་ངེས་པར་དུ་ང་ཚོ་མི་གྲངས་དུང་ཕྱུར་བདུན་ཅུ་ཚང་མ་གཅིག་གྱུར་ཡིན་པ་དང་། མི་ཚང་མ་མཉམ་དུ་འཚོ་དགོས་པའི་འདུ་ཤེས་སྐྲུན་ཐུབ་པ་དགོས་ཀྱི་འདུག སྤྱི་ཡོངས་ཀྱི་ཆ་ནས་ང་ཚོ་འགྲོ་བ་མི་གཅིག་མཚུངས་ཡིན་པ་དང་གོ་ལ་འདིའི་ཐོག་མཉམ་དུ་སྡོད་མཁན་ཡིན་པ་ལས། ཤར་ལྷོ་ནུབ་བྱང་དང་ཤ་མདོག་མི་འདྲ་བ། དེ་བཞིན་ཆོས་ལུགས་མི་འདྲ་སོགས་ནི་དེ་ཙམ་གལ་ཆེན་མིན་སྐོར་གསུངས་སོང་།

གཞན་གོ་ལའི་གནམ་གཤིས་འགྱུར་ལྡོག་དང་མི་ཚང་མས་མཉམ་རུབ་ཀྱི་ཐོག་ནས་གོ་ལའི་གནམ་གཤིས་ཚ་དྲོད་འཕེལ་བཞིན་པར་གདོང་ལེན་དགོས་པའི་སྐོར་ལ་ཁོང་ཉིད་ཀྱིས། དེང་སྐབས་གོ་ལ་ཚ་འགྱུར་ནི་ང་ཚོའི་གདོང་ལེན་ཆེ་ཤོས་ཤིག་ཏུ་གྱུར་ཡོད་པ་དང་། དེ་ཡིས་འཛམ་གླིང་ཤར་ནུབ་དང་མི་རིགས་དཀར་ནག རྒྱལ་ཁབ་འདི་དང་དེ་ཞེས་དབྱེ་བ་མེད་པར་གོ་ལ་ཧྲིལ་བོའི་ཚ་དྲོད་ཡར་ནས་ཡར་འཕར་ཏེ་དཀའ་ངལ་གསར་པ་ཞིག་ལ་འཕྲད་ཀྱི་ཡོད་པ་རེད། ཚན་རིག་པ་རེ་འགའ་ལྟར་ན་ལོ་ངོ་བཅུ་ཕྲག་འགའི་ནང་གཙང་བོ་མང་པོ་ཞིག་སྐམ་འགྲོ་བའི་ཚོད་རྩིད་བྱེད་ཀྱི་ཡོད་པ་རེད། དངོས་ཡོད་ཀྱི་གནས་སྟངས་དེ་ལ་གཞི་བཞག་ནས་ང་ཚོའི་གླིང་ཕྲན་དང་ཁོང་ཚོའི་རྒྱལ་ཁབ་ཅེས་རྩོད་པ་ནི་དོན་སྙིང་མེད་པ་ཞིག་ཡིན་པས། ད་ནི་ང་ཚོས་འགྲོ་བ་མི་སྤྱི་ཡོངས་ལ་བསམ་བློ་གཏོང་བའི་དུས་ལ་སླེབས་ཡོད་སྐོར་གསུངས་སོང་།

མཇུག་ཏུ་༧གོང་ས་མཆོག་ནས། རྒྱ་གར་གྱི་གནའ་བོའི་རིག་གཞུང་བསྐྱར་གསོ་ཡོང་ཐབས་སུ་སྨོན་ལམ་འདོན་པ་དང་ཆོས་ལུགས་ཀྱི་ཆོ་ག་ལག་ལེན་བྱས་པ་བརྒྱུད་ནས་མ་ཡིན་པར་ཤེས་ཡོན་བརྒྱུད་བྱེད་དགོས་པ་ཞིག་ཡིན་སྐོར་དང་། དེང་སྐབས་ཀྱི་ནད་ཡམས་དེ་ལ་བརྟེན་ནས་ས་གནས་གཞན་ལ་ཕེབས་ཐུབ་ཀྱི་མེད་པ་དང་། ཟླ་འགའི་རྗེས་ནད་ཡམས་ཀྱི་གནས་སྟངས་རྒྱུན་ལྡན་དུ་གྱུར་རྗེས། ལྡི་ལི་དང་ཅན་དྷི་གྷར་སོགས་གྲོང་ཁྱེར་ཆེ་ཁག་གི་ནང་ཉིན་གྲངས་འགའི་རིང་མཐོ་སློབ་གྱི་ཉེ་བའི་རིགས་བདག་དང་དགེ་རྒན་ཚོ་དང་མཉམ་དུ་དམིགས་བསལ་གྱི་བཀའ་བསྡུར་གནང་བར་ཐུགས་འདུན་ཆེན་པོ་ཡོད་སྐོར་གསུངས་སོང་།

གསར་འགོད་པ།་ཀླུ་མགོན་ཐར།

The post དེང་རབས་ཤེས་ཡོན་ལམ་ལུགས་ནང་མི་ཚང་མ་མཉམ་དུ་འཚོ་དགོས་པའི་འདུ་ཤེས་སྐྲུན་ཐུབ་དགོས་ཀྱི་འདུག appeared first on བོད་ཀྱི་དུས་བབ།.

ཆབ་སྲིད་བཙོན་ཟུར་མགོ་ལོག་འཇིགས་མེད།

རྒྱ་གར་རྒྱལ་ས་དྷི་ལིའི་སྐུ་ཚབ་དོན་གཅོད་བཀའ་ཟུར་སྐུ་ངོ་འབྲོང་ཆུང་དངོས་གྲུབ་མཆོག་ནི་ ༢༠༢༡ ལོའི་སྲིད་སྐྱོང་ལ་མ་བཞེང་ཐབས་མེད་ཀྱི་མི་སྣ་གཙོ་བོ་གལ་ཆེན་དེ་ཡིན།

གཅིག  སྤྱི་ནོར་༧གོང་ས་༧སྐྱབས་མགོན་༧རྒྱལ་དབང་ཡིད་བཞིན་ནོར་བུའི་རླབས་ཆེན་གྱི་བཀའ་དགོངས་ཇི་བཞིན་སྒྲུབ་པར་སྐུ་ངོ་ཁོང་གི་གཤིས་ཀ་ལ་ནམ་ཡང་འགྱུར་བ་མེད།

གཉིས། ཁོང་ནི་བོད་ནང་གི་ཆབ་སྲིད་བཙོན་པ་དང་། བཙོན་ཟུར་འདས་གསོན་མང་པོས་ཡིད་ཆེས་བློ་འགེལ་ཞུ་ཡུལ་དང་། བོད་ཀྱི་རྩ་དོན་ལ་དོ་སྣང་བྱེད་མཁན་མང་པོས་རེ་བ་དང་ཡིད་ཆེས་ཡོད་པའི་མི་སྣ་གལ་ཆེན་ཞིག་ཡིན་པར་བརྟེན། གཞིས་བཞུགས་ངེས་དོན་རྒྱལ་གཅེས་དཔའ་བོ་ཆབ་སྲིད་བཙོན་ཟུར་རེ་ཟུང་གིས་ཀྱང་། ༢༠༢༡་ལོའི་སྲིད་སྐྱོང་ལ་སྐུ་ངོ་འབྲོང་ཆུང་དངོས་གྲུབ་མཆོག་བཞེངས་ཐུབ་པར་ཤུགས་རྒྱོབ། ཅེས་རེ་བསྐུལ་བདག་ལའང་འབྱོར་བཞིན་ཡོད།

གསུམ།  ཁོང་ནི་རྒྱ་ནག་དམར་གཞུང་གིས་ཀྱང་གནད་འགག་ཅན་གྱི་མི་སྣ་ཞིག་ལ་ངོས་འཛིན་བྱེད་བཞིན་པ་དང་། ཁོང་ནི་མ་ཤེས་ཤེས་མདོག་ཙམ་མིན་པར་བོད་ཕྱི་ནང་གཉིས་ལ་རྒྱུས་མངའ་ཆེ་ཤོས་ཀྱི་དབུ་ཁྲིད་ཅིག་ཡིན།

བཞི།  ཁོང་བོད་དབྱིན་ཧིན་གསུམ་གྱི་སྐད་ཡིག་ལ་བྱང་ཆུབ་པ་དང་། ཁོང་གིས་མི་ལོ་༥༠་མ་ཟིན་ཙམ་རིང་ཐེག་པ་རིམ་འཛེགས་ཀྱིས་གཞུང་མང་ལ་ཞབས་འདེགས་ཞུས་པའི་གང་ཅིའི་ཉམས་མྱོང་ཕུན་སུམ་ཚོགས་པ་ཡོད། ལྷག་ཏུ་ལོ་མང་རིང་༧གོང་ས་མཆོག་གི་སྐུ་བྱའི་ཆེད་དམིགས་བསལ་གྱིས་ཁོང་གིས་ཕྱག་ལས་གནང་ཡོད་ཀྱང་། དེའི་རིང་སྐུ་བྱའི་ལས་དོན་སོགས་འཐུས་ཤོར་རིགས་གཅིག་ཀྱང་བྱུང་མེད།

ལྔ།  ཁོང་ལ་འཐབ་རྩོད་ཀྱི་ནུས་ཤུགས་ངོས་འཛིན་དང་། དེ་སྲུང་སྐྱོབ་ཐུབ་པའི་ཤེས་འཇོན་ཡོད། དེར་བརྟེན་བོད་གཞིས་བྱེས་གཞུང་མང་ཡོངས་རྫོགས་མཐུན་སྒྲིལ་རྡོག་རྩ་ཆིག་སྒྲིལ་གྱི་ལམ་ཆེན་དུ་འཁྲིད་ནུས་པའི་ཤེས་འཇོན་ལྷག་བསམ་ཁོང་ལ་ཡོད། དེ་བཞིན་ཁོང་ལ་ཐེངས་མང་དངོས་མཇལ་རྒྱུས་ལོན་བྱས་པའི་བརྒྱུད་རིམ་ནས་ཁོང་ནི། མིང་དོན་མཚུངས་པའི་ན་གཞོན་བོད་དོན་འཐབ་རྩོད་པ་རྣམས་ལ་ཧ་ཅང་མཐོང་ཆེན་རྒྱབ་སྐྱོར་གནང་མཁན་ཞིག་ཡིན་པ་སོགས་ཕྱོགས་ཡོངས་ནས། ད་ལྟའི་ཆེས་ཛ་དྲག་ཆེ་བའི་དུས་འདིར་ཁོང་ནི་སྤྱི་ཚོགས་འདིའི་ནང་སྲིད་སྐྱོང་ལ་མེད་དུ་མི་རུང་བའི་བདུད་རྩི་སྨན་མཆོག་ལྟ་བུའི་མི་སྣ་གལ་ཆེན་ཞིག་ཡིན།

དྲུག  ཁོང་ལ་བོད་ནང་དུ་ཡང་གོང་ཞུས་ལྟར་ཡིད་ཆེས་རྩེ་གཅིག་བྱེད་མཁན་གང་མང་ཡོད་ཅིང་། ང་རང་ཡང་སྔོན་མ་དེའི་ནང་གི་གཅིག་ཡིན། འོན་ཀྱང་བོད་ནང་ནས་ང་ཚོས་སྐུ་ངོ་ཁོང་གཅིག་པུས་ག་ལ་ཚད། མི་སྣ་གང་མང་ཞིག་ལ་ཧ་ཅང་རེ་བ་ཆེན་པོ་བྱས་མྱོང་། ཕྱིས་སུ་ང་བཙན་བྱོལ་ལ་འབྱོར་རྗེས། དེ་སྔོན་རེ་བ་ཆེ་བའི་མི་སྣ་གང་མང་ལ་རྒྱུས་ལོན་བྱུང་ཚེ། མི་སྣ་རེ་ཟུང་ཞིག་ནི་༧གོང་ས་མཆོག་གི་མཚན་བེད་སྤྱོད་བཏང་སྟེ། རང་དོན་ཉག་གཅིག་བསྒྲུག་རྒྱུ་མ་གཏོགས། བོད་མིའི་འཐབ་རྩོད་དང་བོད་རྒྱལ་ཁབ་དང་མི་རིགས་སོགས་ནི་ཁོང་ཚོའི་ཧམ་བཤད་དང་སྟོང་གཏམ་གྱི་ལམ་ནས་རང་ཉིད་སྒེར་གྱི་ཁེ་ཕན་སྒྲུབ་བྱེད་ཙམ་ཡིན་པའི་ཚོར་སྣང་བྱུང་།

བདུན།  སྐུ་ངོ་འབྲོང་ཆུང་དངོས་གྲུབ་མཆོག་ནི་དེའི་རིགས་དང་མི་འདྲ་བར། གསེར་ལྟ་བུའི་ཁོང་གི་བབ་བརླིང་བརྟན་གསུམ་གྱི་ཐུགས་གཤིས་ལ་ནམ་ཡང་འགྱུར་བ་མེད་པར། རང་དོན་རྒྱབ་ཏུ་བཞག་སྟེ། སྤྱི་དོན་གཙོ་བོར་འཛིན་མཁན་ཞིག་དང་། ཐུགས་རྒྱུད་དྲང་ལ་ལྷག་བསམ་ཤེས་འཇོན་ཉམས་མྱོང་ཆེ། ཁོང་ལ་ཐུགས་སྤོབས་ཆེ་ཞིང་། གནད་འགག་གི་སྐབས་བྱ་བ་ཆེ་ཆུང་གང་ཡིན་ཡང་ཐག་གཅོད་གཙང་མ་གནང་རྒྱུའི་བློ་སྤོབས་ཡོད། དེར་བརྟེན་སྐུ་ངོ་མཆོག་ནི་༢༠༢༡ལོའི་སྲིད་སྐྱོང་ལ་མ་སྦྱངས་ཐབས་མེད་ཀྱི་མི་སྣ་གཙོ་བོ་དེ་ཡིན་པས། རྒྱ་ཆེའི་མང་ཚོགས་ཀྱི་ངོས་ནས་ཀྱང་ཉེན་ཚབས་ཆེ་བའི་དུས་སྐབས་དང་། གལ་ཆེའི་བོད་སྤྱི་བའི་རྩ་དོན་བཅས་གཙིགས་འཛིན་གྱིས། གདམས་བྱ་འདེམས་བྱེད་མ་ནོར་བ་གནང་རོགས་ཞུ།

མཆན། གོང་གསལ་བསམ་ཚུལ་རྩོམ་ཡིག་དེ་ནི་རྩོམ་པ་པོའི་དགོངས་ཚུལ་ཡིན་པ་ལས་འདི་ག་གསར་ཁང་གི་ལྟ་བ་ལངས་ཕྱོགས་ཡིན་པས་མ་ཁྱབ། 

The post ཕྱི་ལོ་  ༢༠༢༡  ལོའི་སྲིད་སྐྱོང་འོས་མིར་མ་བཞེང་ཐབས་མེད་ཀྱི་མི་སྣ་ཞིག appeared first on བོད་ཀྱི་དུས་བབ།.

རྒྱ་ནག་གཞུང་ཚབ་པ་ཞིག་རྒྱལ་སྤྱིའི་ཁྲིམས་ཁང་གི་ཁྲིམས་ཞིབ་པར་བསྐོས་པར་ཨ་རིས་མེར་སྲེག་ཉེས་ཅན་པ་ཞིག་མེ་གསོད་རུ་ཁག་གི་མགོ་འཁྲིད་དུ་བསྐོས་པ་ཡིན་པའི་སྐྱོན་བརྗོད་བྱས་འདུག

དེ་རིང་རྒྱ་ནག་ལྷོ་བརྒྱུད་ཞོགས་པའི་ཆ་འཕྲིན་གྱིས་གནས་ཚུལ་ཞིག་སྤེལ་བའི་ནང་། རྒྱ་ནག་གཞུང་གིས་ཁྲིམས་འགལ་ཐོག་ལྷོ་བརྒྱུད་རྒྱ་ནག་རྒྱ་མཚོའི་མངའ་ཁུལ་བདག་བཟུང་རྒྱ་བསྐྱེད་བྱེད་བཞིན་པའི་གནས་སྟངས་ལ་མ་ལྟོས་པར། རྒྱ་ནག་གི་གཞུང་ཚབ་པ་ཞིག་རྒྱལ་སྤྱིའི་མཉམ་འབྲེལ་རྒྱལ་ཚོགས་ཀྱི་རང་དབང་ལྡན་པའི་རྒྱ་མཚོའི་རྩོད་རྙོག་འདུམ་འགྲིག་ཁྲིམས་ཁང་ (International Tribunal for the Law of the Sea) གི་ཁྲིམས་ཞིབ་པའི་གྲས་སུ་འདེམས་བསྐོ་བྱུང་ཡོད་པ་དང་། གནད་དོན་དེའི་ཐད་ཨ་རིས་རྒྱ་ནག་གིས་རྒྱལ་སྤྱིའི་ཁྲིམས་སྒྲིག་ཁག་ལ་བརྩི་སྲུང་བྱས་མེད་སྐོར་གྱི་སྐྱོན་བརྗོད་བྱེད་བཞིན་ཡོད་འདུག

གནད་དོན་དེའི་ཐད་རྒྱ་ནག་གི་ཕྱི་སྲིད་མགྲིན་ཚབ་པ་ཀྲའོ་ལི་ཅན་ཟེར་བ་དེས། རྒྱ་ནག་ངོས་ནས་རྒྱལ་ཚོགས་ཀྱི་རྒྱ་མཚོའི་རྩོད་རྙོག་འདུམ་འགྲིག་ཁྲིམས་ཁང་ལ་རྒྱབ་སྐྱོར་ཞུས་ཡོད་པ་ལྟར། ད་ཐེངས་ཏུན་ཅེ་ལོང་(Duan Jielong) ཁྲིམས་ཞིབ་པར་བདམས་ཐོན་བྱུང་བ་དེས། རྒྱ་ནག་གིས་རྒྱབ་སྐྱོར་བྱས་པ་དེར་ངོས་འཛིན་བྱས་པ་མཚོན་གྱི་ཡོད་སྐོར་བརྗོད་ཡོད་ཀྱང་། ཨ་རིའི་རྒྱལ་སྲིད་དྲུང་ལས་ཌེ་ཝིཌ་སི་ཊིལ་ཝེལ་ (David Stilwell) གྱིས། རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་གཞུང་འབྲེལ་མི་སྣ་ཞིག་རྒྱ་མཚོའི་རྩོད་རྙོག་འདུམ་འགྲིག་ཁྲིམས་ཁང་གི་ཁྲིམས་ཞིབ་པར་བདམས་པ་དེ་ནི། མེར་སྲེག་ཉེས་ཅན་པ་ཞིག་མེ་གསོད་རུ་ཁག་གི་མགོ་འཁྲིད་དུ་བསྐོས་པ་ལྟ་བུ་ཡིན་སྐོར་བརྗོད་ནས་སྐྱོན་བརྗོད་བྱས་ཡོད་འདུག

སྤྱིར་ཨ་རི་རྒྱལ་ཚོགས་ཀྱི་རྒྱ་མཚོའི་ཁྲིམས་སྒྲིག་ལྷན་ཚོགས་ཀྱི་ཁོངས་སུ་མེད་ནའང་། ཁྲིམས་ཁང་དེའི་འོས་མིའི་ཁོངས་སུ་རྒྱ་ནག་གི་གཞུང་ཚབ་པ་ཞིག་སླེབས་པར་དགག་པ་ཆེན་པོ་བརྒྱབ་ཡོད་པ་མ་ཟད། རྒྱ་ནག་གིས་ལྷོ་བརྒྱུད་རྒྱ་མཚོའི་ཁུལ་དུ་རྒྱལ་སྤྱིའི་ཁྲིམས་སྒྲིག་ཁག་རྡོག་རོལ་བཏང་ཡོད་པའི་སྐྱོན་བརྗོད་དང་།  ཟླ་སྔོན་མར་ཨ་རིའི་རྒྱལ་སྲིད་དྲུང་ཆེ་མེག་པོམ་པེ་ཡིས་ཐེངས་དང་པོར། རྒྱ་ནག་གིས་ལྷོ་བརྒྱུད་རྒྱ་ནག་རྒྱ་མཚོ་བདག་བཟུང་བྱེད་བཞིན་པ་ནི་ཁྲིམས་འགལ་ཞིག་ཡིན་སྐོར་སོགས་བསྒྲགས་ཡོད་པ་དང་། རྒྱ་ནག་མགྲིན་ཚབ་པས་རྒྱལ་སྤྱིའི་རྒྱལ་ཁབ་སྐོར་ཞིག་གིས་རྒྱ་ནག་གི་འོས་མིར་གནོན་ཤུགས་སྤྲད་པ་དེ་དོན་འབྲས་མེད་པ་ཞིག་ཡིན་པ་ར་སྤྲོད་བྱས་ཡོད་པ་དང་། ཁྲིམས་ཞིབ་པར་བདམས་བྱུང་བ་རྣམས་ཀྱིས་དྲང་བདེན་གྱི་ཐོག་ནས་ཕྱག་ལས་གནང་སྟེ། རྒྱ་མཚོ་དང་འབྲེལ་བའི་རྩོད་རྙོག་རྣམས་ཞི་བའི་ངང་འགྲིག་མཐུན་ཡོང་རྒྱུར་ཡིད་ཆེས་བྱེད་ཀྱི་ཡོད། ཅེས་བརྗོད་ཡོད་འདུག

འཇར་མ་ནིར་རྟེན་གཞི་བྱས་པའི་ཁྲིམས་ཁང་དེ་ནི་རྒྱལ་ཚོགས་ཀྱི་རྒྱ་མཚོའི་ཁྲིམས་སྒྲིག་ལྷན་ཚོགས་ (UN Convention of Law of Sea) ཀྱིས་རྒྱལ་སྤྱིའི་རྒྱ་མཚོ་དང་འབྲེལ་བའི་རྩོད་རྙོག་ཁག་འདུམ་འགྲིག་ཡོང་རྒྱུར་དམིགས་པའི་རང་དབང་ཅན་གྱི་ཁྲིམས་ཁང་ཞིག་ཡིན་ཞིང་། ཁྲིམས་ཁང་དེར་སྤྱིར་ཁྲིམས་ཞིབ་པ་ ༢༡ ཡོད་པའི་ཁྲོད་ནས། ཁ་སང་ལྷན་ཚོགས་ཀྱི་ཚོགས་ཆེན་སྐབས་ ༣༠ པའི་ཐོག་ཁྲིམས་ཞིབ་པ་ ༧ འཕོ་འགྱུར་བཏང་སྟེ། ཁོ་ཚོའི་ཚབ་ཏུ་ཁྲིམས་ཞིབ་པ་གསར་པ་ ༦ བདམས་ཐོན་བྱུང་ཡོད་པ་དང་། བདམས་ཐོན་བྱུང་བའི་ཁྲིམས་ཞིབ་པ་གསར་བ་རྣམས་ནི། མཱལ་ཊ་ (Malta)དང་། ཨི་ཊ་ལི་(Italy)། ཅི་ལི་(Chile)། ཀེ་མེ་རུན་(Cameroon)། ཡུ་ཁེ་རེན་(Ukraine) བཅས་ནས་ཡིན་འདུག ཁྲིམས་ཞིབ་པ་ལྷག་འཕྲོ་གཅིག་དེ་ཇེ་མེ་ཁ་དང་བྷ་ར་ཛིལ་གཉིས་གང་རུང་ནས་བདམས་ཐོན་བྱ་རྒྱུ་ཡིན་ཞིང་། ཁྲིམས་ཞིབ་པའི་ལས་ཡུན་དེ་ལོ་ ༩ ཡིན་འདུག

ད་ལན་བདམས་ཐོན་བྱུང་བའི་ཏུན་ཅེ་ལོང་གིས་དེ་སྔ་སིང་གྷ་པུར་གྱི་རྒྱ་ནག་གཞུང་ཚབ་པ་བྱས་མྱོང་བ་དང་། ཕྱི་ལོ་ ༢༠༠༠ ལོའི་ནང་རྒྱ་ནག་གི་ཕྱི་སྲིད་ལྷན་ཁང་གི་ཆིངས་ཡིག་དང་ཁྲིམས་སྒྲིག་ཚན་པའི་ནང་ལས་ཀ་བྱས་ཏེ། ད་ལྟ་ཡུ་རོབ་རྒྱལ་ཁབ་ཧན་གྷེ་རི་ (Hungary) ཡི་རྒྱ་ནག་གཞུང་ཚབ་པ་ཡིན་འདུག ཐེངས་འདིར་རྒྱ་ནག་གི་གཞུང་འབྲེལ་མི་སྣ་ཞིག་རྒྱལ་ཚོགས་ཀྱི་ཁྲིམས་ཁང་དེའི་ཁྲིམས་ཞིབ་པར་བདམས་ཐོན་བྱུང་བ་དང་པོ་མིན་པར། ཕྱི་ལོ་ ༡༩༩༦ ལོར་ཁྲིམས་ཁང་དེ་དབུ་བརྙེས་པ་ནས་བཟུང་ད་བར་ཁྲིམས་ཞིབ་པའི་ཁོངས་སུ་རྒྱ་ནག་གི་གཞུང་འབྲེལ་མི་སྣ་མ་བསྐོས་པའི་སྐབས་ཤིག་བྱུང་མེད་པ་དང་། དེ་ཡང་ཕྱི་ལོ་ ༡༩༩༦ ནས་ ༢༠༠༠ བར་ཀྲའོ་ལི་ཧའེ་ (Zhao Lihai) ཟེར་བ་དང་། ཕྱི་ལོ་ ༢༠༠༡ ནས་ ༢༠༠༧ བར་ཧྲུ་ཀོང་ཅན་ (Xu Guangjian) ཟེར་བ་དང་། གཞན་ཡང་ཕྱི་ལོ་ ༢༠༠༨ ནས་ ༢༠༢༠ བར་ཀའོ་ཁྲི་ཀུའོ་ (Gao Zhigua) བཅས་ཀྱིས་ཁྲིམས་ཞིབ་པ་བྱས་ཡོད་འདུག

གསར་འགོད་པ། པ་སངས་ཚེ་རིང་།

The post རྒྱ་མི་ཞིག་རྒྱལ་སྤྱིའི་ཁྲིམས་ཁང་གི་ཁྲིམས་ཞིབ་པར་བསྐོས། appeared first on བོད་ཀྱི་དུས་བབ།.

ལ་དྭགས་བསོད་ནམས་གླིང་བོད་མིའི་གཞིས་ཆགས་ཀྱི་བོད་ཁྱིམ་རྒན་གསོ་ཁང་དུ་ཏོག་དབྱིབས་ནད་རྟགས་ཅན་རྒན་འཁོགས་སུམ་བཅུ་ཐོན་འདུག

རྒྱ་གར་བྱང་ཕྱོགས་ལ་དྭགས་ལྕོག་ལམ་གསར་བསོད་ནམས་གླིང་བོད་མིའི་གཞིས་ཆགས་ནང་རྟེན་གཞི་བྱས་པའི་བོད་ཁྱིམ་རྒན་གསོ་ཁང་དུ། ཏོག་དབྱིབས་གཉན་རིམས་ནད་རྟགས་ཐོན་པའི་རྒན་འཁོགས་ ༣༠ བྱུང་ཡོད་པ་དང་། ད་ལྟའི་ཆར་ཏོག་ནད་ཅན་ཚོ་ཟུར་བཀག་འོག་བཞག་ཡོད་ཀྱང་། རྒན་འཁོགས་ཁ་ཤས་ཀྱི་གནས་སྟངས་ཛ་དྲག་ཆགས་ཡོད་འདུག

འདི་གའི་གསར་འགོད་པས་ཁ་པར་བརྒྱུད་ལ་དྭགས་ས་གནས་གཞིས་མགོ་ཚེ་བརྟན་དབང་ཕྱུག་ལགས་སུ་ལ་དྭགས་ཀྱི་རྒན་གསོ་ཁང་ཞིག་ཏུ་ཏོག་དབྱིབས་ནད་ཡམས་འགོས་ཁྱབ་བྱུང་ཡོད་པའི་གནས་ཚུལ་དེ་བདེན་པ་ཡིན་མིན་དྲིས་པར་ཁོང་གིས། གནས་ཚུལ་དེ་བདེན་པ་རེད། རྒན་གསོ་ཁང་དེ་ལ་དྭགས་བོད་ཁྱིམ་གྱི་རྒན་གསོ་ཁང་རེད། སྟབས་མ་ལེགས་པ་དང་ཡིད་སྐྱོ་དགོས་པ་ཞིག་ལ་རྒན་འཁོགས་ ༣༠ ལ་ཏོག་དབྱིབས་གཉན་རིམས་ནད་འགོས་ཡོད་པ་དང་། ད་ལྟའི་ཆར་རྒན་འཁོགས་ཁ་ཤས་ཀྱི་གནས་སྟངས་ཛ་དྲག་ཡིན་པ་དང་། ཛ་དྲག་ཡིན་པའི་རྒན་འཁོགས་གཅིག་སྨན་ཁང་དུ་བསྐྱལ་ཡོད་པ་དང་། དེ་མིན་གཞན་རྣམས་ཟུར་བཀག་འོག་བཞག་ཡོད་པ་རེད། ཅེས་བརྗོད་བྱུང་།

ཡང་ནད་ཡམས་ཇི་ལྟར་འགོས་མིན་དྲིས་པར་ཁོང་གིས། སྤྱིར་བཏང་རྒན་གསོ་ཁང་དུ་ལས་བྱེད་དང་སྨན་ཞབས། མ་བྱན་སོགས་ཡོད་པ་དང་། ལས་བྱེད་ཚང་མ་དུས་ཚོད་རེས་མོས་ཀྱིས་ལས་བགོས་བྱས་ཡོད་སྟབས། ཨ་མ་ལགས་ཤིག་ལ་དྭགས་སླེ་རུ་རྒན་འཁོགས་ཅིག་གི་ནད་གཡོག་ཏུ་ཕྱིན་ཡོད་པ་དང་། ཨ་མ་དེར་ཉིན་གྲངས་གང་འཚམ་ཞིག་གི་རིང་ནད་རྟགས་ཐོན་མེད་ནའང་། ཉིན་གྲངས་ ༡༤  ཡས་མས་ཤིག་གི་མཚམས་ནས་མིད་པ་ན་བ་དང་ཚ་བ་རྒྱས་པའི་ནད་རྟགས་ཐོན་ཡོད་འདུག དེར་བརྟེན། འབྲེལ་ཡོད་བོད་ཁྱིམ་དབུ་འཛིན་ཚོས་ཨ་མ་དེ་ཟུར་བཀག་འོག་བཞག་སྟེ་བརྟག་དཔྱད་བྱེད་སྐབས། ཏོག་དབྱིབས་གཉན་རིམས་ནད་རྟགས་ཐོན་པ་རེད། ཉིན་གྲངས་ ༡༤ དེའི་རིང་ལ་ཨ་མ་ལགས་དེས་རྒན་འཁོགས་མང་པོར་གཡོག་རྒྱུག་གནང་ཡོད་སྟབས་རྒན་འཁོགས་མང་པོ་ཞིག་ལ་ན་ཚ་འགོས་པ་རེད། ཅེས་བརྗོད་བྱུང་།

དེ་མིན་ཁོང་ལ་ད་ལྟའི་ཆར་ལ་དྭགས་བོད་མིའི་གཞིས་ཆགས་ཁག་གི་ནང་ཏོག་དབྱིབས་གཉན་རིམས་ཀྱི་གནས་སྟངས་ག་འདྲ་ཡིན་དྲིས་པར་ཁོང་གིས། དེ་སྔོན་ལ་དྭགས་བོད་མིའི་གཞིས་ཆགས་ཁག་ནང་བོད་མི་ཏོག་ནད་ཅན་གསུམ་ཙམ་ཡོད་པ་དང་། དེ་དག་རིམ་ཀྱིས་དྲག་སྐྱེད་བྱུང་གི་ཡོད་པ་དང་། སྤྱི་ཡོངས་ནས་ཏོག་ནད་ཁྱབ་ཚད་དམའ་བོ་ཡིན་ན་ཡང་། ཐེངས་འདིར་ཡིད་གཟབ་མ་བྱས་པས་རྒན་གསོ་ཁང་གི་རྒན་འཁོགས་མང་པོ་ཞིག་ལ་ཏོག་ནད་འགོས་ཁྱབ་ཕྱིན་པ་ཡིན་སྐོར་བརྗོད་བྱུང་།

གནས་ཚུལ་དེ་དང་འབྲེལ་དེ་རིང་སྔ་དྲོར་དྲ་ལམ་ཁག་ཏུ་བོད་མིའི་གཞིས་ཆགས་ཤིག་ནང་ཏོག་ནད་ཁྱབ་གདལ་ཕྱིན་སྐོར་གྱི་སྒྲ་སྒམ་ཞིག་ཁྱབ་བཞིན་པའི་ནང་། བོད་པའི་གཞིས་ཆགས་ཤིག་གི་རྒན་གསོ་ཁང་ནང་ཏོག་ནད་ཁྱབ་གདལ་ཕྱིན་ཡོད་སྟབས། ནམ་རྒྱུན་རྒན་གསོ་ཁང་དུ་ཞལ་ལག་དང་ཟས་རིགས་ཀྱི་སྦྱིན་བདག་བྱེད་མཁན་མང་པོ་ཡོང་གི་ཡོད་པས། ཟས་སྦྱིན་དང་དངུལ་དངོས་ཀྱི་སྦྱིན་བདག་བྱེད་མཁན་ཚོས་ཅ་དངོས་རིགས་རྒན་གསོ་ཁང་གི་གཉེར་བ་ལ་སྤྲོད་པ་ལས། རྒན་གསོ་ཁང་དུ་ཕྱི་མི་མི་ཡོང་བའི་འབོད་སྐུལ་སོགས་བྱེད་ཀྱི་འདུགདེ་རིང་གི་བོད་མིའི་སྒྲིག་འཛུགས་ཀྱི་ཝུ་ཧན་ཏོག་དབྱིབས་གཉན་རིམས་ཛ་དྲག་ངལ་སེལ་ཚོགས་ཆུང་གི་གྲངས་ཐོ་ལྟར་ན། རྒྱ་བལ་འབྲུག་གསུམ་གྱི་བོད་མིའི་ནང་ཁྱོན་ཏོག་དབྱིབས་གཉན་རིམས་ནད་པ་ ༡༡༤ ཡི་ཁྲོད་ནས་དྲག་སྐྱེད་བྱུང་བ་ ༧༧ དང་། ན་བཞིན་པ་ ༣༤། འདས་གྲོངས་སུ་ཕྱིན་པ་ ༣ བྱུང་ཡོད་པ་དང་། དེ་མིན་གྱི་ཕྱི་རྒྱལ་ཁག་ནས་བོད་མི་ཁྱོན་ ༢༡༣ ལ་ནད་རྟགས་ཐོན་པའི་ཁྲོད་ནས་ ༡༦༥ དྲག་སྐྱེད་བྱུང་བ་དང་། མི་ ༣༩ ན་བཞིན་པ་དང་། མི་ ༩ འདས་གྲོངས་སུ་ཕྱིན་ཡོད་འདུག

གསར་འགོད་པ། སྐལ་བཟང་སྦྱིན་པ།

The post ལ་དྭགས་ཀྱི་བོད་མི་རྒན་འཁོགས་ ༣༠ ལ་ཏོག་དབྱིབས་ནད་རྟགས་ཐོན་འདུག appeared first on བོད་ཀྱི་དུས་བབ།.

འདི་ལོའི་ཨ་རིའི་སྲིད་འཛིན་འོས་བསྡུ་ཆེན་མོ་དེ་ཉིད་འཆར་ལ་ཉེ་བའི་ཕྱི་ཟླ་ ༡༡ ཚེས་ ༣ ཉིན་གནང་གཏན་འཁེལ་བ་ལྟར། ད་ལྟའི་ཆར་དམངས་གཙོ་ཚོགས་པའི་སྔོན་འགྲོའི་འོས་མི་འདེམས་སྒྲུག་གི་ལས་རིམ་ཡོངས་སུ་མཇུག་བསྒྲིལ་ཏེ། ཉེ་ཆར་ཟླ་འདིའི་ཕྱི་ཚེས་ ༡༧ ནས་ ༢༠ བར་གྱི་དམངས་གཙོ་ཚོགས་པའི་སྲིད་འཛིན་འོས་བསྡུའི་རྒྱས་འཛོམས་ཚོགས་འདུའི་ (Democratic National Convention) སྟེང་། ཨ་རིའི་གྲོས་ཚོགས་གོང་མའི་འཐུས་མི་དང་། ཨོ་བྷོ་མའི་དུས་སྐབས་ཀྱི་སྲིད་འཛིན་གཞོན་པ་ཇོ་བྷའེ་ཌེན་ (Joe Biden) གཞུང་འབྲེལ་སྒོས་དམངས་གཙོ་ཚོགས་པའི་སྲིད་འཛིན་འོས་མིར་བསླངས་ཡོད་ཅིང་། གྲོས་ཚོགས་གོང་མའི་འཐུས་མི་དང་འདི་ལོའི་དམངས་གཙོ་ཚོགས་པའི་སྲིད་འཛིན་འོས་མིར་ལངས་པའི་ཀ་མ་ལ་ཧ་རི་སི་ (Kamala Harris) སྲིད་འཛིན་གཞོན་པར་མིང་འདོན་བྱས་ཡོད་པ་རེད། དེ་བཞིན་སྤྱི་མཐུན་ཚོགས་པའི་གཞུང་འབྲེལ་སྲིད་འཛིན་འོས་མི་ཊོམ་ཕུ་དང་། ད་ལྟའི་སྲིད་འཛིན་གཞོན་པ་མེག་པེན་སི་བསྐྱར་དུ་སྲིད་འཛིན་གཞོན་པར་མིང་འདོན་བྱས་ཡོད་པ་རེད།

སྤྱིར་འདི་ལོའི་ཨ་རིའི་སྲིད་འཛིན་འོས་བསྡུ་དེ་དཔལ་འབྱོར་དང་། སྤྱི་དམངས་འཕྲོད་བསྟེན། སྨན་བཅོས་སྲིད་བྱུས། རྒྱལ་སྲུང་བདེ་འཇགས་སོགས་ཀྱི་གནད་དོན་ཐོག་འཁོར་བཞིན་པའི་སྐབས་དེར། རྒྱ་ནག་ཝུ་ཧན་ནས་མཆེད་པའི་ཏོག་དབྱིབས་ནད་ཡམས་དང་། འདི་ལོའི་ཕྱི་ཟླ་ ༧ པའི་ནང་མཆེད་པའི་ཨ་རིའི་ནང་གི་མི་རིགས་ནག་པོའི་འཐབ་རྩོད་ལས་འགུལ་གཉིས་ཀྱིས་འོས་བསྡུའི་ཁ་ཕྱོགས་ལ་འགྱུར་བ་ཆེན་པོ་ཐེབས་བཅུག་ཡོད་པ་རེད། དེ་བཞིན་དབྱེ་ཞིབ་པ་ཚོས་ནད་ཡམས་འདིས་ཨ་རིའི་དཔལ་འབྱོར་ལ་དོ་ཕོག་ཤུགས་ཆེན་པོ་ཐེབས་ཡོད་སྟབས། དཔལ་འབྱོར་གོང་འཕེལ་གཞི་རྩར་བཟུང་སྟེ་སྲིད་འཛིན་ལས་ཡུན་གཉིས་པའི་འདུར་རྒྱུག་ནང་ཞུགས་པའི་ད་ལྟའི་སྲིད་འཛིན་ཊོམ་ཕུ་ལ་མཚོན་ནའང་། རང་གི་འོས་བསྡུའི་དྲིལ་བསྒྲགས་དང་སྲིད་བྱུས་བཅས་པར་མནོ་བསམ་ཐེངས་གཉིས་པ་མ་བཏང་ཐབས་མེད་ཆགས་ཡོད་པ་རེད། གཤམ་ནས་ལས་ཐོག་སྲིད་འཛིན་ཊོམ་ཕུ་དང་སྲིད་འཛིན་གཞོན་པ་ཟུར་པ་བྷའེ་ཌེན་གཉིས་ཀྱི་དཔལ་འབྱོར་དང་འཕྲོད་བསྟེན། དེ་བཞིན་ཨ་རྒྱའི་འབྲེལ་ལམ་བཅས་པར་ལྟ་ཕྱོགས་དང་སྲིད་བྱུས་ཅི་བཟུང་སྐོར་ངོ་སྤྲོད་ཀྱི་ཚུལ་དུ་བཀོད་ན། 

ཕྱི་འབྲེལ་སྲིད་བྱུས།

སྲིད་འཛིན་ཊོམ་ཕུ་ཡིས་ཕྱི་ལོ་ ༢༠༡༦ ལོའི་འོས་བསྡུའི་སྐབས་ཨ་རི་དེ་ཨང་དང་པོ་འཇོག་རྒྱུའི་འབོད་ཚིག་འོག འདྲ་མཉམ་མིན་པའི་ཚོང་འབྲེལ་མཚམས་འཇོག་དང་། ཨ་རིས་ད་བར་མནའ་འབྲེལ་དམག་དོན་ལས་གཞིའི་ནང་མ་དངུལ་ཕོན་ཆེན་སྦྱིན་ཡོད་པ་ལྟར། མནའ་འབྲེལ་རྒྱལ་ཁབ་གཞན་ཚོས་ཀྱང་དེ་ལྟར་བྱ་དགོས་པའི་བསྒྲགས་གཏམ་སོགས་སྤེལ་ཏེ། འདས་པའི་ལོ་བཞིའི་ནང་ཨ་རི་དང་མནའ་འབྲེལ་རྒྱལ་ཁབ་ཚོའི་བར་གྱི་འབྲེལ་ལམ་དེ་ཇེ་སྡུག་ཏུ་སོང་ཡོད་པ་རེད། བྷའེ་ཌེན་གྱི་དྲིལ་བསྒྲགས་སྐབས་ཊོམ་ཕུ་ཡི་ཨུ་རུ་སུ་དང་། ཨི་རཱན། ཨབ་གྷན། བྱང་ཀོ་རི་ཡ་བཅས་ལ་འཛིན་པའི་ཕྱི་འབྲེལ་སྲིད་བྱུས་མང་དག་ཅིག་ལ་སྐྱོན་བརྗོད་དྲག་པོ་བྱས་ཡོད་ཅིང་། ལྷག་ཏུ་ཊོམ་ཕུ་ཡི་སྲིད་བྱུས་དེ་དག་གིས་ཨ་རིས་རྒྱལ་སྤྱིའི་སྟེང་ཐོབ་པའི་སྣེ་འཁྲིད་ཀྱི་གནས་བབ་དེ་ཤོར་ཡོད་པ་དང་། ཨ་རིའི་མནའ་འབྲེལ་རྒྱལ་ཁབ་ཀྱི་མཉམ་འབྲེལ་དམག་དོན་སྟོབས་ཤུགས་ཀྱང་ཉམས་ཉེས་སུ་སོང་ཡོད་ཚུལ་སྐྱོན་བརྗོད་བྱས་ཡོད་པ་རེད། དེར་བརྟེན་བྷའེ་ཌེན་གྱིས་མ་འོངས་པར་རང་ཉིད་སྲིད་འཛིན་དུ་འཁོད་མཚམས། ཊོམ་ཕུ་ཡི་ཕྱི་འབྲེལ་སྲིད་བྱུས་དེ་དག་རྩིས་མེད་བཏང་སྟེ། ནེ་ཊོ་དམག་དོན་སྒྲིག་འཛུགས་ (NATO) ཀྱི་སྟོབས་ཤུགས་བསྐྱེད་རྒྱུ་ཡིན་སྐོར་བསྒྲགས་ཡོད། དེ་བཞིན་ཕྱི་ལོ་ ༢༠༡༨ ལོར་སྲིད་འཛིན་ཊོམ་ཕུས། ཨ་རི་ཨི་རཱན་གྱི་རྡུལ་ཕྲན་མཚོན་ཆའི་ལས་གཞི་མཚམས་འཇོག་གི་ཆིངས་ཡིག་ (Iran Nuclear Deal) ནས་ཕྱིར་འཐེན་བྱས་ཡོད་པ་དེར། བྷའེ་ཌེན་གྱིས་ཨི་རཱན་དང་ཕྱི་འབྲེལ་གྱི་ལམ་ནས་ཆིངས་ཡིག་ནང་བསྐྱར་ཞུགས་ཡོང་ཐབས་བྱ་རྒྱུ་ཡིན་སྐོར་སོགས་བསྒྲགས་ཏེ། རྒྱལ་སྲུང་བདེ་འཇགས་ནི་ཁོ་པའི་མ་འོངས་འཛིན་སྐྱོང་གི་དམིགས་ཡུལ་གཙོ་བོ་ཞིག་ཡིན་སྐོར་བརྗོད་ཡོད་འདུག

 རྒྱ་ནག

རྒྱ་ནག་དེ་འདི་ལོའི་ཨ་རིའི་སྲིད་འཛིན་འོས་བསྡུ་ཙམ་མ་ཟད། རྒྱལ་སྤྱིའི་ཁྱོན་ཡོངས་ནང་བློ་འཚབ་བྱ་ཡུལ་ཞིག་ཏུ་གྱུར་ཡོད། ཕྱི་ལོ་ ༢༠༡༦ ལོའི་འོས་བསྡུའི་སྐབས་སྲིད་འཛིན་ཊོམ་ཕུ་ཡིས་ཨ་རྒྱའི་ཚོང་འབྲེལ་ཆ་སྙོམས་མེད་པ་དང་། རྒྱ་ནག་གིས་ཨ་རིའི་འཕྲུལ་རིག་ཤེས་བྱ་རྐུ་འཁྱེར་བྱེད་ཀྱིན་པའི་གནད་དོན་ཤུགས་ཆེར་བསླངས་ཏེ། འདས་པའི་ལོ་བཞིའི་རིང་རྒྱ་ནག་གི་ཚོང་ཟོག་ལ་སྒོ་ཁྲལ་སྣོན་མ་འགེལ་ཐབས་དང་། རྒྱ་ནག་གི་བཟོ་ཚོང་ཁང་སྐོར་ཞིག་ཨ་རིའི་ཁྲོམ་ར་ནས་ཕུད་ཐབས་སོགས་བྱས་ཡོད་ལ། རྒྱ་ནག་དེ་ཨ་རིའི་ཚོང་དོན་འགྲན་ཡ་ཙམ་མ་ཟད། ཕུགས་རྒྱང་རིང་པོའི་འཐབ་བྱུས་ཁ་གཏད་ཅིག་ཏུ་ངོས་འཛིན་བྱས་ཡོད་པ་རེད། འདི་ལོ་གཅིག་པུར་མཚོན་ན་ཊོམ་ཕུ་ཡིས་ཨ་རྒྱའི་ཚོང་དོན་གྲོས་མོལ་མཚམས་བཞག་སྟེ། རྒྱ་ནག་ལ་མུ་མཐུད་སྒོ་ཁྲལ་བསྣན་ཡོད་ཅིང་། ད་དུང་སྲིད་འཛིན་ཀྱི་བཀའ་རྒྱ་བསྒྲགས་ཏེ་ཧོང་ཀོང་གི་དམིགས་བསལ་རྒྱལ་སྤྱིའི་ཚོང་དོན་ལྟེ་གནས་ཀྱི་གནས་བབ་ཕྱིར་འཐེན་དང་། རྒྱ་ནག་གི་འཕྲུལ་རིག་བཟོ་ཚོང་ཁང་ཆེ་ཤོས་ ZTE དང་ཧྭ་ཝེ་ (Huawei) སོགས་བཀག་སྡོམ། རྒྱ་ནག་ལ་ཁ་གཏད་ཀྱི་རྒྱལ་སྤྱིའི་མཐུན་ཚོགས་གསར་འཛུགས། ཐའེ་ཝན་དང་འབྲེལ་ལམ་ཤུགས་ཆེར་བཏང་སྟེ་ལྷོ་རྒྱ་ནག་རྒྱ་མཚོའི་ཁུལ་དུ་དམག་དོན་བྱ་འགུལ་ཤུགས་ཆེར་སྤེལ་བ། དེ་བཞིན་ཨ་རིའི་ཧུ་སི་ཊོན་གྲོང་ཁྱེར་དུ་ཡོད་པའི་རྒྱ་ནག་གཞུང་ཚབ་ཁང་སྒོ་བརྒྱབ་ཏུ་བཅུག་ཡོད།

ཊོམ་ཕུས་སྣེ་ཁྲིད་པའི་ཨ་རིའི་འཛིན་སྐྱོང་གིས་དུས་ནས་དུས་སུ་རྒྱ་ནག་ལ་ཁ་གཏད་ཀྱི་སྲིད་བྱུས་མཁྲེགས་པོ་བཟུང་བའི་རྐྱེན་གྱིས། ཨ་རྒྱའི་འབྲེལ་ལམ་དེ་ཆེས་གཉན་འཕྲང་ཅན་གྱི་གནས་སྟངས་ནང་ལྷུང་ཡོད། གལ་ཏེ་ཊོམ་ཕུ་སྲིད་འཛིན་དུ་བསྐྱར་འདེམས་བྱུང་ཚེ། ཁོ་པས་མུ་མཐུད་རྒྱ་ནག་ལ་ཁ་གཏད་གཅོག་ངེས་ཡིན། སྤྱིར་ཨོ་བྷ་མའི་དུས་སྐབས་སུ་ཨ་རིས་རྒྱ་ནག་ལ་ད་ཐེངས་ལྟ་བུའི་སྲིད་བྱུས་མཁྲེགས་པོ་བཟུང་མེད་ཀྱང་། ད་ལྟ་རྒྱལ་སྤྱིའི་ཁྱོན་ཡོངས་སུ་རྒྱ་ནག་ལ་ངོ་རྒོལ་དང་ཁ་གཏད་ཀྱི་རྦ་རླབས་འཕྱུར་བཞིན་པའི་སྐབས་དང་། ལྷག་ཏུ་ཨ་རིའི་ནང་ཏོག་དབྱིབས་ནད་ཡམས་ཀྱི་རྐྱེན་པས་ཨ་རིའི་མང་ཚོགས་ཀྱིས་རྒྱ་ནག་ལ་ལྟ་སྟངས་ཇེ་སྡུག་ཏུ་སོང་ཡོད་སྟབས། རྒྱ་ནག་གི་དྲང་བདེན་མིན་པའི་ཚོང་འབྲེལ་ལ་ཁ་གཏད་ཆེད། མནའ་འབྲེལ་རྒྱལ་ཁབ་དག་དང་ལག་རྡང་སྦྲེལ་ནས་ཊོམ་ཕུ་ལས་ཀྱང་ཐབས་བྱུས་བཟང་བ་གཏིང་རྒྱུ་ཡིན་སྐོར་བརྗོད་འདུག ཡིན་ན་ཡང་། ཨ་རིའི་འཛད་སྤྱོད་པ་དང་ཞིང་པར་གནོད་འཚེ་ཆེན་པོ་ཕོག་ཡོད་སྐོར་བསྙད་དེ། ཊོམ་ཕུ་ཡིས་རྒྱ་ནག་ཐོག་བཀལ་བའི་སྒོ་ཁྲལ་རིགས་ཕྱིར་འཐེན་བྱ་རྒྱུ་ཡིན་སྐོར་བསྒྲགས་འདུག

དཔལ་འབྱོར་སྲིད་བྱུས།

ཊོམ་ཕུ་ཡིས་ནད་ཡམས་ཀྱི་ཛ་དྲག་གནས་སྟངས་ལ་མ་ལྟོས་པར་རྒྱལ་ཡོངས་ཀྱི་ཚོང་དོན་བྱ་འགུལ་གང་མགྱོགས་སྒོ་འབྱེད་དགོས་པའི་ལམ་སྟོན་བྱས་ཡོད་ཅིང་། དཔལ་འབྱོར་བསྐྱར་གསོ་ཡོང་ཆེད་གཞུང་རང་ནས་དུས་གཅིག་ཏུ། ཚོང་དོན་ཚན་པ་དང་། མི་སྒེར། ས་གནས་སྲིད་གཞུང་བཅས་ལ་མ་དངུལ་ཨ་སྒོར་ཐེར་འབུམ་མང་པོ་འགྲེམ་འཇོག་བྱས་ཡོད། གཞན་ཡང་ལས་མི་གླ་དངུལ་ནས་དཔྱ་ཁྲལ་ཉུང་འཁྲི་ལ་སོགས་པའི་རོགས་དངུལ་བགོ་འགྲེམ་ལས་གཞི་ཤུགས་ཆེར་སྤེལ་ཡོད་པ་རེད། ཇོ་བྷའེ་ཌེན་ལ་མཚོན་ན། ཁོའི་སྲིད་གཞུང་གིས་ཐོན་ཁུངས་གཙང་བའི་གློག་ནུས་ཚན་པ་དང་། བཟོ་སྐྲུན་ཚན་པ། དེ་བཞིན་བདེ་དོན་ཚན་པ་བཅས་ལ་མ་དངུལ་ཕོན་ཆེན་བཏང་སྟེ་ལས་ཀ་གསར་པ་སྐྲུན་ཐབས་བྱ་རྒྱུ་དང་། ཊོམ་ཕུས་ཕྱི་ལོ་ ༢༠༡༧ ལོར་ཕྱུག་བདག་དང་བཟོ་གྲྭ་ཆེ་ཁག་གི་ཚོང་ཁྲལ་གཅོག་རྒྱུའི་སྲིད་བྱུས་དེ་རྩིས་མེད་བཏང་སྟེ། དེ་ལས་ལྡོག་སྟེ་ཚོང་ཁྲལ་སྤར་རྒྱུ་ཡིན་སྐོར་བརྗོད་ཡོད་ལ། ཨ་རིའི་ད་ཡོད་ཀྱི་རྒྱལ་ཡོངས་ཀྱི་ཉུང་མཐའི་ཕོགས་དངུལ་ཆུ་ཚོད་རེར་ཨ་སྒོར་ ༧།༢༥ དེ་ ༡༥ ལ་སྤར་རྒྱུའི་ཁས་ལེན་བྱས་ཡོད་འདུག གཞན་ཡང་ཊོམ་ཕུ་དང་བྷའེ་ཌེན་གཉིས་ཀས་རྒྱལ་ནང་གི་ཐོན་སྐྱེད་གོང་འཕེལ་ཐད་ཤུགས་སྣོན་བརྒྱབ་རྒྱུ་ཡིན་སྐོར་བརྗོད་ཡོད་ཅིང་། ལྷག་ཏུ་བྷའེ་ཌེན་གྱིས་དེའི་ཆེད་དུ་ཨ་སྒོར་ཐེར་འབུམ་ ༧༠༠ ལྷག་གཏོང་རྒྱུ་ཡིན་སྐོར་བརྗོད་ཡོད་འདུག དེ་བཞིན་ཨ་རྒྱའི་ཚོང་དམག་དང་འབྲེལ་ཊོམ་ཕུས་ཕྱོགས་གཉིས་ཀྱི་ཚོང་འབྲེལ་ཆ་སྙོམས་དང་། ཨ་རིའི་བཟོ་ཚོང་ཁང་ཁག་ལ་གྱོང་གུད་མི་ཐེབས་རྒྱུའི་ཆེད་ཡིན་ཡང་། བྷའེ་ཌེན་གྱིས་ཊོམ་ཕུའི་སྲིད་བྱུས་དེས་ཨ་རིའི་འཛད་སྤྱོད་པ་དང་ཞིང་པ་ཚོར་གྱོང་གུད་ཆེན་པོ་ཐེབས་ཡོད་སྐོར་སྐྱོན་བརྗོད་བྱེད་ཀྱི་ཡོད་པ་རེད།

 གཞིས་སྤོའི་སྲིད་བྱུས།

ཕྱི་ལོ་ ༢༠༡༦ ལོའི་སྲིད་འཛིན་འོས་བསྡུའི་དྲིལ་བསྒྲགས་སྐབས་ཊོམ་ཕུ་ཡིས་རྒྱལ་ཡོངས་ཀྱི་ལས་ཀ་སྲུང་སྐྱོབ་དང་རྒྱལ་སྲུང་བདེ་འཇགས་ཆེད། ཕྱི་མི་ཨ་རིར་སྐྱབས་བཅོལ་ཞུ་ཕྱོགས་ཐད་ཚད་བཀག་དང་ཁ་ཆེ་རྒྱལ་ཁབ་ཀྱི་མི་སེར་རྣམས་ཨ་རིར་སླེབས་རྒྱུ་བཀག་སྡོམ་བྱ་རྒྱུ་ཡིན་སྐོར་བསྒྲགས་ཡོད་ལ། ད་ལྟ་མུ་མཐུད་སྲིད་བྱུས་དེ་ལག་བསྟར་བྱེད་མུས་རེད། ཡིན་ན་ཡང་། བྷའེ་ཌེན་གྱིས་རང་ཉིད་སྲིད་འཛིན་དུ་བདམས་ཐོན་བྱུང་ནས་ཉིན་བརྒྱའི་ནང་ཚུད་ལ། ཊོམ་ཕུ་ཡིས་གཏན་འབེབ་ལག་བསྟར་བྱས་པའི་གཞིས་སྤོས་སྲིད་བྱུས་དེ་དག་རྩིས་མེད་བཏང་སྟེ། ཨ་རི་དང་མེག་སི་ཁོའི་ས་མཚམས་གུ་ཡངས་དང་། དེ་བཞིན་ཨ་རིའི་ནང་སྐྱབས་བཅོལ་ཞུ་རྒྱུའི་མིའི་གྲངས་ཚད་ལ་ཚད་བཀག་མེད་པར་བཟོ་རྒྱུ། གཞན་ཡང་ཊོམ་ཕུ་ཡིས་ཕྱི་ལོ་ ༢༠༡༧ ལོར་དངོས་སུ་ལག་བསྟར་བྱས་པའི་ཁ་ཆེ་རྒྱལ་ཁབ་མི་ཉུང་བའི་མི་སེར་རྣམས་ཨ་རིར་ཡོང་རྒྱུ་བཀག་སྡོམ་གྱི་སྲིད་བྱུས་དེ་རྩིས་མེད་གཏང་རྒྱུ་ཡིན་སྐོར་བསྒྲགས་ཡོད་པ་རེད། གཞན་ཡང་བྷའེ་ཌེན་གྱིས་སྲིད་འཛིན་ཊོམ་ཕུ་ཡིས་མེག་སི་ཁོ་དང་ཨ་རིའི་ས་མཚམས་སུ་བསླངས་ཟིན་པའི་རྩིག་གྱང་རྣམས་རང་སོར་བཞག་སྟེ། གསར་དུ་བརྩིག་རྒྱུ་མཚམས་འཇོག་བྱ་རྒྱུ་ཡིན་སྐོར་བརྗོད་ཡོད་འདུག

སྨན་བཅོས་སྲིད་བྱུས།

སྤྱིར་ཨ་རིའི་ནང་སྤྱི་དམངས་འཕྲོད་བསྟེན་སྨན་བཅོས་ཚན་པ་དེ་མང་ཚོགས་ཀྱི་དོ་འཁུར་བྱ་སའི་གནད་དོན་གལ་ཆེན་ཞིག་ཡིན་པའི་ཐོག འདི་ལོའི་ནད་ཡམས་ཀྱི་རྐྱེན་པས་གནད་དོན་དེ་སྔར་བས་ཚ་ཚ་འུར་འུར་དུ་གླེང་སློང་བྱེད་ཀྱིན་ཡོད་ལ། དེའི་ཐད་ཊོམ་ཕུ་དང་བྷའེ་ཌེན་གཉིས་ཀྱི་ལྟ་ཕྱོགས་ཀྱང་ཧ་ཅང་མི་མཐུན་པ་ཞིག་རེད། བྷའེ་ཌེན་གྱིས་ཨ་རིའི་མི་མང་ཡོངས་ལ་རིན་མེད་ཐོག་ནད་ཡམས་འགོས་ཡོད་མེད་བརྟག་དཔྱད་བྱ་རྒྱུ་དང་། དེ་བཞིན་ནད་པ་རྗེས་འདེད་ཀྱི་བྱ་འགུལ་ཆེད་མི་གྲངས་འབུམ་ ༡ གསར་དུ་གླ་རྒྱུ་སོགས་པའི་འཆར་གཞི་འཐེན་ཡོད་པ་རེད། སྤྱི་ཡོངས་ནས་བྷའེ་ཌེན་གྱིས་ཨ་རིའི་ཕྱུག་བདག་དང་བཟོ་ཚོང་ཁག་ཆེ་ཁག་ལ་ཚོང་ཁྲལ་བསྣན་ཏེ། དེའི་མ་དངུལ་གྱིས་རང་ཉིད་སྲིད་འཛིན་གཞོན་པའི་དུས་སྐབས་སུ་གཏན་འབེབ་བྱས་པའི་ཨོ་བྷ་མ་སྨན་བཅས་ལྟོ་སྐྱོང་ལས་གཞི་ (Obamacare) དེ་ཉིད་ཚགས་ཚུད་དུ་གཏོང་ཐབས་བྱ་རྒྱུ་དང་། འབྱུང་འགྱུར་ལོ་བཅུའི་ནང་དེའི་ཆེད་ཨ་སྒོར་ཐེར་འབུམ་ ༧༥༠ གཏང་རྒྱུའི་ཁས་བླངས་ཡོད། དེ་བཞིན་ཨ་རིའི་ནང་སྨན་རྫས་ཀྱི་རིན་གོང་མར་གཅོག་རྒྱུ་དང་། གཞན་ཡང་སྨན་བཅོས་ལྟ་སྐྱོང་གི་ལོ་ཚད་དེ་ ༦༥ ནས་ ༦༠ ལ་མར་གཅོག་རྒྱུའི་ཁས་ལེན་བྱས་ཡོད་པ་རེད། ཊོམ་ཕུ་ལྟ་བུར་མཚོན་ན་ཕྱི་ལོ་ ༢༠༡༦ ནས་བཟུང་ཨོ་བྷ་མ་སྨན་བཅོས་ལྟ་སྐྱོང་ལ་སྐྱོན་བརྗོད་ཤུགས་ཆེན་པོ་བྱེད་མཁན་ཞིག་ཡིན་ལ། སྤྱི་མཐུན་ཚོགས་པས་གྲོས་ཚོགས་བརྒྱུད་སྨན་བཅོས་ལྟ་སྐྱོང་ལས་གཞི་དེ་རྩིས་མེད་གཏོང་ཐབས་བྱས་ཡོད་ཀྱང་ལམ་ལྷོངས་བྱུང་མེད། ད་ལྟ་སྲིད་འཛིན་ཊོམ་ཕུ་ཡིས་ཨོ་བྷ་མ་སྨན་བཅོས་ལྟ་སྐྱོང་ལས་གཞི་ལས་རིན་གོང་ཆུང་ཞིང་ལེགས་པའི་སྨན་བཅོས་ལྟ་སྐྱོང་ལས་གཞི་ཞིག་སྤེལ་རྒྱུའི་ཁས་ལེན་བྱས་ཡོད་པ་རེད།

གོ་ལའི་གནམ་གཤིས་འགྱུར་ལྡོག

འདས་ལོའི་ཨོ་གླིང་གི་མེ་སྐྱོན་དོན་རྐྱེན་སོགས་ཀྱིས་རྒྱལ་སྤྱིའི་སྤྱི་ཚོགས་ནང་གོ་ལའི་ཚ་དྲོད་དང་འབྲེལ་བའི་གནད་དོན་མང་པོར་དོ་སྣང་ཤུགས་ཆེན་པོ་སླེབས་ཡོད་ཅིང་། ཨ་རིར་མཚོན་ནའང་འོས་བསྡུ་ནམ་ཡིན་ལ་ཅུང་གུ་ཡངས་ཀྱི་ལྟ་ཕྱོགས་འཛིན་པའི་དམངས་གཙོ་ཚོགས་པས་གོ་ལའི་ཚ་དྲོད་ཀྱི་གནད་དོན་དེ་གཙིགས་ཆེར་བཟུང་སྟེ། འོས་བསྡུའི་སྐབས་དེའི་ཐད་ལངས་ཕྱོགས་དང་སྲིད་བྱུས་བརྟན་པོ་འདོན་གྱི་ཡོད་པ་ལྟར། འདི་ལོར་བྷའེ་ཌེན་གྱིས་འཆར་ལོ་བཞིའི་ནང་ཨ་སྒོར་ཐེར་འབུམ་ ༢༠༠༠ གཏང་སྟེ། ཕྱི་ལོ་ ༢༠༣༥ བར་ཨ་རིའི་རྒྱལ་ཡོངས་ཀྱི་གློག་བརྒྱ་ཆ་ ༡༠༠ ཐམ་པ་ཐོན་ཁུངས་གཙང་མའི་གློག་ནུས་སུ་འགྱུར་ཐུབ་པ་བྱ་རྒྱུ་དང་། དེ་བཞིན་གཞུང་ནས་དུག་རླངས་མི་འདོན་པའི་འགྲིམ་འགྲུལ་རླངས་འཁོར་བཟོ་སྐྲུན་ཚན་པར་རོགས་སྐྱོར་ལས་གཞི་སྤེལ་རྒྱུ། གཞན་ཡང་ཕྱི་ལོ་ ༢༠༡༥ ལོར་བཞག་པའི་པེ་རི་སི་གནམ་གཤིས་སྤྱི་ཆིངས་ཀྱི་དམིགས་ཚད་འགྲུབ་ཆེད། ཨ་རི་དེ་བསྐྱར་དུ་གོ་ལའི་གནམ་གཤིས་འགྱུར་ལྡོག་གི་ཐད་མགོ་འཁྲིད་ཀྱི་ནུས་པ་འདོན་ཐབས་བྱ་རྒྱུ་ཡིན་འདུག ཡིན་ན་ཡང་། ཊོམ་ཕུ་ལ་མཚོན་ན། འདི་ལོའི་སྲིད་བྱུས་བསྒྲགས་གཏམ་ནང་གོ་ལའི་གནམ་གཤིས་སྐོར་དམིགས་བསལ་སྲིད་བྱུས་མེད་ཅིང་། ལྷག་པར་དུ་ཨོ་བྷ་མའི་སྐབས་སུ་བཞག་པའི་པེ་རི་སི་གནམ་གཤིས་སྤྱི་ཆིངས་དེས་ཨ་རིའི་བཟོ་གྲྭ་ཁག་ལ་གྱོང་གུད་ཆེན་པོ་ཕོག་ཡོད་སྐོར་བརྗོད་དེ། སྤྱི་ཆིངས་དེ་ནས་ཕྱིར་ཐོན་ཟིན།ཉེ་ཆར་ཨ་རིའི་ཨེན་བྷི་སི་ (NBC) གསར་ཁང་། ཝོལ་སི་ཀྲི་ཏི་གསར་ཁང་ (WSJ) གིས་ཚོད་དཔག་བསམ་ཤོག་བསྡུས་པའི་གྲུབ་དོན་ལྟར་ན། ཨ་རིའི་མི་མང་གིས་ཆེས་དོ་འཁུར་བྱ་སའི་གནད་དོན་ནི་དཔལ་འབྱོར་དང་། རྒྱལ་ཁབ་གཅིག་སྒྲིལ། མགོ་འཁྲིད་འཇོན་ནུས་ཅན། འཕྲོད་བསྟེན་སྨན་བཅོས། ཏོག་དབྱིབས་ནད་ཡམས་བཅས་ཡིན་འདུག་པ་དང་། དེ་དག་ཁྲོད་ནས་གནད་དོན་ཕལ་ཆེ་བའི་ཐད་མི་མང་གིས་ཇོ་བྷའེ་ཌེན་ལ་ཡིད་ཆེས་བྱེད་ཀྱི་འདུག་ཀྱང་། དཔལ་འབྱོར་ཐད་ཊོམ་ཕུ་ལ་རྒྱབ་སྐྱོར་ཤུགས་ཆེ་བ་བྱེད་ཀྱི་ཡོད་འདུག དེ་བཞིན་སི་ཨེན་ཨེན་གསར་ཁང་གི་དྲ་རྒྱར་བཏོན་པའི་འོས་བསྡུའི་ཚོད་དཔག་བསམ་ཤོག་ཁག་མི་འདྲ་བ་ལྔའི་ནང་། ཊོམ་ཕུ་ལས་ཇོ་བྷའེ་ཌེན་ལ་སྲིད་འཛིན་འོས་བསྡུ་འཐོབ་རྒྱུའི་བརྒྱ་ཆ་མང་བ་ཡོད་འདུག དབྱེ་ཞིབ་པ་མི་ཉུང་བས་ཕྱི་ལོ་ ༢༠༡༦ ལོར་ཊོམ་ཕུ་ཡི་འགྲན་ཡ་ཧེ་ལ་རེ་ཁི་ལིན་ཊོན་ (Hillary Clinton) ལ་ཊོམ་ཕུ་ལས་རྒྱལ་ཡོངས་ཀྱི་འོས་ཤོག་མང་བ་ཐོབ་ཡོད་ཀྱང་། ཊོམ་ཕུ་ལ་མངའ་སྡེའི་འོས་བསྡུའི་ལྷན་རྒྱས་ (electoral college) མང་བ་ཐོབ་པའི་རྐྱེན་གྱིས་སྲིད་འཛིན་དུ་བདམས་ཐོན་བྱུང་བ་ལྟར། འདི་ལོ་ཡང་ཊོམ་ཕུ་ཡིས་ཕྱོགས་སུ་མ་ལྷུང་བའི་མངའ་སྡེ་ (swing state) སྐོར་ཞིག་རང་ཕྱོགས་སུ་བཀུག་སྟེ། བསྐྱར་དུ་སྲིད་འཛིན་གྱི་རྒྱལ་ཁ་འཐོབ་མ་སྲིད་པ་མིན་སྐོར་རྗོད་ཀྱིན་འདུག

པ་སངས་ཚེ་རིང་གིས་བསྡུ་སྒྲིག་བྱས།

The post ཨ་རིའི་སྲིད་འཛིན་འོས་བསྡུ་ཆེན་མོ། appeared first on བོད་ཀྱི་དུས་བབ།.

བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེ་ཀརྨ་ཆོས་དབྱངས་ལགས་མགྲིན་ཚབ་པར་བསྐོ་བཞག་གནང་འདུགདེ་རིང་བོད་མིའི་སྒྲིག་འཛུགས་དབྱིན་ཡིག་དྲ་རྒྱར་བཀོད་པའི་གནས་ཚུལ་ལྟར་ན། བོད་མིའི་སྒྲིག་འཛུགས་ཀྱི་དྲིལ་བསྒྲགས་དྲུང་ཆེ་ཀརྨ་ཆོས་དབྱངས་ལགས། བོད་མིའི་སྒྲིག་འཛུགས་ཀྱི་མགྲིན་ཚབ་པར་བསྐོ་བཞག་གནང་ཡོད་པ་དང་། ཀརྨ་ཆོས་དབྱངས་ལགས་ཀྱིས་འདི་གའི་གསར་འགོད་པར་མགྲིན་ཚབ་པས་ལས་འགན་གཙོ་བོ་གསར་ལམ་ཁག་ལ་བོད་ཀྱི་སྒྲིག་འཛུགས་དང་འབྲེལ་བའི་གནད་དོན་ཁག་ལ་ལན་འདེབས། བཀའ་ཤག་གིས་བཀོད་ཁྱབ་ག་རེ་གནང་བ་ཁག་ལ་འགན་འཁུར་རྒྱུ་ཡིན་སྐོར་གསུངས་སོང་།

འདི་གའི་གསར་འགོད་པས་དྲུང་ཆེ་ཀརྨ་ཆོས་དབྱིངས་ལགས་སུ་བོད་མིའི་སྒྲིག་འཛུགས་ཀྱི་མགྲིན་ཚབ་པའི་ལས་དོན་གཙོ་ཆེ་ཤོས་ག་རེ་ཡིན་དྲིས་པར་ཁོང་གིས། མགྲིན་ཚབ་པས་ལས་དོན་གཙོ་བོ་གསར་འགྱུར་བརྒྱུད་ལམ་ཁག་གི་བཅར་འདྲི་དང་ལེན་དང་། བཀའ་ཤག་ནས་བཀོད་ཁྱབ་གནང་བ་ལྟར་བོད་མིའི་སྒྲིག་འཛུགས་ཀྱི་ལས་དོན་ཁག་གི་ཐད་མགྲིན་ཚབ་པས་ལན་འདེབས་དགོས་པ་ཁག་ལ་འགན་ལེན་རྒྱུ་བཅས་ཡིན་པ་དང་། བོད་མིའི་སྒྲིག་འཛུགས་ཀྱི་མགྲིན་ཚབ་པ་དེ་ཕྱི་དྲིལ་ལས་ཁུངས་ལ་དྲུང་ཆེ་གཉིས་ཡོད་པ་ལས་གཅིག་གིས་གནང་དགོས་པའི་ལམ་སྲོལ་ཡོད་སྟབས། བསྐོ་བཞག་གནང་བ་ཞིག་ཡིན་སྐོར་གསུངས་བྱུང་།

ཡང་མགྲིན་ཚབ་པའི་ལས་དོན་དེ་རྒྱལ་ཁབ་དང་ཚོགས་སྡེ་ག་འདྲ་ཞིག་ལ་མཚོན་ནའང་གལ་གནད་ཆེན་པོ་ཆགས་ཡོད་སྟབས། མ་འོངས་པར་ལས་དོན་བྱེད་ཕྱོགས་ཐད་འཆར་གཞི་སོགས་ག་འདྲ་ཡོད་སྐོར་དྲིས་པར་ཁོང་གིས། ང་རང་ལ་མཚོན་ན་ཕྱི་ལོ་ ༡༩༩༦ ལོ་ནས་བོད་མིའི་སྒྲིག་འཛུགས་ནང་ཞབས་ཕྱི་ཞུས་ཏེ་ཡོང་བ་དང་། ད་ལྟའི་ཆར་མགྲིན་ཚབ་པ་གཅིག་པུའི་ལས་ཀ་མིན་པར་ཕྱི་དྲིལ་དྲུང་ཆེའི་འགན་འཁུར་ཡོད་པས། མ་འོངས་པར་བཀའ་ཤག་གིས་ལས་དོན་ག་རེ་བསྐུལ་བ་ཡིན་ན་ལས་རྒྱུ་ལས། གཞན་ཟུར་དུ་ལས་དོན་དང་འཆར་གཞི་དམིགས་བསལ་བ་གང་ཡང་མེད་སྐོར་གསུངས་བྱུང་།

ཀརྨ་ཆོས་དབྱངས་ལགས་ནི་ལ་དྭགས་བོད་མིའི་གཞིས་ཆགས་ནང་སྐྱེས་ཤིང་། ལ་དྭགས་བོད་ཁྱིམ་དང་དྷ་སྟེང་བོད་ཁྱིམ་ནས་འཛིན་གྲྭ་བཅུ་གཉིས་སློབ་མཐར་ཕྱིན་རྗེས། ཕྱི་ལོ་ ༡༩༩༦ ལོར་རྒྱ་གར་རྒྱལ་ས་ལྡི་ལི་གཙུག་ལག་སློབ་གཉེར་ཁང་དུ་ཚོང་ལས་ཐོག་སློབ་མཐར་སོན་ཡོད་པ་དང་། ཕྱི་ལོ་ ༡༩༩༦ ལོ་ནས་བོད་མིའི་སྒྲིག་འཛུགས་ནང་ཕྱག་ལས་གནང་མགོ་ཚུགས་ཏེ། ནང་སྲིད་ཁྱབ་ཁོངས་དྷེ་ར་ལྡུན་བདེ་སྐྱིད་གླིང་དང་ཧུན་སོར་རབ་རྒྱས་གླིང་གཞིས་ཆགས་ཀྱི་ལས་དྲུང་དང་། དེའི་རྗེས་ཀ་ལོན་པོང་དང་དར་རྒྱས་གླིང་གཞིས་ཆགས་ཀྱི་ས་གནས་མགོ་འཛིན་དང་། ལྡི་ལིའི་སྐུ་ཚབ་དོན་གཅོད་དང་བྷེལ་རྗམ་རྒྱལ་ས་སྤིར་ཛིལ་དོན་གཅོད་ཀྱི་དྲུང་ཆེའི་ལས་འགན་འཁུར་ཡོད་པ་དང་། ཕྱི་ལོ་ ༢༠༠༧ ལོར་ཨ་རིའི་སན་ཧྥི་རན་སི་ཁོ་གཙུག་ལག་སློབ་གཉེར་ཁང་དུ་ལོ་གཅིག་རིང་སློབ་གཉེར་བྱས་རྗེས། མུ་མཐུད་བོད་མིའི་སྒྲིག་འཛུགས་ནང་སྲིད་དྲུང་འཕར་དང་དྲིལ་བསྒྲགས་དྲུང་ཆེ་སོགས་འདས་པའི་ལོ་ངོ་ ༢༤ རིང་བོད་མིའི་སྒྲིག་འཛུགས་ནང་ཞབས་ཕྱི་ཞུས་ཡོད་འདུག

མཆན། པར་རིས་བོད་མིའི་སྒྲིག་འཛུགས་དྲ་རྒྱ་ནས་བླངས།

གསར་འགོད་པ། སངས་རྒྱས་དཀོན་མཆོག

The post བོད་མིའི་སྒྲིག་འཛུགས་ཀྱི་མགྲིན་ཚབ་པ་གསར་པ་བསྐོས། appeared first on བོད་ཀྱི་དུས་བབ།.