རྒྱ་ནག་ཧྲིན་ཀྲིན་གྲོང་འཁྱེར་གྱི་བཟོ་ལས་ཁང་ཞིག་གིས་ཀུ་ཤུ་ཁ་པར་རྫུན་མ་གྲངས་ ༥༠༠ ཙམ་བཟོ་སྐྲུན་བྱས་པ་ཤེས་རྟོགས་བྱུང་སྟེ་དོགས་ཡོད་མི་སྣ་ཞིག་འཛིན་བཟུང་བྱས།ཧྲིན་ཀྲིན་གྲོང་ཁྱེར་ཉེན་རྟོག་པས་བརྗོད་པ་ལྟར་ན། འདི་ལོའི་ཕྱི་ཟླ་ ༩ ནང་མི་ཞིག་གིས་ས་ཆ་དེར་ཁ་པར་རྫུན་མ་བཟོ་བཞིན་ཡོད་སྐོར་ཞུ་གཏུག་བྱས་ཡོད་པ་དང་། ཉེན་རྟོག་པས་ཞིབ་འཇུག་རིམ་པར་བྱས་པ་བརྒྱུད་ཁ་སང་ཀུ་ཤུ་ཁ་པར་ཐོན་རིམ ༨ པ་ནག་པོ་གྲངས་ ༡༣༠ དང་། ཟིང་སྐྱ་གྲངས་ ༣༧༠ ཙམ། དེ་བཞིན་ཁ་པར་བཟོ་བྱེད་ཀྱི་ཅ་ལག་སོགས་ལག་སོན་བྱུང་ཡོད་པ་མ་ཟད། རུས་མིང་ཀྲང་ཅན་གྱི་དོགས་ཡོད་མི་སྣ་ཞིག་འཛིན་བཟུང་བྱས་ཏེ་མུ་མཐུད་ཞིབ་འཇུག་བྱེད་བཞིན་ཡོད་འདུག

ཨ་རིའི་གཞུང་གིས་རྒྱ་ནག་ལ་ཚོང་དམག་རྒྱག་དགོས་པའི་རྒྱུ་མཚན་གཙོ་བོ་གཅིག་ཀྱང་རྒྱ་ནག་གིས་ཨ་རིའི་ཆེད་ལས་པའི་ལག་རྩལ་རྐུ་འཁྱེར་བྱས་ཏེ། རྒྱ་ནག་ནང་བེད་སྤྱོད་བྱེད་བཞིན་ཡོད་པའམ་ཕྱི་རྒྱལ་ཁག་ལ་རིན་གོང་ཁེ་པོས་བཙོང་བསྒྱུར་བྱེད་ཀྱི་ཡོད་པ་དང་། དེ་བཞིན་འདི་ལོའི་ཕྱི་ཟླ་ ༦ ནང་ཡུ་རོབ་མཉམ་འབྲེལ་མཐུན་ཚོགས་ཀྱིས་འཛམ་གླིང་ཚོང་འབྲེལ་སྒྲིག་འཛུགས་ (World Trade Organisation) ལ་རྒྱ་ནག་གཞུང་གིས་ཕྱིའི་ཁེ་ལས་ཚོར་བཙན་སྐུལ་གྱིས་རྒྱ་ནག་གི་ཁྲོམས་རའི་ནང་ཞུགས་ཏུ་བཅུག་སྟེ། དྲང་བདེན་མིན་པའི་ཚོང་འབྲེལ་བྱེད་དུ་འཇུག་བཞིན་ཡོད་སྐོར་ཞུ་གཏུག་བྱས་ཡོད་པ་རེད།

ད་ལོའི་ཕྱི་ཟླ་ ༤ ནང་རྒྱ་ནག་ཅང་སུའུ་ཞིང་ཆེན་ནང་ཀུ་ཤུ་རྟགས་ཅན་གྱི་ཁ་པར་ཐོན་རིམ་ ༨ པ་རྫུན་མ་བཙོང་བའི་དོགས་གཞིའི་འོག་མི་ ༣ འཛིན་བཟུང་བྱས་ཡོད་པ་དང་། ཁོང་ཚོས་ཧྲིན་ཀྲིན་གྲོང་ཁྱེར་ནས་ཉོས་ཏེ་བཙོང་བཞིན་ཡོད་པ་གསར་འགྱུར་བརྒྱུད་ལམ་ཁག་ཏུ་ཐོན་ཡོད་པ་རེད།

ཕྱི་ལོ་༢༠༡༧ ལོར་རྒྱ་ནག་ནང་ཧྭ་ཝེ་བཟོ་ལས་ཁང་ (Huawei) གིས་བཟོས་པའི་ཧྭ་ཝེ་ཁ་པར་ས་ཡ་ ༡༠༢ དང་ ཨོ་བྷོ་(Oppo) རྟགས་ཅན་གྱི་ཁ་པར་ས་ཡ་ ༧༧ ལྷག  ཝི་ཝོ་(Vivo) རྟགས་ཅན་གྱི་ཁ་པར་ས་ཡ་ ༧༢ ལྷག ཀུ་ཤུ་རྟགས་ཅན་གྱི་ཁ་པར་ས་ཡ་ ༥༡ ལྷག་བཙོང་ཡོད་པ་དང་། རྒྱ་ནག་ནང་ཀུ་ཤུ་ཁ་པར་བྲིན་ཤོས་ཨང་ ༤ པ་དེ་ཆགས་ཡོད་འདུག

གསར་འགོད་པ། ཀླུ་མགོན་ཐར།

The post རྒྱ་ནག་ནང་ཀུ་ཤུ་ཁ་པར་རྫུན་མ་མང་པོ་ཐོན། appeared first on བོད་ཀྱི་དུས་བབ།.

འབྲི་ཆུའི་རྒྱུད་ལ་སྔ་གཞུག་ཏུ་རི་ཉིལ་བྱུང་སྟེ་ཆུ་རྒྱུན་ཡོངས་སུ་འགག་ནས་ཉིན་ཤས་འགྲོ་བཞིན་ཡོད་པ་དང་།  ད་ལྟ་འཇོ་མདའ་རྫོང་སྤོ་ལི་ཡུལ་ཚོ་དང་སྤོ་ལི་དགོན་སོགས་གཙོ་བོར་གྱུར་བའི་འབྲི་ཆུའི་རྒྱུད་ཀྱི་ཡུལ་མི་ཚོར་དཀའ་ངལ་ཆེན་པོ་འཕྲད་བཞིན་ཡོད་པ་དང་།  ཉེན་ཁའི་གནས་སུ་ལྷུང་བའི་ཡུལ་མི་ཚོ་གནས་སྤོར་བཞིན་ཡོད་འདུག

The post འབྲི་ཆུའི་བཞུར་རྒྱུན་འགག་སྟེ་ཡུལ་ཚོ་ཆུས་སྣུབ་ཀྱི་འདུག appeared first on བོད་ཀྱི་དུས་བབ།.

ཨ་རིའི་བར་མའི་འོས་བསྡུ་ཡི་གྲུབ་འབྲས་གསལ་པོ་ཆགས་ཀྱི་ཡོད་པ་དང་བསྟུན་སྲིད་འཛིན་ཊོམ་ཕུས་དམངས་གཙོ་ཚོགས་པས་དོན་མེད་ཞིབ་འཇུག་རིགས་བྱས་ན་གཞུང་འབྲེལ་ལས་དོན་རྣམས་མཚམས་འཇོག་བྱ་རྒྱུ་ཡིན་པའི་ཉེན་བརྡ་བཏང་ཡོད་འདུགཨ་རིའི་བར་མའི་འོས་བསྡུ་ཟླ་འདིའི་ཕྱི་ཚེས་ ༦ ནས་མགོ་འཛུགས་གནང་ཡོད་པ་ལྟར། གྲོས་ཚོགས་འོག་མའི་ཞབས་བཀྱག་ ༤༣༥ ནས་དམངས་གཙོ་ཚོགས་པར་ཞབས་བཀྱག་ ༢༢༣ ཐོབ་སྟེ། འདས་པའི་ལོ་ངོ་ ༨ རིང་གི་ཆབ་སྲིད་ཚོགས་པ་གཅིག་གིས་ཁ་ལོ་བསྒྱུར་བའི་ལམ་ལུགས་ལ་འགྱུར་བ་ཆེན་པོ་བྱུང་ཡོད་པ་དང་། འབྱུང་འགྱུར་ལོ་གཉིས་ནང་ཊོམ་ཕུས་མགོ་འཁྲིད་པའི་སྤྱི་མཐུན་གཞུང་འཛིན་ཚོགས་པར་འཛིན་སྐྱོང་ཁྲིམས་འཆར་གཏན་འབེབ་སོགས་ཀྱི་ཐད་སྟངས་འཛིན་ཆེན་པོ་ཐེབས་རྒྱུ་ཡིན་འདུག

གྲོས་ཚོགས་གོང་མའི་ནང་སྤྱི་མཐུན་ཚོགས་པར་སྔར་ཡོད་ཞབས་བཀྱག་ ༤༢ ཐོག་ ༩ མང་དུ་ཕྱིན་ཏེ་ཁྱོན་ཞབས་བཀྱག་ ༥༡ ཡོད་པས་མུ་མཐུད་དབང་ཆ་སྟངས་འཛིན་བྱེད་ཐུབ་ཀྱི་ཡོད་སྟབས། སྲིད་འཛིན་ཊོམ་ཕུ་ཡིས་ཁྲིམས་དཔོན་སོགས་ཆེས་མཐོའི་གཞུང་འཛིན་པ་རྣམས་འདེམས་པའི་དབང་ཆ་ཡོད་པ་དང་། ཨ་རིའི་མངའ་སྡེ་ ༥༠ ལས་ ༣༦ གི་གཞུང་འཛིན་པ་འོས་བསྡུའི་ནང་སྤྱི་མཐུན་ཚོགས་པས་སྔར་ཡོད་ཞབས་བཀྱག་ ༧ སྟེང་ཞབས་བཀྱག་ ༡༩ མང་དུ་ཕྱིན་ཏེ།  དམངས་གཙོ་ཚོགས་པ་ལས་ཞབས་བཀྱག་ ༣ གྱིས་མང་བ་ཐོབ་ཡོད་འདུག

ད་ལྟའི་ཆར་གྲོས་ཚོགས་འོག་མའི་ཞབས་བཀྱག་ ༡༥ རྩོད་བཞིན་པ་ལས་དམངས་གཙོ་ཚོགས་པར་འཐོབ་རེ་ཆེ་བ་ ༧ དང་། སྤྱི་མཐུན་ཚོགས་པར་འཐོབ་རེ་ཆེ་བ་ ༨ ཡོད་འདུག དེ་བཞིན། གྲོས་ཚོགས་གོང་མའི་ཞབས་བཀྱག་ ༣ རྩོད་བཞིན་པ་ལས་གསུམ་ཀ་སྤྱི་མཐུན་ཚོགས་པར་འཐོབ་པའི་རེ་བ་ཆེན་པོ་ཡོད་འདུག མངའ་སྡེའི་གཞུང་འཛིན་པའི་འོས་བསྡུ་ལས་ཇོར་ཇི་ཡ་མངའ་སྡེར་འོས་འདེམས་བྱེད་མུས་ཡིན་པ་དང་། ད་ལྟའི་ཆར་སྤྱི་མཐུན་ཚོགས་པར་རྒྱལ་ཁ་ཐོབ་བཞིན་ཡོད་འདུག

ཟླ་འདིའི་ཕྱི་ཚེས་ ༦ ཉིན་གྱི་དགོང་མོར། དམངས་གཙོ་ཚོགས་པར་གྲོས་ཚོགས་འོག་མའི་ནང་རྒྱལ་ཁ་ཆེན་པོ་ཐོབ་པ་དེར་ཚོགས་གཙོ་ལྕམ་ནན་སེ་པེ་ལོ་སི་(Nancy Pelosi)ལགས་ཀྱིས་རྒྱབ་སྐྱོར་བ་ཚང་མར་ཐུགས་རྗེ་ཆེ་ཞུ་རྒྱུ་ཡིན། སང་ཉིན་ནས་ཨ་རིར་ཉི་མ་གསར་པ་ཞིག་མགོ་ཚུགས་རྒྱུ་རེད། ཅེས་བརྗོད་ཡོད་པ་དང་། ཕྱི་ཚེས་ ༧ ཉིན་ཊོམ་ཕུ་དང་ལྕམ་ནན་སེ་པེ་ལོ་སི་གཉིས་ཀས་འོས་བསྡུའི་གྲུབ་འབྲས་དང་འབྲེལ་བའི་ཡོངས་ཁྱབ་གསར་འགོད་གསལ་བསྒྲགས་ཤིག་སྤེལ་བའི་ནང་། ཊོམ་ཕུས་འདི་ལོར་སྤྱི་མཐུན་ཚོགས་པས་གྲོས་ཚོགས་གོང་མར་ལོ་རྒྱུས་རང་བཞིན་ལྡན་པའི་རྒྱལ་ཁ་བླངས་ཡོད་པ་དང་། ཨ་རིའི་དཔལ་འབྱོར་དང་འཕྲོད་བསྟེན། ཁོར་ཡུག དམག་དོན་སོགས་སྔར་བས་སྟོབས་ཤུགས་ཆེ་རུ་གཏོང་བར་ཆབ་སྲིད་ཚོགས་པ་གཉིས་ཀས་མཉམ་རུབ་ཀྱི་ཐོག་ནས་ལས་ཀ་བྱེད་དགོས་པའི་རེ་འདུན་བཏོན་ཡོད་པ་དང་། གལ་ཏེ་དམངས་གཙོ་ཚོགས་པས་ཊོམ་ཕུའི་སྟེང་དོན་མེད་ཀྱི་ཞིབ་འཇུག་བཙུགས་ན་གཞུང་འབྲེལ་ལས་དོན་རྣམས་མཚམས་འཇོག་བྱ་རྒྱུ་ཡིན་པ་དང་། དེར་དམངས་གཙོ་ཚོགས་པས་འགན་ལེན་དགོས་ཚུལ་གསུངས་ཡོད་འདུག

ལྕམ་ནན་སི་པེ་ལོ་སི་ཡིས་རྒྱལ་ཁ་འདི་ནི་ང་ཚོའི་དམངས་གཙོ་སླར་གསོ་བྱ་རྒྱུའི་གོ་སྐབས་བཟང་པོ་ཞིག་ཡིན་པ་དང་། དམངས་གཙོ་ཚོགས་པའི་གཞི་རྩའི་ལྟ་གྲུབ་དང་མ་འགལ་བའི་ཐོག་ནས་སྤྱི་མཐུན་ཚོགས་པ་དང་མཉམ་འབྲེལ་གྱིས་ཨ་རིའི་དཔལ་འབྱོར་དང་སྨན་བཅོས་སྲིད་བྱུས་སོགས་ཀྱི་ཐད་ལ་ཤུགས་བརྒྱབ་རྒྱུ་དང་། སྲིད་འཛིན་ཊོམ་ཕུ་སྒེར་གྱི་ཚོང་དོན་དང་འཛིན་སྐྱོང་གི་སྲིད་བྱུས་སོགས་ཀྱི་ཐོག་ལ་ཞིབ་འཇུག་བྱ་རྒྱུ་ཡིན་ཡང་། དེ་ནི་གལ་གནད་ཅིག་མིན་པར་གཙོ་བོ་ཁ་འཐོར་དུ་ཕྱིན་པའི་ཨ་རི་དེ་མཐུན་སྒྲིལ་གྱི་ཕྱོགས་སུ་བསྐྱོད་ཐུབ་པ་བྱ་རྒྱུ་དང་། མི་མང་གི་སྨན་བཅོས་ཀྱི་འགྲོ་གྲོན་དམའ་རུ་གཏང་སྟེ་སྲིད་བྱུས་དེ་སྔར་ལས་ཇེ་ལེགས་སུ་གཏང་རྒྱུ་ཡིན་པའི་སྐོར་གསུངས་ཡོད་པ་རེད།

འདི་ལོའི་དམངས་གཙོ་ཚོགས་པའི་གྲོས་ཚོགས་འོག་མའི་རྒྱལ་ཁ་དེས་ཊོམ་ཕུ་སྲིད་གཞུང་གིས་གཏན་འབེབ་ལག་བསྟར་བྱས་པའི་ཚོང་དོན་འབྲེལ་ལམ་དང་། རྒྱལ་ཁྲལ་སྲིད་བྱུས་སོགས་ཀྱི་སྐོར་ལ་བསྐྱར་ཞིབ་བྱེད་ཐུབ་པ་མ་ཟད། ཊོམ་ཕུའི་ཨ་རི་དང་མེག་སི་ཁོའི་ས་མཚམས་སུ་གྱང་ར་བསླང་རྒྱུའི་འཆར་གཞི་དེ་རྩིས་མེད་གཏོང་བའི་ལམ་ཀའང་ཡོད་འདུག གལ་གནད་ཆེ་ན་ཊོམ་ཕུ་ཁྱིམ་ཚང་གི་སྒེར་གྱི་ཚོང་དོན་འབྲེལ་ལམ་སོགས་ལ་ཞིབ་འཇུག་བྱས་ཏེ། གལ་སྲིད་ཁྲིམས་དང་འགལ་བའི་ནག་ཉེས་བསག་ཡོད་ན་སྲིད་འཛིན་གྱི་གོ་གནས་ནས་གནས་དབྱུང་གཏོང་བའི་གོ་སྐབས་དང་ཐོབ་ཐང་ཡང་ཡོད་འདུག སྤྱིར་བཏང་ཨ་རིའི་ལོ་རྒྱུས་ནང་ད་བར་སྲིད་འཛིན་གཅིག་ཀྱང་གྲོས་ཚོགས་ནས་གནས་དབྱུང་བཏང་མེད་པ་དང་། གལ་ཏེ་གནས་དབྱུང་གི་གྲོས་འཆར་འཁུར་ཡོང་བ་ཡིན་ནའང་གྲོས་ཚོགས་འཐུས་མི་གསུམ་ཆ་གཉིས་ཀྱི་རྒྱབ་སྐྱོར་ཐོབ་དགོས་ཀྱི་ཡོད་འདུག

ཨ་རིའི་ལོ་རྒྱུས་གསར་པ།

ཐེངས་འདིའི་འོས་བསྡུའི་ནང་བུད་མེད་འོས་མི་རྣམས་ལ་རྒྱལ་ཁ་ཆེན་པོ་ཐོབ་ཡོད་པར་ངོས་འཛིན་བྱེད་ཀྱི་འདུག དེ་ཡང་འོས་མི་བུད་མེད་ ༢༧༧ ལས་ད་ལྟའི་ཆར་གྲོས་ཚོགས་འོག་མའི་ནང་བུད་མེད་ ༩༨ དང་། གྲོས་ཚོགས་གོང་མར་བུད་མེད་ ༡༢། མངའ་སྡེའི་གཞུང་འཛིན་པར་བུད་མེད་ ༩ བཅས་ཁྱོན་བུད་མེད་ ༡༡༩  གསར་འདེམས་བྱུང་ཡོད་པ་དང་། དེ་ནི་ཨ་རིའི་ལོ་རྒྱུས་ཁྲོད་བུད་མེད་ཀྱི་གྲངས་འབོར་མང་ཤོས་དེ་ཆགས་ཡོད་འདུག གཞན་ཡང་། འདི་ལོའི་བར་མའི་འོས་བསྡུའི་ནང་རྒྱལ་ཁ་ཐོབ་པའི་ལོ་ན་ ༢༩ སོན་པའི་དམངས་གཙོ་ཚོགས་པའི་ཨེ་ལེག་ཛེན་ཌ་རི་ཡ་ཨོ་ཁ་ཤིའོ་ཁོར་ཊེ་ཛི་(Alexandria Ocasio-Cortez)དང་ཨ་བྷེ་ཧྥིན་ཀེ་ཎོར་(Abby Finkenauer)གཉིས་ནི་ཨ་རིའི་ལོ་རྒྱུས་ཁྲོད་ཀྱི་གྲོས་ཚོགས་འཐུས་མི་ལོ་ན་གཞོན་ཤོས་དེ་ཆགས་ཡོད་འདུག ཡང་གསར་དུ་འོས་འདེམས་བྱུང་བའི་ལྕམ་ར་ཤི་ཌ་ཊ་ལཱེབ་(Rashida Tlaib) དང་ལྕམ་ཨི་ལཱན་ཨོ་མར་(Ilhan Omar) གཉིས་ནི་གྲོས་ཚོགས་འཐུས་མི་ཁ་ཆེ་བ་བུད་མེད་ཐོག་མ་དང་། ལྕམ་ཤཱེ་རི་སི་ཌེ་ཝིཌ་(Sharice Davids) དང་ལྕམ་ཌེ་བྷ་ར་ཧཱ་ལེན་(Debra Haaland)གཉིས་ནི་ཨ་རིའི་གདོད་མའི་མི་རིགས་(Native American) ཀྱི་བུད་མེད་གྲོས་ཚོགས་ནང་འོས་འདེམས་བྱུང་བ་ཐོག་མ་དེ་ཆགས་ཡོད་འདུགའདི་ལོར་འདེམས་ཐོན་བྱུང་བའི་གྲོས་ཚོགས་འཐུས་མི་གསར་པ་རྣམས་ཀྱིས་ཕྱི་ལོ་ ༢༠༡༩ ཟླ་ ༡ ཚེས་ ༣ ཉིན་ནས་དངོས་སུ་ལས་འཁུར་ཞུས་ཏེ། གྲོས་ཚོགས་འོག་མའི་འཐུས་མི་རྣམས་ཀྱིས་ལོ་གཉིས་རིང་ལས་འཁུར་ཞུ་རྒྱུ་དང་། གྲོས་ཚོགས་གོང་མའི་འཐུས་མི་གསར་པ་ ༣༥ ཡིས་ལོ་ ༦ རིང་ལས་འཁུར་ཞུ་རྒྱུ་ཡིན་འདུག

པ་སངས་ཚེ་རིང་།

The post དམངས་གཙོ་ཚོགས་པས་ཨ་རིའི་གྲོས་ཚོགས་འོག་མའི་དབང་ཆ་བཟུང་། appeared first on བོད་ཀྱི་དུས་བབ།.

ཐའེ་ཝན་གཞུང་གིས་རྒྱལ་སྲུང་མཚོ་དམག་གྲུ་གཟེངས་གཉིས་གསར་སྣོན་བྱས་ཏེ་རྒྱ་ནག་གཞུང་གི་དམག་ཤུགས་འཇིགས་སྐུལ་ལ་ནུས་པ་ཡོད་རྒུ་བཏོན་ནས་ཁ་གཏད་གཅོག་རྒྱུ་ཡིན་ལུགས་བསྒྲགས་འདུགདེ་རིང་ཐའེ་ཝན་གཞུང་གིས་མངའ་ཁོངས་སྲུང་སྐྱོབ་ཆེད་མཚོ་དམག་གྲུ་གཟིངས་ (PFG-1112 Ming Chuan) དང་ (PFG-1115 Feng Chia) རྟགས་ཅན་གཉིས་ཐའེ་ཝན་རྒྱ་མཚོའི་ནང་གསར་གཏོང་གི་མཛད་སྒོ་བསྡུས་ཡོད་པ་དང་། སྐབས་དེར་སྲིད་འཛིན་ལྕམ་ཚའེ་ཡེན་ཝིན་ (Tsai Ing-wen) ལགས་ཀྱིས་ཐའེ་ཝན་གྱི་བདག་དབང་ལ་རྒྱ་ནག་གཞུང་གིས་དམག་ཤུགས་འཇིགས་སྐུལ་ཐེབས་ཀྱི་ཡོད་པ་དང་། མོ་རང་གིས་དབུ་འཁྲིད་པའི་ཐའེ་ཝན་གཞུང་གིས་དམག་དོན་ཐད་ནུས་པ་ཡོད་རྒུ་འདོན་རྒྱུ་ཡིན་སྐོར་གསུངས་འདུག

སྲིད་འཛིན་ལྕམ་ཚའེ་ཡེན་ཝིན་ལགས་ཀྱིས། རྒྱལ་སྲུང་དམག་གྲུ་འདི་གཉིས་གསར་སྣོན་བྱས་པ་བརྒྱུད་ང་ཚོས་འཛམ་གླིང་ལ་བརྡ་ལན་གསལ་པོ་ཞིག་སྟོན་འདོད་ཡོད་པ་དང་། དེ་ནི་ང་ཚོས་རང་ཉིད་ཀྱི་གོ་མཚོན་གྱི་ནུས་ཤུགས་གོང་མཐོང་གཏོང་བར་འབད་བརྩོན་བྱེད་བཞིན་ཡོད་པ་མ་ཟད། ཐའེ་ཝན་གྱི་བདེ་སྲུང་དང་མི་མང་གི་རང་དབང་། དམངས་གཙོའི་འགྲོ་ལུགས་བཅས་ལ་འགན་ལེན་བྱེད་ཀྱི་ཡོད་སྟབས། གོམ་གང་ཡང་ཕྱི་སྣུར་བྱ་རྒྱུ་མིན། ཞེས་གསུངས་འདུག

ཡང་ཁོང་གིས། དམག་གྲུ་གཉིས་དེ་གསར་སྣོན་བྱེད་དགོས་པའི་རྒྱུ་མཚན་ནི་རྒྱ་གཞུང་གིས་ཡང་དང་བསྐྱར་དུ་ཐའེ་ཝན་གླིང་ཕྲན་གྱི་བདག་དབང་ལ་ཐེ་གཏོགས་བྱེད་ཀྱིན་ཡོད་པ་དང་། ས་གནས་ཀྱི་བདེ་འཇགས་དང་ཞི་བདེ་ལ་གཏོར་སྐྱོན་གཏོང་གི་ཡོད་པ་དེར་མཐའ་གཅིག་ཏུ་ཁ་གཏད་གཅག་ནས་ཐའེ་ཝན་གྱི་བདེ་སྲུང་ལ་ཤུགས་སྣོན་རྒྱག་རྒྱུ་ཡིན་པ་མ་ཟད། རྒྱ་ནག་གཞུང་གིས་སྤྱི་ཚོགས་དྲ་ལམ་བརྒྱུད་གནས་ཚུལ་རྫུན་མ་སྤེལ་ཏེ། ཐའེ་ཝན་གཞུང་དང་བཟོ་གྲྭ་ཁག་ལ་གནོད་འཚེ་གཏོང་ཐབས་བྱེད་བཞིན་པར་འགོག་རྒོལ་བྱ་རྒྱུ་ཡིན་སྐོར་གསུངས་འདུག

ཐའེ་ཝན་གཞུང་གིས་རྒྱལ་སྲུང་ཆེད་ཨ་རི་སོགས་ནས་དམག་གྲུ་ཐེངས་མང་ཉོས་ཡོད་པ་དང་། ད་ལན་གསར་སྣོན་བྱས་པའི་དམག་གྲུ་དེ་གཉིས་ཕྱི་ལོ་ ༡༩༨༠ ལོར་ཨ་རིས་བཟོ་སྐྲུན་བྱས་ཡོད་པ་དང་། ཕྱི་ལོ་ ༢༠༡༤ ལོར་ཨ་རིའི་སྲིད་འཛིན་ཨོ་བྷ་མའི་སྐབས་གྲོས་ཆོད་བཞག་སྟེ་ཕྱི་ལོ་ ༢༠༡༥ ལོར་ཐའེ་ཝན་ལ་ཨ་སྒོར་ས་ཡ་ ༡༩༠ ཙམ་བྱས་ནས་ཕྱིར་ཚོང་བྱས་ཡོད་འདུག ཕྱི་ལོ་ ༢༠༡༦ ལོར་དེ་འབྲེལ་གྱི་ཐའེ་ཝན་ཆེད་ལས་མི་སྣ་ཨ་རིར་སྦྱོང་བརྡར་དུ་ཕྱིན་ཡོད་འདུག དམག་གྲུ་དེ་མཚོ་གཏིང་དང་མཚོ་ཁ་གཉི་གར་སྤྱོད་ཆོག་པ་མ་ཟད། ཁྱད་ཆོས་འདྲ་མིན་ལྡན་པའི་མེ་ཤུགས་འཕུར་མདེལ་སོགས་ཀྱང་འཁྱེར་གཏོང་ཐུབ་ཀྱི་ཡོད་འདུག

གསར་འགོད་པ། ཀླུ་མགོན་ཐར།

The post ཐའེ་ཝན་གོམ་གང་ཕྱི་སྣུར་བྱ་རྒྱུ་མིན། appeared first on བོད་ཀྱི་དུས་བབ།.

རྔ་བ་རྫོང་ཁོངས་ནས་ཡིན་པའི་བོད་མི་གཞོན་སྐྱེས་རྡོ་པོ་ལགས་ཀྱིས་རང་ལུས་མེར་བསྲེགས་གནང་ནས་འདས་གྲོངས་སུ་གྱུར་འདུག

ཟླ་འདིའི་ཕྱི་ཚེས་ ༥ ཉིན་ནས་སྤྱི་ཚོགས་དྲ་ལམ་ཁག་ཏུ་བོད་ནང་རང་ལུས་མེར་བསྲེགས་བྱུང་བའི་པར་རིས་གནས་ཚུལ་ཐོན་པ་ལྟར།  ཟླ་འདིའི་ཚེས་ ༤ ཉིན་རྔ་བ་རྫོང་ནང་སླར་ཡང་རྒྱ་ནག་གཞུང་གིས་བོད་ཐོག་འཛིན་པའི་དྲག་གནོན་ཅན་གྱི་སྲིད་བྱུས་ལ་ཞུ་འབོད་སླད། གཞོན་སྐྱེས་རྡོ་པོ་ལགས་ཀྱིས་རང་ལུས་མེ་རུ་བསྒྲོན་ནས་ “རྒྱལ་བ་བསྟན་འཛིན་རྒྱ་མཚོ་སྐུ་ཚེ་བརྟན་དགོས། གསེར་ཞལ་མྱུར་ཏུ་མཇལ་བར་ཤོག” ཅེས་སྐད་འབོད་གནང་སྟེ་མཐར་འདས་གྲོངས་སུ་གྱུར་བ་ཁ་གསལ་ཆགས་འདུག་ལ། རྡོ་པོ་ལགས་ནི་ད་བར་ཤེས་རྟོགས་བྱུང་བའི་ཨ་མདོ་རྔ་བའི་ནང་བྱུང་བའི་རང་ལུས་མེར་སྲེག་གནང་མཁན་༤༡ པ་ཡིན་པ་རེད།

ཁོང་འདས་གྲོངས་སུ་སོང་རྗེས་སྐུ་ཕུང་རྒྱ་གཞུང་གིས་འཕྲོག་ཡོད་མེད་དང་ཤུལ་ལུས་ནང་མིའི་གནས་སྟངས་ཅི་འདྲ་ཡིན་སོགས་ཞིབ་ཕྲ་ཤེས་རྟོགས་ཐུབ་ཀྱི་མེད་པ་རེད།

རྡོ་པོ་ལགས་ནི་རྔ་བ་རྫོང་ཆོ་རྗེ་མ་ཡུལ་ཚོའི་བྱ་སྐོར་སྡེ་བ་ནས་ཡིན་ཞིང་། རང་ལོ་ ༢༣་ཡིན་པ་དང་། ཕ་མིང་ལ་གཅོད་པ་དང་། མ་མིང་ལ་འཕྲིན་ལས་སྐྱིད་ཟེར་བ་དང་།  ཨ་མ་ལགས་ལོ་ཤས་གོང་ནས་གྲོངས་ཡོད་འདུག དེང་སྐབས་ཁོང་ཨ་ཞང་འཇམ་དཔལ་གྲགས་པ་ཚང་གི་ནང་ལ་གཏན་སྡོད་བྱས་ནས་ཡོད་པ་དང་།  བྱ་སྐོར་སྡེ་བ་ནི་འབྲོག་ལས་ལ་བརྟེན་པའི་འབྲོག་སྡེ་ཞིག་ཡིན་འདུག

གནས་ཚུལ་མཁོ་སྤྲོད་པ་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་ལགས།

The post རྡོ་པོ་ལགས་ཀྱིས་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར། appeared first on བོད་ཀྱི་དུས་བབ།.

སི་ཝེ་ཌན་ནང་ཡོད་པའི་རྒྱ་ནག་གི་གཞུང་ཚབ་ཀེའུ་ཚོང་ཡུའུ་ཡིས་བོད་རྒྱ་འབྲེལ་མོལ་བྱེད་པའི་སྔོན་འགྲོ་ཆ་རྐྱེན་ནི་བོད་མིས་རང་བཙན་ལངས་ཕྱོགས་དོར་ནས་རྒྱ་ནག་གཞུང་གི་དཔོན་རིགས་ཚོ་དང་ལེན་བྱེད་དགོས་སྐོར་བརྗོད།
ཁ་སང་སི་ཝེ་ཌན་གྱི་གཞུང་འབྲེལ་མིན་པའི་བདེ་སྲུང་དང་ཡར་རྒྱས་སྲིད་བྱུས་ཁང་ (Institute for Security & Development Policy) གི་གོ་སྒྲིག་འོག རྒྱ་ནག་དང་ཡུ་རོབ་ཀྱི་འབྲེལ་བ་ཞི་འགྲིག་ཕྱོགས་སུ་སྐྱོད་པ་ (China-Europe Relations – Toward Reconciling Diverging Interests)  ཞེས་པའི་བརྗོད་གཞི་ཐོག་ཡུལ་དེའི་ནང་གནས་སྡོད་རྒྱ་ནག་གཞུང་ཚབ་པ་ཀེའུ་ཚོང་ཡུའུ་(Gui Congyou) དང་ལྷན་དུ་ས་གནས་བོད་མི་དང་། རྒྱ་རིགས་སོགས་ཀྱི་སྐྱབས་བཅོལ་སློབ་མ་ ༥༠ ཙམ་འཛོམས་ཏེ་གཏམ་བཤད་དང་དྲི་བ་དྲིས་ལན་ཞིག་གནང་ཡོད་པ་དང་། སྐབས་དེར་ཀེའུ་ཚོང་ཡུའུ་ཡིས་ད་བར་དུ་ང་སྒེར་གྱི་ངོས་ནས་ཏཱ་ལའི་རུ་ཚོགས་ཕྱོགས་ནས་རང་བཙན་དོར་བ་དང་དབུས་གཞུང་གི་མགོ་འཁྲིད་ལ་དང་ལེན་བྱེད་པ་གོ་མ་བྱུང་སྐོར་བརྗོད་འདུག

གཏམ་བཤད་སྐབས་ཀེའུ་ཚོང་ཡུས་ཀྱིས། རྒྱུད་གཅིག་ལམ་གཅིག་གི་གལ་གནད་དང་དེས་རྒྱ་ནག་ཇི་ལྟར་འཕེལ་རྒྱས་ཀྱི་ཕྱོགས་སུ་སྐྱོད་བཞིན་ཡོད་སྐོར་དང་། ཐའེ་ཝན་དང་བོད་མི་ཁ་བྲལ་བས་རང་བཙན་འཐབ་རྩོད་བྱེད་བཞིན་ཡོད་ལུགས། དེ་བཞིན་སི་ཝེ་ཌན་དང་རྒྱ་ནག་བར་གྲོས་མོལ་གྱིས་མཉམ་འབྲེལ་བྱེད་རྒྱུ་གལ་ཆེན་ཡིན་སྐོར་སོགས་བཤད་ཡོད་འདུག དྲི་བ་དྲིས་ལན་སྐབས་སི་ཝེ་ཌན་བོད་རིགས་སྤྱི་མཐུན་ཚོགས་པའི་ཚོགས་གཙོ་འཇམ་དབྱངས་ཆོས་སྒྲོན་ལགས་ཀྱིས། ཀེའུ་ཡིས་གྲོས་མོལ་ཧ་ཅང་གལ་ཆེན་ཡིན་སྐོར་བརྗོད་པ་བཞིན་བོད་མི་ཚོའི་མངོན་འདོད་ནི་གཉིས་སྨན་དབུ་མའི་ལམ་གྱི་ཐོག་ནས་ཆེས་མཐོའི་རང་སྲིད་རང་སྐྱོང་འཐོབ་རྒྱུ་དེ་ཡིན་ཡང་། རྒྱ་ནག་གཞུང་གིས་བོད་རྒྱ་གཉིས་བར་གྲོས་མོལ་གནང་གི་མེད་པའི་རྒྱུ་མཚན་ཅི་ཡིན་དྲིས་པར་ཀེའུ་ཚོང་ཡུའུ་ཡིས།  ལོ་བཅུ་ཙམ་སྔོན་ལ་རྒྱ་གཞུང་གིས་བོད་མི་དང་བཙན་བྱོལ་བོད་གཞུང་ཟེར་བ་དེའི་སྐུ་ཚབ་མགྲོན་འབོད་ཀྱིས་གྲོས་མོལ་བྱས་པ་རེད། འོན་ཀྱང་གོང་དུ་ངས་བཤད་པ་བཞིན་ངེས་པར་དུ་སྔོན་འགྲོའི་ཆ་རྐྱེན་ཞིག་དགོས་རེད། དེ་ནི་ཏཱ་ལའི་རུ་ཚོགས་ཀྱི་རང་བཙན་འདོར་དགོས་པ་རེད་ལ། རྒྱ་ནག་དབུས་གཞུང་གི་མགོ་འཁྲིད་ལ་ངོས་ལེན་བྱེད་དགོས་པ་རེད། ད་སྔ་བར་དུ་ང་སྒེར་གྱི་ངོས་ནས་ཏཱ་ལའི་རུ་ཚོགས་ཕྱོགས་ནས་རང་བཙན་དོར་བ་དང་དབུས་གཞུང་གི་མགོ་འཁྲིད་དང་ལེན་བྱས་པ་གོ་མ་བྱུང་། ཏཱ་ལའི་རུ་ཚོགས་ཕྱོགས་ནས་རྟག་ཏུ་བོད་དང་རྒྱ་ནག་གི་གནད་དོན་གྱི་འབྲེལ་བ་ཟེར་གྱི་འདུག་པས་ངས་དེར་ངོས་འཛིན་བྱེད་ཀྱི་མེད། དོན་དངོས་ནི་རྒྱ་ནག་དབུས་གཞུང་དང་ཏཱ་ལའི་རུ་ཚོགས་བར་གྱི་གནད་དོན་ཞིག་རེད། བོད་དང་རྒྱ་ནག་གཉིས་འདྲ་མཉམ་གྱི་གཞི་གཅིག་ལ་འཇོག་ཐབས་ཡོད་པ་མ་རེད། ཅེས་བརྗོད་འདུག

ཡང་ཀོའུ་ཚོང་ཡུའུ་ཡིས། རང་སྐྱོང་ལ་ཆ་བཞག་ནས་བཤད་ན་བོད་རང་སྐྱོང་ལྗོངས་ལ་ཡོད་པའི་རང་སྐྱོང་ནི་ཚད་མཐོའི་རང་སྐྱོང་རེད། བོད་རང་སྐྱོང་ལྗོངས་ཀྱི་མགོ་འཁྲིད་ནི་བོད་མི་ཞིག་ཡིན་པ་དང་། ས་གནས་རང་སྐྱོང་གི་མགོ་འཁྲིད་གཞན་ཆ་ཚང་བོད་མི་རེད། ངས་བལྟས་ན་དེ་ནི་བོད་ལ་ཆེས་མཐོའི་རང་སྐྱོང་ཡོད་པའི་གཞི་རྩའི་བདེན་དཔང་རེད་ལ། རང་སྐྱོང་གི་ཐད་ནས་དཀའ་ངལ་ཅི་ཡང་མེད་པ་རེད། བོད་ལ་འགྲོ་རྒྱུའི་གོ་སྐབས་ང་ལ་མང་པོ་ཐོབ་སོང་ཡང་། སྟབས་མ་ལེགས་པ་ཞིག་ལ་ལས་ཀའི་བྲེལ་འཚུབ་ཀྱི་དབང་གིས་གོ་སྐབས་ཆ་ཚང་ལེན་ཐུབ་མ་སོང་། ཕྱི་ལོ་ ༢༠༡༦ ལོའི་དབྱར་ཁ་ཞིག་ལ་མཚོ་སྔོན་པོའི་ཕྱོགས་སུ་ང་དང་བཟའ་ཟླ་གཉིས་སྒེར་ངོས་ནས་ཡུལ་སྐོར་ལ་འགྲོ་རྒྱུ་བྱུང་སོང་། ང་ཚོའི་སྣེ་ཤན་པ་དང་འདུག་སའི་མགྲོན་ཁང་དང་ཟ་ཁང་གི་བདག་པོ་སོགས་ཚང་མ་བོད་པ་རེད་ལ། ཁོང་ཚོའི་འཚོ་བ་བདེ་སྐྱིད་དང་ཞི་འཇགས་རེད་འདུག གལ་སྲིད་ཁྱེད་རང་ཚོར་ཡང་གོ་སྐབས་རག་ཚེ་བོད་རང་སྐྱོང་ལྗོངས་དང་མཚོ་སྔོན་ཞིང་ཆེན་ཕྱོགས་སུ་ཐེངས་ཤིག་འགྲོ་རྒྱུར་མཚམས་སྦྱོར་བྱེད་འདོད་བྱུང་། ཉེ་ཆར་ཚོགས་པའི་ཇི་ནི་ཝེའི་འགྲོ་བ་མིའི་ཐོབ་ཐང་བསྐྱར་ཞིབ་ཐོག་རྒྱ་ནག་གི་སྐུ་ཚབ་ཀྱིས་རྒྱ་གཞུང་གི་བོད་ནང་ཡུལ་སྐོར་སྒོ་འབྱེད་ཀྱི་སྲིད་བྱུས་གསར་པ་ལག་བསྟར་བྱ་རྒྱུ་ཡིན་པ་གསལ་བསྒྲགས་གནང་ཡོད་པ་རེད། བོད་ལ་སྐོར་སྐྱོད་དུ་འགྲོ་འདོད་ཡོད་པའི་སི་ཝེ་ཌན་གྱི་མི་མང་རྣམས་ལ་ང་སྒེར་ངོས་ནས་མགྲོན་འབོད་དགའ་བསུ་བྱེད་བཞིན་ཡོད། ཅེས་སོགས་བརྗོད་འདུག

གསར་འགོད་པ། ཀླུ་མགོན་ཐར།

The post བོད་ལ་རང་སྐྱོང་ཚད་མཐོ་བོ་ཡོད་ཟེར། appeared first on བོད་ཀྱི་དུས་བབ།.

ཨ་རིའི་ཁ་ལི་ཧྥོ་ནེ་ཡའི་དགོང་ཚོགས་ཁང་ཞིག་ཏུ་གྱོན་གོས་ནག་པོ་གྱོན་པའི་སྐྱེས་པ་ཞིག་གིས་གང་བྱུང་མེ་མདས་བརྒྱབས་ཏེ་མི་བཅུ་གྲངས་ཤིག་བསད་པ་དང་མི་བཅུ་གྲངས་ཤིག་ལ་རྨས་སྐྱོན་བཟོས་རྗེས་རང་ཤི་བརྒྱབས་ཡོད་འདུགརྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན།  ཁ་སང་ཨ་རིའི་མངའ་སྡེ་ཁ་ལི་ཧྥོ་ནེ་ཡའི་ལྷོ་རྒྱུད་གྲོང་ཁྱེར་ལོ་སི་ཨན་ཇལ་གྱི་ཉེ་འཁྲིས་དགོང་ཚོགས་ཁང་(Borderline)ཞིག་ཏུ། སློབ་ཕྲུག་གཙོ་བོར་གྱུར་བའི་ཁྱོན་མི་གྲངས་ ༢༠༠ ཙམ་འདུ་འཛོམས་ཀྱིས་རོལ་དབྱངས་འཁྲབ་སྟོན་ལ་ལྟད་མོ་ལྟ་བཞིན་པའི་སྐབས་སུ། གློ་བུར་དུ་གྱོན་པ་ནག་པོ་གོན་ཞིང་མེ་མདའ་ཐོག་པའི་སྐྱེས་པ་ཞིག་ནང་དུ་འཛུལ་ཏེ། སྒོ་སྲུང་བ་བསད་པ་ལྟད་མོ་བའི་ནང་གང་བྱུང་མེ་མདས་བརྒྱབས་ཏེ། ཉེན་རྟོག་པ་ ༡ དང་མི་མང་ ༡༡ བཅས་ཁྱོན་མི་གྲངས་ ༡༢ རྐྱེན་ལམ་དུ་བཏང་བ་དང་། མི་༡༠ ལྷག་ལ་རྨས་སྐྱོན་བཟོས་ཏེ་སྨན་བཅོས་བྱེད་བཞིན་ཡོད་འདུག

 མི་གསོད་དོན་རྐྱེན་བྱུང་རྗེས་སྲིད་འཛིན་ཊོམ་ཕུ་ལགས་ཀྱིས། དོན་རྐྱེན་ཁྲོད་རྐྱེན་འདས་སུ་ཕྱིན་པ་དང་ཁོ་ཚོའི་ཁྱིམ་མི་ཚོར་གདུང་སེམས་མཉམ་སྐྱེད་དང་མྱ་ངན་ཞུ་བཞིན་ཡོད། ལྷག་པར་དུ་ད་རེས་ཀྱི་དོན་རྐྱེན་སྐབས་ཉེན་རྟོག་པས་སོ་སོའི་སྲོག་ལ་མ་འཛེམས་པར་དཔའ་ངར་ཆེན་པོས་མི་མང་སྐྱོབ་ཐབས་བྱས་པ་དེར་ཡིད་རང་དང་། ཉེན་རྟོག་པ་རོན་ཧེ་ལོ་སི་(Ron Helus)ལགས་སྨན་ཁང་ནས་འདས་གྲོངས་སུ་ཕྱིན་པར་གདུང་སེམས་མཉམ་སྐྱེད་ཡོད། ཅེས་བརྗོད་ཡོད་པ་དང་། རྐྱེན་འདས་ཕྱིན་པ་རྣམས་ལ་མྱ་ངན་མཚོན་ཕྱིར་ཕོ་བྲང་དཀར་པོའི་རྒྱལ་དར་ཉིན་ ༡ རིང་ཕྱེད་མར་ཕབ་ཡོད་འདུག

ཡང་མེ་མདའི་དོན་རྐྱེན་སྐོར་ལ་དམངས་གཙོ་ཚོགས་པའི་མགོ་འཁྲིད་ལྕམ་ནེ་སི་པོལ་སི་ལགས་ཀྱིས། ང་ཚོའི་སྲང་ལམ་དང་ལྷ་ཁང་། དེ་བཞིན། མི་མང་འདུ་འཛོམས་བྱེད་ཡུལ་སོགས་སུ་མེ་མདའི་དྲག་སྤྱོད་ཁྲོད་བྱིས་པ་མང་པོ་ཞིག་ཞེད་སྣང་ངང་གནས་དགོས་ཐུག་གི་ཡོད་པ་དང་།  ལྷག་པར་དུ་ཨ་རིིའི་མི་མང་ཉིན་རེ་བཞིན་མེ་མདའི་འཇིགས་སྣང་འོག་གནས་དགོས་ཀྱི་ཡོད་པའི་དཀའ་ངལ་འདི་མཚམས་འཇོག་བྱེད་རན་འདུག  ཅེས་གསུངས་ཡོད་པ་རེད།

ཉེན་རྟོག་པས་ཤེས་རྟོགས་བྱུང་བ་ལྟར་ན། མེ་མདའ་རྒྱག་མཁན་གྱི་མིང་ལ་ཨིན་ཌཱ་ཝི་ཌི་ལོང་(Ian David Long)ཟེར་ཞིང་། ད་ལྟ་རང་ལོ་ ༢༨ ཡིན་འདུག ཁོ་ནི་ཕྱི་ལོ་ ༢༠༠༨ ནས་ ༢༠༡༨ བར་ཨ་རིའི་ཨབ་གྷན་ནེ་སི་ཐན་ནང་མངག་གཏོང་བྱས་པའི་དམག་མི་ཞིག་ཡིན་པ་དང་། དེ་སྔོན་ཁོའི་སེམས་ཁམས་བདེ་ཐང་མིན་པའི་གནས་སྟངས་འོག་ཉེན་རྟོག་པས་སྨན་ཁང་དུ་འཁྲིད་དེ་བརྟག་དཔྱད་རིམ་པ་བྱས་སྐབས། སྨན་པས་ཁོའི་སེམས་ཁམས་བདེ་ཐང་ཡིན་པའི་ངོས་འཛིན་བྱས་ཏེ་ཉེན་ཁ་གང་ཡང་མེད་སྐོར་བཤད་ཡོད་པས་འཛིན་བཟུང་བྱས་མེད་པ་དང་། ད་ལན་ཁོས་དམར་གསོད་དོན་རྐྱེན་བཟོས་རྗེས་རང་ཤི་བརྒྱབས་ཡོད་འདུག

ཁ་སང་གི་མེ་མདའི་དོན་རྐྱེན་ཁྲོད། ན་ནིང་ཕྱི་ཟླ་ ༡༡ པའི་ནང་བྱུང་བའི་ཨ་རིའི་གྲོང་ཁྱེར་ལྰ་སི་ཝི་གྷ་སིའི་མེ་མདའི་དོན་རྐྱེན་སྐབས་ཡོད་པའི་མི་མང་པོ་ཡོད་པ་དང་། མེ་མདའི་དོན་རྐྱེན་ཐེངས་གཉིས་ཀྱི་ཁྲོད་ནས་ཐར་བའི་ནེ་ཁོ་ལ་སི་ཆམ་ཕེན་ཟེར་བ་ཞིག་གིས། ང་ལ་ཁྱིམ་ཚང་ཆེན་པོ་ཞིག་ཡོད། འོན་ཀྱང་། སྟབས་མ་ལེགས་པ་ཞིག་ལ་ངའི་ཁྱིམ་ཚང་མེ་མདའི་དྲག་སྤྱོད་ཐེངས་གཉིས་འོག་ཚུད་སོང་། ཞེས་བརྗོད་ཡོད་པ་དང་།  ཡང་མདང་དགོང་རྐྱེན་འདས་སུ་ཕྱིན་པའི་སའོ་ཟན་ཨོར་ཧྤ་ནོ་སི་ཟེར་བ་ཞིག་གི་ཨ་མས། ན་ནིང་མེ་མདའི་དོན་རྐྱེན་སྐབས་ངའི་བུ་ནང་ལ་ལོག་བསླེབས་བྱུང་། འོན་ཀྱང་། མདང་དགོང་ཁོ་ནང་ལ་བསླེབས་མ་བྱུང་བས། ངའི་བརྗོད་འདོད་པའི་སྐད་ཆ་ནི་མེ་མདའ་མཚམས་འཇོག་བྱེད་རོགས། ཞེས་གཞུང་ནས་མང་ཚོགས་དཀྱུས་མར་མེ་མདའ་འཁྱེར་ཆོག་པའི་སྲིད་བྱུས་ལ་འགྱུར་བ་གཏོང་དགོས་པའི་འབོད་སྐུལ་བྱས་ཡོད་འདུག

ས་གནས་ཉེན་རྟོག་ཁང་གིས། ད་ལན་རྐྱེན་འདས་སུ་ཕྱིན་པའི་ཉེན་རྟོག་པ་རོན་ཧེ་ལོ་སི་(Ron Helus)ལགས་གྲོངས་པ་དེར་ང་ཚོ་བློ་འགྱོད་སྐྱེ་ཡི་ཡོད། མི་མང་སྲུང་སྐྱོབ་ཆེད་ཁོང་འདས་གྲོངས་སུ་གྱུར་བ་ནི་གཟི་བརྗིད་ལྡན་པ་ཞིག་ཆགས་ཡོད།  ཅེས་བརྗོད་ཡོད་པ་རེད།

 དོན་རྐྱེན་བྱུང་ཡུལ་དགོང་ཚོགས་ཁང་(Borderline)དེ་ནི་ཁ་ལི་ཧྥོ་ནེ་ཡའི་ལོའོ་ཐི་རན་(Lutheran)གཙུག་ལག་སློབ་གཉེར་ཁང་དང་ཕེ་ཕེར་ཌི་ནེ་(Peperdine)གཙུག་ལག་སློབ་གཉེར་ཁང་། དེ་བཞིན། མོར་པ་ཁུ་(Moorpark)མཐོ་སློབ་བཅས་སློབ་གཉེར་ཁང་མང་པོའི་ཐག་ཉེར་ཡོད་སྟབས། ནམ་རྒྱུན་ནས་དེ་རུ་སློབ་མ་མང་པོ་ཡོང་གི་ཡོད་པ་མ་ཟད། ས་གནས་དེར་གྲགས་ཆེ་བའི་དགོང་ཚོགས་ཁང་ཞིག་ཀྱང་ཡིན་འདུག

ན་ནིང་ཕྱི་ཟླ་ ༡༠ ཚེས་ ༡ ཉིན་ཨ་རིའི་ནུབ་རྒྱུད་མངའ་སྡེ་ནེ་བཱ་དྷའི་(Nevada)གྲོང་ཁྱེར་ལཱ་སི་བི་གྷ་སི་(Las Vegas)ལ་བསྡུས་པའི་རོལ་དབྱངས་མཚན་ཚོགས་ཤིག་ཏུ།  ལོ་ན་ ༦༤ ཡིན་པའི་མིང་ལ་སི་ཊི་ཧྥིན་པཱ་ཌོ་ཁུ(Stephen Paddock)ཟེར་བ་ཞིག་གིས་མི་ཚོགས་ནང་གང་བྱུང་མེ་མདས་བརྒྱབས་ཏེ་ཉུང་མཐར་ལྟད་མོ་བ་ ༥༩ རྐྱེན་ལམ་དུ་བཏང་ཡོད་པ་དང་། མི་ ༥༢༧ ལ་རྨས་སྐྱོན་བཟོས་ཏེ། ཕྱི་ལོ་ ༡༩༤༩ ནས་རྩིས་པའི་ཨ་རིའི་དེང་རབས་ལོ་རྒྱུས་ནང་གི་མེ་མདའི་དམར་གསོད་དོན་རྐྱེན་ཚབས་ཆེ་ཤོས་ཆགས་ཡོད་འདུག

གསར་འགོད་པ། སྐལ་བཟང་སྦྱིན་པ།

The post དགོང་ཚོགས་ཁང་དུ་མི་གསོད་དོན་རྐྱེན་བྱུང་། appeared first on བོད་ཀྱི་དུས་བབ།.

རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་ཞིབ་འཇུག་སྙན་ཐོ་ལྟར་ན་འདི་ལོར་འཛམ་གླིང་ཡོངས་སུ་གསར་འགོད་རང་དབང་ཆེས་སྐྱོ་བའི་རྒྱལ་ཁབ་ ༥ ནི་རྒྱ་ནག་དང་སེ་རི་ཡ། ཊཱར་ཁེ་མཱེ་ནཱེ་སི་ཐན། ཨེ་རེ་ཊི་རཱ། བྱང་ཀོ་རི་ཡ་བཅས་རེད་འདུག
ཟླ་འདིའི་ཕྱི་ཚེས་ ༨ ཉིན། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་ཕྱི་ལོ་ ༢༠༡༨ ལོའི་གསར་འགོད་རང་དབང་གི་གཟེངས་རྟགས་སྤྲོད་པའི་མཛད་སྒོ་དེ་དབྱིན་ཇིའི་རྒྱལ་ས་ལོན་ཊོན་ཏུ་ཚོགས་ཡོད་པ་དང་། ད་ལོའི་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་རང་དབང་གསར་འགོད་གཟེངས་རྟགས་དེ་ཧྥེ་ལི་པིན་གྱི་གསར་འགོད་པ་ཨེན་ཊི་ཨེ་སི་པཱེ་ནཱ་ཝ་རོ་ནཱ་(Inday Espina-Varona)ལགས་ལ་སྤྲད་ཡོད་པ་དང་། དེ་བཞིན་རྒྱ་གར་གྱི་གསར་འགོད་པ་སི་ཝེ་ཊེ་ཆཱ་ཊཱར་ཝེ་དྷེ་(Swati Chaturvedi)ལགས་ལ་སྙིང་སྟོབས་ཅན་གྱི་གསར་འགོད་གཟེངས་རྟགས་དང་། མལ་ཊཱ་རྒྱལ་ཁབ་ཀྱི་གསར་འགོད་པ་མཱ་ཊི་ཐཱའོ་ཁཱ་རོ་ནཱ་གྷ་ལེ་ཛཱ(Matthew Caruana Galizia)ལགས་ལ་ཤུགས་རྐྱེན་ཆེ་བའི་གསར་འགོད་གཟེངས་རྟགས་བཅས་སྤྲད་ཡོད་འདུག

ཡང་མཛད་སྒོའི་ཐོག་བྷི་བྷི་སི་གསར་ཁང་གི་རྒྱལ་སྤྱིའི་རྩོམ་སྒྲིག་འབྲེལ་མཐུད་པ་ལཱེ་སི་དྷོ་སཱ་ཊི་(Lyse Doucet)ལགས་དང་། དེ་སྔོན་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་གཟེངས་རྟགས་ཐོབ་མྱོང་མཁན་སྐུ་ཞབས་ཁཱན་དྷན་དྷར་(Can Dundar)ལགས་དང་དཱ་ནཱ་ཨེར་ཧཱམ(Zaina Erhaim)ལགས། དེ་བཞིན་རྒྱ་ནག་གི་དམངས་གཙོ་དང་རང་དབང་ལས་འགུལ་བ་ཝེ་ཨེར་ཁེ་ཞེ(Wu’er Kaixi)ལགས་སོགས་མཉམ་ཞུགས་གནང་ཡོད་པ་དང་། སྐབས་དེར་ཉེ་སྔོན་སོ་དྷི་ཨ་རབ་ནང་ལྐོག་གསོད་བཏང་བའི་གསར་འགོད་པ་ཇ་མལ་ཁ་ཤོ་གྷི་(Jamal Khashoggi)ལགས་དང་འབྲེལ་ཏེ། འཛམ་གླིང་གི་གསར་འགོད་རང་དབང་ལ་སྤྱི་ཡོངས་ནས་ཉེན་ཁ་སླེབས་བཞིན་པ་དང་། གསར་འགོད་རང་དབང་གི་གལ་ཆེའི་རང་བཞིན་དང་གསར་འགོད་པའི་བདེ་འཇགས་སོགས་ཀྱི་སྐོར་ལ་གཏམ་བཤད་བྱས་ཡོད་འདུག

མཛད་སྒོའི་ཐོག་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་སྤྱི་ཁྱབ་དྲུང་ཆེ་ཁིར་སི་ཊོ་ཧྥི་ཌི་ལོར་(Christophe Deloire)ལགས་ཀྱིས། ང་ཚོས་གསར་འགོད་པ་ཚོར་གཟེངས་རྟགས་འདི་སྤྲད་དེ། ཁོང་ཚོའི་དམིགས་བསལ་གྱི་ལས་དོན་ལ་སོ་སོའི་རྒྱལ་ཁབ་ནང་འཇིགས་སྐུལ་དང་གནོན་ཤུགས་སོགས་མི་ཡོང་བར་བདེ་འཇགས་དང་སྲུང་སྐྱོབ་བྱེད་པའི་རེ་བ་རྒྱག་གི་ཡོད་ཅེས་བརྗོད་འདུག

ཡང་གསར་འགོད་མཐུན་ཚོགས་ཀྱི་དབྱིན་ཇིའི་ཡན་ལག་ཁང་གི་འགན་འཛིན་རེ་བྷེ་ཁཱ་ཝན་སཱན་ཊི་(Rebecca Vincent)ཡིས་ལོ་གཉིས་ཀྱི་སྔོན་དུ་དབྱིན་ཡུལ་དུ་གསར་འགོད་མཐུན་ཚོགས་ཀྱི་ཡན་ལག་ཁང་གསར་འཛུགས་ཐུབ་པ་ནས་བཟུང་། ང་ཚོས་འཛམ་གླིང་སྤྱི་ཡོངས་ལ་གལ་ཆེན་པོ་ཆགས་པའི་མཛད་སྒོ་ཞིག་ཚོགས་ཐུབ་སོང་། དབྱིན་ཡུལ་དུ་ཡོད་པའི་གསར་འགོད་པ་ཚང་མས་ལས་དོན་འདིར་དགའ་བསུ་ཆེན་པོས་རྒྱབ་སྐྱོར་བྱས་ཡོད་པ་དང་། མ་འོངས་པར་ང་ཚོ་མཉམ་དུ་གང་ན་རང་གི་ལས་རོགས་གཅིག་པ་ཚོར་དཀའ་ངལ་དང་གནོན་ཤུགས་ཡོད་ན་དེ་ཡི་རྒྱབ་ལ་ལངས་ཡོད་སྐོར་བརྗོད་འདུག

ད་ལོའི་རང་དབང་གསར་འགོད་གཟེངས་རྟགས་དེ་ཧྥི་ལི་པིན་རྒྱལ་ཁབ་ཀྱི་གསར་འགོད་པ་ཨེན་ཊི་ཨེ་སི་པེ་ནཱ་ཝ་རོ་ནཱ་(Inday Espina-Varona)ལགས་སུ་སྤྲོད་དོན་ནི། ཧྥེ་ལི་པིན་སྲིད་འཛིན་ཌོའི་ཊར་ཊི་(Rodrigo)ཡིས་བུད་མེད་ལ་དམའ་འབེབ་དང་ཁྱད་གསོད་སོགས་ཀྱི་སྐད་ཆ་མང་པོ་བཤད་པར་སྤྱི་ཚོགས་དྲ་རྒྱ་བརྒྱུད་ཡུན་རིང་རྒོལ་ལན་སློག་ཡོད་པ་དང་། ཨེན་ཊི་ཨེ་སི་པེ་ནཱ་ཝ་རོ་ནཱ་ལགས་ཀྱིས་བུད་མེད་ཀྱི་ཐོབ་ཐང་གླེང་སའི་སྤྱི་ཚོགས་དྲ་ལམ་གསར་འགྱུར་སྤེལ་ས་ཞིག་ཆེད་འཛུགས་ཀྱིས་བུད་མེད་ཀྱི་ཐོབ་ཐང་གཙོའི་གསར་འགོད་རང་དབང་སོགས་ཀྱི་སྐོར་ནས་གསར་འགྱུར་སྤེལ་ཡོད་པ་དང་། མོ་ལ་ཉིན་ལྟར་སྐྱག་རྫུན་བཤད་མཁན་དང་བུད་མེད་མདོག་ངན་མ། ང་ཚོས་ཁྱོད་གང་ན་ཡོད་པ་ཤེས་ཀྱི་ཡོད། ཁྱོད་གསོད་ཀྱི་ཡིན་ཞེས་འཇིགས་སྐུལ་བྱེད་མཁན་གྱི་ཁ་པར་གྲངས་ཨང་དང་འཕྲིན་ཐུང་སོགས་ ༥༠ ནས་ ༨༠ བར་ཡོང་གི་ཡོད་སྐོར་བརྗོད་པ་དང་། གཟེངས་རྟགས་སྤྲོད་སྐབས་མོས་གསར་འགོད་རང་དབང་ནི་གསར་འགོད་པ་ཚོར་ཧ་ཅང་གལ་ཆེན་པོ་ཡིན་པ་དང་། མོར་གཟེངས་རྟགས་འདི་སྤྲད་པས་ཡུལ་དེའི་ན་གཞོན་ཚོར་བློ་སྤོབས་སྐྱེས་བར་སྐུལ་སློང་ཐེབས་པའི་རེ་བ་ཡོད་སྐོར་བརྗོད་འདུག

སྙིང་སྟོབས་ཅན་གྱི་གསར་འགོད་གཟེངས་རྟགས་ཐོབ་མཁན་རྒྱ་གར་གྱི་གསར་འགོད་པ་ལྕམ་སི་ཝེ་ཊེ་ཆཱ་ཊཱར་ཝེ་དྷེ་(Swati Chaturvedi)ཡིས། བྷི་ཇི་པི་མུ་དྷི་གཞུང་གིས་དྲ་ལམ་སྤྱད་ནས་གསར་འགོད་པ་ཚོར་འཇིགས་སྐུལ་དང་གནོན་ཤུགས་སྤྲོད་བཞིན་པར་མོས་གསར་འགོད་པའི་ལག་ཆ་སྤྱད་ནས་ཕྱིར་རྒོལ་བྱས་ཡོད་པ་དང་། མོས་བྷི་ཇི་པི་ཚོགས་པའི་འཛམ་གླིང་ལ་མི་མངོན་པའི་འཕྲུལ་ཆས་ཀྱི་དམག་མི་ཞེས་པའི་དེབ་ཅིག་ཀྱང་བྲིས་ཡོད་པ་དང་། དེབ་དེ་བྲིས་རྗེས་སྤྱི་ཚོགས་དྲ་ལམ་ཁག་ཏུ་མོ་ལ་ཁ་རྡུང་གཏོང་མཁན་དང་འཇིགས་སྐུལ་བྱེད་མཁན་ཧ་ཅང་མང་པོ་བྱུང་ཡོད་པ་དང་། མོས་(AFP)གསར་ཁང་ལ་ཉིན་རེར་ལྐོག་གསོད་དང་བཙན་གཡེམ་སྐོར་གྱི་འཇིགས་སྐུལ་བྱེད་མཁན་་ ༡༥ ནས་ ༢༠ བར་ཡོང་གི་ཡོད་པ་དང་། མང་ཆེ་ཤོས་བྷི་ཇི་པི་ཚོགས་པར་རྒྱབ་སྐྱོར་དང་དགའ་བོ་བྱེད་མཁན་ཡིན་སྐོར་བརྗོད་ཡོད་པ་དང་། གཟེངས་རྟགས་སྤྲོད་སྐབས་མོས་དོན་དམ་པའི་དམངས་གཙོའི་ལྟ་བ་ནི་ཁྱེད་ཀྱིས་བསམ་ཚུལ་གང་ཞིག་བཤད་འདོད་ཀྱང་བཤད་དབང་ཡོད་པ་དེ་ཡིན་པ་དང་། ཡིད་སྐྱོ་བ་ཞིག་ལ་ཆབ་སྲིད་ཀྱི་འགྲན་རྩོད་རྐྱེན་གྱིས་གསར་འགོད་པ་མང་པོ་ཞིག་གི་ལས་དོན་ཐད་གནོན་ཤུགས་དང་འཇིགས་སྐུལ་ཡོང་གི་ཡོད་པ་རེད། ཅེས་བརྗོད་འདུག

ཤུགས་རྐྱེན་ཆེ་བའི་གསར་འགོད་གཟེངས་རྟགས་ཐོབ་མཁན་མཱལ་ཊཱ་རྒྱལ་ཁབ་ཀྱི་གསར་འགོད་པ་མཱ་ཊི་ཐཱའོ་ཁཱ་རོ་ནཱ་གྷ་ལེ་ཛཱ(Matthew Caruana Galizia)ལགས་ཀྱིས། ཁོས་ཡུན་རིང་ཡུལ་དེའི་ནང་སྐོག་ཟ་རུལ་སུངས་ཀྱི་གནད་དོན་དང་གསར་འགོད་རང་དབང་སོགས་ཀྱི་སྐོར་ལ་གོ་རྟོགས་སྤེལ་ནས་ཤུགས་རྐྱེན་ཆེན་པོ་ཐེབས་ཡོད་པ་དང་། ཁོང་ནི་གློག་ཀླད་མཉེན་ཆས་བཟོ་སྐྲུན་པ་ཞིག་ཡིན་པ་དང་། དེ་སྔོན་གསར་འགོད་རང་དབང་ཐད་པོ་ལེ་ཛཱར་(Pulitzer Prize)བྱ་དགའ་ཡང་ཐོབ་ཡོད་པ་དང་། ཁོས་གསར་འགོད་རང་དབང་ཐད་གོ་རྟོགས་སྤེལ་བའི་རྩོམ་ཡིག་སོགས་བྲིས་རྐྱེན། ཕྱི་ལོ་ ༢༠༡༧ ལོར་ཁོའི་ཨ་མ་རླངས་འཁོར་ནང་ལྐོག་གསོད་བྱས་ཡོད་འདུག གཟེངས་རྟགས་སྤྲོད་སྐབས་ཁོས་གཟེངས་རྟགས་འདི་ནི་ང་ཚོས་འཐབ་རྩོད་བྱེད་བཞིན་པའི་ལས་དོན་དེ་འགྲིག་ཡོད་པའི་ངོས་འཛིན་བྱས་པ་ཞིག་ཡིན་པ་དང་། མུ་མཐུད་འཐབ་རྩོད་བྱ་དགོས་པ་ཞིག་དང་མི་ཚང་མས་དོ་སྣང་དགོས་པ་ཞིག་ཡིན་སྐོར་བརྗོད་འདུག
གཞན་ཡང་། རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་ད་ལོར་དབྱིན་ཡུལ་གྱི་གསར་འགོད་པ་ཚོར་དམིགས་བསལ་གསར་འགོད་གཟེངས་རྟགས་ཞེས་པ་ཞིག་གསར་དུ་སྤྲད་ཡོད་པ་དང་། ད་ལོའི་དམིགས་བསལ་གཟེངས་རྟགས་དེ་དབྱིན་ཡུལ་གྱི་གསར་འགོད་པ་ཁཱར་རོ་ལེ་ཁཱ་དྷི་(Carole Cadwalladr)ལགས་ལ་ཐོབ་ཡོད་པ་དང་། མོས་གྷར་དྷིན(Guardian)གསར་ཁང་དང་(Observer)གསར་ཁང་སོགས་སུ་གསར་འགོད་པའི་ལས་ཀ་བྱེད་ཀྱི་ཡོད་པ་དང་། མོས་ད་ལོར་ཨ་རི་དང་དབྱིན་ཡུལ་ནང་དམངས་གཙོའི་སྤྱི་ཚོགས་ཁྲོད་བསམ་སྤྱོད་ལ་བཀག་སྡོམ་ཐེབས་པའི་སྐོར་ལ་ཞིབ་འཇུག་བྱས་ཏེ་སྙན་ཐོ་ཞིག་བཏོན་པར་བརྟེན། ཨ་རིའི་འོས་བསྡུའི་སྐབས་ངོ་དེབ་ཀྱིས་ཤུགས་རྐྱེན་སྤྲད་ཡོད་སྐོར་བརྗོད་པའི་དབྱིན་ཇིའི་(Cambridge Analytica) རྒྱལ་སྤྱིའི་ཆབ་སྲིད་ཚན་རིག་ཞིབ་འཇུག་ཐབས་ཇུས་ཚད་ཡོད་ཁང་གིས་སྤྱི་ཚོགས་དྲ་རྒྱའི་རེའུ་མིག་བསྡུ་ཉར་གྱི་མཉེན་ཆས་ཤིག་བེད་སྤྱད་དེ། ངོ་དེབ་བེད་སྤྱོད་བྱེད་མཁན་ས་ཡ་མང་པོའི་སྒེར་གྱི་གནས་ཚུལ་བསྡུ་རུབ་ཀྱི་གནད་དོན་ཕྱི་ལ་བཏོན་ཡོད་པ་དང་། དེ་བཞིན་ཨ་རི་དང་དབྱིན་ཇི་བྷི་རེ་ཟི་ཊི་(Brexit)འོས་བསྡུའི་གནད་དོན་མང་པོ་ཞིག་ཐེར་འདོན་བྱས་ཡོད། སྙན་ཐོ་དེ་བཏོན་རྗེས་མོ་ལ་མི་མང་པོ་ཞིག་གིས་གནོན་ཤུགས་དང་འཇིགས་སྐུལ་བྱས་ཡོད་འདུག

རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་ངོས་ནས་འདས་པའི་ལོ་ཤས་ནས་འཛམ་གླིང་གི་རྒྱལ་ཁབ་མང་པོའི་ནང་གསར་འགོད་རང་དབང་ལ་ཉེན་ཁ་ཆེ་རུ་འགྲོ་བཞིན་ཡོད་པའི་ངོས་འཛིན་བྱེད་ཀྱི་ཡོད་པ་རེད། ཕྱི་ལོ་ ༢༠༡༧ ལོར་འཛམ་གླིང་ཁྱོན་ཡོངས་ནས་གསར་འགོད་པ་ ༥༥ བསད་ཡོད་པ་དང་། ཕྱི་ལོ་ ༢༠༡༨ ལོའི་ནང་གཅིག་པུར་གསར་འགོད་པ་ ༧༤ ལྐོག་གསོད་ཐེབས་ཡོད་འདུག ད་ལོའི་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་གསར་འགོད་རང་དབང་སྙན་ཐོའི་ནང་འཛམ་གླིང་ཡོངས་སུ་གསར་འགོད་རང་དབང་ཆེས་སྐྱོ་བའི་རྒྱལ་ཁབ་ ༥ ནི་རྒྱ་ནག་དང་སེ་རི་ཡ། ཊཱར་ཁེ་མཱེ་ནཱེ་སི་ཐན། ཨེ་རེ་ཊི་རཱ། བྱང་ཀོ་རི་ཡ་བཅས་ཡིན་པ་གསལ་འདོན་གནང་འདུག

གསར་འགོད་པ། སངས་རྒྱས་དཀོན་མཆོག

The post གསར་འགོད་མཐུན་ཚོགས་ཀྱི་གསར་འགོད་གཟེངས་རྟགས་སྤྲད། appeared first on བོད་ཀྱི་དུས་བབ།.

རྒྱ་གར་གྱི་འོད་སྣང་དུས་ཆེན་སྐབས་ཤོག་སྦག་ཕོན་ཆེན་བཀད་པའི་རྐྱེན་གྱིས་མཁའ་རླུང་འབག་བཙོག་གི་ཚད་རིམ་མཐོ་ཤོས་སུ་བསླེབས་ནས་ལྡི་ལིར་ཛ་དྲག་མྱུར་སྐྱོབ་དགོས་པའི་བཀའ་ཁྱབ་བསྒྲགས།ཟླ་འདིའི་ཕྱི་ཚེས་ ༧ ཉིན་ནས་རྒྱ་གར་རྒྱལ་ཡོངས་ནང་འོད་སྣང་དུས་ཆེན་(Diwali)དུ་ཁེལ་ཡོད་པ་དང་། སྐབས་དེར་རྒྱ་གར་ས་ཕྱོགས་གང་སར་མཆོད་མེ་དང་གློག་ཁྲ་སྤར་བ། དེ་བཞིན་རྒྱུན་རིང་ནས་གོམས་སྲོལ་དུ་གྱུར་བའི་ཤོག་སྦག་ཕོན་ཆེན་བཀད་དེ་མཁའ་རླུང་འབག་བཙོག་ཐེབས་པའི་གནས་ཚུལ་ལོ་རེ་བཞིན་ཚབས་ཆེ་རུ་འགྲོ་བཞིན་ཡོད་སྟབས། འདི་ལོར་རྒྱ་གར་གྱི་ཆེས་མཐོའི་ཁྲིམས་ཞིབ་ཁང་གིས་འོད་སྣང་དུས་ཆེན་སྐབས་དགོང་མོའི་ཆུ་ཚོད་ ༨ ནས་ ༡༠ བར་གྱི་ཆུ་ཚོད་གཉིས་རིང་། འོད་མདངས་དང་གནོད་རྫས་ཉུང་ཞིང་། ཚགས་སྒྲ་ཆུང་བའི་ཤོག་སྦག་ལྗང་ཁུའི་རིགས་(Green Crackers) མ་གཏོགས་བཀད་མི་ཆོག་པའི་ཡོངས་ཁྱབ་བཀའ་རྒྱ་བསྒྲགས་ཡོད་ཀྱང་། མི་མང་གིས་དོ་འཁུར་མ་བྱས་པར་རྒྱུན་རིང་ཤོག་སྦག་བཀད་པར་བརྟེན། ཁ་སང་ཕྱི་ཚེས་ ༨ ཉིན་ལྡི་ལིའི་ཞོགས་པའི་མཁའ་རླུང་གནོད་ཚབས་ཆེ་བའི་རྫས་རྡུལ་གྱིས་བཏུམས་ཏེ། ལོ་འདིའི་མཁའ་རླུང་འབག་བཙོག་གི་ཚད་རིམ་མཐོ་ཤོས་སུ་བསླེབས་ཡོད་པ་རེད།

རྒྱ་གར་རླུང་ཁམས་སྤུས་ཚད་དང་གནམ་གཤིས་སྔོན་བརྡ་ཞིབ་འཇུག་བསྟི་གནས་ཁང་གིས་སྤེལ་བའི་གནས་ཚུལ་ལྟར་ན། འོད་སྣང་དུས་ཆེན་རྗེས་ལྡི་ལིའི་མཁའ་རླུང་སྤུས་ཚད་ཉེན་བྲལ་ཚད་གཞི་ལས་ལྡབ་བཅུ་འཕར་ཡོད་པ་དང་། ས་ཁུལ་རེ་འགར་མཁའ་རླུང་སྤུས་ཚད་ ༩༩༩ ལ་ཟིན་ཡོད་པ་དང་། རྒྱ་གར་འབག་བཙོག་སྟངས་འཛིན་ལྷན་ཁང་(Central Pollution Control Board)གིས་བརྗོད་ན། འོད་སྣང་དུས་ཆེན་གྱི་དགོང་དྲོའི་ཆུ་ཚོད་ ༧ པ་ཙམ་ནས་མཁའ་རླུང་འབག་བཙོག་ཏུ་འགྱུར་མགོ་བརྩམས་ཡོད་པ་དང་། དང་ཐོག་མཁའ་རླུང་སྤུས་ཚད་ ༢༩༡ ནས་ཆུ་ཚོད་ ༡༠ པ་ཙམ་ལ་མཁའ་རླུང་སྤུས་ཚད་ ༢༩༦ ལ་འཕར་ཡོད་འདུག དེ་མིན་ལྡི་ལི་དང་ས་འབྲེལ་ཡིན་པའི་གྷུ་རུ་ག་རམ་དང་ཎོ་ཡ་ཌ་ས་ཁུལ་ཏུ་ཡང་མཁའ་རླུང་འབག་བཙོག་གི་ཚད་རིམ་མཐོན་པོར་བསླེབས་ཡོད་འདུག

རྒྱ་གར་རྒྱལ་ཡོངས་ནང་འོད་སྣང་དུས་ཆེན་གཙོས་པའི་དུས་ཆེན་ཆེ་ཁག་ནང་ཤོག་སྦག་བཀད་པའི་གོམས་སྲོལ་ཤུགས་ཆེན་ཡོད་པར་བརྟེན། རྒྱ་གར་ཆེས་མཐོའི་ཁྲིམས་ཞིབ་ཁང་གིས་གནོད་ཚབས་ཆེ་བའི་ཤོག་སྦག་རིགས་ཚོང་འགྲེམ་བཀག་པ་དང་། འོད་སྣང་དུས་ཆེན་སྐབས་ཆུ་ཚོད་གཉིས་རིང་མ་གཏོགས་ཤོག་སྦག་བཀད་མི་ཆོག་པའི་ཁྲིམས་བཟོས་པ་མ་ཟད། དབུས་དང་ལྡི་ལི་གཞུང་གིས་འོད་སྣང་དུས་ཆེན་དང་སྟབས་བསྟུན་གྱིས་ཕྱི་ཟླ་ ༡༡ པའི་ཚེས་ ༡ ནས་ ༡༠ བར་ཉིན་བཅུའི་རིང་ཁོར་ཡུག་འབག་བཙོག་གྱི་ལས་འགུལ་རིགས་ལ་སྟངས་འཛིན་ཚགས་ཚུད་ཡོང་ཆེད་དམིགས་བསལ་ལས་འགུལ་ཞིག་མགོ་བརྩམས་ཡོད་ཅིང་། ས་གནས་སོ་སོའི་ཉེན་རྟོག་རུ་ཁག་ངོས་ནས་ཀྱང་ཁྲིམས་ཞིབ་ཁང་གི་ཁྲིམས་སྒྲིག་ལག་བསྟར་དོན་འཁྱོལ་ཡོང་རྒྱུ་དང་། ཁྲིམས་འགལ་རིགས་ལ་གུ་ཡངས་མི་སྤྲོད་པའི་ཉེན་བརྡ་བཏང་ཡོད་འདུག

མཉམ་འབྲེལ་རྒྱལ་ཚོགས་འཕྲོད་བསྟེན་ལྷན་ཁང་(WHO)གི་ལོ་གཅིག་ནང་རླུང་ཁམས་འབག་བཙོག་གི་རྫས་ PM2.5. མང་ཤོས་ཀྱི་འཛམ་གླིང་གི་གྲོང་འཁྱེར་ ༢༠ ནང་རྒྱ་གར་གྱི་གྲོང་འཁྱེར་ ༩ ཡོད་པ་དང་། ལྡི་ལི་ནི་གྲོང་འཁྱེར་ ༢༠ ཁྲོད་ཀྱི་རླུང་ཁམས་འབག་བཙོག་གི་ཨང་རིམ་ ༦ པ་དེ་ཡིན་འདུག སྤྱིར་འོད་སྣང་དུས་ཆེན་སྐབས་རྒྱ་གར་བྱང་ཕྱོགས་ཁུལ་དུ་རླུང་ཁམས་འབག་བཙོག་གི་ཚད་རིམ་མཐོན་པོར་སོན་གྱི་ཡོད་པ་དེ། ཤོག་སྦག་བཀད་པ་ཁོ་ནས་མ་ཡིན་པར་དུས་སྐབས་དེར་པན་ཇབ་དང་ཧར་ཡ་ན་མངའ་སྡེའི་ནང་ས་ཞིང་མེར་བསྲེགས་བཏང་བའི་དུ་བ་དང་། ནམ་རྒྱུན་མོ་ཊའི་དུ་བ། འཛུགས་བསྐྲུན་དང་བཟོ་གྲྭ་ཁག་ནས་ཐོན་པའི་དུད་རྫས་རིགས་དང་། དེ་བཞིན་སྐབས་འཕྲལ་གནམ་གཤིས་ཀྱི་རྐྱེན་པས་འབག་རྫས་རྣམས་མཁའ་རླུང་ནང་འཁོར་བསྡད་པའི་རྐྱེན་གྱིས་ཡིན་འདུག

པ་སངས་ཚེ་རིང་།

The post ལྡི་ལིའི་མཁའ་རླུང་ལ་ཛ་དྲག་མྱུར་སྐྱོབ་བྱས། appeared first on བོད་ཀྱི་དུས་བབ།.

རྒྱ་ནག་གིས་འཕྲུལ་མི་གསར་འགྱུར་སྙན་སྒྲོན་པ་གཉིས་གསར་གཏོད་བྱས་ཏེ་ཤིན་ཧྭ་གསར་ཁང་གི་རྒྱ་སྐད་དང་དབྱིན་སྐད་ཀྱི་གསར་འགྱུར་སྒྲོག་སྦྱང་བྱེད་པར་བཀོལ་སྤྱོད་བྱེད་ཀྱི་ཡོད་འདུགཟླ་འདིའི་ཕྱི་ཚེས་ ༧ ནས་ ༩ བར་རྒྱ་ནག་ནང་འཛམ་གླིང་དྲ་རྒྱ་སྐོར་གྱི་ལོ་འཁོར་ཚོགས་ཆེན་ཚོགས་ཡོད་པ་དང་བསྟུན། རྒྱ་ནག་གཞུང་འབྲེལ་ཤིན་ཧྭ་གསར་ཁང་དང་དྲ་རྒྱ་འཚོལ་བཤེར་མ་ལག་ (Sogou.com) གཉིས་མཉམ་འབྲེལ་གྱིས་བཟོས་པའི་ཆེས་ཐོག་མའི་མི་གཟུགས་འཕྲུལ་ཆས་ཀྱི་གསར་འགྱུར་སྙན་སྒྲོན་པའི་ལས་ཀ་མགོ་འཛུགས་བྱས་ཡོད་པ་དང་། འཕྲུལ་མི་དེ་གཉིས་ཀྱིས་ཆེད་གཉེར་གསར་འགྱུར་སྙན་སྒྲོན་པ་ལྟར་གསར་འགྱུར་སྙན་སྒྲོན་བྱེད་ཐུབ་ཀྱི་ཡོད་པ་མ་ཟད། ལས་མཚམས་འཇོག་མི་དགོས་པར་ཉིན་མཚན་བསྟུད་མར་ལས་ཀ་བྱེད་ཐུབ་ཀྱི་ཡོད་སྐོར་བསྒྲགས་འདུག

ཆེས་མཐོའི་ལག་རྩལ་ལས་ཐོན་པའི་འཕྲུལ་མི་སྙན་སྒྲོན་པ་དེ་གཉིས་སྐྱེས་པའི་གཟུགས་སུ་བཟོས་ཤིང་།  མཆུ་སྒྲོས་འགུལ་སྟངས་དང་། ཉམས་འགྱུར་སོགས་མི་ངོ་མ་ཞིག་དང་འདྲ་བོ་ཡོད་ལ། ད་ལྟ་ཞིན་ཧྭ་གསར་ཁང་གི་རྒྱ་སྐད་དང་དབྱིན་སྐད་ཀྱི་གསར་འགྱུར་སྙན་སྒྲོན་པའི་ལས་ཀར་བཀོལ་བཞིན་ཡོད་པ་དང་། འཕྲུལ་མི་གསར་འགྱུར་སྙན་སྒྲོན་པ་གསར་གཏོད་བྱས་པ་དེས་གསར་འགྱུར་ལས་རིགས་ཁྲོད་འགྲོ་གྲོན་དང་ལས་ཚགས་ཉུང་འཕྲི་གཏོང་བར་ཕན་ཐོགས་ཆེན་པོ་ཡོད་སྐོར་བརྗོད་འདུག

ཁ་སང་དབྱིན་སྐད་ཀྱི་འཕྲུལ་མི་སྙན་སྒྲོན་པ་དེས་ཐོག་དང་པོར་གསར་འགྱུར་སྙན་སྒྲོན་བྱས་ཡོད་པ་དང་། ཁོས་ངོ་སྤྲོད་ནང་ངའི་མ་ལག་ནང་ཡི་གེ་ཆད་མེད་ངང་གཏགས་པ་ཡིན་ན། ངས་འབད་བརྩོན་ལྷོད་མེད་ངང་ཁྱེད་ཅག་ལ་གནས་ཚུལ་མཁོ་སྤྲོད་བྱ་ངེས་ཡིན་ལ། ངས་ཁྱེད་ཅག་ལ་གསར་འགྱུར་གྱི་ཉམས་མྱོང་གསར་པ་ཞིག་སྤྲོད་འདོད་ཡོད། ཅེས་བརྗོད་འདུག

ཨ་རིའི་ཨོ་སི་ཧྥོ་ཊི་གཙུག་ལག་སློབ་གཉེར་ཁང་ (University of Oxford) གི་སློབ་དཔོན་མེ་ཁལ་ཝུའུ་ཌིར་ཇི་ (Michael Wooldridge)ལགས་ཀྱིས་བྷི་བྷི་སི་གསར་ཁང་ལ། སྙན་སྒྲོན་པ་དེས་རང་བཞིན་གྱི་ཉམས་འགྱུར་སྟོན་ཐུབ་པར་འབད་བརྩོན་བྱས་འདུག་ན་ཡང་། བརྙན་དེར་སྐར་མ་འགའ་ལས་ལྟ་ཐུབ་རྒྱུ་ཁག་པོ་འདུག འཕྲུལ་མིའི་སྐད་ཆར་འགྱུར་ཁུག་མེད་པ་དང་གཙོ་འདོན་མི་བྱེད་པ། གདངས་གཅིག་ལས་མེད་པ་དང་། གལ་སྲིད་ང་ཚོས་འགུལ་རིས་ཤིག་ལ་བལྟས་པ་དང་བསྡུར་ཚེ། སྙན་སྒྲོན་པ་འདི་དང་ང་ཚོའི་བར་གྱི་འབྲེལ་བ་རྩ་བ་ནས་མཐུད་ཐུབ་ཀྱི་མེད་པ་རེད། ཅེས་བརྗོད་འདུག

སྤྱི་ཚོགས་དྲ་ལམ་ཊེ་ཝེ་ཊིར་ནང་སྙན་སྒྲོན་པ་དེས་སྙན་སྒྲོན་བྱས་པའི་བརྙན་ཐུང་འོག་མཆན་འདྲ་མིན་སྣ་ཚོགས་བཀོད་པའི་ནང་།  རེ་འགས་གཞུང་གིས་གནས་ཚུལ་ཚོད་འཛིན་བྱེད་ཀྱི་ཡོད་པ་དང་གནས་ཚུལ་དེ་རྒྱང་སྲིང་བྱེད་པར་མི་གཟུགས་འཕྲུལ་ཆས་ཤིག་དགོས་ཀྱི་ཡོད་པ་རེད་ཟེར་བ་དང་། འཛམ་གླིང་གི་མི་འབོར་ཆེ་ཤོས་རྒྱ་ནག་ལ་མི་གཟུགས་འཕྲུལ་ཆས་སྤྱོད་ཀྱིན་པ་ནི་མིའི་ལས་ཀར་མི་གཟུགས་འཕྲུལ་ཆས་ཀྱིས་བཙན་འཛུལ་བྱས་པ་མ་རེད་དམ། རྒྱ་ནག་གི་གསར་འགོད་པ་དང་མི་གཟུགས་འཕྲུལ་ཆས་ཀྱི་གསར་འགོད་པ་གཉིས་ཀྱི་བར་ལ་ཁྱད་པར་གང་ཡང་མཐོང་གི་མེད་ཚུལ་སོགས་ཟུར་ཟ་སྐྱོན་བརྗོད་བྱེད་མཁན་འདུག་ལ། ཡང་ལ་ལས་དཔེ་ཡག་པོ་འདུག་སྟེ་སྐད་དང་གདོང་གི་ཉམས་འགྱུར་བར་ཅུང་མཐུན་པོ་བྱུང་ན་འགྲིག་ཡོད་པ་དང་། ཁོང་ནི་མི་ངོ་མ་ཞིག་དང་ཁྱད་པར་མེད་སྐོར་སོགས་བརྗོད་ཀྱི་འདུག

གསར་འགོད་པ། ཀླུ་མགོན་ཐར།

The post འཕྲུལ་མི་གསར་འགྱུར་སྙན་སྒྲོན་པ་བཟོས། appeared first on བོད་ཀྱི་དུས་བབ།.

༄༅།། སློབ་གྲྭ་ཞེས་པའི་ཐ་སྙད་འདི་ཉེ་རབས་བོད་ཀྱི་སྤྱི་ཚོགས་ཁྲོད་བེད་སྤྱོད་ཆེ་ཤོས་ཀྱི་མིང་ཞིག་ཏུ་གྱུར་ཡོད་ཀྱང། ཐ་སྙད་འདིའི་བྱུང་རིམ་གྱི་ལོ་རྒྱུས་ལ་གཏིང་ཕྱིན་པར་ཞིབ་འཇུག་བགྱིས་པའི་དཔྱད་རྩོམ་ཚད་ལྡན་ཞིག་དེ་སྔོན་མཐོང་མ་མྱོང། ང་རང་གི་ཐོག་མའི་བསམ་ཚོད་ལ་ཐ་སྙད་འདི་དེ་སྔའི་བོད་ཀྱི་བསྟན་བཅོས་དང་མང་ཚོགས་ཀྱི་སྐད་ངག་གཉིས་ཀའི་ནང་བེད་སྤྱོད་མ་བྱས་པའི་ཐ་སྙད་གསར་པ་ཞིག་དང། དེ་ཡང་དུས་འགྱུར་རྗེས་སུ་རྒྱ་ཡིག་ནས་བོད་སྐད་ལ་འགྱུར་བའི་ཐ་སྙད་གསར་པ་ཞིག་ཡིན་ནམ་སྙམ་པའི་རྣམ་རྟོག་ཅིག་རྒྱུན་པར་ཡོད། འདི་ནི་ངའི་བསམ་ཚོད་ཙམ་མ་གཏོགས་ལུང་རིགས་ཀྱི་སྒྲུབ་བྱེད་གང་ཡང་འཚོལ་ཞིབ་བྱེད་ཐུབ་མེད། ང་དང་འདྲ་བའི་མི་མང་པོ་ཞིག་ལ་ཡང་ཐ་སྙད་འདི་རྒྱ་འགྱུར་གྱི་བརྡ་ཆད་གསར་པ་ཞིག་ཡིན་པའི་རྣམ་རྟོག་ཡོད་སྲིད།

The post བོད་ཀྱི་ལོ་རྒྱུས་ནང་སློབ་གྲྭ་ཞེས་པའི་མིང་ནམ་ཞིག་ལ་བྱུང་བ། appeared first on བོད་ཀྱི་དུས་བབ།.

རྩོམ་པ་པོ། ཇཱ་ཡ་དྷེ་ཝ་རན་ཌེ། Jayadeva Ranade

བོད་སྒྱུར་བ།  པ་སངས་ཚེ་རིང་།

འདི་ལོའི་ཕྱི་ཟླ་ ༡༠ པའི་ནང་རྒྱ་ནག་གི་ཕྱི་སྲིད་བློན་ཆེན་རྒྱ་གར་དུ་གྲོས་མོལ་བྱེད་དུ་མ་སླེབས་སྔོན་ཏག་ཏག་དེར་རྒྱའི་དམག་དཔུང་རེ་འགའ་ལ་དྭགས་བདེ་མཆོག་ཁུལ་དུ་འཛུལ་བ་དང་། དེ་བཞིན་ཉེ་ཆར་རྒྱ་གར་ཨ་རུ་ན་ཅལ་མངའ་སྡེའི་མཐའ་མཚམས་ནང་འཛུལ་བ་སོགས་པའི་རྐྱེན་གྱིས་རྒྱ་དཀར་ནག་གཉིས་ཀྱི་འབྲེལ་བ་དེ་ཛ་དྲག་ཏུ་འགྱུར་བཞིན་པར་བརྟེན། ཕྱི་ཟླ་ ༡༠ ཚེས་ ༢༢ ཉིན་རྒྱ་ནག་མི་མང་བདེ་འཇགས་ལས་ཁུངས་ཀྱི་བློན་ཆེན་དང་འཐུས་ཚོགས་ཀྲའོ་ཁེ་ཀྲི་(Zhao Kezhi)ཡིས་མགོ་འཁྲིད་པའི་གཞུང་འབྲེལ་འཐུབ་ཚབ་ ༢༠ རྒྱ་གར་རྒྱལ་ས་ལྡི་ལིར་རྒྱ་དཀར་ནག་གཉིས་ཀྱི་འབྲེལ་ལམ་སྐོར་ནས་གྲོས་མོལ་བྱེད་དུ་འབྱོར་ཡོད་ཀྱང་། གྲོས་མོལ་སྐབས་དེ་ལས་ལྡོག་སྟེ་༧གོང་ས་རྒྱལ་བ་རིན་པ་ཆེ་དང་བོད་དོན་སྐོར་ནས་གླེང་སློང་ཤུགས་ཆེར་བྱས་སོང་བ་དང་། སྟབས་ལེགས་པ་ཞིག་ལ་གྲོས་མོལ་སྐབས་རྒྱ་གར་ངོས་ནས་རྒྱ་ནག་དང་། ཨ་རུ་ན་ཅལ་མངའ་སྡེའི་ནང་སྲིད་བློན་ཆེན་དང་གྲོས་ཚོགས་འཐུས་མི་གཅིག་ལྕོག་ཡིན་པའི་ཀི་རན་རི་ཇི་ཇུ་(kiren Rijiju)གཉིས་ལ་དོ་ཕོག་སོང་ཡོང་སྙམ་པའི་ཞེད་སྣང་གིས་མགོ་མ་སྒུར་བར། སྐབས་དོན་ཛ་དྲག་གནད་དོན་རྣམས་སྦ་གསང་མེད་པའི་ཐོག་ནས་བཤད་ཐུབ་ཡོད། སྲིད་འཛིན་ཞི་ཅིང་ཕིན་ལ་མཚོན་ན། སྐབས་དེར་ཆེས་གལ་ཆེ་བའི་གནད་དོན་ནི་རྒྱ་དཀར་ནག་གི་འབྲེལ་ལམ་དེ་མ་ཡིན་པར་བོད་དོན་དང་། ༧གོང་ས་རྒྱལ་བ་རིན་པོ་ཆེ་དང་། ཡོང་རྒྱུའི་རྒྱ་གར་རྒྱལ་ཡོངས་ཀྱི་འོས་བསྡུའི་སྐོར་ནས་ཡིན་འདུག

ལོ་ན་ ༦༤ སོན་པའི་ཀྲའོ་ཁེ་ཀྲི་ལ་རྒྱ་གར་གྱི་ནང་སྲིད་བློན་ཆེན་རཇ་ཎཱཋ་སིང་གིས་ཐུག་འཕྲད་བྱས་ཡོད་པ་མ་ཟད། རྒྱ་གར་དུ་འབྱོར་སྐབས་རྒྱ་གར་གྱི་བདེ་སྲུང་སློབ་སྟོན་པ་དང་། སྲིད་བློན་གཉིས་ཀྱིས་བསུ་མ་བྱས་ཡོད་པ་དང་། གྲོས་མོལ་དེ་བརྒྱུད་རྒྱ་དཀར་ནག་བར་གནས་ཚུལ་དང་ལས་གཞི་བརྗེ་རེས། མཉམ་རུབ་ཀྱི་སྦྱོང་བརྡར་དང་། དེ་བཞིན་རང་བྱུང་གོད་ཆགས་ལ་གཡོལ་ཐབས་སོགས་ཀྱི་ཐད་ལ་བདེ་སྲུང་སྐོར་གྱི་འགན་རྒྱ་ཐོག་མ་དེ་བཞག་ཡོད་པ་ལས། ལག་ལེན་གྱི་གནད་དོན་གཞན་སྐོར་ནས་གྲོས་ཆོད་སོགས་བཞག་མེད་པ་རེད།

དེ་བཞིན་ཐེངས་འདིའི་གྲོས་མོལ་ནང་རྒྱ་ནག་ངོས་ནས་པ་ཀི་སི་ཐན་ལ་རྒྱབ་སྐྱོར་བྱེད་རྒྱུ་མཚམས་འཇོག་མ་བྱེད་བར་དུ་རྒྱ་དཀར་ནག་གཉིས་ཀས་མཉམ་རུབ་ཀྱི་ཐོག་ནས་འཇིགས་སྐུལ་དྲག་སྤྱོད་རྩ་མེད་གཏོང་རྒྱུའི་གྲོས་ཆོད་དང་གླེང་གཞི་འཇོག་ཐབས་མེད་ལ། གལ་ཏེ་རྒྱ་གར་གྱིས་གནད་དོན་དེའི་སྐོར་གླེང་སློང་བྱེད་པའི་དབང་དུ་བཏང་ན་ཡང་། རྒྱ་ནག་གིས་སྔར་བཞིན་རྒྱ་ནག་དང་པ་ཀི་སི་ཐན་བར་གྱི་ཚོང་འབྲེལ་དང་། བདེ་སྲུང་གི་གལ་གནད་ལ་ཁ་གཡར་ཏེ། རྒྱ་གར་ངོས་ནས་གང་མགྱོགས་པ་ཀི་སི་ཐན་དང་གྲོས་མོལ་སླར་གསོ་བྱས་ཏེ་ཀ་ཤི་མིར་གྱི་གནད་དོན་དེ་ཐག་གཅོད་བྱེད་དགོས་པའི་གནོན་ཤུགས་སྤྲད་ངེས་པ་ལྟ་བུ་ཡིན།

རྒྱ་ནག་གིས་བོད་དོན་དེ་གྲོས་མོལ་གྱི་གླེང་གཞི་གལ་ཆེན་ཞིག་ཏུ་རྩིས་ཡོད་པ་དང་། རྒྱ་ནག་གི་འཐུས་ཚབ་རྣམས་རྒྱ་གར་ལྡི་ལིར་གྲོས་མོལ་བྱེད་དུ་ཐོན་སྐབས། བོད་ནང་མཚོན་ན། རྒྱ་གཞུང་ནས་དམར་ཤོག་ཚོགས་པའི་ཤུགས་རྐྱེན་དང་། བདེ་འཇགས་དམག་མིས་སྟངས་འཛིན་ཤུགས་ཆེར་བྱེད་ཐབས། བོད་ཀྱི་ནང་བསྟན་ཆོས་ལུགས་དེ་ཀྲུང་གོའི་སྤྱི་ཚོགས་རིང་ལུགས་ཀྱི་ཁྱད་ཆོས་ལྡན་པ་ཞིག་ཏུ་གྱུར་ཐབས་ཀྱི་ལས་གཞི་འདྲ་མིན་སྣ་ཚོགས་སྤེལ་བའི་དུས་སྐབས་ཤིག་ཡིན་པ་དང་། ཀྲའོ་ཁེ་ཀྲི་ཡིས་རྒྱ་ནག་གི་གནས་བབ་གསལ་སྟོན་གྱི་ཆེད། ཏཱ་ལའི་བླ་མས་བོད་ནང་ཁ་བྲལ་བའི་ལས་འགུལ་སྤེལ་བཞིན་ཡོད་པར་སྐྱོན་བརྗོད་དང་རྒྱ་གར་ངོས་ནས་༧ཏཱ་ལའི་བླ་མར་ལས་འགུལ་འདིའི་རིགས་མི་སྤེལ་རྒྱུའི་གནོན་ཤུགས་སྤྲད་དགོས་ཚུལ་བརྗོད་ཡོད་པ་དང་། དེ་མིན་ཉེ་སྔོན་ཕྱི་ཟླ་ ༡༠ ཚེས་ ༡༡ ཉིན་ཧྥ་རན་སིར་རྒྱ་གཞུང་དང་༧ཏཱ་ལའི་བླ་མ་གཉིས་ཀས་ངོས་འཛིན་བྱས་པའི་ཀརྨ་པ་དབུ་རྒྱན་འཕྲིན་ལས་རྡོ་རྗེ་དང་ཀརྨ་མ་པ་མཐའ་ཡས་འཕྲིན་ལས་རྡོ་རྗེ་གཉིས་ཀྱི་མཇལ་འཕྲད་སྐོར་ནས་ཀྱང་དོ་སྣང་ཆེན་པོ་བྱེད་ཀྱི་འདུག ཉེ་ཆར་གྱི་གསར་འགྱུར་ཁག་ནང་ཀརྨ་པ་དབུ་རྒྱན་འཕྲིན་ལས་རྡོ་རྗེ་རྒྱ་གར་དུ་གནས་སྡོད་བྱེད་རྒྱུར་འདོད་པ་མེད་སྟབས། ཕྱི་རྒྱལ་ཌོ་མི་ནི་ཁའི་(Dominica)མི་སེར་ལག་འཁྱེར་བླངས་ཡོད་སྐོར་གྱི་གནས་ཚུལ་ཐོན་པ་དེས་རྒྱ་གཞུང་གིས་ཀརྨ་པའི་ཐད་ལ་དོ་སྣང་སྔར་ལྷག་བྱེད་མགོ་བརྩམས་ཡོད་པ་དང་། ཁུངས་ལྡན་གྱི་གནས་ཚུལ་ལྟར་ན། རྒྱ་གཞུང་གིས་ཀརྨ་པ་དབུ་རྒྱན་འཕྲིན་ལས་རྡོ་རྗེ་ནིའུ་ཇར་སི་(New Jersey) རུ་གནས་བཞུགས་སྐབས་རྒྱ་ནག་དང་འདུམ་སྒྲིག་བྱེད་རྒྱུའི་བསམ་ཚུལ་གཏོན་ཡོད་ཚུལ་ཤེས་རྟོགས་བྱུང་། ཕྱི་ཟླ་ ༡༠ ཚེས ༢༢ ཉིན་གྱི་རྒྱ་དཀར་ནག་གཉིས་ཀྱི་གྲོས་མོལ་སྐབས་རྒྱ་གར་གྱི་བཙན་བྱོལ་བོད་མི་རྣམས་ཀྱིས་རྒྱ་ནག་གཞུང་ཚབ་ཁང་གི་མདུན་དུ་ངོ་རྒོལ་སྐད་འབོད་ཀྱང་བྱས་སོང་།

གྲོས་མོལ་སྐབས་བོད་དོན་སྐོར་གླེང་སློང་བྱེད་མཁན་གཙོ་བོར་བོད་རང་སྐྱོང་ལྗོངས་ཀྱི་མི་དམངས་བདེ་འཇགས་ལས་ཁུངས་ཀྱི་འགན་འཛིན་ཀྲང་ཧོང་པོ་(Zhang Hongpo)དང་། རྒྱ་ནག་ཕྱི་སྲིད་ལས་ཁུངས་ཀྱི་ལྕམ་ཧོའུ་དབྱང་ཆི་(Hou Yangqi)ཡིན་འདུག ཀྲང་ཧོང་པོ་ལྟ་བུར་མཚོན་ན། ཁོ་སི་ཁྲོན་དུ་སྐྱེས་པའི་ཧན་མི་རིགས་ཤིག་ཡིན་པ་དང་། ཕྱི་ལོ ༡༩༨༥ ལོར་རྒྱ་ནག་དམར་ཤོག་ཚོགས་པར་ཞུགས་ཡོད་པ་དང་། ཕྱི་ལོ་ ༡༩༨༢ ལོ་ནས་བཟུང་བོད་རང་སྐྱོང་ལྗོངས་ནང་ལས་ཀ་བྱེད་མུས་ཡིན་འདུག ཁོ་ལ་བདེ་སྲུང་སྐོར་ནས་ཉམས་མྱོང་ཆེན་པོ་ཡོད་པ་མ་ཟད། ཕྱི་ལོ་ ༢༠༡༨ ལོའི་ཟླ་ ༧ པའི་ནང་བོད་རང་སྐྱོང་ལྗོངས་ཀྱི་མི་དམངས་བདེ་འཇགས་ལས་ཁུངས་ཀྱི་འགན་འཛིན་དུ་མ་བཀོད་གོང་། པཎ་ཆེན་བླ་མའི་བླ་སྦྲང་གི་རྟེན་གཞི་གཞིས་ཀ་རྩེ་རྫོང་གི་རྫོང་དཔོན་གྱི་ལས་གནས་འཁུར་ཡོད་པ་དང་། ཀྲང་ཧོང་པོ་ལ་རྒྱ་གར་དང་ཕྱི་རྒྱལ་དུ་ཡོད་པའི་བོད་པའི་གྲྭ་བཙུན་དང་རྒྱ་ནག་གི་མགོ་མཁྲིད་བར་གྱི་འབྲེལ་ལམ་སོགས་པའི་བོད་དོན་སྐོར་གྱི་གནས་ཚུལ་ཐད་རྒྱུས་ལོན་ཆེན་པོ་ཡོད། ཀི་སི་ཐན་དང་ཨབ་གྷ་ནི་སི་ཐན་སྐོར་གྱི་ཆེད་མཁས་པ་ལྕམ་ཧོའུ་དབྱང་ཆི་ལྟ་བུར་མཚོན་ན། རྒྱ་ནག་ཕྱི་འབྲེལ་ལས་ཁུངས་ཀྱི་ཁོངས་གཏོགས་ཕྱི་འབྲེལ་བདེ་སྲུང་ཚན་པའི་ནང་ལས་ཀ་བྱེད་སྐབས། ཕྱི་རྒྱལ་ཁག་ཏུ་ཡོད་པའི་བོད་པའི་སྐོར་ལ་རྟོག་ཞིབ་བྱེད་ཀྱི་ཡོད་སྟབས། བོད་དང་ཡུ་གུར་གྱི་གནད་དོན་སྐོར་ལ་ཤེས་རྟོགས་ཆེན་པོ་ཡོད།

ཉེ་བའི་ལོ་ཤས་རིང་ནས་རྒྱ་ནག་གཞུང་གིས་བོད་དོན་ཐད་དོ་སྣང་སྔར་ལས་ལྷག་པ་བྱེད་ཀྱི་ཡོད་པ་དང་། ཀྲའོ་ཁེ་ཀྲི་ཡུན་རིང་ནས་སྲིད་འཛིན་ཞི་ཅིན་ཕིང་གི་བློ་འཁེལ་བའི་ཕྱི་སྲིད་བདེ་སྲུང་གི་བློན་ཆེན་ཡིན་པའི་ཆ་ནས། གྲོས་མོལ་འདི་ལས་བྱུང་བའི་བསམ་ཚུལ་རྣམས་ཀྱིས་རྒྱ་ནག་གི་རྒྱ་གར་དུ་འཛིན་པའི་སྲིད་བྱུས་ལ་འགྱུར་བ་ཆེན་པོ་བྱུང་སྲིད་པ་ལྟ་བུ་ཡིན།

* ཇ་ཡ་རན་ཌེ་ནི་རྒྱ་གར་དབུས་གཞུང་གི་དྲུང་ཆེ་ཟུར་པ་དང་། ད་ལྟ་རྒྱ་ནག་དབྱེ་ཞིབ་དང་འཐབ་བྱུས་བསྟི་གནས་ཁང་(Centre for China Analysis and Strategy)གི་འགན་འཛིན་ཡིན།

The post རྒྱ་གཞུང་གིས་བོད་དོན་ཐོག་དོ་སྣང་སྔར་ལྷག་བྱེད་ཀྱི་འདུག appeared first on བོད་ཀྱི་དུས་བབ།.

ཨ་རིའི་མངའ་སྡེ་ཁ་ལི་ཧྥོ་ནེ་ཡའི་ནང་ཉིན་གྲངས་མང་པོར་མེ་སྐྱོན་བྱུང་སྟེ་ཉུང་མཐར་ཡང་མི་གྲངས་ ༣༡ རྐྱེན་འདས་དང་། མི་ ༢༠༠ ལྷག་བོར་བརླག ཁང་པ་ ༦༧༠༠ ལྷག་མེས་འཚིག་ཡོད་འདུག ཟླ་འདིའི་ཕྱི་ཚེས་ ༨ ཉིན་ནས་བཟུང་ཨ་རིའི་མངའ་སྡེ་ཁ་ལི་ཧྥོ་ནེ་ཡའི་བྷ་ཊི་(Butte)རྫོང་པཱ་རཱ་ཌི་སི་(Paradise)གྲོང་ཚོ་ནས་མགོ་འཛུགས་ཏེ། མངའ་སྡེ་དེའི་ལྷོ་བྱང་གཉིས་སུ་ས་ཁྱོན་ཨེ་གར་གྲུ་བཞི་མ་འབུམ་ ༡།༡ ལྷག་ལ་མེ་སྐྱོན་ཤོར་ཏེ། ཉུང་མཐར་ཡང་མི་གྲངས་ ༣༡ རྐྱེན་འདས་དང་། མི་ ༢༠༠ ལྷག་བོར་བརླག ཁང་པ་ ༦༧༠༠ ལྷག་མེས་འཚིག་ཡོད་པ་དང་། ཡུལ་མི་འབུམ་ ༣ ལྷག་ཛ་དྲག་ངང་གནས་སྤོར་དགོས་བྱུང་ཡོད་པ་རེད་འདུག རླུང་ཤུགས་ཆེ་བའི་རྐྱེན་གྱིས་ད་ལྟའང་མེ་གསོད་མ་ཐུབ་པར་མུ་མཐུད་འབར་གྱི་ཡོད་པ་དང་། མངའ་སྡེ་ཡོངས་ཀྱི་མི་མང་གིས་ཡིད་གཟབ་དགོས་པའི་ཛ་དྲག་ཉེན་བརྡ་བཏང་འདུག

ཁ་ལོ་ཧྥོ་ནེ་ཡའི་ནགས་ཚལ་དང་མེ་སྐྱོན་སྲུང་སྐྱོབ་ཚན་པའི་སྤྱི་ཁྱབ་འགན་འཛིན་སི་ཁོ་ཊི་ཇལ་བྷར་ཊི་(Scott Jalbert)ལགས་ཀྱིས།  གཟའ་མཇུག་འདིར་ཁ་ལི་ཧྥོ་ནེ་ཡའི་ནང་མེ་སྐྱོན་ཚབས་ཆེན་བྱུང་སྟེ་ཁང་པ་སྟོང་ཕྲག་མང་པོ་མེས་འཚིགས་པ་དང་།  མི་མང་པོ་རྐྱེན་འདས་དང་མེ་གསོད་རུ་ཁག་གི་མི་ ༥ ལ་རྨས་སྐྱོན་ཕོག་ཡོད། ཅེས་བརྗོད་འདུག

ཁ་ལི་ཧྥོ་ནེ་ཡ་མངའ་སྡེའི་མགོ་འཁྲིད་ཇེ་རེ་བྷི་རོན་(Jerry Brown)ལགས་ཀྱིས་སྲིད་འཛིན་ཊོམ་ཕུར་ཞུ་ཡིག་ཅིག་བཏང་སྟེ། ཁ་ལི་ཧྥོ་ནེ་ཡ་མངའ་སྡེར་ཨ་རིའི་གཞུང་ནས་ཛ་དྲག་རོགས་སྐྱོར་བྱེད་དགོས་པའི་རེ་སྐུལ་ཞུས་ཡོད་ནའང་། ཊོམ་ཕུས་ནགས་ཚལ་དོ་དམ་ཡག་པོ་བྱས་ཚེ། ང་ཚོས་མེ་སྐྱོན་འདི་སེལ་ཐུབ་ཀྱི་ཡོད། དེར་བརྟེན། རིག་པ་སྒྲིམ་དགོས་ཞེས་ཁ་ལི་ཧྥོ་ནེ་ཡའི་ནགས་ཚལ་དང་མེ་གསོད་རུ་ཁག་གིས་དོ་དམ་དང་ལས་འགན་སྒྲུབ་ཕྱོགས་ཡག་པོ་མེད་སྐོར་བརྗོད་ཡོད་འདུག

བརྒྱུད་ལམ་ཁག་གི་གནས་ཚུལ་ནང་། ད་ལན་གྱི་མེ་སྐྱོན་ཟླ་འདིའི་ཕྱི་ཚེས་ ༨ ཉིན་ཐོག་མར་(Paradise)གྲོང་ཚོ་ནས་མགོ་འཛུགས་ཀྱིས་གྲོང་ཚོ་ཁག་ ༨ ནང་ཉིན་གསུམ་རིང་བསྟུད་མར་འབར་ཡོད་པ་དང་།  མེ་སྐྱོན་འོག་གཙོ་ཆེ་བ་རི་དང་ཤིང་ནགས། ནགས་གསེབ་ཁྲོད་ཀྱི་ཁང་པ་སོགས་མེར་འཚིགས་ཡོད་པའི་ཁྲོད། ཨ་རིའི་གཞས་པ་དང་གློག་བརྙན་འཁྲབ་སྟོན་པ་ཁག་ཅིག་གི་ཁང་པའང་མེས་འཚིགས་ཡོད་འདུག་ལ། དེ་བཞིན། ཁ་ལི་ཧྥོ་ནེ་ཡའི་ཚོང་འགྲེམས་ཀྱི་ལྟེ་གནས་ཁང་ ༢༦༠ ལྷག་མེར་འཚིགས་ཡོད་སྐོར་སོགས་བརྗོད་འདུག

ཁ་ལི་ཧྥོ་ནེ་ཡ་ནི་ནགས་ཚལ་རྒྱ་ཆེ་ཞིང་། རང་བྱུང་ཐོན་ཁུངས་ཕྱུག་པོ་ཡོད་པའི་མངའ་སྡེ་ཞིག་ཡིན་ཡང་། མེ་རི་སོགས་ཀྱིས་ལོ་ལྟར་མེ་སྐྱོན་ཚབས་ཆེན་བྱུང་བཞིན་ཡོད་སྟབས། རྒྱུན་པར་མེ་ཡི་དུས་ཚིགས་ཞེས་འབོད་སྲོལ་ཡོད་པ་ལྟར་དུས་ཚིགས་རེ་རེའི་ཁྲོད་མི་དང་རྒྱུ་དངོས་གཉིས་ལ་གྱོང་གུད་ཧ་ཅང་ཚབས་ཆེན་ཕོག་གི་ཡོད་འདུག འདི་ལོར་ཁ་ལི་ཧྥོ་ནེ་ཡའི་ནང་མེ་སྐྱོན་ཆེ་ཆུང་ཐེངས་ ༧༥༧༩ ཤོར་ཏེ་ས་ཁྱོན་ཨེ་ཀར་གྲུ་བཞི་མ་ས་ཡ་ ༡།༦ ལ་གནོད་སྐྱོན་ཐེབས་ཡོད་སྟབས། མེ་གསོད་དང་མི་དམངས་སྲུང་སྐྱོབ་སོགས་ཀྱི་ཆེད་འགྲོ་གྲོན་ཨ་སྒོར་ཐེར་འབུམ་ ༢།༩ ལྷག་བཏང་ཡོད་འདུག་ལ། འདི་ལོར་མེ་སྐྱོན་ཁྲོད་མི་ ༣༤ དང་མེ་གསོད་པ་མི་ ༦ བཅས་མི་གྲངས་ ༤༠ རྐྱེན་འདས་དང་མི་༤༤ ལ་རྨས་སྐྱོན་ཕོག་ཡོད་འདུག ན་ནིང་ལོ་དང་བསྡུར་ན་གནོད་སྐྱོན་ཅུང་ཆུང་བ་ཡོད་འདུག  ན་ནིང་མངའ་སྡེའི་ནང་རྒྱུ་རྐྱེན་སྣ་ཚོགས་འོག་མེ་སྐྱོན་ཐེངས་ ༩༡༣༣ བྱུང་སྟེ། ས་ཁྱོན་ཨེ་ཀར་གྲུ་བཞི་མ་ས་ཡ་ ༡།༣ ལྷག་མེས་འཚིགས་ཡོད་པ་དང་། མི་ ༤༧ རྐྱེན་འདས་དང་མི་ ༢༡༡ ལ་རྨས་སྐྱོན་བཟོས་པ་དང་།  སྲུང་སྐྱོབ་སོགས་ཀྱི་ཆེད་ཨ་སྒོར་ཐེར་འབུམ་ ༡༨ ཕྱིན་ཡོད་འདུག

གསར་འགོད་པ། སྐལ་བཟང་སྦྱིན་པ།

The post ཁ་ལི་ཧྥོ་ནེ་ཡའི་ནང་མེ་སྐྱོན་ཚབས་ཆེན་བྱུང་། appeared first on བོད་ཀྱི་དུས་བབ།.

རྒྱལ་བ་༧ཀརྨ་པ་རིན་པོ་ཆེ་མཆོག་བླ་ཆེན་རྣམ་པའི་ཚོགས་ཆེན་ཐོག་ཕེབས་འཆར་གྱིས་ཨ་རིའི་ནང་ཡོད་པའི་རྒྱ་གར་གཞུང་ཚབ་ཁང་ལ་ཐོངས་མཆན་ཞུས་ཏེ་གྲོས་བསྡུར་འགྲོ་བཞིན་པ་ཡིན་སྐོར་བརྗོད་བྱུང་།
གསར་འགྱུར་བརྒྱུད་ལམ་ཁག་དང་སྤྱི་ཚོགས་དྲ་ལམ་ཁག་ཏུ་རྒྱལ་བ་༧ཀརྨ་པ་རིན་པོ་ཆེ་མཆོག་གིས་ཌོ་མི་ནི་ཁ་(Dominica)རྒྱལ་ཁབ་ཀྱི་མི་སེར་ལག་འཁྱེར་བཞེས་པར་བརྟེན། ཟླ་འདིའི་ཕྱི་ཚེས་ ༢༩ ནས་ཕྱི་ཟླ་ ༡༢ ཚེས་ ༡ ཉིན་བར་བཞུགས་སྒར་དྷ་རམ་ས་ལར་འཚོགས་འཆར་ཡོད་པའི་བླ་ཆེན་ཁག་གི་ལྷན་ཚོགས་ཐོག་ཕེབས་པར་རྒྱ་གར་གཞུང་ནས་ནང་འཛུལ་ཐོངས་མཆན་སྤྲོད་ཀྱི་མེད་པའི་གནས་ཚུལ་ཐོན་པ་ལྟར། འདི་གའི་གསར་འགོད་པས་མཚུར་ཕུ་བླ་བྲང་གི་དྲུང་ཆེ་ཀརྨ་རྡོ་རྗེ་རྣམ་རྒྱལ་ལགས་སུ་ཞལ་པར་བརྒྱུད་བཀའ་འདྲི་ཞུས་པར་གནས་ཚུལ་དེ་ཚོ་བདེན་པ་མིན་སྐོར་བརྗོད་བྱུང་།

མཚུར་ཕུ་བླ་བྲང་གི་དྲུང་ཆེ་ཀརྨ་རྡོ་རྗེ་རྣམ་རྒྱལ་ལགས་ཀྱིས་གསར་འགོད་པར། གནས་ཚུལ་དེ་དག་ཁུངས་ལྡན་མིན་ལ། གནས་ཚུལ་དེ་རིགས་ཀྱིས་སྤྱི་ཚོགས་ནང་གོ་ནོར་ཐེབས་འཇུག་གི་འདུག རིན་པོ་ཆེ་མཆོག་གིས་ཕྱི་རྒྱལ་ཌོ་མི་ནི་ཁའི་མི་སེར་ལག་འཁྱེར་བཞེས་ཡོད་པ་མ་ཟད། ཟླ་འདིའི་ཕྱི་ཚེས་ ༢༩ ནས་ཟླ་ ༡༢ པའི་ཚེས་ ༡ བར་དྷ་རམ་ས་ལར་འཚོགས་གཏན་འཁེལ་བའི་བླ་ཆེན་ཁག་གི་ཚོགས་འདུའི་ཐོག་ཕེབས་ཆེད། ཨ་རིའི་ནང་ཡོད་པའི་རྒྱ་གར་གཞུང་ཚབ་ཁང་ལ་ཐོངས་མཆན་ཞུས་ཡོད་པ་དང་། ད་ལྟའི་ཆར་གཞུང་ཚབ་ཁང་གི་འགྲོ་སྟངས་ཤིག་གི་ཆ་ནས་སྤྲད་མེད་པ་ལས། རྩ་བ་ནས་སྤྲད་རྒྱུ་མིན་པའི་ཐག་གཅོད་གང་ཡང་གནང་མེད་ལ། ད་ལྟའི་ཆར་འབྲེལ་ཡོད་གོང་རིམ་དང་གྲོས་བསྡུར་བྱེད་བཞིན་པའི་སྒང་ལ་ཡོད། ཅེས་བརྗོད་བྱུང་།

ཡང་བརྒྱུད་ལམ་ཁག་ནང་རྒྱལ་བ་༧ཀརྨ་པ་རིན་པོ་ཆེ་མཆོག་གིས་ཌོ་མི་ནི་ཁའི་མི་སེར་ལག་འཁྱེར་བཞེས་པའི་རྐྱེན་གྱིས་རྒྱ་གར་གཞུང་ནས་བོད་མི་སྐྱབས་བཅོལ་བར་གནང་བའི་ཕྱི་བསྐྱོད་ལག་འཁྱེར་ (IC)ཕྱིར་སློག་གནང་ཡོད་ཀྱང་བླངས་མེད་སྐོར་ཡོང་བཞིན་པའི་སྐོར་ལ་ཁོང་གིས། གནས་ཚུལ་དེ་ཡང་ཁུངས་ལྡན་ཞིག་རྩ་བ་ནས་མིན་པ་དང་། རིན་པོ་ཆེ་མཆོག་གིས་རྒྱ་གར་གཞུང་གི་ཁྲིམས་ལུགས་ལྟར། ཕྱི་བསྐྱོད་ལག་འཁྱེར་སེར་པོ་དེ་ཨ་རིའི་རྒྱ་གར་གཞུང་ཚབ་ཁང་བརྒྱུད་ཕྱིར་སློག་གནང་ཡོད་ཀྱང་། གཞུང་ཚབ་ཁང་རང་གིས་འགྲོ་ལུགས་ཏན་ཏན་ཞིག་མ་ཤེས་པའི་རྐྱེན་གྱིས་ད་བར་འགོར་འགྱངས་སོང་བ་ལས། མི་ལེན་པའི་ཐག་གཅོད་གང་ཡང་བྱས་ཡོད་པ་མ་རེད། སྤྱིར་བོད་མི་ཕལ་ཆེ་བས་ལྡི་ལི་སྐུ་ཚབ་དོན་གཅོད་བརྒྱུད་ཕྱི་བསྐྱོད་ལག་འཁྱེར་ཕྱིར་སློག་བྱེད་ཀྱི་ཡོད་སྟབས། དེར་འགོར་འགྱངས་སོགས་ཀྱི་དཀའ་ངལ་གང་ཡང་མེད་ཀྱང་ད་ཐེངས་ཨ་རིའི་རྒྱ་གར་གཞུང་ཚབ་བརྒྱུད་ཕུལ་ཡོད་པས་ཅུང་འགོར་འགྱངས་བྱུང་ཡོད་པ་རེད། ཅེས་བརྗོད་བྱུང་།

འདི་ལོའི་ཕྱི་ཟླ་ ༡༠ པའི་ཚེས་ ༡༡ ཉིན་ཧྥ་རན་སིའི་དབེན་གནས་ཤིག་ཏུ། རྒྱལ་བ་༧ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་དང་། ཀརྨ་པ་མཐའ་ཡས་རྡོ་རྗེ་རྣམ་གཉིས་ནས་མཇལ་འཕྲད་གནང་བར་བརྟེན། རྒྱ་དཀར་ནག་གཉིས་ཀས་རྒྱལ་བ་༧ཀརྨ་མཆོག་གི་སྐོར་ལ་དོ་སྣང་སྔར་ལྷག་བྱེད་པའི་མགོ་བཙུགས་ཡོད་པ་དང་། འདི་ལོའི་ཕྱི་ཟླ་ ༡༠ ནང་རྒྱ་གར་རྒྱལ་ལ་ལྡི་ལི་རུ་རྒྱ་དཀར་ནག་གི་འཐུས་ཚབ་བར་གྲོས་མོལ་གནང་སྐབས། རྒྱ་ནག་གི་འཐུས་ཚབ་རྣམས་ཀྱིས་ཀརྨ་པ་རྣམ་གཉིས་ཀྱི་མཇལ་འཕྲད་སྐོར་ནས་གླེང་སློང་མི་ཉུང་བ་ཞིག་བྱས་ཡོད་པ་དང་། ཡང་ཟླ་འདིའི་ཕྱི་ཚེས་ ༦ ཉིན་ཧིན་རྡུ་གསར་ཁང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཟླ་མཇུག་ཙམ་ལ་རྒྱ་གར་གྱི་རྒྱལ་སྲུང་སློབ་སྟོན་པ་ཨ་ཇི་ཏེ་ཌོ་ཝལ་(Ajit Doval)ལགས་རྒྱ་ནག་ནང་སྐོར་སྐྱོད་དུ་ཕེབས་འཆར་ཡོད་པ་ལྟར། ཁོང་མ་ཕེབས་གོང་ལ་བོད་དོན་རྟོག་ཞིབ་ཚན་པ་(Tibet Study Group)ནང་ཁུལ་ལ་ཀརྨ་པ་མཆོག་གི་མཇལ་འཕྲད་སྐོར་ལ་ཆེས་མཐོའི་ཚོགས་འདུ་ཞིག་བསྐོངས་ཡོད་པ་དང་། བོད་དོན་རྟོག་ཞིབ་ཚན་པ་དེས་ཆེད་དམིགས་རྒྱལ་བ་༧ཀརྨ་པ་མཆོག་གི་སྐོར་ལ་རྟོག་ཞིབ་བྱས་ཏེ་གྲུབ་དོན་རྣམས་དབུས་གཞུང་ལ་མཁོ་སྤྲོད་བྱེད་ཀྱི་ཡོད་འདུག

ཕྱི་ལོ་ ༢༠༠༠ ལོར་༧རྒྱལ་བ་ཀརྨ་པ་མཆོག་བཙན་བྱོལ་དུ་ཕེབས་པ་ནས་བཟུང་རྒྱ་གར་གཞུང་གིས་ཁོང་རྒྱ་གར་ནང་ལོགས་ནས་ཡར་མར་ཕེབས་པ་ལའང་སྟངས་འཛིན་གནང་ཡོད་ཀྱང་།  ཕྱི་ལོ་༢༠༠༨ ལོར་རྒྱལ་བ་ཀརྨ་པ་རིན་པོ་ཆེ་མཆོག་ཐེངས་དང་པོར་ཨ་རིར་ཕེབས་ཡོད་པ་དང་། དེ་ནས་ཡུ་རོབ་སོགས་སུ་ཕེབས་ཡོད་པ་རེད། མུ་དྷི་གཞུང་ནས་འབྲས་ལྗོངས་ཀྱི་རུམ་བཏེག་དགོན་ཕུད་པའི་རྒྱ་གར་རྒྱལ་ཡོངས་ཀྱི་ས་གནས་གང་དུའང་ཕེབས་ཀྱང་ཕེབས་ཆོག་སྐོར་གསུངས་ཡོད་པ་མ་ཟད། འདི་ལོའི་ཕྱི་ཟླ་ ༩ པའི་ནང་རྒྱ་གར་ནང་སྲིད་ལས་ཁུངས་ཀྱི་བོད་དོན་སློབ་སྟོན་པ་སྐུ་ཞབས་ཨཱ་མེཊ་བྷ་མཱ་ཐར(Amitabh Mathur)ལགས་ཀྱིས། རྒྱ་གར་གཞུང་ནས་༧རྒྱལ་དབང་ཀརྨ་པ་རིན་པོ་ཆེ་མཆོག་ལ་དོགས་པ་གང་ཡང་མེད་ལ། ཁོང་གི་བོད་དོན་འཐབ་རྩོད་ཀྱི་ཐུགས་སྐྱེད་དམ་བཅར་བློ་དོགས་མེད་ཀྱང་། ཁོང་ཕར་ཚུར་ཕེབས་སྐབས་སྐུའི་བདེ་འཇགས་སྲུང་སྐྱོབ་ལ་གྲ་སྒྲིག་ཡོང་ཆེད་རྒྱ་གར་གཞུང་ལ་སྙན་གསེང་ཞུ་དགོས་པ་ལས་ཆོག་མཆན་ཞུ་དགོས་ཀྱི་མེད་སྐོར་གསུངས་ཡོད་པ་རེད།

པ་སངས་ཚེ་རིང་།

The post རྒྱ་གར་གཞུང་གིས་ཐོངས་མཆན་མ་སྤྲད་པའི་སྐད་ཆ་དེ་བདེན་པ་མ་རེད་ཟེར། appeared first on བོད་ཀྱི་དུས་བབ།.

སང་ཉིན་ནས་འབྲི་ཆུའི་སྨད་རྒྱུད་ཀྱི་ཆུའི་བཞུར་ཤུགས་ཆེ་ཤོས་ཆགས་ཏེ་ཆུ་ལོག་འབྱུང་བའི་ཉེན་ཁ་ཧ་ཅང་ཆེ་བའི་ཉེན་བརྡ་བཏང་འདུགདེ་རིང་ཕྱི་ཚེས་ ༡༢ ཉིན། རྒྱ་ནག་གཞུང་ཕྱོགས་ནས་བསྒྲགས་པའི་གནས་ཚུལ་ལྟར་ན། དེ་རིང་ཞོགས་པའི་བོད་ནང་གི་ཆུ་ཚོད་ ༤ ཐོག འཇོ་མདའ་རྫོང་སྤོ་ལི་བལ་དཀར་གྲོང་ཚོའི་འབྲི་ཆུའི་འཁྱིལ་མཚོ་གློད་མགོ་བཙུགས་ཡོད་པ་དང་།  དེ་རིང་ཞོགས་པར་རྒྱ་གཞུང་གི་ཆུ་ལོག་འགོག་སྲུང་ཚན་པས་སང་ཉིན་ནས་འབྲི་ཆུའི་སྨད་རྒྱུད་ཀྱི་ཆུའི་བཞུར་ཤུགས་ཆེ་ཤོས་ཆགས་ཏེ་ཆུ་ལོག་འབྱུང་བའི་ཉེན་ཁ་ཧ་ཅང་ཆེ་པས་གཟབ་གཟབ་དགོས་པའི་ཛ་དྲག་གི་ཉེན་བརྡ་བཏང་འདུག

དེ་རིང་ཞོགས་པ་ནམ་ལངས་རྗེས་ཀྱི་ཡུལ་དངོས་བརྙན་ཐུང་ཞིག་ཏུ། འཁྱིལ་མཚོའི་ཁར་བརྐོས་པའི་ཡུར་བའི་ནང་དུ་ཆུ་ཕྲ་བོ་ཞིག་བཞུར་གྱི་ཡོད་པ་མཐོང་གི་འདུག་ལ། འདི་གའི་གསར་འགོད་པས་ཆུ་བཏང་རྗེས་ས་གནས་ཀྱི་གནས་སྟངས་ག་འདྲ་ཆགས་ཡོད་མེད་སོགས་འབྲེལ་ཡོད་མང་པོར་སྐད་ཆ་དྲིས་ཀྱང་། གཞུང་ཕྱོགས་ཀྱི་བརྒྱུད་ལམ་ནས་འཁྱིལ་མཚོ་གློད་རྒྱུ་ཡིན་པའི་གནས་ཚུལ་བསྒྲགས་པ་མ་གཏོགས་གཞན་ཤེས་རྟོགས་མ་བྱུང་སྐོར་བརྗོད་བྱུང་།

རྒྱ་ནག་གཞུང་ཕྱོགས་ནས་བསྒྲགས་པ་ལྟར་ན། ཕྱི་ཚེས་ ༨ ཉིན་ནས་ས་བརྐོ་འཕྲུལ་ཆས་ ༥ ཡུལ་དངོས་སུ་འབྱོར་ཏེ་ཡུར་བ་བརྐོས་ཡོད་པ་དང་། རི་ཉིལ་ཐེངས་གཉིས་པ་བྱུང་རྗེས་ལས་མི་ ༡༨༧༦ གིས་ཉིན་མཚན་བསྟུད་དེ་དཀའ་ལས་བརྒྱབས་ནས་འཇོ་མདའ་རྫོང་སྤོ་ལི་ཡུལ་དང་ཡུལ་ཚོའི་སློབ་གྲྭ། ཡུལ་མི་ ༣༤༢༠༠ ཙམ་གནས་སྤོར་བྱས་ཡོད་ན་ཡང་། ཁྱིམ་ཚང་ ༢༥ དང་གཞུང་གི་གྲོང་རྡལ་ཁང་རྩེག་གཅིག དེ་བཞིན་སློབ་གྲྭ་གཅིག་དང་སྨན་ཁང་གཅིག་བཅས་ཆུ་ལོག་གི་ཉེན་ཁའི་ནང་ལྷུང་ཡོད་ཚུལ་བསྒྲགས་ཡོད་ཀྱང་། ཕྱི་ཕྱོགས་སུ་བསླེབས་པའི་བརྙན་ཐུང་ནང་ཡུལ་ཚོ་དང་གཞུང་གི་ལས་ཁུངས་། སློབ་གྲྭ། གྲྭ་ཤག་མང་པོ་ཆུས་ནུབ་ཀྱི་ཡོད་པ་མ་ཟད། དགོན་པའི་འདུ་ཁང་མདུན་དུའང་ཆུ་བླུགས་ནས་ཉེན་ཁ་ཆེན་པོ་ཆགས་འདུག་པས་ཡུལ་མི་རེ་ངུ་བཞིན་ཡོད་པའང་གོ་ཡི་འདུགས་གནས་འབྲེལ་ཡོད་ཅིག་གིས་བརྗོད་པ་ལྟར་ན། གནས་སྤོར་བྱས་ཏེ་གཞུང་གི་སྡོད་གུར་ནང་ཡོད་པའི་ཡུལ་མི་ཚོར་སྟབས་བདེའི་ཐུག་པ་སོགས་བཟའ་བཏུང་ཙག་ཙིག་གིས་རོགས་རམ་བྱེད་ཀྱི་ཡོད་ཀྱང་། གནམ་གཤིས་ཇེ་གྲང་དུ་ཕྱིན་ནས་རི་མགོ་ཚང་མར་ཁ་བ་འབབ་ཀྱི་ཡོད་པས་གུར་ནང་དུ་སྡོར་པར་དཀའ་ངལ་ཆེན་པོ་ཡོད་པ་དང་། ད་ལོའི་དགུན་དུས་དེ་སྡོད་གུར་ནང་དུ་སྐྱེལ་བར་སེམས་འཁུར་ཆེན་པོ་བྱེད་ཡོད་སྐོར་དང་། འབྲི་ཆུ་འགག་པ་དང་ས་གནས་མི་མང་ལ་དཀའ་ངལ་མང་པོ་འཕྲད་ཀྱི་ཡོད་པའི་པར་རིས་སོགས་གང་བྱུང་ཕྱི་ལ་བསྒྲགས་མི་ཆོག་པ་དང་། གལ་སྲིད་བསྒྲགས་པ་ཡིན་ན་ཉེས་ཆད་གཅོད་རྒྱུ་ཡིན་པའི་ཉེན་བརྡ་བཏང་ཡོད་སྐོར་བརྗོད་བྱུང་།

སྤྱི་ཚོགས་དྲ་ལམ་ཁག་ནང་རི་ཉིལ་བྱུང་བའི་སྐོར་གྱི་བརྙན་ཐུང་ཞིག་འགྲོ་བཞིན་པའི་ནང་བོད་མི་ཞིག་གིས། འབྲི་ཆུ་འགག་ནས་དེ་རིང་བར་ཉིན་ ༧ འགོར་ཡོད་པ་དང་། ང་ཡོད་པའི་ས་ཆ་འདི་ནི་དཀར་མཛེས་ཁུལ་དཔལ་ཡུལ་རྫོང་འབྲི་ཤར་མཉམ་ལས་གྱི་ས་ཆ་རེད། ད་ལྟ་ས་ཆ་འདིའི་གནས་ཚུལ་གང་འདྲ་ཡོད་མེད་ནི། འབྲུ་ཆུའི་འོག་ཏུ་འབྲི་ཤར་གྱི་དུད་ཁ་ ༥༦ དང་ཞིང་ས་ཧ་ལམ་རྨིད་ (རྨིད་གྲུ་བཞི་མ་) ༣༠༠ ཁ་ལྷག དེ་བཞིན་འབྲོག་པའི་འཚེར་ས་དང་རྩྭ་ས་སོགས་ཧ་ལམ་རྨིད་ཁྲི་ ༡ ཡས་མས་ཙམ་ཆུའི་ཞབས་ལ་ནུབ་ཡོད་པ་རེད། ས་འདི་བརྒྱུད་ནས་འགྲོ་སའི་ལམ་ཁ་ཞིག་ཡོད་པ་རེད་དེ་བེད་མེད་ཆགས་འདུག ཅེས་བརྗོད་འདུག

ཡང་བརྙན་ཐུང་དེའི་ནང་མི་དེས་ཞི་ཅིན་ཕིན་གྱི་སྣེ་འཁྲིད་པའི་རྒྱ་གཞུང་དང་སི་ཁྲོན་ཞིང་ཆེན་དཔལ་ཡུལ་རྫོང་མི་མང་སྲིད་གཞུང་། གྲོང་རྡལ་འཛུགས་སྐྲུན་ཁང་བཅས་ཀྱིས་ས་གནས་མི་མང་སྡུག་བསྔལ་ལས་གྲོལ་ཐབས་དང་། དཀའ་ངལ་སེལ་ཐབས་བྱེད་དགོས་པའི་རེ་སྐུལ་བྱས་ཡོད་པ་དང་བསྟུན། ས་ཆ་དེའི་ཡར་མར་གཉིས་ནས་ཞིང་པའི་འབྲུ་མཛོད་དང་འབྲོག་ཁྱིམ་ཧ་ལམ་ ༣༠ ཙམ་ཆུས་ནུབ་སྟེ་མཐོང་རྒྱུ་མེད་པར་གྱུར་ཡོད་སྐོར་བརྗོད་འདུག

གསར་འགོད་པ། ཀླུ་མགོན་ཐར།

The post འབྲི་ཆུ་འགག་པ་གློད་ཡོད་པས་ཆུ་ལོག་རྒྱུག་ཉེན་འདུག appeared first on བོད་ཀྱི་དུས་བབ།.

The post ང་ཚོས་རྔན་པ་ཉོ་བྱེད་ཀྱི་དངུལ་རྣམས་ཞལ་འདེབས་སུ་ཕུལ་བ་ཡིན། appeared first on བོད་ཀྱི་དུས་བབ།.

ཉི་ཧོང་ནང་གནས་སྡོད་བོད་མི་དང་བོད་དོན་རྒྱབ་སྐྱོར་བ་སོགས་མི་གྲངས་བརྒྱ་ཕྲག་ལྷག་གི་ཕེབས་བསུའི་ཁྲོད་༧གོང་ས་རྒྱལ་བ་རིན་པོ་ཆེ་མཆོག་ཉི་ཧོང་ནང་ཞབས་སོར་བདེ་བར་བཀོད།ཟླ་འདིའི་ཕྱི་ཚེས་ ༡༢ ཉིན། ༧གོང་ས་རྒྱལ་བ་རིན་པོ་ཆེ་མཆོག་གི་ལྡི་ལི་ཁུལ་གྱི་མཛད་འཆར་རྣམས་ལེགས་པར་གྲུབ་ཏེ། སིངྒ་པུར་བརྒྱུད་ཉི་ཧོང་གི་གྲོང་ཁྱེར་ཡོ་ཀོ་ཧ་མའི་གནམ་ཐང་དུ་ཞབས་སོར་བདེ་བར་བཀོད་ཡོད་པ་དང་། གནམ་ཐང་དུ་ས་གནས་བོད་མི་དང་བོད་དོན་རྒྱབ་སྐྱོར་བ་སོགས་མི་གྲངས་བརྒྱ་ཕྲག་ལྷག་གི་ཕེབས་བསུའི་ཁྲོད་བཞུགས་གནས་མགྲོན་ཁང་དུ་ཕེབས་ཡོད་འདུག

་ཡང་སྐུ་སྒེར་དྲ་བའི་མཛད་འཆར་ལྟར་ན། ཟླ་འདིའི་ཕྱི་ཚེས་ ༡༤ ཉིན་གྱི་སྔ་དྲོར་ཉི་ཧོང་དང་ཤར་ཨེ་ཤི་ཡའི་སྐུ་ཚབ་དོན་གཅོད་ཁང་གིས་ཇི་ལྟར་གསོལ་བ་བཏབ་པ་ལྟར། ཡོ་ཁོ་ཧ་མ་རྒྱལ་ཡོངས་ཚོགས་ཁང་ (National Convention Hall of Yokohama) དུ་ཤེས་རབ་སྙིང་པོ་དང་རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པ། སློབ་དཔོན་ཀ་མ་ལ་ཤཱི་ལས་མཛད་པའི་སྒོམ་རིམ་བར་པ་བཅས་ཀྱི་ཆོས་འབྲེལ་བཀའ་དྲིན་བསྐྱང་རྒྱུ་ཡིན་འདུག

ཕྱི་ཚེས་ ༡༥ ཉིན་དད་ལྡན་ཆོས་ཞུ་བ་རྣམས་ལ་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་བཀའ་དྲིན་ཆེ་རྒྱུ་དང་། ཕྱི་ཚེས་ ༡༦ ཉིན་ཚན་རིག་མཁས་པ་གསུམ་གྱི་ནང་པའི་ཚན་རིག་དང་དེང་རབས་ཚན་རིག་བར་བགྲོ་གླེང་ལྷན་ཚོགས་ཐོག་ཆིབས་སྒྱུར་བཀའ་དྲིན་བསྐྱང་ནས་བཀའ་སློབ་སྩལ་རྒྱུ། ཕྱི་ཚེས་ ༡༧ ཉིན་ཤེས་རབ་སྐྱེད་ཚལ་གླིང་གི་གོ་སྒྲིག་འོག་ཧེ་བྷི་ཡ་ཚོགས་ཁང་(Hibiya Open Air Concert Hall)ནང་དུ་ང་ཚོ་ཚང་མ་ཁྱིམ་ཚང་གཅིག་ཡིན་ཞེས་པའི་བརྗོད་གཞིའི་ཐོག་གཞོན་སྐྱེས་ཚོར་བཀའ་སློབ་གནང་འཆར་ཡོད་པ་དང་། ཉི་ཧོང་ནང་གི་མཛད་འཆར་ཁག་གྲུབ་རྗེས་ཕྱི་ཚེས་ ༢༥ ཉིན་བཞུགས་སྒར་དུ་ཕྱིར་ཕེབས་རྒྱུ་ཡིན་འདུག

གསར་འགོད་པ། སངས་རྒྱས་དཀོན་མཆོག

The post ཉི་ཧོང་ནང་ཞབས་སོར་བདེ་བར་བཀོད། appeared first on བོད་ཀྱི་དུས་བབ།.

རྒྱ་ནག་གཞུང་གིས་རྔ་བ་ཁུལ་མཛོད་དགེ་རྫོང་ཁོངས་སུ་སྤྱི་ཚོགས་རིང་ལུགས་ཀྱི་རིན་ཐང་དར་སྤེལ་དང་དྲིན་དྲན་སློབ་གསོ་ཞེས་པའི་འོག་ང་ཡི་མེས་རྒྱལ་སེམས་ཁུངས་ན་ཡོད་ཅེས་པའི་ཆབ་སྲིད་བྱ་འགུལ་སྤེལ་བཞིན་འདུགརྔ་བ་ཁུལ་མཛོད་དགེ་རྫོང་སྲིད་གཞུང་གིས་སྤྱི་ཚོགས་རིང་ལུགས་ཀྱི་ཡང་སྙིང་རིན་ཐང་དར་སྤེལ་དང་ཏང་ཡོན་ལས་བྱེད་མང་ཚོགས་ཡོངས་ལ་རྒྱལ་གཅེས་ཆོས་གཅེས་ཀྱི་དྲིན་དྲན་སློབ་གསོ་ཟེར་བའི་ཆེད་དུ་ང་ཡི་མེས་རྒྱལ་སེམས་ཁུངས་ན་ཡོད་ཅེས་པའི་བྱ་འགུལ་ཞིག་སྤེལ་མགོ་བཙུགས་ཡོད་པ་དང་། བྱ་འགུལ་དེ་ད་ལྟའི་ཆར་མཛོད་དགེ་རྫོང་གི་ས་ཁུལ་མང་པོའི་ནང་སྤེལ་བཞིན་ཡོད་འདུག

དྲིལ་བསྒྲགས་སློབ་གསོ་ཟེར་བའི་སྐོར་གྱི་གཞུང་འབྲེལ་གསར་འགྱུར་ཞིག་གི་ནང་། སྤྲོ་སེམས་འཁོར་བའི་ངང་རྒྱལ་ཁབ་དབུ་བརྙེས་ནས་ལོ་འཁོར་ ༦༩ ལོན་པའི་རྟེན་འབྲེལ་ཞུ་བ་དང་ཆབས་གཅིག རྐྱང་ཚ་ཡུལ་ཚོའི་ཏང་སྲིད་གཞུང་གི་ལས་བཟོ་བ་ཡོངས་ཀྱིས་ཏང་དར་དམར་པོའི་འོག་ནས་རྒྱལ་གླུ་མཐོན་པོར་སྒྲོག་བཞིན་ཏང་གི་དམ་ཚིག་སྲུང་ནས་རྒྱ་ཆེའི་མང་ཚོགས་ཡོངས་ལ་རྒྱལ་གཅེས་ཆོས་གཅེས་ཀྱི་བག་ཆགས་ཟབ་མོ་བཞག་ཡོད། ཅེས་བཀོད་འདུག

རྐྱང་ཚ་ཡུལ་ཚོའི་མགོ་འཁྲིད་ཀྱིས། དེ་རིང་ང་ཚོ་རྐྱང་ཚ་ཡུལ་ཚོའི་ནང་ཁུལ་ནས་རྒྱ་དར་སྒྲེང་ཞིང་རྒྱལ་གླུ་སྒྲོག་ནས་ང་ཡི་མེས་རྒྱལ་སེམས་ཁུངས་ན་ཡོད་ཅེས་པའི་སློབ་གསོའི་བྱ་འགུལ་སྤེལ་བཞིན་ཡོད། ཏང་ཡོན་ལས་བྱེད་དང་ཞིང་བ་མང་ཚོགས་ཀྱིས་དགའ་བ་འཛུམ་གྱིས་བསུ་བཞིན་རྒྱལ་གཅེས་ཆོས་གཅེས་ཀྱི་བསྟོད་གླུ་མཐོན་པོར་སྒྲོག་ཞིང་མ་འོངས་པའི་གནད་འཁེལ་དབུལ་སྐྱོར་ལས་དོན་ངོས་ནས་གོང་འོག་ཚང་མའི་སྟོབས་ཤུགས་གཅིག་གྱུར་བྱས་ཏེ་སྣང་བརྙན་གསར་པ་བསྐྲུན་ངེས་པའི་རེ་བ་བཞག་སོང་། ཞེས་བརྗོད་འདུག

གཞན་ཡང་རྐྱང་ཚ་དགུ་རོང་སྡེ་བའི་མགོ་འཁྲིད་ཀྱིས། དེ་རིང་ང་ཚོའི་སྡེ་བའི་རྒྱལ་གླུ་ལེན་བཞིན་རྒྱལ་དར་མཐོན་པོར་སྒྲེང་ནས་ཏང་གི་ཡང་དག་པའི་སྲིད་ཇུས་འོག་ཡུལ་གྲོང་གཉོམ་ཆུང་ལས་འཛུགས་ངོས་ནས་སྐུལ་འདེད་བྱས་ཏེ་ཆུ་དང་ལམ་མེད་སར་དེ་དག་ཚང་མ་འཛོམས་པོ་བྱས་ནས་ས་གནས་མང་ཚོགས་ལ་ཅི་ནུས་གང་ལྕོགས་ཀྱིས་དམངས་ཕན་བྱ་བ་སྒྲུབ་དང་སྒྲུབ་བཞིན་ཡོད་ལ། མ་འོངས་བར་ད་དུང་མུ་མཐུད་དུ་དམངས་ལ་ཕན་པའི་བྱ་བ་སྒྲུབ་ངེས་ཡིན། ཞེས་བརྗོད་འདུག

རྒྱ་ནག་གཞུང་གིས་མཛོད་དགེ་རྫོང་ཁོངས་ཀྱི་དགོན་སྡེ་ཁག་མང་པོའི་ནང་དུས་རྒྱུན་རྒྱལ་གཅེས་ཆོས་གཅེས་དང་མེས་རྒྱལ་ལ་དགའ་ཞེན་ཟེར་བ་སོགས་ཀྱི་དྲིལ་བསྒྲགས་སློབ་གསོ་ཤུགས་ཆེར་སྤེལ་བཞིན་ཡོད་པ་དང་། དེ་བཞིན། ཉེ་སྔོན་མཛོད་དགེ་རྫོང་གི་ཁོངས་གཏོགས་དབུལ་ཁྱིམ་ཚོའི་ནང་དུ་རྒྱ་ནག་གཞུང་གི་མགོ་འཁྲིད་ཚོའི་འདྲ་པར་སྒྲིག་ཤོམ་དང་། རྒྱ་ནག་གི་དར་དམར་ཁང་ཐོག་ཏུ་སྒྲེང་བ་སོགས་བྱེད་བཅུག་ཡོད་འདུག

རྒྱ་ནག་གཞུང་གིས་ཕྱི་ལོ་ ༢༠༡༨ ལོ་ནི་བཅོས་སྒྱུར་སྒོ་འབྱེད་བྱས་ཏེ་ལོ་ ༤༠ དང་དམར་ཤོག་ཚོགས་པ་བཙུགས་ནས་ལོ་ངོ་ ༦༩ ལོན་པར་བརྟེན། ལོ་ངོ་དེ་དག་གི་རིང་ལ་གཞུང་གིས་མི་མང་ལ་ཕན་ཐོགས་མང་པོ་ཞིག་བསྒྲུབས་ཡོད་པ་དང་། གྲུབ་འབྲས་མང་པོ་ཞིག་ལེན་ཐུབ་ཡོད་སྐོར་སོགས་བརྗོད་ནས་བོད་ཀྱི་ས་ཁུལ་མང་པོའི་ནང་མིང་འདྲ་མིན་གྱི་འོག་ནས་ཆབ་སྲིད་དྲིལ་བསྒྲགས་ཀྱི་སློབ་གསོ་སྣ་ཚོགས་སྤེལ་བཞིན་ཡོད་འདུག

གསར་འགོད་པ། སངས་རྒྱས་དཀོན་མཆོག

The post ང་ཡི་མེས་རྒྱལ་སེམས་ཁུངས་ན་ཡོད། appeared first on བོད་ཀྱི་དུས་བབ།.

རྒྱལ་སྤྱིའི་ཉེས་ཡངས་ཚོགས་པས་འབར་མ་གཞུང་གི་སློབ་སྟོན་པ་ལྕམ་ཨང་སན་སུའུ་སྐྱིད་ལགས་ཀྱིས་མངོན་གསལ་དོད་པོའི་ཐོག་ནས་ཡང་དང་བསྐྱར་དུ་འགྲོ་བ་མིའི་གཞི་རྩིའི་རིན་ཐང་ལ་སྣང་མེད་བཏང་ཡོད་སྐོར་བརྗོད་དེ་ཤེས་རབ་ཕོ་ཉའི་གཟེངས་རྟགས་ཕྱིར་བསྡུ་བྱས།ཁ་སང་རྒྱལ་སྤྱིའི་ཉེས་ཡངས་ཚོགས་པས་གནས་ཚུལ་སྤེལ་བ་ལྟར་ན། ནོ་སྦེལ་ཞི་བདེའི་གཟེངས་རྟགས་ཐོབ་མཁན་ལྕམ་ཨང་སན་སུའུ་སྐྱིད་ལགས་ཀྱིས་སྤོབས་པ་དང་རེ་བ། འགྲོ་བ་མིའི་ཐོབ་ཐང་གི་འཐབ་རྩོད་པའི་ངོ་ཚབ་ཅིག་གནང་ཐུབ་ཀྱི་མེད་སྟབས། ཕྱི་ལོར་ ༢༠༠༩ ལོར་མོ་ལ་སྤྲད་པའི་རྒྱལ་སྤྱིའི་ཤེས་རབ་ཕོ་ཉའི་གཟེངས་རྟགས་ཕྱིར་བསྡུ་བྱས་ཡོད་པ་དང་། ལྕམ་ཨང་སན་སུའུ་སྐྱིད་ལགས་ཀྱིས་འགྲོ་བ་མིའི་ཐོབ་ཐང་སྲུང་སྐྱོབ་དོན་གཉེར་གནང་གི་མེད་པའི་ཉེས་མིང་འོག དེ་སྔོན་མོ་ལ་སྤྲད་པའི་གཟེངས་རྟགས་ཡོངས་གྲགས་ཐོག་ཕྱིར་བསྡུ་བྱས་པ་ཐེངས་གཉིས་པ་དེ་ཆགས་ཡོད་པ་རེད།

ཟླ་འདིའི་ཕྱི་ཚེས་ ༡༡ ཉིན་རྒྱལ་སྤྱིའི་ཉེས་ཡངས་ཚོགས་པའི་དྲུང་ཆེ་ཁོ་མི་ནེ་ཌུ་ (Kumi Naidoo) ཡིས། ལྕམ་ཨང་སན་སུའུ་སྐྱིད་ལགས་ལ་ཡིག་འཕྲིན་ཞིག་བཏང་སྟེ། གཟེངས་རྟགས་དེ་འབུལ་སྐབས་མོས་མུ་མཐུད་བཟང་སྤྱོད་ཐོག་ནས་མ་མཐའ་ཡང་འབར་མའི་ནང་གི་དྲང་བདེན་མིན་པའི་བྱ་སྤྱོད་ལ་ཁ་གཏད་གཅོག་པ་རྒྱུ་དེ་ཚོགས་པའི་རེ་བ་ཡིན་ཡང་། དེ་ལས་ལྡོག་ཏེ་ལོ་འགའི་རིང་མངོན་གསལ་དོད་པོའི་ཐོག་ནས་ཡང་དང་བསྐྱར་དུ་གཞི་རྩའི་རིན་ཐང་ལ་བསླུ་བྲིད་བཏང་བར་བློ་ཕམ་དང་སེམས་ཚབས་བྱུང་བས། མུ་མཐུད་ཚོགས་པ་དེས་མོ་ལ་ཤེས་རབ་ཕོ་ཉའི་གཟེངས་རྟགས་ཐོབ་མཁན་ཞིག་ལ་ངོས་འཛིན་བྱ་ཐབས་བྲལ་བར་བརྟེན། ཟླ་འདིའི་ཕྱི་ཚེས་ ༡༣ ཉིན་གཟེངས་རྟགས་ཀྱི་མཚན་གནས་ཕྱིར་བསྡུ་བྱས་པ་བསྒྲགས་པ་ཡིན་སྐོར་བརྗོད་འདུག

གཞུང་འབྲེལ་དྲ་ཐོག་ཏུ་བཀོད་པའི་གནས་ཚུལ་དེའི་ནང་། ཕྱི་ལོ་ ༢༠༡༦ ལོར་ཨང་སན་སུའུ་སྐྱིད་ལགས་འབར་མའི་མི་མང་གི་མགོ་འཁྲིད་དུ་གྱུར་པ་ནས་མོའི་འཛིན་སྐྱོང་གིས་མུ་མཐུད་འགྲོ་བ་མིའི་ཐོབ་ཐང་རྡོལ་རོལ་དང་། དམག་གི་དྲག་སྤྱོད་ཀྱིས་འབར་མའི་རཱ་ཁེན་མངའ་སྡེའི་ (Rakhine State) ནང་གི་ཁ་ཆེ་བ་རོ་ཧན་གྷ་གྲངས་ཉུང་མི་རིགས་སྟོང་ཕྲག་འགའ་བསད་པ་དང་བུད་མེད་ལ་བཙན་གཡེམ་བཏང་བ། སྐྱེས་པ་རྣམས་བཀག་ཉར་གྱིས་མནར་གཅོད་བཏང་བ་དང་སྡོད་གནས་བརྒྱ་ཕྲག་མང་པོ་མེར་བསྲེགས་པ། མི་གྲངས་འབུམ་ ༧ ལྷག་བྷང་ལ་ཌི་ཤི་ནང་སྐྱབས་བཅོལ་དུ་ཕྱིན་ཡོད་སྐོར་གྱི་གནས་ཚུལ་བཀོད་འདུག

ཡང་གནས་ཚུལ་དེའི་ནང་། འབར་མིའི་དབང་ཆ་དམག་མིས་བཟུང་ཡོད་ཀྱང་ལྕམ་ཨང་སན་སུའུ་སྐྱིད་ཀྱིས་སྣེ་འཁྲིད་པའི་མི་མང་གི་གཞུང་དེར་འགྲོ་བ་མིའི་ཐོབ་ཐང་སྲུང་སྐྱོབ་དང་སྨྲ་བརྗོད་རང་དབང་། མི་མང་ཞི་བའི་ངང་འདུ་འཛོམས་བྱེད་པ་སོགས་ཀྱི་ཁྲིམས་ལ་བསྐྱར་བཅོས་བྱེད་པའི་ཐོབ་ཐང་ཡོད་ནའང་། ད་ལྟ་ད་དུང་འབར་མིའི་ནང་འགྲོ་བ་མིའི་ཐོབ་ཐང་འཐབ་རྩོད་པ་དང་ཞི་བའི་འཐབ་རྩོད་པ། གསར་འགོད་པ་སོགས་ཀྱིས་རང་ཉིད་ཀྱི་ལས་ཀ་བྱས་པ་ཙམ་གྱིས་ཀྱང་འཛིན་བཟུང་བཙོན་འཇུག་དང་། ཉེན་བརྡ་བསུན་གཙེར། འཇིགས་སྐུལ་སོགས་བྱེད་ཀྱི་ཡོད་པ་རེད། ཅེས་བཀོད་འདུག

ཕྱི་ལོ་ ༢༠༠༩ ལོར་རྒྱལ་སྤྱིའི་ཉེས་ཡངས་ཚོགས་པས་ལྕམ་ཨང་སན་སུའུ་སྐྱིད་ལགས་ལ་ཤེས་རབ་ཀྱི་ཕོ་ཉའི་གཟེངས་རྟགས་ཕུལ་ཏེ། མོས་ཞི་བའི་ངང་དམངས་གཙོ་དང་འགྲོ་བ་མིའི་འཐབ་རྩོད་གནང་བར་ངོས་འཛིན་གནང་ཡོད་ན་ཡང་། སྐབས་དེར་མོ་གཞུང་གི་བཟང་བཙོན་འོག་ཡོད་པས་ཕྱི་ལོ་ ༢༠༡༢ ལོར་གཟེངས་རྟགས་དེ་བླངས་ཡོད་པ་རེད།  སྐབས་དེར་མོས་རྒྱལ་སྤྱིའི་ཉེས་ཡངས་ཚོགས་པའི་མིག་དང་སེམས་པ་གཉི་ག་ང་ཚོར་གཏད་དེ་རེ་བ་དང་ལོ་རྒྱུས་གཉིས་གཞི་གཅིག་ཏུ་འདྲིས་ནས་འབར་མ་ནང་བཟང་ཕྱོགས་ཀྱི་འགྱུར་བ་ཡོང་བར་རོགས་རམ་གནང་རོགས། ཞེས་བརྗོད་ཡོད་འདུག

རོ་ཧན་གྷ་ཡའི་གནད་དོན་བྱུང་རྗེས། ནོ་སྦེལ་ཞི་བདེའི་གཟེངས་རྟགས་ཀྱི་གཙོས་དེ་སྔོན་ལྕམ་ཨང་སན་སུའུ་སྐྱིད་ལགས་ལ་སྤྲད་པའི་གཟེངས་རྟགས་མང་པོ་ཞིག་ཕྱིར་བསྡུ་དགོས་པའི་གླེང་སློང་བྱུང་ཡོད་པ་ལྟར། ཕྱི་ལོ་ ༡༩༩༧ ལོར་དབྱིན་ཇིའི་དབུས་ལྷོད་རྒྱུད་ཀྱི་གྲོང་ཁྱེར་ཨོ་ཁུ་སི་ཧྥོ་ཌིས་ཨོ་ཁུ་ཧྥོ་ཌོ་རང་དབང་གཟེང་རྟགས(Oxford Freedom Award)ཞེས་པ་ཞིག་ལྕམ་ཨང་སན་སུའུ་སྐྱིད་ལགས་ལ་ཕུལ་ཡོད་པ་དེ་ཕྱིར་བསྡུས་བྱས་ཡོད་པ་རེད། གཟེངས་རྟགས་དེ་ལྕམ་སུའུ་སྐྱིད་ལགས་ཀྱིས་ལོ་མང་རིང་དམངས་གཙོའི་ཆེད་དུ་དཀའ་ངལ་ལ་གདོང་གཏད་ཀྱིས་འཐབ་རྩོད་བྱས་པར་ཆེད་བསྟོད་དུ་ཕུལ་བ་ཞིག་ཡིན་འདུག

གསར་འགོད་པ། ཀླུ་མགོན་ཐར།

The post ཤེས་རབ་ཕོ་ཉའི་གཟེངས་རྟཊ་ཕྱིར་བསྡུ་བྱས། appeared first on བོད་ཀྱི་དུས་བབ།.

འཛམ་གླིང་གི་པར་རིས་རྟོག་སྒྲུང་རྩོམ་པ་པོ་གྲགས་ཅན་དང་མཱར་ཝལ་པར་རིས་རྟོག་སྒྲུང་ཁང་གི་འགན་འཛིན་ཟུར་པ་སི་ཊི་ལི་ལགས་འདས་གྲོངས་སུ་ཕྱིན་ཡོད་པས་འཛམ་གླིང་གི་སྒྱུ་རྩལ་བ་སོགས་མི་མང་པོས་མྱ་ངན་ཞུས།རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་ཕྱི་ཚེས་ ༡༢ ཉིན་འཛམ་གླིང་ཐོག་ཧ་ཅང་སྐད་གྲགས་ཆེ་བའི་སྡོམ་འབུའི་མི་(Spider-man)དང་། མི་བོ་ཆེ་(Hulk) ལྕགས་མི།(Iron Man) ཐཱོར།(Thor) དང་ཨེག་སི་མཱེན་(X-men)སོགས་པར་རིས་རྟོག་སྒྲུང་རྩོམ་པ་པོ་གྲགས་ཅན་དང་། རྒྱལ་སྤྱིའི་མཱར་ཝལ་པར་རིས་རྟོག་སྒྲུང་ཁང་གི་འགན་འཛིན་ཟུར་པ་སྐུ་ཞབས་སི་ཊན་ལི་(Stan Lee)ལགས་ལོ་ ༩༥ ཐོག་ཨ་རིའི་ལོ་སི་ཨན་ཇི་ལེ་སི་མངའ་སྡེའི་(Los Angeles)སྨན་ཁང་ཞིག་ཏུ་འདས་གྲོངས་སུ་ཕྱིན་ཡོད་འདུག ཁོང་འདས་གྲོངས་སུ་ཕྱིན་པའི་གནས་ཚུལ་གྱིས་འཛམ་གླིང་གི་སྒྱུ་རྩལ་ལས་རིགས་ཀྱི་ཆེད་ལས་པ་ཙམ་མིན་པར། པར་རིས་རྟོག་སྒྲུང་གི་ཤུགས་རྐྱེན་འོག་འཚར་ལོངས་བྱུང་བའི་ཕོ་མོ་རྒན་གཞོན་མང་པོས་མྱ་ངན་ཞུ་ཡི་ཡོད་འདུག

སི་ཊན་ལི་གྲོངས་པའི་གནས་ཚུལ་ཐོས་མ་ཐག་ཁོང་གི་རྟོག་སྒྲུང་ཨ་རིའི་དེད་དཔོན་(Captain American)གྱི་འཁྲབ་སྟོན་པ་གཙོ་བོ་ཁི་རི་སི་ཨི་ཧྦན་སི་(Chris Evans)ཡིས་སྒེར་གྱི་ཊུའེ་ཊར་ཐོག སི་ཊན་ལི་འདྲ་བའི་མི་ཞིག་བྱུང་མི་སྲིད་པ་དང་། ཁོང་གིས་ལོ་ངོ་དུ་མའི་རིང་ཕོ་མོ་རྒན་གཞོན་མང་པོར་སྤྲོ་སེང་དང། བྲོས་བྱོལ། བདེ་སྣང་། གདེང་སྤོབས། སྐུལ་འདེད། སྙིང་སྟོབས། གྲོགས་འདྲིས། སྤྲོ་སྣང་བཅས་བྱིན་ཡོད་པས། ཁོང་གི་བརྩེ་འདང་གིས་མི་མང་པོའི་འཚོ་བར་ཤུགས་རྐྱེན་ཟབ་མོ་སྤྲད་པ་དེ་གསུབ་ཐབས་མེད་པ་ཞིག་རེད། ཅེས་བརྗོད་ཡོད་པ་དང་། ཡང་ལཱི་པཱོ་གློག་བརྙན་སྤྱི་གཉེར་ཁང་(Lee Pow Entertainment)གི་འགན་འཛིན་ཤཱན་ཌ་ཧྥི་(Shane Duffy)ཡིས། སི་ཊན་ལི་ཡིས་འཇིག་རྟེན་ཁམས་འདིར་མི་ཤོང་བའི་རྟོག་སྒྲུང་གི་མི་སྣ་མང་པོ་ཞིག་བཞེངས་བསྐྲུན་བྱས་པ་དེས། ཁོང་ནི་རིག་གནས་དེའི་གཙོ་མི་ཡིན་པ་མཚོན་ཐུབ་ཅེས་བསྟོད་བསྔགས་བྱས་ཡོད་ལ། དེ་བཞིན་མི་མང་པོས་སྤྱི་ཚོགས་དྲ་ལམ་ཁག་ནང་ཁོང་གི་རྟོག་སྒྲུང་གིས་རང་གི་མི་ཚེར་སྐུལ་འདེད་དང་འགྱུར་བ་ཇི་བྱུང་གི་བསམ་ཚུལ་དང་གདུང་སེམས་མཉམ་སྐྱེད་ཀྱི་གྱེས་ཚིག་འབུལ་གྱི་འདུགསི་ཊན་ལི་ནི་ཕྱི་ལོ་ ༡༩༢༢ ལོར་ཨ་རིའི་རྒྱལ་ས་ནིའུ་ཡོག་ཏུ་ཇིའུ་རིགས་སུ་སྐྱེས་ཡོད་པ་དང་། སློབ་མཐར་སོན་རྗེས་ཕྱི་ལོ་ ༡༩༣༩ ལོར་ཏཱམ་ལི་ཀོ་མིག་(Timely Comics)ཞེས་པའི་པར་རིས་རྟོག་སྒྲུང་བཟོ་བསྐྲུན་ཁང་ཞིག་གི་ནང་རྩོམ་པ་པོ་དང་། རྩོམ་སྒྲིག་པ། རི་མོ་བའི་ལས་གནས་སུ་ཞུགས་ཡོད་ཀྱང་། རིང་པོར་མ་འགོར་བར་རང་གི་ཐོན་འབྲས་ལ་ཡིད་མ་ཚིམས་པའི་རྐྱེན་གྱིས་ལས་ཁུངས་དེ་ནས་ཐོན་རྩིས་བྱས་ཡོད་ཀྱང་། ཕྱི་ལོ་ ༡༩༦༠ ལོའི་ལོ་མགོ་ཙམ་ནས་སྐབས་དེའི་སྐད་གྲགས་ཆོད་པའི་ཌི་སི་རྟོག་སྒྲུང་བཟོ་བསྐྲུན་ཁང་(DC Comics)གི་ཁ་གཏད་དུ་རྟོག་སྒྲུང་གི་མི་སྣ་གསར་པ་བཞེངས་བསྐྲུན་བྱེད་རྒྱུའི་ལས་གཞི་གསར་པ་ཞིག་སླེབས་པར་བརྟེན། སྐབས་དེའི་རྟོག་སྒྲུང་སྒྱུ་རྩལ་པ་ཇེག་ཀིར་བྷི་(Jack Kirby)དང་སི་ཊིབ་ཌི་ཀོ་(Steve Ditko)གཉིས་ལ་མཉམ་འབྲེལ་ཐོག་མི་ཚུལ་ལས་བརྒལ་བའི་དཔའ་པོའི་(Superhero)སྣང་བརྙན་བཞེངས་སྐྲུན་བྱེད་མགོ་བརྩམས་ཡོད་པ་དང་། ལོ་དེ་རང་ལ་སྟོབས་པོ་ཆེ་བཞི་(Fantastic Four)ཞེས་པའི་རྟོག་སྒྲུང་གྲགས་ཅན་དེ་འགྲེམ་སྤེལ་བྱས་ཏེ། ཏཱམ་ལི་ཀོ་མིག་ལ་ཚོང་འགྲེམ་སོགས་ཀྱི་ཐོག་ནས་རྒྱལ་ཁ་ཆེན་པོ་ཐོབ། སི་ཊན་ལི་ཡིས་ཕྱིར་དྲན་བྱས་ཞོར་དེ་དུས་ངའི་ལག་ལ་ལས་གཞི་དེ་བསླེབས་མེད་ན། ངས་མུ་མཐུད་རྟོག་སྒྲུང་ཆུང་ཙག་རིགས་འབྲི་བསྡད་ཡོད་སྲིད། ཅེས་བརྗོད་ཡོད་པ་རེད།སི་ཊན་ལི་ཡིས་ལས་གཞི་དེ་མགོ་བརྩམས་ནས་རིམ་པས་མིའི་འཚོ་བ་དང་ཐག་ཉེ་ཞིང་། རྒྱུན་ལྡན་གྱི་སྤྱི་ཚོགས་ཁྲོད་ཀྱི་དཀའ་སྡུག་གཞིར་བཞག་པའི་རྟོག་སྒྲུང་གི་མི་སྣ་བཞེངས་སྐྲུན་བྱེད་མགོ་བརྩམས་པ་དེས་ཀློག་པ་པོ་མང་པོ་ཡིད་དབང་འཕྲོག སྐབས་དེའི་ན་གཞོན་རྟོག་སྒྲུང་ཀློག་པ་པོ་རྣམས་ལ་མཚོན་ན། སི་ཊན་ལི་ཡིས་བཞེངས་སྐྲུན་བྱས་པའི་མཐོ་སློབ་ནས་མཐར་སོན་ཏེ་ལས་ཀར་ཞུགས་མ་ཐག་པའི་ན་གཞོན་ཞིག་སྡོམ་འབུས་སོ་བརྒྱབ་ལ་བརྟེན་ནས་སྡོམ་འབུའི་ཁྱད་ཆོས་ཐོབ་པའི་སྡོམ་འབུའི་མི་(Spider-man)དུ་གྱུར་བ་དང་། རྫས་འགྱུར་ཕོག་པའི་རྐྱེན་གྱིས་མདོག་ལྗང་ཞིང་གཟུགས་སྟོབས་ཆེན་པོར་གྱུར་བའི་མི་བོ་ཆེ(Hulk)། དེ་བཞིན་རང་ཉིད་ཀྱི་ལུས་ཡོངས་རྫོགས་ནུས་སྟོབས་ཆེ་བའི་ལྕགས་གོས་ཀྱིས་བཏུམ་ཞིང་འཕུར་བ་སོགས་མི་ལས་ཚད་བརྒལ་གྱི་སྟོབས་ཤུགས་ལྡན་པའི་ལྕགས་མི་(Iron man)། ལག་ལ་ནུས་མཐུ་ཆེ་བའི་ཐོ་བ་བཟུང་ཞིང་འཕུར་ནུས་ཡོད་པའི་ཡི་ཤུའི་ལྷ་སྒྲུང་ནང་གི་མི་སྣ་ཐཱོར་(Thor) བཅས་ནི་སྤྲོ་སྣང་དང་། སྙིང་སྟོབས། དངོས་ཡོད་འཚོ་བ། བདེན་པ་སོགས་ཀྱི་མཚོན་དོན་ལྟ་བུར་གྱུར་ཡོད་པ་དང་། ཏཱམ་ལི་ཀོ་མིག་དེ་རིམ་པས་དེང་སང་སྐད་གྲགས་ཡོད་པའི་མཱར་ཝལ་པར་རིས་རྟོག་སྒྲུང་(Marvel Comics)ཞེས་པར་བསྒྱུར་ཡོད་པ་དང་།  པར་རིས་རྟོག་སྒྲུང་ཁང་དེས་པར་རིས་རྟོག་སྒྲུང་གི་དཔེ་དེབ་ས་ཡ་ ༥༠ ལྷག་འགྲེམ་སྤེལ་བྱས་ཐུབ་ཡོད་པ་དང་། སི་ཊན་ལི་ཡི་པར་རིས་རྟོག་སྒྲུང་རྣམས་ཕྱི་ལོ་ ༡༩༨༩ ནས་གློག་བརྙན་དུ་ཕབ་མགོ་བརྩམས་ཏེ། ད་བར་པར་རིས་རྟོག་སྒྲུང་ ༣༠ ལས་མང་བ་གློག་བརྙན་དུ་ཕབ་ཟིན་པ་དང་། ཕལ་ཆེ་བས་ཨ་སྒོར་ས་ཡ་མང་པོའི་ཁེ་ཕན་བསྐྲུན་ཐུབ་ཡོད་པ་དང་། གློག་བརྙན་མི་ཉུང་བ་ཞིག་གི་ནང་རང་ཉིད་མི་སྣ་ཕལ་བའི་ངོ་བོར་འཁྲབ་སྟོན་ཡང་བྱས་ཡོད་འདུག

ཕྱི་ལོ་ ༡༩༧༢ ལོར་ས་ཊན་ལི་ལགས་མཱར་ཝལ་པར་རིས་རྟོག་སྒྲུང་གི་རྩོམ་སྒྲིག་ཚན་པའི་འགན་འཛིན་དུ་བསྐོ་བཞག་བྱས་ཏེ། མུ་མཐུད་པར་རིས་རྟོག་སྒྲུང་གི་འཇིག་རྟེན་བསྐྲུན་རྒྱུར་ཞུགས་ཡོད་པ་དང་། ཁོང་གི་བུ་མོ་ཇེ་སི་ལི་(JC Lee)ཡིས་ཁོང་གིས་རང་ལ་དགའ་མོས་བྱེད་མཁན་ཚོའི་ཆེད་དུ་པར་རིས་རྟོག་སྒྲུང་འབྲི་རྒྱུ་དེ་འོས་འགན་ཞིག་ཏུ་རྩི་ཡི་ཡོད། ཅེས་བརྗོད་ཡོད་པ་དང་། ཁོང་ལ་ཕྱི་ལོ་ ༢༠༠༨ ལོར་ཨ་རིའི་གཞུང་གི་སྒྱུ་རྩལ་ལས་རིགས་ཐོག་གི་གཟེངས་རྟགས་མཐོ་ཤོས་རྒྱལ་ཡོངས་སྒྱུ་རྩལ་གཟེངས་རྟགས་ཐོབ་པ་སོགས་འཛམ་གླིང་གི་གཟེངས་རྟགས་མང་པོ་ཞིག་ཐོབ་ཡོད་པ་དང་། ཁོང་གིས་པར་རིས་རྟོག་སྒྲུང་གི་ལས་རིགས་ལས་བརྒལ་ནས་ཤེས་ཡོན་སོགས་ཀྱི་ཐད་ལའང་དཀའ་ལས་བརྒྱབས་ཏེ་གྲུབ་འབྲས་ཆེན་པོ་ཐོན་ཡོད་འདུག

གསར་འགོད་པ། པ་སངས་ཚེ་རིང་།

The post པར་རིས་རྟོག་སྒྲུང་རྩོམ་པ་པོ་གྲགས་ཅན་སི་ཊན་ལི་འདས་གྲོངས་སུ་ཕྱིན། appeared first on བོད་ཀྱི་དུས་བབ།.